Ujuni 18
18
Bayaanţ bawajanţ
1Unuur uloŋ Abraham aţo ţi plëman pi kaloona ki nul du mnko mnweek mi Mambre wi unuur udiŋuŋ, kë Yawe Nawat Kabuka aşë pën awinana ţi kadun ki nul. 2Abraham akat këş, aşë win biinţ bawajanţ kë banaţ du kadunul. Wi awinaŋ win baka, aţiina du plëman pi kaloona, aya yit na baka ajot afëţ kaara ţi mboş adëman baka, 3aşë ji na aloŋ ţi baka : « Naweek, dkooţu kooţ, pantan ţi katoh ki nalemparu, idole haŋ kalilan. 4Yoonkaan ddo baţijan meel, nañow ihoţ naşë naţo nanoorfën ţi bko bi uţeeh. 5Dya kaţijan kapoom nade, naţiişan ŋleef, nabaa naţëp wi nabiiŋ te ţi katoh ki nalemparan. »
Kë başë aŧeema aji : « Aa, dolan jibi ijakuŋ. »
6Abraham amint wal mënţ aya du kaloona meeţ di Ŧaara awooŋ, aşë ji na a : « Ŧaraan ijej pşon pnuura pankëşuŋ, inag ijuŋ ipoom. » 7Wi wi Abraham aşaaŋ amint aya du batani ajej ubay unuura, awul wa nalemparul kë ajuŋ aŧaran. 8Ajej mntow mnaţ na mntow mnjiilu na ubay wi babomanuŋ wuŋ abëkan iko mënţ bŧi ţi kadun ki baka. Anaţ añog baka du pţeef pi bko kë başë de.
9Bahepara aji : « Ŧaara aharu awo ţuŋ ba ? »
Kë aŧeem aji : « Awo du kaloona meeţ. »
10Kë nayaanţ aşë ji na a : « Dluŋ kabi ţi pkili ţi wal wi ; uţënk wal mënţ Ŧaara aharu abuk napoţ ñiinţ. »
Ŧaara awo du plëman pi kaloona, du kafeţ ki nayaanţ aŧiink. 11Bi Abraham na Ŧaara bado bi wo wo baweek, kë Ŧaara akak aţañan kañowa. 12Hënk, kë Ŧaara aşë ji ţi uşalul, amuujan. Aşal aji : « Hënkuŋ wi ndooŋ aţaf, kabaa kawinar na ñiinţ naan ! Kë ajug katoh naan abot awo naţaf ! »
13Kë Nawat Kabuka aşë ji na Abraham : « We ukaaŋ kë Ŧaara ajii ba, aşal aji aanhinan kabuk wi adooŋ abi ţaf ţaf ? 14We wi Nawat Kabuka awooŋ aanhinan pdo ? Pkili, ţi wal wi, dkak ţi katohu, uţënk wal mënţ Ŧaara abuk napoţ ñiinţ. »
15Ŧaara apok aji : « Mënjii » ţiki alënki, kë Nawat Kabuka aŧeema aji : « Ijii. »
Abraham aţiiniir Ŧodom
16Biinţ banaţa aŧool pya, aten ubeeka wi Ŧodom. Kë Abraham aşë ñooţan baka. 17Yawe Nawat Kabuka aji ţi uşalul : « Dwo i kamen Abraham uko wi nji kadoluŋ i ? 18Ul ankbukuŋ pntaali pŧum pankkaaŋ mnhina, kabot kaţu nwul kntaali ki mboş bŧi bnuura. 19Ddata ahilna ado babukul na biki katohul bado kaţaş bgah bi naan, kado uko wi nŋaluŋ na uko unwooŋ uŧool ţi këş ki naan. Hënk, nşë ndo pa a uko wi mbiiŋ ahoŋa. »
20Wi wi Nawat Kabuka aşaaŋ aji : « Batapar biki Ŧodom na Gomora iko iwuţaan maakan, pjuban pi baka padëm maakan. 21Dya da katen me uko wi bataparuŋ baka uwoha manjoonan, woli uunwo, kame. »
22Batëb ţi biinţ bukuŋ bapënna da, aşë ya Ŧodom. Kë Abraham ahum nnaţ ţi kadun ki Nawat Kabuka. 23Abi añog aşë ji na a : « Na manjoonan, ifiŋ baŧool kanaakrën na bado buţaan i ? 24Ulome bañaaŋ iñeen kañeen baŧool bawo ţi ubeeka ? Ifiŋ bañaaŋ biki ubeeka bŧi i ? Kë bañaaŋ iñeen-kañeen baŧool banwooŋ ţi ubeeka, baankdo imiir wa i ? 25A-a, iinkdo uko uŧënţ waŋ, kado naŧool akeţ na nado buţaan. Naŧool awo wo ji nado buţaan. Iinkdo uko uŧënţ waŋ. Kë iwi nawayëş umundu bŧi ido uko unwooŋ uŧool di. »
26Kë Nawat Kabuka aŧeema aji : « Woli dţënk du Ŧodom bañaaŋ baŧool iñeen-kañeen, katen ţi baka kamiir ubeeka bŧi. »
27Kë akak aţiini na a aji : « Nji nwooŋ pdëpalën na ufob, dñoomuŋ aţiini na Ajugun. 28Ulome bañaaŋ kañeen baţaaŋëş ţi baŧool iñeen-kañeen bukuŋ : Bañaaŋ kañeen bampënuŋ bukuŋ baţu iŧok ubeeka bŧi i ? »
Kë aŧeem aji : « Woli dţënk da bañaaŋ iñeen ŋbaakër na bañaaŋ kañeen mënkŧok ubeeka. »
29Abraham akak aţiini ji uŧeek aji : « Ulome bawoha iñeen-ŋbaakër ? »
Kë aŧeem aji : « Bañaaŋ iñeen ŋbaakër mënţ baţu mënkŧok ubeeka. »
30Kë akak aji : « Ajugun awutan kadeebaţ akaan awutën nţup : Bahinan kawo iñeen-ŋwajanţ. »
Kë aŧeem aji na a : « Mënkŧok ubeeka woli dţënk da bañaaŋ iñeen ŋwajanţ baŧool. »
31Abraham akak aji : « Miiran, wi nkaaŋ añoom aţiini na Ajugun : Bahinan kawo iñeen-ŋtëb. »
Kë aŧeem aji : « Bañaaŋ iñeen ŋtëb bukuŋ baţu mënkŧok ubeeka. »
32Kë aji : « Ajugun awutan kadeebaţ, dkak aţiini ubaañşaani : Bahinan kawo iñeen. »
Kë aŧeem aji : « Bañaaŋ iñeen bukuŋ bado kë mënkŧok ubeeka bŧi. »
33Wi Nawat Kabuka abaaŋ pţiini na Abraham aşë ya, kë Abraham aţiiş katohul.
S'ha seleccionat:
Ujuni 18: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal