Kañaam 12
12
Uţup wi Nawat Kabuka ţi pŧoof pi bado buţaan
1Kayeeh ki pñaamarën Naşibaţi ki kapënna ţi ulibra wi najukan iyeeh. Kaji kayeehna na bko banwooŋ na ital bakreŋ. Kayeeh ki Dayiţ.
2Iwi Yawe Nawat Kabuka, buuraanun, bañaaŋ banjaaŋ baŧiinku babaa,
bañaaŋ banjaaŋ baţup uţup unjoonanuŋ babaa.
3Andoli aji ţup aŧënţul ŋţilan
kawo na kaguuru ţi mntum
kawo na ŋşal ŋtëb.
4Iwi Nawat Kabuka ŧokan banwooŋ na kaguuru ţi mntum,
falan pndemënt pankhompuŋ.
5Ŧokan banjakuŋ aji :
« Ŋluŋ kawat na pndemënt pi nun ;
ŋka mntum mi nun ;
in akşihuŋ un keeri ? »
6Bajuuk biki bakhajanuŋ,
na bawaaŋ banknţëgiiŋ,
bakaaŋ kë iwi Nawat Kabuka iţiini aji :
dnaţa, abuuran ñaaŋ i bawuukuŋ atot.
7Iwi Nawat Kabuka, ŋţup ŋi nu ŋawo ŋţup ŋanwooŋ ŋjinţ piş,
ŋawo ji unŧaam umpënnuŋ ţi mboş
anaj ŋyaaş paaj na uloŋ ajinţan.
8Iwi Nawat Kabuka, iluŋ kayeŋan baka,
iluŋ kabuuranun ţi bañaaŋ bawuţaan mënţ te mnţo.
9Bañaaŋ bawuţaan mënţ bañaay na dko, ala pwinana.
Kë iko iwuţaan maakan işë dëma dëm pya ţi dko.
S'ha seleccionat:
Kañaam 12: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal