Ppën 9
9
Kakob kañeenanţën : Pkeţ pi ŋnŧaam
1 Yawe Nawat Kabuka aji na Moyiŧ : « Yaan du Farawuna ijaka, Nawat Kabuka Naşibaţi i bahebërë bajaaŋ badëman ajakuŋ : “Wutan pntaali pi naan paya padëmanaan. 2Ipokle pwutan pa akak amëban pa kak, 3Nawat Kabuka kakob itani yi nu inwooŋ du pşaar na kañen ki nul, kaţu ŋmpëlënŧ na ŋbuuru, na ŋnŧaam ŋi pnkunkaali, ŋgit, ŋkaneel na ŋpi bkeţan bweek. 4Kë Nawat Kabuka aşë apaţëş itani yi biki Iŧrayel na yi biki Ejiptu, kë nin unŧaam uunkkeţ ţi ŋi biki Iŧrayel.” »
5Nawat Kabuka aţu unuur wi akdoluŋ uko mënţ ţi uŧaak, aji uwo faan. 6Wi unuur ujinţuŋ Nawat Kabuka ado uko wi ajakuŋ, akob itani, kë yi biki Ejiptu bŧi ikeţi, kë ţi yi biki Iŧrayel bŧi, nin unŧaam uundoo keţ keţ.
7Farawuna ado bañaaŋ kë baya ten uko unţëpuŋ kë babi aţupa kë nin unŧaam uloŋ ţi itani yi biki Iŧrayel uundoo keţ keţ. Kë uhaaş wi Farawuna uşë dënëţaara dënëţ kë apok pwutan bañaaŋ biki Iŧrayel baya.
Kakob kapaajanţën : Ŋwur ŋankakuŋ ŋjad
8 Yawe Nawat Kabuka aji na Moyiŧ na Aaron : « Nabëñan ufob wi pteet naŧuman iñen, Moyiŧ aya afël wa ţi kadun ki Farawuna. 9Ukak pdëpalën kaniink uŧaak wi Ejiptu bŧi. Paţu bañaaŋ na ŋnŧaam bŧi ţi Ejiptu bawo na ŋwuur ŋankyaaŋ kadoo kakak ŋjad. » 10Bajej ufob wi pteet aya anaţ ţi kadun ki Farawuna ; kë Moyiŧ ajej ufob afël kë bañaaŋ bawo na ŋwuur ŋankakuŋ ŋjad. 11Bado dayaamu baanhil kaya kanaţ du kadun ki Moyiŧ ţiki bawo na ŋjad ţi uleef bŧi ji bañaaŋ biki Ejiptu bŧi. 12Nawat Kabuka ado kë uhaaş wi Farawuna udënëţ kë aanŧiink baka jibi Nawat Kabuka abiiŋ aji na Moyiŧ.
Kakob kaţënk paaj na kaloŋ : Uşubal wi mpoj
13 Yawe Nawat Kabuka aji na Moyiŧ : « Naţiin na nfa kub iya inaţ du kadun ki Farawuna. Jakana, Nawat Kabuka Naşibaţi i bahebërë bajaaŋ badëman aţiini aji : “Wutaan pntaali pi naan paya padëmanaan. 14Ipokle, byaaş bi, kadolu iko itam iŧum iwi ţi uleefu na banjaaŋ baţënku pşih na bañaaŋ biki uŧaaku imeena kë uunka nin aloŋ annaami na nji ţi mboş. 15Woli ddeeŋ lah kañen akoban na pmaak pi pkeţ, iwi na pntaali pi nu, nawetana ţi mboş. 16Kë uko unkaaŋ kë nwutu uwo kë dŋal pyuuju mnhina mi naan, katim naan kahilna kameeţana ţi umundu bŧi. 17Idiik apok pwutan pntaali pi naan paya. 18Faan na kawoori ki keeri, ddo uşubal wi mpoj udëm maakan, jibi uwooŋ uumbaaŋ kawohaara ţi Ejiptu kapënna unuur wi dapaşnaaniiŋ te wi nţa wi. 19Kë hënkuŋ, doon baneejan itani yi nu du impen na uko wi ikaaŋ bŧi kë uwo du uţeeh. Uko bŧi unwooŋ du uţeeh awo uunţiişi, uwole ñaaŋ këme unŧaam, mpoj kajotna wa ukeţ.” »
20Banfiyaaruŋ uţup wi Nawat Kabuka ţi banjaaŋ baţënk Farawuna pşih baŧaran ado kë balempar baka kë baţiişi abot aneejan ŋnŧaam du itoh. 21Kë banwooŋ baanfiyaar uţup wi nul bawut du ŋţeeh balempar baka na ŋnŧaam ŋi baka.
22Nawat Kabuka aji na Moyiŧ : « Deeŋan kañen du baţi, uşubal wi mpoj uşë ujot ţi uŧaak wi Ejiptu bŧi, ujot ţi bañaaŋ, ţi ŋnŧaam, na ţi ujaagal bŧi ţi uŧaak wi Ejiptu. » 23Moyiŧ adeeŋ pmul pi nul du baţi kë Nawat Kabuka aşë do kë imparantant iŧiinkanaa, mpoj manjoti, kë imparantant ikak ajot ţi mboş. Kë Nawat Kabuka ado kë mpoj mankşub ţi Ejiptu. 24Iliik liik ipën ţi uşubal wi mpoj wuŋ. Uşubal wi mpoj udëm pdëm paŋ ; uloŋ uŧënţ wuŋ uumbaaŋ kawoha wi uŧaak wi Ejiptu uwoonuŋ. 25Mpoj manjotna uko bŧi unwooŋ du uţeeh du Ejiptu kajunna du bañaaŋ te du ŋnŧaam. Mankak ajotna ujaagal bŧi wi uţeeh awat mnko abot akit ma. 26Dko di Goşen di biki Iŧrayel bawooŋ dul di manwooŋ maanjoti.
27Farawuna ado kë badu Moyiŧ na Aaron aşë ji na baka : « Ţi byaaş bi, djubani ; Nawat Kabuka awooŋ naŧool, kë nji na pntaali pi naan ŋşë duknaana. 28Nañehandëraan Nawat Kabuka aţañan imparantant na mpoj, dwutanan naya mënkak amëbanan. »
29Moyiŧ aŧeema aji : « Woli dpën ţi ubeeka kadeeŋ iñen du Nawat Kabuka kañehan imparantant kţañ, mpoj mambot manţañ ihilna ime kë Nawat Kabuka awooŋ ajug mboş. 30Kë nşë me bnuura iwi, na banjaaŋ baţënku pşih, naandobi kaţi Nawat Kabuka kado uko wi ajakuŋ. »
31Mngof manaamuŋ na bmuuţ na mannaamuŋ na umaanan mankeţi. 32Kë ŋdeey ŋloŋ ŋaşë wo ŋaanŧokaa ţiki ŋaji ŋajon ude.
33Moyiŧ apën du uko Farawuna, apën ţi ubeeka, aşë deeŋ iñen du Nawat Kabuka añehana, kë imparantant na mpoj ibot aţañan kë uşubal uţañan pşub. 34Wi Farawuna awinuŋ kë uşubal, mpoj na imparantant iţañi, kë aşë mëbanaara ţi pjuban pi nul, adënëm. Banjaaŋ baţënka pşih badoo kak ji a. 35Adiik apok pwut biki Iŧrayel baya jibi Nawat Kabuka abiiŋ aţëpna ţi Moyiŧ aţup.
S'ha seleccionat:
Ppën 9: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal