Ppën 3
3
Moyiŧ na bgof bankyikuŋ
1Moyiŧ akak hënkuŋ ayafan ŋkaneel na ŋpi ŋi Yetro ayootanul naţeŋan i uŧaak wi Madiyan. Unuur uloŋ wi añooţuŋ batani aţëp pndiiş, aşë ban du pnkuŋ pweek pi Naşibaţi, pi bajaaŋ badu Horeb#3.1 Horeb : Bakak aji badu pnkuŋ mënţ Ŧinayi. . 2Ţi dko mënţan duŋ di di uwanjuŧ wi Yawe Nawat Kabuka upënuŋ awinana ţi kadunul ţi kandemënt ki bdoo awo ţi bgof bloŋ meeţ. Moyiŧ awin bgof banwooŋ na bdoo aşë wo baankyik, 3aşë aji : « Yoonkan ññog nya nten uko uñoŋarënaan wi bnuura, nten uko unkayi kë bgof baankyik. »
4Nawat Kabuka awin kë akñog pya katen, aşë duuna du bgof meeţ aji : « Moyiŧ, Moyiŧ ! »
Kë aŧeem aji : « Nji wi. »
5Kë aji na a : « Wutan kañog. Wohşën işapaat yi nu, ţiki dko di inaţuŋ duŋ dayimani. 6Nji dwooŋ Naşibaţi i şaaş ajaaŋ adëman, Naşibaţi i Abraham, i Iŧaak na i Yakob bajaaŋ badëman. » Wal mënţ kë Moyiŧ aşë gur kaara di ŧul ţiki aţi pten Naşibaţi.
7Kë Nawat Kabuka aşë kak aji na a : « Dwin bnuura jibi bakhajani pntaali pi naan du Ejiptu ; dŧiink baka kë bakwooni wi bakhajanuŋ baka. Aa, dme mnhaj mi baka. 8Dbi bi ppënan baka kabuuran baka ţi iñeen yi bañaaŋ biki Ejiptu bankhajanuŋ baka, kañooţ baka du uŧaak uloŋ unnuuriiŋ abot adëm, uŧaak unŧumi mntow na mnob, uŧaak wi bañaaŋ biki Kanaan na bahitit na bahamorit na baperiŧit, wi bahiwit na bayebuŧit bafëţuŋ. 9Jibi nŧiinkuŋ ŋwooni ŋi bañaaŋ biki Iŧrayel kë ŋaban ţi nji abot awin jibi bañaaŋ biki Ejiptu bakhajanuŋ baka, 10dyilu hënkuŋ du Farawuna. Yaan, ipënan bañaaŋ biki Iŧrayel, pntaali pi naan, du Ejiptu. »
11Kë Moyiŧ aşë ji na Naşibaţi : « Nji, dwo in, adoo hilan kaya du Farawuna kapënan bañaaŋ biki Iŧrayel du Ejiptu ? »
12Kë aşë ŧeema aji : « Dwo na iwi. Dţupu uko wi kayuujnu kë nji ţi uleef naan dyiliiŋ : woli iluŋ apënan bañaaŋ biki Iŧrayel du Ejiptu, naluŋ kadëmanaanën ţi pnkuŋ pi. »
13Kë aşë ji na a : « Woli dya du bañaaŋ biki Iŧrayel aji na baka “Naşibaţi i başinan bajaaŋ badëman ayilën ţi an” kë başë ŧeemën aji “Katimul kawo hum ba ?” Hum di di nji kaŧeemuŋ baka ? »
14Kë Naşibaţi aŧeem aji : « NJI DWOOŊ ANWOOŊ. Uko wi ikŧeemuŋ bañaaŋ biki Iŧrayel wii wi, jakan na baka : “ANWOOŊ ayilnuŋ ţi an.” »
15Naşibaţi akak aji na Moyiŧ : « Jakan na bañaaŋ biki Iŧrayel kë Nawat Kabuka, Naşibaţi i başinan bajaaŋ badëman, Naşibaţi i Abraham, i Iŧaak na Yakob ayiliiŋ ţi baka. Katim naan ki kaŋ te mnţo, katim ki bañaaŋ biki ŋwal bŧi bakdooŋ kadëmanaanën.
16« Yaan hënkuŋ, idu bantohi biki Iŧrayel, iji na baka Nawat Kabuka, Naşibaţi i Abraham, i Iŧaak na Yakob apën awinana ţi kadunu aji : “Dten uko wi nan du Ejiptu, awin uko wi bakdolanaŋ da. 17Kë nşë hoŋ aji dpënanan ţi mnhaj du Ejiptu kañooţan du uŧaak wi bañaaŋ biki Kanaan, bahitit na bahamorit, wi baperiŧit na bahiwit na bayebuŧit bafëţuŋ, uŧaak unŧumi mntow na mnob.”
18« Bantohi biki Iŧrayel baya kaŧiinku. Hënk iya na baka du naşih i Ejiptu, naya kajaka : “Nawat Kabuka Naşibaţi i bahebërë adiimanun bkowul. Wutun ŋya du pndiiş ŋya dko di ŋkpoşari ŋnuur ŋwajanţ ŋya ŋdola bţeŋan.”
« 19Dme bnuura kë naşih i Ejiptu aankwutan naya bë mënţ uko uloŋ uweek ukţu'uluŋ adinan. 20Ukaaŋ kë nji kaluŋ kadeeŋ kañen kado iko iñoŋarënaan iŧum kakob bañaaŋ biki Ejiptu. Woli ddo iko mënţ, awutanan naya. 21Dluŋ kado bañaaŋ biki Ejiptu baŧaŋ ţi uko wi nan, hënk naankya iñen ijinţ. 22Ñaaţ i Iŧrayel andoli aheparan ñaaţ i Ejiptu anwooŋ akinţul na anwooŋ ţi katohul wuuru na unŧaam na iko yi nakluŋ kawoharën babukan biinţ na baaţ. Hënk naluŋ kaduk biki Ejiptu bajinţ. »
S'ha seleccionat:
Ppën 3: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal