Traducción bíblica: Toba © Sociedad Bíblica de Argentina, 2012 Grabación de Toba ℗ 2017 Hosanna

Toba Qom - 2012 Edition (NT) Non Drama

Toba Qom - 2012 Edition (NT) Drama

Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.

Qaq huo'o so na'a'q co'ollaq So Jesús huetaigui aso no'onaxanaxaqui late'erai da ỹapaxagueetac so shiỹaxauapi, qataq ỹa'axattac da no'on na'axaỹaxac. Nache nvireuo som nqueroxonecpi maye lataxala' na judiopi qataq nam ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq nam dapaxaguenataxaatapeguec na namaxasoxonaxacpi. Nache inattac Somaye, 'eeta':
–Ña qomi' 'aua'aqtaxanema, ¿hua'ague ca 'auachegoxota'ague ca 'ana'aqtac da huo'omshe 'auo'ot de'era? ¿Negue't ca 'am ỹami' da 'ara'añaxac da 'auo'ot de'era?
Nache So Jesús 'enapeco':
–Aỹem nataqa'en huo'o da inataxanaxac da qoñiita. ¿Chaq negue't ca ỹamaxalec co'ollaxa so Juan da dachelaxanataxan? ¿Ñim Lo'onatac 'Enauacna peta'a, huo'otaq ca choche shiỹaxaua?
Nache somayepi maiche ncotatega't, 'eeta':
–¿Chaq hua'ague ca shenaqtec? Da shenaqapec da nacheñi Ñim Lo'onatac 'Enauacna da ỹamaxalec, qaq Damaye ỹoqta qome da qomi' 'enapegalo, 'eeta': «Qalaq ¿ta'ainco' qone' ye sa qaua'amaqchiñi?» Qaq da huo'otaq shenaqapec da choche shiỹaxaua ca ỹamaxalec, qaq 'enauac na shiỹaxauapi ỹoqta qome da qomi' ỹasa'q na coma' da qomi' ỹalaua't, cha'aye ỹoqta 'eesa da na shiỹaxauapi ỹa'amaqten da so Juan, somaye la'aqtaxanaxanec Ñim Lo'onatac 'Enauacna.
Nache somayepi 'enapec da sa ỹaỹaten chaq negue't ca ỹamaxalec so Juan da dachelaxanataxan. Nache So Jesús 'enapeco':
–Aỹem nataqa'en sa saỹaten cam Aỹem ỹamaxalec da so'ot de'era.


Qaq co'ollaq ime, nache So Jesús da'aqtaxanem so shiỹaxauapi, nache ỹauo'o da daloqnaxana, 'eeta':
–Huo'o so ỹale ỹauo'o so lanaxanaqa' da ỹaañi ana uva. Qaq co'ollaq ime, nache ỹauo'o so naỹamaxate' 'onataxanaxaicpi da do'onataxaalec naqa'en se'eso lanaxanaqa'. Ime, nache taỹa ca lỹa 'alhua, nache huo'oi soua vi'iye da hueta'ague. Qaq co'ollaq ivita so laloqo' da qanqat ana ala na nañiguishec, nache namaq so lamaxashec da iỹaxanot som 'onataxanaxaicpi, da yaqto' qaicolaxateuga acam talec somaye. Qalaxaye so 'onataxanaxaicpi iuaxaatac se'eso namaxashec. Ime, nache ỹamaq qui'itchiguilo naqa'en naua lhua'q. Nache som lalamaxat se'eso nanaxanaqa' qaltaq namaq so lỹa lamaxashec. Qalaxaye, nataqa'en somaye qaisheueetac qataq qaiuaxaatac, qataq saishet da huo'o ca qoỹami'. Ime, qaltaq ỹe'eguelaxalec da namaq so lỹa lamaxashec, qalaxaye som 'onataxanaxaicpi nataqa'en ique'emaqchet somaye qataq ỹo'orauec.
Qaq pa'atec, nache som lalamaxat se'eso nanaxanaqa' 'enapeco': «Qaq nagui ¿chaq hua'ago' ca sheetec? Nagui aỹem samaq ñim ỹauotaxat ỹalec, yaqto' qom ila'a camayepi, qaq ỹoqta qome da ilo'oguet.» Qalaxaye som 'onataxanaxaicpi co'ollaq ila'aguet somaye, nache detaxaỹapega't, 'eeta': «'Ena qome na talec qanqa'en ne'ena nanaxanaqa' qom ileu cam lta'a. Salauataq nagui namaye, yaqto' qomi' ishet qome da qaralamaxat namaye.» Nache somayepi nqateeguesop somaye se'eso nanaxanaqa'. Ime, nache ỹalauat.
Nache So Jesús denataxan, 'eeta':
–Qaq ¿chaq hua'ague ca 'eetec se'eso lalamaxat se'eso nanaxanaqa'? Qomye anac somaye, nache ỹalauat se'eso 'onataxanaxaicpi. Ime, nache ỹami' so laỹepi 'onataxanaxaicpi som nanaxanaqa'.
Qaq co'ollaq qaỹa'aqchigui de'era, nache qoỹeeta':
–¡De'era saishet da nache 'eetec!
Qalaxaye So Jesús ỹamataigui somayepi, nache 'eeta':
–Qaq ¿hua'ago' ca 'eetec naua ñiyigui'she la'aqtaqa Ñim Lo'onatac 'Enauacna maye 'eeta'?:

Som coma' maye ỹo'otan na nỹec lo'opi co'ollaxa,
nacheso nagui som ỹe'eguelaxa da
ỹataqta nhuenec da qaỹo'ot ca nỹec.

Qaq da huo'o ca camachaqca talec se'eso coma', nache camaye dolagui; qaq se'eso coma' da huo'o ca talec, nache camaye ỹataqta dolachigui.


Nache so lataxala'pi nam ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq so dapaxaguenataxaatapeguec na namaxasoxonaxacpi, somayepi nshetaique da nache ỹaconeua'a se'eso na'a'q So Jesús, cha'aye ỹaỹaten da nacheso somayepi ỹalamaqchigui de'era daloqnaxaatega Somaye. Qalaxaye ñe'etega som shiỹaxauapi. Nache ỹauo'oi soua lamaxa'she da choche 'axaỹaxanaxanaqa. Soomaye choche ỹe'enaxa't da 'eetega no'o'n shiỹaxau', da yaqto' isomaxanaqche't naua la'aqtaqa So Jesús, nache ishet da huo'o ca qaỹachegoxotchigui lasouaxashet, nache qoỹaneua'a so lta'a nam netaña ye 'alhua Judea som lca'aguishec so lta'a na nta'alpi maye netaña ye Roma. Qaq ỹoqo'oye soomaye ỹauo'o da lnataxanaxa'c, 'eeta':
–'Am Napaxaguenataxanaq, qomi' saỹaanaq da nache 'eetai' naxa da saishet da saq 'en ca 'aua'axat qataq saishet da 'auqochetega ca maiche 'eetapeguec na shiỹaxauapi, chaqrata da ỹataqta 'alotelec da 'arapaxaguenataxanaxac qaltaq nache 'eetai' da qoqueto'ot da qomi' qonetegalo da ỹataqta salaxasoxoguet Ñim Lo'onatac 'Enauacna. Ỹoqo'oye qomi' 'aua'aqtaxanema: ¿peta'a ỹaỹamaqchiguiñi da sesheetenaq ñim lta'a nam nta'alpi maye netaña ye Roma, qalqo' saishet?
Qalaxaye So Jesús ỹauattooteguet da qauem lhuennataxac soomaye, nache 'eeta':
–¿Ta'ainco' ye choche Aỹem qavi'iguiñiitac? 'Ego', ñaq Aỹem qauachaxañiỹa acam anom lcatole. Ime, nache So Jesús inatta'ape soomaye, 'eeta': ¿Negue't lashec ñim huetalec? Qataq ¿negue't le'enaxat yem nanettalec?
Nache soomaye 'ena'apo':
–Qomye nacheñi ñim lta'a na nta'alpi maye netaña ye Roma.
Nache Somaye 'enapeco':
–Qaỹa'añim ñim lta'a na nta'alpi cam maiche lalamaxat, nataqa'en qaỹa'añim Ñim Lo'onatac 'Enauacna ca maiche lalamaxat.
Nache saishet da huo'o ca ỹachegoxotchigui da ỹo'ot ca lasouaxashet naqa'en dam 'enapec co'ollaq datata'agueta Somaye. Chaqrata da ỹataqta huo'o da la'aalaqa' soomaye dam 'enapec So Jesús. Huaña, nache ỹe'emaqto'm.


Qaq co'ollaq ime, nache huo'o na anac nam ỹalectaigui nam saduceopi da nqo'oneua'a So Jesús. Namayepi 'eetega saishet da qaltaq nca'alec na leuaxaicpi. Nache 'eetrega So Jesús, 'eeta':
–'Am Napaxaguenataxanaq, so Moisés qomi' no'onaxata'agueta naua lqataxaco, 'eeta': Ca shiỹaxaua da huo'otaq ileu, nache no'oichigui aca lhua da huo'otaq qaica ca llalec, nache cam maiche lqaỹa, iuen da qaltaq huaroneguet acam llo'oxoua, da yaqto' huo'o ca llalec naqa'en som lqaỹa maye saqca. Cha'aye ne'ena souaqta'a huo'oi co'ollaxa soua siete nqaỹa't. Som ỹe, la'auaxanec da huaron, qalaxaye somaye ileu co'ollaq saxanaqca ca llalec. Nache som lqaỹa huaroneguet asom llo'oxoua, qaq somaye nataqa'en ileu, qaq nache 'ena'am saishet da huo'o ca llalec. Qataq som lqaỹa maye lpa'axaua somaye huaroneguet asom llo'oxoua, qaq nache jec 'enauac som nqaỹañecpi. Nache 'enauac som siete nqaỹañecpi ileu, qalaxaye qaica ca ishet da huo'o ca llalec ñi 'oonolec soomaye. Qaq pa'atec, nache nataqa'en aso 'alo ileu. Qaq ỹoqo'oye 'am senataq: Qom ivita ca laloqo' da qaltaq qanca'alaxatec na leuaxaicpi, qaq ¿chaq negue't cam ỹoqta 'eesa da lhua asa'aso 'alo? Ye 'enauaque se'esoua siete nqaỹa't huaronegueta asomaye.
Nache So Jesús 'enapeco':
–Ana'ana 'alhua maye hueta'a na shiỹaxauapi ishet da huarona't. Qalaxaye cam taiguet qominchiye da inoxoneua'a cam lỹa 'alhua, qom mashe qanca'alaxatec nam leuaxaicpi, que'eca 'alhua, huaña, nache aca 'alo qataq ca ỹale saishet da huaron. Cha'aye huaña da namayepi da qaltaq qanca'alaxatec, nache saishet da qaltaq ileu. Qataq nache 'eeta'am na piguem le'ecpi lamaxashecpi Ñim Lo'onatac 'Enauacna qataq ỹataqta llalaqpi Ñimaye. Qaq ivira'a so Moisés nataqa'en ỹa'axat da ishet da qaltaq nca'alec na leuaxaicpi. Da na'aqtaguec co'ollaq hueta'a aso qo'oipaqole maye 'ettaigui, qalaxaye saishet da ỹoqta ỹavic. Huaña, nache Ñim Nataxala', 'eeta': «Aỹem maye Nachaỹem natameetacot co'ollaxa naxa so Abraham, Isaac, qataq so Jacob.» Qaq saishet da natameetacot Ñimaye na leuaxaicpi, chaqnata nam nca'altauecpi, cha'aye Ñimaye 'enauac nca'altauec naqa'en na shiỹaxauapi.
Nache huo'oi soua dapaxaguenataxaatrapegue'c na namaxasoxonaxacpi, 'eeta':
–'Am Napaxaguenataxanaq, ỹataqta ỹaỹamaqchiguiñi da 'ara'aqtac.
Huaña, nache so saduceopi saishet da ỹe'eguelaxalec da qaltaq inat Somaye.


Nache So Jesús 'enapeco':
–¿Chaq ta'ainec naxa da na shiỹaxauapi 'eetega llalec so David cam Lca'aguishec Ñim Lo'onatac 'Enauacna? Ye som nta'a David 'enapec da la'aqtac maye nanettalec anam lere maye le'enaxat Salmos, 'eeta':

Ñim Lo'onatac 'Enauacna 'enapega Ñim
Ỹataxala' maye Lca'aguishec, 'eeta':
«'Anso'oota'ague qome da aỹoic,
nato' qom mashe ime da sacho'oto naua
'arapia'ate, nam 'am ipa'agueetacpi.»

Qaq ¿hua'ago' ca 'eetec da cam Lca'aguishec Ñim Lo'onatac 'Enauacna da chegoxoguet so David, ye som David da iỹaxana camaye nache Lataxala'?


Qaq 'enauac so shiỹaxauapi na'axaỹaxaatac, co'ollaq 'enapegalo soua lapaxaguenataqa So Jesús, 'eeta':
–Maxatchoxo' qome, qarvichiỹa'aguet nam dapaxaguenataxaatapeguec na namaxasoxonaxacpi. Cha'aye namayepi nqopita da ỹaatrañi naua no'o'n nogo maye ỹo'oxora'q, qataq nqopita da qaiyaata da qaiquin da huaña ca naponqa', qataq namayepi nmitta'ai anam so'onaxaqui maye ỹataqta ỹo'oxoraq anam paxaguenaxaquipi qataq nam ỹataqta no'on nquia'aqa'pi. Namayepi decachigui na nma' ana pa'aipi, ime, nache ỹo'ot da nqouagaxaunaxac ỹataqta logoraic naqa'en yaqto' na qalota shiỹaxauapi ipi'itaxana da no'on shiỹaxauapi. Qalaxaye Ñim Lo'onatac 'Enauacna ỹauo'o da nhuaxanaguec ỹataqta ỹactec, saq 'ena'am na laỹepi shiỹaxauapi.

Escolta Lucas 20