Zulgo - 1988 Edition (Drama-NT)

Akahər ata piŋŋe, i təv ana Mbulum aka ge gər ahəɗ zukw tsiye ka, wele ana tə zalar bazlam Mbulum ka, a riŋ dukw ŋgar. Ŋgat ka, a riŋ mandza ŋa i təv Mbulum, dite ŋgat ka, Mbulum mbaŋa. Daga piŋŋe ka, ŋgat a riŋ i təv Mbulum. Mbulum a ge gà dukw tserdze ka, nda ahər ŋgar. Duwa ilik na Mbulum a ge nda ahər ŋgar tsiye ka, a riŋ tsa. Mesife gà duwa tserdze a dara ka, i təv ŋgar a, dite mesife ata ka, a vəlawa təv dzaydzay ŋa a gà mburma mbaŋa. Təv dzaydzay ŋa ata a də̀vawa ika magər luvuŋ, ama ka, luvuŋ a sle aà mimbete dər tsa.
Akahər ata ka, Mbulum a slərra mburma ya, zləm ŋgar Yuhana. A dara ka, aà meɗìfè à təv dzaydzay ŋa a gà mburma, dite ka, gà na tàa tsaraka bazlam ŋgar ata tserdze ya ka, ta gəs təv dzaydzay ŋa ata a tsik a ter a ya. Ŋgat tsa na a ne təv dzaydzay ŋa ya. Ama a dara ka, aà meɗìfè à təv dzaydzay ŋa ata pəra. Təv dzaydzay ŋa ata ndzer ŋa ya ka, wele ana tə zalar «Bazlam Mbulum» a. A dara aka gər ahəɗ a ka, aà medìve ika magər gà mburma tserdze.
Ŋgat ɗa ika gər ahəɗ. Ama ku mege Mbulum a ge gər ahəɗ nda ahər ŋgar tekeɗe ka, gà mburma ana iɗəm a, tə sər ŋgat tsa. A dara ka, aka ahəɗ ŋgar a. Ama gà mburma ŋgar tàa gəs ŋgat tsa. Ama gà asiŋ ŋa kə̀la ka, ta waya ŋgat, tàa gəs ŋgat nda gəzləŋ tar lele. Tar ka, aka vəl a tar vatwa aà mene gà ɓəza Mbulum. Ti ne gà ɓəza Mbulum ka, a wa tar kamala ana mburma ti dzele a, ta we a ba ya tsa. Ti ne gà ɓəza Mbulum ka, agəra ana a vəl a tar mesife awiya ŋa ya.
Ŋgat ana tə zalar «Bazlam Mbulum» a, na a ne mburma ya, dite ka, a ndza ɗa ika magər mər zaakwa ya. Maa ŋgat a ndzəɗa ŋgar ana a za gà dukw tserdze, Mbulum a vəl a Kəla ŋgar ata mifèndèz ŋa, a da dərra i təv ŋgar a. Ŋgat ka, mala ndzer ŋa. A gewa ka, dukw ana ŋgwal ŋa ya ɗekɗek.
I təv ana a pàt aba ya ka, Yuhana aka tsik aà ŋgat parakkà, a gwa: «Araha na wur ana akahər ata i tsik ahər, i gwa: <A dere a i dəba gà ya mba. Ŋgat ka, a za iye kweleŋ fètìte. Aɗaba ŋgat a riŋ daga aà gər ana tàa wa iye zukw tsiye.> «
Kwa tserdze kàa ŋgatakwa Əbay ŋgar, dite a pisewa a kwa dər ahəm ka, sik diŋdiŋ màdzànàpa ŋa. Mbulum aka vəl a kwa məpala ahəm nda ahər Musa. Ama a ge a kwa ŋgwal ŋgar, a ɗif a kwa à ndzer ŋgar ka, nda ahər Yesuw Kiristi. Wura aka ŋgat a Mbulum ilik tsidze. Ama Kəla ŋgar ata mifèndèz ŋa tə ndzawa i təv ilik ŋa nda ŋgat a, na a ɗif a kwa dər a.


A pat duwa ka, gà bàba gà Yahuda ana i Yeruzalem a, tə slər gà asiŋ gà ɓəzla mandəva kuɗa a Mbulum ana i gwala Levi ya, nda gà asiŋ tar a təv Yuhana, aà megweɗer ka: «Kər ana, weke?» Tə daha a təv ŋgar, ta wiz ahər. Bazlam ana Yuhana a tsik a tar a ka, araha. A tsik a tar parakkà ika miɗ mburma tserdze, a gwaɗa a tar: «Iye ka, *Kiristi, mala məmbàlà à mburma ana Mbulum a gwa, i ti slir a kurumehe a ya tsa.» Tə tsaraka bazlam ŋgar ata kataya ka, ta gwaɗar: «Kər ana, weke? Kər ana, Iliya ana akahər ata ya ya?»*fa* Yuhana a gwaɗa a tar aaka asa: «Iye ka, ŋgat tsa.» Ta gwaɗar aakaha asa mbaŋa: «Kər ana, mala məma à guma Mbulum ata Mbulum a gwa, i ti slir a kurumehe a ya ya?»*fb* A gwaɗa a tar aaka: «Awaŋ, iye ka, ŋgat tsa.» Ta gwaɗar: «Dite kər dze ana, weke kəla ya? Ɗe a mər aba te. Ki gweɗe a aà ba yak dze ana, weke? Na dite mìi ta me a dər a gà mburma ana tə slərra mər a ya.» Yuhana a gwaɗa a tar aaka: «Iye ka, wele ana Ezaya, mala məma à guma Mbulum ana akahər ata a tsik aà iye, a gwa:
<Mburma ŋa a riŋ i kusak,
à fèfil a ŋgəlakəkka, a gweɗe a:
Làmbaɗum aba vatwa a BATSAH kwa ŋa
a gəzləŋ kurum a fehhè lele.> «*fc*
I liwiŋ gà mburma ata tə daha a təv Yuhana, ta wiz ahər bazlam a ka, gà *Farisa iɗəm. Tə daha, ta gwaɗar: «Na kər Kiristi tsa, dite kər Iliya tsa, nda gà kər mala məma à guma Mbulum ata tsidze ana, aàmala na ki tsilwiɓ a à mburma a yam a?» Yuhana a gwaɗa a tar aaka: «Aɗaba iye ka, i tsilwiɓ a à mburma ka, a yam pəra, ama wele ŋgiɗ a riŋ, ika magər kurum, kà sərum ŋgat tsa. Ŋgat ka, a dere a i dəba gà ya mba. A za iye nda ndzəɗa kweleŋ fètìte. I sle a aà mesirikaha a təv ŋgar, aà məpəla à liɓir tsàpà ŋgar tsidze.»
Gà dukw ata tserdze ta ge ba ka, i kwite Betaniya, ika lìdè dulwa Yurdan, i təv ana Yuhana a tsilwiɓewa iɗəm à mburma a yam a.


Ndidwe ŋana ka, Yuhana a ŋgat a Yesuw a riŋ a dehe a a təv ŋgar. A gwaɗa a gà mburma ana i fataya: «Kəla təmaŋ ana Mbulum a vəl, ta kiɗ a aɗaba məpəla à bakal a mburma ya ka, araha, a deriŋa.*fd* I fàfəl ka, aà ŋgat, na i gwa: <Wele ŋa a riŋ a dere a i dəba gà ya ka, à za iye nda ndzəɗa kweleŋ fètìte, na ŋgat a. Aɗaba ŋgat ka, a riŋ daga aà gər ana tàa wa iye zukw tsiye.> Iye piŋŋe tekeɗe, i sər ŋgat ana weke tsa. Ama iye, i dara aà metsìlwìɓè à mburma a yam ka, dite gà mburma Isərayel tə sər ŋgat.»
Yuhana a tsik ahər asa, a gwaɗa a tar: «Yàa ŋgat a Mezite Mesife Mbulum a riŋ a tarra i gər ŋa ya, zərawwa kamala maadagwar a, a dara, a ndza a bəɗ aka gər ŋgar. Akahər ata Yàa sər ŋgat ana weke zukw tsa, ama Mbulum ana a slərra iye, aà metsìlwìɓè à mburma a yam a, a gweɗiŋ: <Ki ta ŋget a Mezite Mesife a terre a aka wele ŋa a riŋ a, dite a ndze a aka gər ŋgar.> A gweɗiŋ asa ka: <Wele ata na a ti tsilwiɓ a à mburma a Mezite Mesife Mbulum a.> « Yuhana a gwa asa ka: «Yàa ŋgat a gà dukw ata ndzer, pàrsa iɗəm tsa. Aɗaba taŋa, na iye ihər i tsik a kurum a parakkà, ŋgat na Kəla Mbulum a.»

Ndidwe ŋana ka, Yuhana a riŋ nda gà asiŋ gà ɓəzla mazazama ŋgat sula i fata asa. A ŋgat a Yesuw ana a riŋ ihər a de a ya ka, a gwaɗa a tar: «Naha ka, wele ana a ne kəla təmaŋ, Mbulum a vəl, ta kiɗ a ya.» Gà ɓəzla mazazama Yuhana ata sula ya, tə tsaraka dukw ana a tsik a ka, tə zazam Yesuw. Wudəgə̀r Yesuw a mbəɗ à ba ka, aka ŋgat a a taraha, tar riŋ ti zezemehe a ŋgat. I dəba ŋa ya, a gwaɗa a tar: «Ki yehwim a là?» Ta gwaɗar: «Kər ana, mandza ŋa ana, i ŋga, Rabi?» Rabi ka, kamala megweɗe ya, mala medzeŋge duwa a mburma. A gwaɗa a tar: «Dumara, tàkwa, dite ki sirwim a təv ga ana iye iɗəm a.» Tə da. Tə daha ka, ta ŋgat a təv ana ŋgat mandza ŋa iɗəm a. Tə ləm akaba pat ata, tə ndza akaba ka, aà gər ndzemde faɗ a, haa həvəɗ a ge.
Mìsle ŋgiɗ a riŋ ilik i liwiŋ gà mburma ata sula tə tsaraka bazlam Yuhana, dite tə zazam Yesuw a ka, zləm ŋgar Andire. Ŋgat ka, damər Simun Piyer. A le aà damər ŋgar Simun tsara ka, a gwaɗar: «Maa ŋgat a *Masihu, kamala megweɗe ya ka, *Kiristi, mala məmbàlà à mburma ana Mbulum a gwa, i slir a kurumehe a ya.» I dəba ŋa ya, a laka Simun a təv Yesuw. Dite Yesuw a fə̀r ahər, a gwaɗar: «Kər ka, Simun, kəla Yuhana. Ti ta mbìɗek a à zləm, ti zelek a Kayfas», kamala megweɗe ya ka, Piyer. Taŋa ka, kuvəl.

Ndidwe ŋana ka, Yesuw a waya à mbìɗ a gər aka ahəɗ Galile. I təv ana a riŋ a de a ya ka, tə lə̀ma nda Filip. A gwaɗar: «Zezem iye, kà tama.» Filip a dara ka, i kwite Betsayida ana gà Andire nda Piyer tə ndzawa iɗəm a. I dəba ŋa ya, gà Filip tə lə̀ma nda Nataniyel. A gwaɗar: «Maa ŋgat a wele ana Musa a tsik ahər i wakita məpala ahəm ŋgar a, dite gà ɓəzla məma à guma Mbulum ti tsik ahər mbaŋa ya. Zləm wele ŋa ka, Yesuw, kəla Yasufa ana i kwite Nazaret a.» Nataniyel a gwaɗar: «Kà dzala ana, duwa a sle a aà medera ŋgwal ŋa lele i kwite Nazaret a ya?» Filip a gwaɗar aaka: «Dara, fə̀r ahər.» Ta mah ba, tə da.
Aləka Yesuw a fə̀r Nataniyel a riŋ a dehe a a təv ŋgar ka, a gwa aà ŋgat: «Araha na kəla gà Isərayel ana ndzer, wirwir i ba tsidze ya.» Nataniyel a tsaraka taŋa ka, a gwaɗar: «Ge, kà sərara iye dze ana, i ŋga ya?» Yesuw a gwaɗar aaka: «Yàa ŋgatak aà huɗ gùrùv duwa aka na Filip aka zalak, kàa màhum ba zukw tsiye?» Nataniyel a gwaɗar: «Batsah mala mesìnèkè à duwa a mburma, kər ka, Kəla Mbulum. Kər ka, batsah Əbay gà Isərayel.» Yesuw a gwaɗar aaka: «Kə̀ gəs iye kamala Kəla Mbulum a ana, aɗaba ana i gwaɗak, Yàa ŋgatak aà huɗ gùrùv a ya? Yaw, na kataya ka, araha, ki ta ŋget a a gà dukw gà bàba ŋana hinne, tì zè a taŋa ya.» A gwaɗar asa: «Iye ihər i tsik a kurum a nda ndzer, pàrsa iɗəm tsa. Ki ta ŋgetwim a a kuvəl Mbulum ndzayìya mandə̀zlà ŋa ikaba ya, gà gawla Mbulum ti tsil aɗəmiŋa, dite gà asiŋ ŋa, ti terre a aka gər gà, iye, *wur ana a dara i təv Mbulum a mbaŋa.»*fe*

Escolta Yuhana 1