Text: © New Life Computer Institute Audio: ℗ 2022 Hosanna

Shekhawati 2017 NLCI (NT)  Non Drama

जद ईसु बि भीड़नै देख्यो जणा डूँगर क उपर चढगो अर आपका चेलानै सीख देबा ताँई बठै बेठगो। बे बिकी सुणबा ताँई बिकन आया। जणा ईसु बानै सीख देबा लाग्यो,
“भागहाळा ह बे मिनख जखा आत्मा का भूखा हीं; क्युं क ईस्बर नगरी को राजपाट बाकोई ह! भागहाळा ह बे जखा रोवै ह; क्युं क परमेसर बानै स्यांती देसी! भागहाळा ह बे जखा सूदा हीं; बे धरती का हकदार होसी! भागहाळा ह बे जखा धरम का काम करबा ताँई भूखा हीं; परमेसर बाकी इंछ्या पूरी करसी! भागहाळा ह बे जखा दयालु ह; क्युं क बापै दया करी ज्यासी! भागहाळा ह बे जाको मन परमेसर की नजर्या म पबितर ह; बे परमेसरनै देखसी! भागहाळा ह बे जखा मेळमिलाप करावै ह; बे परमेसर का टाबर खुवासी! भागहाळा ह बे जखा धारमिक्‍ता की बजेऊँ सताया जावै ह, क्युं क ईस्बर नगरी को राजपाट बाकोई ह! भागहाळा हो थे जखा मनै मानबा की बजेऊँ मिनख थानै सतावै ह, थारी बेजती करै अर झूठ बोलर हर बाता म थानै बुरा बतावीं हीं। जणा थे राजी होज्यो क्युं क ईस्बर नगरी म थानै इको फळ मिलसी। क्युं क बे तो परमेसर की खेबाळानै बी जखा थारूँ पेली हा बानै बी अंय्यांई सताया हा।


“थे धरती का सगळा मिनखा ताँई लुण हो; पण जद लुण मऊँ सुवाद चल्योजा जणा बिनै ओज्यु चरचरो कोनी बणायो जा सकै। अर नइ बो कोई काम आवै। पण बिनै फेक दिओ जावै ह, जिऊँ बो लोगा क पगा तळै मसळ्यो जावै ह। थे जगत का मिनखा ताँई च्यानणा हो। अर जखी नगरी डूँगर प ह बा कोनी लुख सकै। मिनख दिओ जळार कुंडा तळै कोनी म्हेलीं पण आळ्या म म्हेलीं हीं जिऊँ घर म आबा-जाबाळा मिनखानै च्यानणो दिख सकै। थारा चोखा काम बि दिआ क च्यानणा की जंय्यां चमकणा चाए जिऊँ दुसरा मिनख भला कामानै थारै जरिए देख सकै अर थारा परम-पिता की जखो ईस्बर नगरी म ह बिकी बडाई करै।

“थे ओ मना सोचो क म नेम-कायदा नहिस परमेसर की खेबाळा की मांडेड़ी पोथ्यानै नास करबा आयो हूँ। म बानै नास करबा कोनी आयो पण बानै पूरो करबा आयो हूँ। म थारूँ सची बोलुँ हूँ अकास अर धरती टळ सकै ह पण नेम-कायदा म मंडेड़ो आंक पूरो होया बिना कोनी रेह्‍वै। इ ताँई जखो बी मिनख आ छोटाऊँ छोटा आदेसा मऊँ एकनैई कोनी मानै अर बो बंय्यांई दुसरा मिनखानै बी करबा की सीख देवै बो ईस्बर नगरी म छोटाऊँ बी छोटो खुवासी। पण जखो मिनख बा बातानै मानै ह अर दुसरा मिनखानै बी मानबा ताँई सीखावै ह बो ईस्बर नगरी राज म बडो खुवासी। म थारूँ साची बोलुँ हूँ ज थारा नेकी का काम सास्तरी अर फरिसीया की नेकिऊँ बेसी कोनी ह जणा थे ईस्बर नगरी का राज म कदैई कोनी जा सकोगा।

“थे सुण्या हो, क आपणा बडकानै ओडायो गयो हो, ‘हत्या मना करज्यो’ अर ज कोई हत्या करसी बिको न्याय होसी। पण म थारूँ खेऊँ हूँ क ज कोई मिनख कोई पाड़ोसी भाईड़ा प झाळ काडै बिको न्याय होसी। अर ज कोई मिनख कोईकी बेजती करै बिको न्याय पंचायत करसी; अर ज कोई मिनख कोईनै बावळो खेवै बिनै परमेसर नरक की आग म गेरसी। इ ताँई जद बेदी प चढावो चढाती टेम तनै याद आवै क तेरा पाड़ोसी भाई का मन म तेरै खिलाप कुटळाई ह। जणा तू तेरा बि चढावानै बेदी क आगै धर'र पेल्या तेरा पाड़ोसी भाईऊँ मेळमिलाप करले अर बिकै पाछै तू तेरा चढावानै चढाजे। अर ज कोई तनै कचेरी म लेज्यावै जणा तू बिकै सागै गेला मई सुळजेटो कर लिए कदै अंय्यां नइ होज्या क बो तनै पंचा क सामै पेस करै अर पंच सिपाईड़ानै सूपै अर सिपाईड़ा तनै काळ-कोठड़ी म पटकै। म तनै सची बोलुँ हूँ ज तू एक बार बी काळ-कोठड़ी म चलेगो जणा जद ताँई तू पाई-पाई नइ चुका दे जद ताँई तू बठैऊँ कोनी छुट सकै।

“थे जाणो हो थानै ओडायो गयो हो क थे कुकरम मना करज्यो।” पण म थारूँ अंय्यां बोलुँ हूँ क ज कोई मिनख पराई लूगाईनै बुरी नजर्याऊँ देखै ह जणा बो आपका हिया म बि लूगाईऊँ कुकरम कर लिआ। इ ताँई ज तेरी दाइणी आँख तनै पाप करावै जणा तू बिनै फोड़ दे; क्युं क तेरै ताँई ओई भलो ह क तेरी काया को एक अंग नास होज्या पण तेरी सगळी काया नरक म जाबाऊँ बच जावै। अर ज तेरो दाइणो हात तनै पाप करावै जणा बिनै काट फेक; क्युं क तेरै ताँई ओई भलो ह क तेरी काया को एक अंग नास होज्या पण तेरी सगळी काया नरक की आग म जाबाऊँ बच जावै।


“थानै अंय्यां बी ओडायो गयो हो; क ज कोई आपकी लूगाईनै छोडबो चावै, जणा बिनै आपकी लूगाईनै तलाकनामो देणो चाए। पण सुणो, ज कोई मिनख आपकी लूगाईनै कुकरम क अलावा कोई ओर बजेऊँ छोडै ह अर बा लूगाई दुसरा मोट्यार क सागै रेह्‍वै जणा बिको कुकरमी होबा को जिमेबार बिको पेलड़ो मोट्यार ह अर बि छोडेड़ी लूगाईऊँ ब्या करबाळो बी कुकरम करै।

“थे आ बी जाणो हो क आपणा बडकानै ओडायो गयो हो क थे सोगन मना तोड़ज्यो पण बिनै परबु का नाम म पूरो करज्यो। पण म थानै खेऊँ हूँ क थे कदैई सोगन मना खाज्यो; नइ तो ईस्बर नगरी की क्युं क ओ परमेसर को सिंघासन ह। अर नइ इ धरती की क्युं क आ परबु क पगा की चोकी ह। अर नइ यरूसलेम नगरी की क्युं क इको राजा परमेसर ह। थे थारा सीर की सोगन बी मना खाज्यो क्युं क थे थारा बाळा मऊँ एक बी बाळ नइ तो धोळो अर नइ काळो कर सको हो। पण थारी बात ‘हाँ’ की ‘हाँ’ अर ‘ना’ की ‘ना’ हो। क्युं क जखो मिनख इकै अलावा क्युं बोलै ह जणा बो सेतान कानिऊँ ह।


“थे जाणो हो थानै ओडायो गयो हो क, ‘आँख क बदलै आँख अर दांत क बदलै दांत।’ पण म थारूँ खेऊँ हूँ थे थारै सागै बुराई करबाळा क सागै बुराई मना करज्यो। पण ज कोई थारै दाया गाल प थपड़ मारै जणा बिकै कानि दुसरो गाल बी आगै कर दिज्यो। अर ज कोई मिनख न्याय ताँई तेर प मुकदमो चलार तेरो कुर्तीयो लेबो चावै जणा बिनै तेरो कोट बी दे दिजे। अर जखो मिनख जबरदस्ती आपको समान तनै पकड़ा'र एक कोस पैदल लेज्यावै जणा बिकै सागै दो कोस चल्यो जाए। अर ज कोई मिनख तेरूँ क्युं माँगै जणा बिनै दिजे। अर ज कोई मिनख तेरूँ उधारो लेबो चावै जणा बिनै बी मना मत करजे।


“थारूँ ओ बी ओडायो गयो हो क, ‘थे थारा पड़ोसीऊँ परेम करज्यो अर थारा दुस्मनाऊँ नफरत करिओ।’ पण म थानै खेऊँ हूँ क थे थारा दुस्मनाऊँ परेम करज्यो। अर जखो थानै सतावै, बा ताँई बी अरदास करज्यो। जिऊँ थे ईस्बर नगरी म रेह्बाळा थारा परम-पिता की ओलाद बण सको। क्युं क परमेसर भला अर बुरा दोन्यु जंय्यां का मिनखा प सूरज को च्यानणो करै ह। अर धरमी अर पापी दोन्यु प म्हें बरसावै ह। अंय्यां म इ ताँई खेऊँ हूँ क्युं क ज थे थारूँ प्यार-परेम करबाळा क सागैई परेम करस्यो जणा थानै बिको काँई फळ मिलसी। अंय्यां तो चुंगी लेबाळा बी कोनी करै के? अर ज थे थारा भाई-भाणा किई आवभगत करो हो जणा इमै काँई गुण-एसान? अंय्यां तो परमेसरनै नइ ध्यारबाळा मिनख बी कोनी करै के? इ ताँई थानै सिद बणबो चाए, जंय्यां की ईस्बर नगरी म रेह्बाळो थारो परम-पिता सिद ह।

Escolta मत्ती 5