Iranian Azeri Bible

ائنسانلار یِر اوزونده چوخالماغا باشلادیلار و اونلارا قیزلار دوغولدو. ائلاهی وارلیقلار گؤردولر کی، ائنسان قیزلاری چوخ گؤزلدئرلر و بَیَندئکلری هر قیزی اؤزلرئنه آرواد اتدئلر. رب ددی: «منئم روحوم ائنساندا اَبده‌جک قالمایاجاق، چونکی اونلار آنجاق جئسمدئرلر. اونلارین عؤمرو یوز ائیئرمی ائل اولاجاق.»
ائلاهی وارلیقلارین ائنسان قیزلاری ائله اِوله‌نئب اوشاق صاحئبی اولدوقلاری گونلرده، و داها سونرا، یر اوزونده «نِفئلئم» وار ائدی. بونلار قدئم دؤورانین قهرمان و آدلی-سانلی آداملاری ائدئلر.
رب گؤردو کی، یر اوزونده ائنسانین شرارتی بؤیوکدور و هر زامان اونون اوره‌یئنده‌کی فئکئرلرئن نئیّتلری آنجاق پئسلئکدئر. او، یِر اوزونده ائنسانی یاراتماغینا پشمان اولدو و اوره‌یئنی قم باسدی. رب ددی: «یاراتدیغیم ائنسانی یر اوزوندن محو اده‌جیم، بونو ائنسانلارلا بئر، حیوانلارین، سوروننلرئن و گؤیده‌کی قوشلارین دا باشینا گتئره‌جیم، چونکی اونلاری یاراتماغیما پشمان اولموشام.» آنجاق نوح ربّئن گؤزونده لوطف تاپدی.
نوحون تارئخچه‌سی بله‌دئر: نوح صالح و اؤز نسلی آراسیندا قوصورسوز بئر آدام ائدی. او، تارییا یاخین یاشاییردی. نوحون اوچ اوغلو وار ائدی: سام، خام و یافِت. تارینین نظرئنده یر اوزو فسادا چکئلمئش و قدّارلیقلا دولموشدو. تاری یر اوزونده ائنسانلارین نه قدر چوخ فاسئد اولدوقلارینی گؤردو، چونکی دونیادا اولان بوتون بشر یولدان آزمیشدی.
تاری نوحا ددی: «قاباغیمدا اولان بوتون بشرئن آخیری چاتیب، چونکی یر اوزو اونلارین سببئندن قدّارلیقلا دولوب. باخ، من اونلاری یر اوزو ائله بئر محو اده‌جیم. اؤزونه گوفِر آغاجیندان بئر گمی دوزَلت، اونون ائچئنده اوتاقلار دوزَلت، اوستونه ائچه‌رئدن و چؤلدن قَطران وور. گمئنی بله دوزَلت: اونون اوزونلوغو اوچ یوز قول‌‌آچ، اِنی اَلّی قول‌آچ، بویو دا اوتوز قول‌‌آچ اولسون. گمئنئن اوستوندن بئر قول‌آچ آشاغی پنجره آچارسان و قاپینی یان طرفدن قویارسان. گمئنئن اوچ مرتبه‌سی اولسون: بئری آلتدا، بئری اورتادا، بئری ده اوستده.
باخ، من، بلی من، یر اوزونه سلی گتئرئرم کی، گؤیون آلتیندا حیات نَفَسی اولان بوتون جانلی‌لار محو اولسونلار؛ یر اوزونده اولانلارین هامیسی آرادان گده‌جک. لاکئن عهدئمی سنئنله باغلایاجاغام. سن، اوغوللارین، آروادین و گلئنلرئنله بئر گمئیه مئنه‌جکسن. بوتون جانلی مخلوقلاردان بئر جوتونو، اِرکَک و دئشئسئنی گمئیه گؤتورَرسن کی، سنئنله بئر دئری قالسینلار. جئنسلرئنه گؤره قوشلارین، حیوانلارین و یرده سوروننلرئن هر بئرئندن بئر جوتو سنئن یانینا گله‌جک کی، دئری قالسین. سن گرک یِمه‌لی اولان هر شیی ده گؤتوروب، آنبار اده‌سن؛ اونلار هم سنه هم ده اونلارا یمک اولارلار.»
نوح دا اله اتدی: تاری اونا نجه امر اتمئشدی، او دا هر شیی اِله‌جه یرئنه یتئردی.

Escolta یارادیلیش 6