If you would like a copy of this version please contact info@davaraudiobibles.org

Lahuali New Testament, CC-BY-SA-4.0, The Love Fellowship. Lahuali New Testament Audio Bible, CC-BY-SA-4.0, Davar Partners International, The Love Fellowship, 2022.

Lahuali New Testament

Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.

यीशु महसे मीहरे तंङज़िरंङ साते गोह हखा अच्च़ा इलि, दंङ दोतिंङ शिक्षा रंड्रीमी थल्जी बंङज़ा इलि दोपहल दोऊ चेलारे दोऊ कछंङ अतिरे। दंङ यीशु दोतिंङ शिक्षा रंड्री लेहती:


“धन्य शुहरे दोरे, अरी परमेश्वरो थल्जी एनोह ज़रुरतो एहसास लहज़ातोर,
छना कुचे स्वर्गो राज दोतु शुह।
धन्य शुहरे दोरे, अच़ि शोक लाह्तोर,
छना कुचे परमेश्वर दोतिंङ शांति रमोतो।
धन्य शुहरे दोरे, अरी नम्र तोतोर
परमेश्वर दोतु दोरच़ी एनोह वाईदा पूरा लोहतो।
धन्य शुहरे दोरे, अरी धार्मिकताऊ ज़िंदगीऊ हिटी तहच़ातेर। छना कुचे परमेश्वरे दोतु थल्जी पुरे लोहतो।
धन्य शुहरे दोरे, अरी दयावन्त तोतोर,
छना कुचे परमेश्वरे दोतु टोईच़ी दया लोहतो।
धन्य शुहरे दोरे, अतु सेहम शुद्ध तो,
छना कुचे दोच़ी परमेश्वर बि खमोर।
धन्य शुहरे दोरे, अरी मेल मिलाप लहज़ी लाह्तोर,
छना कुचे दोरे परमेश्वरो कटुरे शोअर।
धन्य शुहरे दोरे, अरी सही कम लहज़िमी बजहच़ि खंहच़ातोर,
छना कुचे स्वर्गो राज दोतु शोतो।
धन्य शुंई केरे, अपेहल मीहच़ी गिऊ चेला शुहबिमी बजहच़ि केहतु निंदा लोहर, दंङ केरे तंग लोहर, दंङ हप्सी कुचे केहतु थल्जी भत्ते पाहठी मांजी गप्पारे कोर। दोहपल केहरे खुशी मनातुंई ए मगन शुई छना कुचे स्वर्गंङ केहतु थल्जी मोह्ड़े ईनाम तोह। दिऊ थल्जी कि दोच़ी दुह भविष्यवक्तातिंङ अंऊ महसे तुईबेज़ि तोईरे ध्यांए तंग लहज़ातेर।

केरे दिह संसारो मीहतु थल्जी छ़ाऊ ठ्रोह शुई; पर अगर छ़ाऊ स्वाद अच़ा इलि सईता, दंङ दुह अंऊ चीज़ा रंङ साते छ़कू लहज़ी दंङ दुह छोउला कमो माह शुहबी, सिर्फ दिऊ थल्जी शुहबी कि धह्तेका छङें मीहतु कोन्ज़ो पोयंङ ककट्रीमी थल्जी। केरे भत्ते संसारो थल्जी छंङीऊ ठ्रोह शुई। अंऊ नगर गोह मुखंङ बसेके तोह दुह ब्याके मरच़ि। मीहच़ी लम्पा बि जलाके टोकरिऊ पोयंङ माह केहट्री, ठेपू टोईच़ी केहट्री, दंङ दोऊ दोरच़ी घरबारो भत्ते मीहतंङ छंङी शुहबी। ध्वांए केहतु छंङी मीहतु तुईज़ी च़मकेकी जूंस कि दोच़ी केहतु रूठे कम खांऐ केहतु बाहऊ, अरी स्वर्गंङ तोद, तारीफ लहसी जूंस।

झांह थाह सोचेक्तुई, कि गेह मूसाऊ कानून ए भविष्यवक्तातु शिक्षा खत्म लहज़िमी थल्जी अंज़े शुगाह, पर पूरे लहज़ी अंज़े शुगाह। छना कुचे गेह केतंङ साते हेले कुट्रातग, कि अपेहल तचेक कि मूसाओ कानूनो भत्ते भविष्यवाणी पुरे माह शोतो, धोंण तचेक परमेश्वरो ब्यवस्थाज़ि इच्च़ा मात्रा या बिन्दु ला माह योह्सोतो। झांह लेह अच़िला दिह कवचि बे कवचि हुकुमो बिचंङज़ि इच्च़ा लाह माह मनेकपोतो, दंङ ध्वांए मीहतिंङ कंबोतो, दुह स्वर्गो राजंङ भत्तेबे कवचि शोतो; पर अच़िला दुह मनेकपोतो ए कंबोतो, दुऐ स्वर्गो राजंङ मोह्ड़े शोतो। छना कुचे गेह केतंङ साते कुट्रातग कि, अगर केहतु धर्मिकता ओ कम यहुदी शास्त्री ए फरीसी मीहतु धर्मो कम्माङ ज़ि महस माह शुई सा ता, केहच़ी स्वर्ग राजंङ अपेहल ला अपि मरपोंई।

केहच़ी दिह थहसी शोंई, कि परमेश्वरे हेंदु बाह-मेमेतु हखा कुहषी तोहई कि हत्या थलांई दंङ अच़िला हत्या लोहतो दुह यहुदी महासभारिंङ दण्डो हकदार शोतो। पर गेह केतिंङ दिह कुट्रातग, कि अच़िला एनोह न्वाबि रोहष लोहतो दुह यहुदी सभारिंङ दण्डो हकदार शोतो, दंङ अच़िला एनोह न्वाबि कम माहलाहज़ा कोतो दुह यहुदी महासभाओ तुईज़ी दण्डो हकदार शोतो; दंङ अच़िला कोतो ‘ए बमजी’ (बेबकूफा) दुह नरको मेहऊ दण्डो जोगे शोतो। दिऊ थल्जी अगर केई केनोह तग मंदिरंङ हपोंन, दंङ दोहर कनिंङ हिद अपतो, कि कांह न्वाओ सेहमरिंङ कांह थल्जी मांजी तोह, दंङ केनोह तग दोहरऐ मंदिरो तुईज़ी केह केऊ, दंङ इलजे केनोह न्वारंङ मेल मिलाप लोहऊ दंङ अंज़े केनोह तग चढातु। अगर कांह केनोह दुश्मनारंङ साते अमरिंङ तोतोन दोहरंङ य्हप्पन मेल मिलाप लेह च़रतु झांह शुहबी माजूंस कि दोई काह हकिम हवाले लेह केहऊ तो हकिम ए कांह सिपाहीऊ हखा रेह केहतो, दंङ कांह जेलंङ केह केओर। गेह कनिंङ हेले कुट्रातग दोहर काह अपेहल तचेक केई इच्च़ा-इच्च़ा टंगो हिसाब माह रमोंन, अंऊ कांह टोईच़ी बकाया तोह, दोपहल तचेक कांह जेलंङ दोरच़ी धह्तेका हुंज़ी मरपोंन।

केहच़ी थहसी शोंई कि हुकुम छि कुट्रा कि, ‘कुकम थलांई।’ पर गेह केतंङ कुट्रातग अच़िया मेच़मीऊ हखा झखंजी टिरे खमोतो दोई एनोह सेहमरिंङ दोरंङ कुकम लेह केहतो। अगर कांह सुचंङ टीरा कनिंङ विशवासो दोरच़ी थलका लेह पापो अमरिंङ रेंज़ा शोतो ता, दंङ दुह टिरो दोरच़ी लहसी मांजी बि लहज़ी ब्याड़ा लेह च़रतु छना कुचे दिह रुठे तोह कि कांह फुको इच्च़ा अंङ योह्सा योतो दंङ कांह भत्ते फुक नरक मेहबोतो। अगर कांह सुचंङ गुहड़ कनिंङ विशवासो दोरच़ी थलका लेह पापो अमरिंङ रेंज़ा शोतो ता, दंङ दुह गुहड़ो दोरच़ी लहसी मांजी बि लहज़ी ब्याड़ा लेह च़रतु, कांह थल्जी दिह ए रूठे शोतो कि काह फुको इच्च़ा अंङ योह्सा योतो दंङ कांह फुक नरकंङ मेहओतो।

मूसा भविष्यवक्ताओ कानूना दिला कुहषी तोहई, अच़िला एनोह मेच़ाबि हुंज़ी ततो, दंङ दोबि तलाकनामा रोंऊ। पर गेह केतंङ दिह कुट्रातग कि अच़िला एनोह मेच़ा कुकमो एलावा ऊहई वजाहज़ि तलाक रमतो, दंङ दोई दोबि कुकम कराएच़ा; अच़ि दुह केहषी दोरंङ साते ब्याह लोहतो ता दुह कुकम लहज़ा।

दंङ केहच़ी दिह थहसी शोंई, कि परमेश्वरे हेंदु बाह-मेमेतु हखा कुहषी तोहई कि, ‘हप्सी वाईदा थालांई, पर प्रभु थल्जी केनोह कसम पूरा लहंई।’ पर गेह केतंङ कुट्रातग अपेहला वाईदा थालांई माह स्वर्ग, छना कुचे दुह परमेश्वरो सिहासन शुह। माह धरतीऊ, छना कुचे परमेश्वर दोर तिंङ एनोह कोन्ज़ा केहट्री; माह यरूशलेम शहरो, छना कुचे दुह महाराज्यो प्रभुऊ नगरी शुह। केनोह पुंज़ो ला वाईदा थज़ोऊ छना कुचे केई इच्च़ा क्राह ला, माह रोह्की लेह तरपोन माह छंङसे लेह तरपोन पर केहतु गप्पा हाँ ओ हाँ ना ओ ना शुहबी जूंस छना कुचे छिला दिहबे महस शोतो दुह शेतानो दोरच़ी शुहबी।


केहच़ी दिह थहसी शोंई कि, व्यावस्थाज़ि कुट्रा कि टिरो भुहंदे टीरा छ्वाऊ भुहंदे छ्वा। पर गेह केतंङ कुट्रातग मांजीऊ बदला थाह लेहप्तुंई; पर अच़िआ कांह सुचंङ चरनी रिंङ चट्टेक रमतो दोऊ हखा अईसंङ ला किरज़े चर्तु। अगर अच़िआ कनिंङ कोर्टंङ शोहकी रेंज़ा शोहर दंङ कांह कुर्ती शिल्ज़िमी शोतो ता दोबि केनोह कोटला शिल्ज़ी रांई। अगर रोमी सेनिका ज़ि कनिंङ ज़बरदस्ती इच्च़ा मील जोईमी थल्जी मज़बूर लोहतो दोरंङ साते झुह्ट मील अच्च़ा ईला। अच़िआ कांह दोरच़ी पेड़ीता, दोबि रंऊ; दंङ अच़िआ कांह दोरच़ी तच्ची अति ता दोबि मना थालोहू।


केहच़ी दिह थहसी शोंई कि, व्यावस्थाज़ि कुट्रा कि केन्दु पड़ोसीतंङ साते दाह तोह दंङ केनोह बेरीतंङ साते बैर तहऊ। पर गेह केतंङ साते दिह कुट्रातग कि केन्दु बेरीतंङ साते ला दाह लंहि दंङ केदंङ मांजी लहज़ातु थल्जी प्रार्थना लांई। झांह लेह केहरे केनातु स्वर्गो बाह परमेश्वरो कटुरे शोंई छना कुचे परमेश्वरे रूठे ए मदम मीहतु थल्जी एनोह एके हुंपा दंङ धर्मी ए पापी मीहतु टोईच़ी संदा वरसाची। छना कुचे अगर केहच़ी केतिंङ दाह लहज़ा दोतंङ साते ए दाह लोहन ता परमेश्वर केतिंङ छले ईनाम माह रमतो। चुंगी लेहपच़ाज़ि ला ध्यांए लेह। अगर केहच़ी सिर्फ केनातु न्वातिंङ ए नमस्ते लहरिता, दंङ छि मोह्ड़े कम लाहतंई, देर तचेक कि गैर यहुदी ला अच़ि परमेश्वरो नियमो भाषे माह लहज़ातोर, ध्यांए लहज़ातोर। दिऊ थल्जी केतिंङ झांह ठ्रोह मीहरंङ साते दाह लहज़िमी ज़रूरत तोह अरी केतंङ साते दाह माह लहज़ातोर, छना केहतु स्वर्गो बाह परमेश्वर सिद्ध तोह।”

Escolta मत्ती 5