If you have would like a copy of this version please contact info@davarpartners.org

Pahari Mahasu New Testament, CC-BY-SA-4.0, The Love Fellowship (Text), Pahari Mahasu New Testament Audio Bible, CC-BY-SA-4.0, Davar Partners International, 2021 (Audio)

Pahari Mahasu New Testament

This work is licensed under Creative Commons Attribution-ShareAlike 4.0 License.

हेरोदेस राज़ै रै राज़ा दी ज़ेबी यहुदिया रै बैतलैहमा दी यीशु रौ जनम हुऔ, ता देखौ, पुर्वा कु कई ज्ञानी यरुशलेमा दी आशीयौ पुछ़दै लागै। यहुदिऊ रौ हुणै वाल़ौ राज़ौ ज़ासरौ जनम हुऔ सा, सेऊ कियै सा? कैलैकि आमुऐ पुर्वा दी तेसरौ तारौ देखौ आ ज़ो तेसरै पैदै हुणै रै बारै दी बोला और आमै तेसकै झुकियौ ढाल कौरदै आशै औन्दै। इणै शुणियौ हेरोदेस राज़ौ और तेस आइलै यरुशलेम शहरा रै भौरी लोग डौरी गौऐ। तैबै तिणीऐ लोगु रै सारै बौड़ै याजक और शास्त्री कौठै कौरीयौ तिऊंकु पुछ़ौ, की मसीह रौ जनम किऐ हुणौ च़ांई? तिंउऐ तेसलै बोलौ, “यहुदिया रै बैतलैहमा दी।” कैलैकि मीका नावां रै भविष्यवक्तै इणौ आ लिखौ औन्दौ कि,
“ओ बैतलैहमा दी बौसणै वाल़ेउओ, ज़ो यहुदा रै परदेशा दी आ, तू किणै कौरीऐ भी यहुदा रै सौभी अधिकारिऊ दी सौभी कु छ़ोटौ नाईं। कैलैकि ताऊं मांझ़िआ कु एक अधिपति निकल़ा सा, ज़ुण मेरी ज़ौण पौरज़ा इस्राइला रै लोगु री अगुवाई कौरालौ ज़ुण इस्राइला दी रौआ ई।”
तैबै हेरोदेसै सै ज्ञानी च़ुटुकच़ार औटाइयौ तिऊंकु पुछ़ौ, की तारौ ठीक केज़ै बौगतै दिशौ थौ। और तिणीऐ इणै बोलीयौ सै बैतलैहमा लै भेज़ै, “डैऔ, तेस मांऊ रै बारै दी ठीक-ठीक पौतौ कौरौ और ज़ेबी सेऊ मिला लौ ता मुकै खौबर कौरेऊ ताकी हाऊं भी आशीयौ तेसकै ढाल कौरु।”
सै राज़ै री बुशै शुणियौ डेई गौऐ, और देखौ, ज़ो तारौ तिंउऐ पुर्वा दी देखौ थौ, सेऊ तिऊंकु औगाड़ी-औगाड़िऐ च़ालौ, और ज़िऐ मांऊ थौ, तेस घौरा काऐ पौंउच़िऔ टेकी गौ। तेस तारै देखीयौ सै भौरी खुश हुऐ। और तेस घौरा दी पौउंच़ियौ सेऊ मांऊ तेसरी मां मरियम आइलै देखौ, और धौनी झुकियौ छ़ोहरु कै ढाल की, और आपणौ-आपणौ झ़ोल़ौ खोलियौ तेसकै सुनौ, और मुर्र, और खुशबुदार च़िज़ै भैंटा दी देई। और सुइणै दी सौरगदूतै तिउंलै इणौ हुकम दैऔ की हेरोदेसा काऐ औज़ौ ना डेवेऊ, तैबै सै दुजी बाटा दी आपणै देश मिस्रा लै डेई गौऐ।

तिंउरै डेउणै बासिऐ प्रभु रै एकी दूतै सुइणै दी पौगड़ौ हुइयौ युसुफा लै बोलौ, “उठ, एस मांऊ और एसरी मां कौरी मिस्र देशा लै डेऊ। और ज़ेबी झ़ांऊ हाऊं ताउंकै नाईं बोलु लौ तेबी झ़ांऊ तिऐ रौऊ। कैलैकि हेरोदेस एस मांऊ आ लोड़दै लागौ औन्दौ ताकी एस पोरु झ़ांगा।” तैबै युसुफै दोउत राची ई उठीयौ मांऊ और तेसरी मां आपु आइलै मिस्र देशा लै निऐं, और सै हेरोदेसा रै मौरणै झ़ांऊ तिऐ ई रौऐ। एथीलै की सेऊ वचन ज़ो प्रभुऐ भविष्यवक्ता रै ज़ौरिऐ बोलौ औन्दौ थौ पुरौ हुऔ, “मुंइऐ आपणौ छ़ोहरु मिस्रा कु औटाऔ।”

ज़ेबी हेरोदेस ज़िउंदौ थौ ता तिणीऐ देखौ, की धौर्मा रै गुरुऐ तेस आइलै धोखौ कियौ आ, तैबै सेऊ रोशा कौरी भौरुऔ, और लोग भेज़ीयौ धौर्मा रै गुरु रै ज़ौरिऐ ठीक-ठीक बोलै औन्दै बौगता रै मुताबिक बैतलहम और तेसरै ओरु-पोरु री ज़ागाह रै सौभी मांऊ ज़ो दुई साला रै या तिऊंकु छ़ोटै थै, झ़ौंगाई गौऐ। तैबै ज़ो वचन यिर्मयाह भविष्यवक्तै थौ बोलौ औन्दौ, सेऊ पुरौ हुऔ, “रामाह दी एक राड़, लेरणै और बौड़ै दु:खा री शुणुई। राहेल आपणै लोल़डेऊ लै थी लेरदै लागी औन्दी, और च़ुटुक रौइणौ नाईं च़ाहा थी, कैलैकि सै सारै मौरी गौऐ थै।”

हेरोदेसा रै मौरणै बासिऐ, प्रभु रै दूतै मिस्रा दी युसुफा कै सुइणै दी पौगड़ौ हुइयौ बोलौ, “उठ मांऊ और तेसरी मां नीईंयौ इस्राइला रै देशा दी डेऊ, कैलैकि ज़ो मांऊ रौ प्राण निणौ च़ाहा थौ, सेऊ मौरी गौ आ।” सेऊ उज़ुऔ, और मांऊ और तेसरी मां आपु आइलै नीईंयौ इस्राइल देशा दी आशौ। पर इणै शुणियौ की अरखिलाउस आपणै बाब हेरोदेसा री ज़ागाह दी यहुदिया माथै राज़ कौरदै आ लागौ औन्दौ। ता युसुफ तिऐ डेउणा लै डौरौ। तैबै सुइणै दी परमेश्‍वरा कु हुकम मिलियौ गलील परदेशा दी डेई गौ, और नासरत नावां रै गांवा दी डेइऔ बौसौ, ताकी सेऊ वचन पुरौ हुआ, ज़ो भविष्यवक्तु री तौरफा कु बोलौ औन्दौ थौ कि, “तेसलै नासरी बोलाई।”

Escolta मत्ती 2