ROMANOS 4

Abraham oyapogüe

1¿Mbae pa yaeta? ¿Ñaneñemuñagüe Abraham mbae pa oväe opaete oyapo vae rupi? 2Echa Abraham oyembojupi yave mona oyapogüe rupi, oyemboeteta tëi ko. Ërei mbaeä eteita Tumpa jóvai. 3Echa Tumpa Iñee pe oyekuatía oï körai: “Abraham güɨrovia Tumpa re, jókuae iporogüɨrovia rupi omae jese jupi.”#Gn 15.6; Gl 3.6. 4Ërei oparavɨkɨ vae pe oyemboepɨ vae, mbotaä ko, omonganagüe ko. 5Ërei kia mbae oyapombae reve güɨrovia jókuae iyoa vae ombojupi vae re yave, jókuae iporogüɨrovia rupi Tumpa omae jese jupi. 6Jáeramo David jei, kërai oyerovia katu ko jókuae mbae oyapombae reve Tumpa ombojupi vae, 7echa jei:

“Oyerovia ko jókuae iyoa reta re Tumpa iñɨ̈ro chupe vae reta.

Jare iyoa reta oyemboai oï vae reta.

8Oyerovia kuimbae, Tumpa mbaetɨ omboeko mbaeyoa re vae.”#Sal 32.1-2.

9Kuae yerovia ¿oyembocircuncidauka vae reta peguaño ra?, ani ¿oyembocircuncidaukambae vae reta pegua vi ra? Echa yae ma, kërai Abraham iporogüɨrovia rupi Tumpa omae jese jupi. 10Ërei ¿kërai yave ra omae jese jupi? ¿Oyembocircuncidauka ma yave ra?, ani ¿ndeiño oyembocircuncidauka mbove ra? Ndei oyembocircuncidauka yave ko. 11Jaɨkue rupi oyembocircuncidauka,#Gn 17.10. oikuaauka vaerä Tumpa ombojupi ko iporogüɨrovia rupi ndei oyembocircuncidauka mbove. Jökorai Abraham ou opɨta opaete oporogüɨrovia vae oyembocircuncidaukambae vae reta tu rami. Jökorai jae reta iporogüɨrovia rupi Tumpa omae vaerä jese jupi; 12jaeramiño vi Abraham ko opaete oyembocircuncidauka vae reta tu rami. Jókuae güɨnoi mborogüɨrovia, ñaneñemuñagüe Abraham ndei oyembocircuncidauka mbove güɨnoi mborogüɨrovia vae rami vae reta.

Morogüɨrökuavee oyembopo mborogüɨrovia rupi

13Echa Tumpa güɨrökuavee Abraham jare iñemuña reta pe omee vaerä imbaerä ɨvɨ.#Gn 17.4-6; 22.17-18; Gl 3.29. Ërei mbaetɨ güɨrökuavee chupe reta mborookuai jei vae oyapo reta ramo, omee ko chupe reta iporogüɨrovia rupi omae jese jupi ramo. 14Echa Tumpa omee yave mona ɨvɨ, mborookuai oyapo vae reta imbaerä, jökorai yave mborogüɨrovia osiriveä ma ko jare Tumpa güɨrökuavee vae.#Gl 3.18. 15Echa mborookuai rupi oime arasɨ; ërei mbaetɨ mborookuaía pe, mbaetɨ vi kia oyavɨ.

16Jáeramo, morogüɨrökuavee oyeapo Abraham pe jare opaete iñemuña reta pe vae Tumpa ipɨakavi rupi ko mborogüɨrovia re, kuae mbaetɨ opaete mborookuai rupi yogüɨreko vae reta peguaño, oporogüɨrovia Abraham rami vae reta peguarä vi ko, echa jökorai jae ou opɨta yanderu rami.#Gl 3.7. 17Echa oyekuatía oï körai: “Che roñono ma jeta vae reta turä.”#Gn 17.5. Jae Tumpa, Abraham güɨrovia jese vae, tekove omee omanogüe reta pe vae, oyapo mbaembae ndeiño oyeapo vae.

18Abraham oäro ñaäro rapembae vae, ërei Tumpa re güɨrovia jeko pegua, ou opɨta jeta vae reta turä, echa Tumpa jei chupe körai: “Jökoraita ko neñemuña reta.”#Gn 15.5. 19Cien año#Gn 17.17. seri ma Abraham güɨnoi yave, oikuaa mbaetɨ ma ipuere jare Sara imembɨmbae vae imembɨ rapeä ma ko. 20Ërei güɨrovia Tumpa iporogüɨrökuavee re, oñemomɨ̈rata jare omboete Tumpa. 21Echa jae oikuaa katu Tumpa imbaepuere yae ko oyapo vaerä opaete jae güɨrökuavee vae. 22Jáeramo, iporogüɨrovia rupi Tumpa omae vaerä jese jupi.

23Jare kuae iporogüɨrovia rupi Tumpa omae vaerä jese jupi vae, mbaetɨ oyekuatía Abraham reguaño, 24oyekuatía vi yanderé, echa yandeporogüɨrovia rupi Tumpa omae vi yanderé jupi; kuae ko, yarovia Tumpa omoingove ye yandeYa Jesús omanogüe reta ipɨte güi vae re vae; 25echa jae oñemee omano vaerä yandeyoa#Is 53.4-5. reta re jare oikove ye yandembojupi vaerä.

বর্তমানে নির্বাচিত:

ROMANOS 4: GUABD

হাইলাইট

কপি