Ppën 18
18
Byit bi Yetro na Moyiŧ
1Yetro, naţeŋan i uŧaak wi Madiyan, ayootan Moyiŧ aŧiink iko bŧi yi Naşibaţi adoluŋ Moyiŧ na Iŧrayel pntaali pi nul : Aŧiink jibi Yawe Nawat Kabuka apënandëri biki Iŧrayel du Ejiptu. 2Yetro abi yeenk Ŧipora ahar Moyiŧ du katohul wi Moyiŧ aţiişanuŋ aharul, 3ayeenka ul na babukul batëb. Moyiŧ abi ji : « Dwo nayaanţ ţi uŧaak wi. » Ukaaŋ kë aţu aloŋ ţi babukul katim ki Gerşom#18.3 Gerşom : Ţi uhebërë daţu kanaam kaŧiinkare na nayaanţ ţi.. 4Akak aji : « Naşibaţi i paapa ajaaŋ adëman abi aţënkën, ul abuuranaanuŋ kakej ki Farawuna. » Ukaaŋ kë aţu natëbanţën katim ki Eliyeŧer#18.4 Eliyeŧer dawo Naşibaţi aţënkën..
5Yetro ayootan Moyiŧ ajej ahar Moyiŧ na babukul, aya du Moyiŧ du pndiiş pankabuŋ du pnkuŋ pweek pi Naşibaţi di atanuŋ kaloona ki nul. 6Yetro ado kë baji na Moyiŧ : « Nji ayootanu, dbi pwinu na aharu na babuku batëb. » 7Moyiŧ apën abi akita, aŋup ţi kadunul, aboota, kë wi bawuladuŋ mboş aba, baya du kaloona ki Moyiŧ. 8Moyiŧ akakalëş ayootanul iko bŧi yi Nawat Kabuka adoluŋ Farawuna na bañaaŋ biki Ejiptu abuuranaan Iŧrayel. Aţupa kak unoor bŧi wi bakaaŋ ţi bgah, na jibi apënanuŋ baka ţi wa. 9Yetro alilandër iko inuura bŧi yi Nawat Kabuka adoluŋ bañaaŋ biki Iŧrayel, wi abuuranuŋ baka ţi bañaaŋ biki Ejiptu. 10Aţiini wal mënţ aji : « Ddëman Nawat Kabuka ambuurananaŋ ţi bañaaŋ biki Ejiptu na ţi iñen yi Farawuna, ambuuranuŋ pntaali pi nul pjuuk du Ejiptu. 11Hënkuŋ dme kë Yawe adëm apel biki bajaaŋ banaamnţën na Naşibaţi bŧi, ţiki adiiman wa wi bakhajanuŋ biki Iŧrayel#18.11 ţiki adiiman wa wi bakhajanuŋ biki Iŧrayel : Uko umpiiŧuŋ ţi uhebërë ţi uunjinţi. » 12Wal mënţ Yetro afiŋar Nawat Kabuka unŧaam atër abot ado iţeŋan iloŋ. Aaron na bantohi biki Iŧrayel bŧi babi ade na ayootan Moyiŧ ţi kadun ki Naşibaţi.
Pjukan pi Yetro
13Wi nfa mambanuŋ, Moyiŧ aţo awayëş bañaaŋ biki Iŧrayel, kë bañaaŋ banaţ nfa te utaakal ayoonk awayëş baka. 14Wi ayootan Moyiŧ awinuŋ iko yi akdoluŋ bŧi pa bañaaŋ aji na a : « Wel wi ikdoluŋ hënk pa bañaaŋ ba ? Wel ukaaŋ kë ikwayëş iwi aloolan ţañ kë bañaaŋ başë ŧum ayoonk nfa te utaakal ? »
15Moyiŧ aŧeem ayootanul aji : « Bañaaŋ baji babi ţi nji pme uko wi Naşibaţi ajakuŋ ţi uko wi baka. 16Woli baka uhok baji babi ţi nji. Dji kawayëş baka kaţup baka uko wi Naşibaţi ajakuŋ na bgah bi ayuujuŋ. »
17Kë ayootanul aji : « Mënţ hënk di di iwooŋ kado ! 18Ilemp te kanoor, pntaali pi nu panoor, ţiki ulemp udëm maakan pa iwi, iinkhinan pdo wa aloolan. 19Hënkuŋ ŧiinkan uko wi nji kajukaniiŋ, dñehan Naşibaţi awo na iwi. Ulemp wi nu uwo pţupar pntaali pi nu ţi kadun ki Naşibaţi, iñooţa uhok wi baka. 20Jukaan baka uko wi Naşibaţi aţuuŋ pdo na bgah bi nul, jukaan baka uko wi bawooŋ kaţaş na jibi bawooŋ kawo. 21Kë işë wo kadat ţi pntaali bŧi bañaaŋ banhilanuŋ pwayëş, afiyaar Naşibaţi, aŋal manjoonan, biki bawooŋ baanhil pnug na nin uko uloŋ, ido baka bawo bawayëş biki pnŧuk pi bañaaŋ iñeen-week ŋyaaş iñeen (1 000) na biki bañaaŋ iñeen-week (100), iñeen kañeen (50), na iñeen (10). 22Bukal bakdooŋ kaţo ŋnuur bŧi kawayëş bañaaŋ bankaaŋ uhok. Woli uko uwo uweek, baţiju kwayëş ; kë woli iko impoţi ya, bawayëş bdidi baka. Hënk, ulempu uunkŧum maakan, bafaaşër wa na iwi uşë uwiiş. 23Woli ido haŋ kë uwo uko wi Naşibaţi ajakiiŋ ido, khil kanoorfën, bañaaŋ bŧi kaŧiinkar kaţiiş itoh yi baka. »
24Moyiŧ aŧiink Yetro ayootanul ado iko bŧi yi ajakuŋ. 25Adat ţi Iŧrayel bŧi bañaaŋ banhilanuŋ pwayëş, aţu baka ţi kadun ki pntaali kë bawo bawayëş. Biki pnŧuk pi bañaaŋ iñeen-week ŋyaaş iñeen (1 000), biki pi iñeen-week, biki pi iñeen kañeen na biki iñeen. 26Baji bawayëş bañaaŋ ŋnuur bŧi ; woli uko uloŋ udëm pa baka, baji bawul Moyiŧ awayëş wa, woli uwo umpoţi, bawayëş bdidi baka. 27Hënk di di Moyiŧ awutanuŋ ayootanul kë aţiiş uŧaakul.
S'ha seleccionat:
Ppën 18: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal