SAN LUCAS 22
22
Oyomboemboe reta oyuka vaerä Jesús
(Mt 26.1-5,14-16; Mc 14.1-2,10-11; Jn 11.45-53)
1Jare arete Pascua#Ex 12.1-27; Dt 16.1-8. oyearo ma oï. Jókuae ara pe judío reta jou mbɨyape oyembovumbae. 2Jayave sacerdote reta itenondegua reta jare mborookuai re oporomboe vae reta oeka kërai oyuka vaerä Jesús. Ërei okɨɨye opaete vae reta güi.
3Jayave Satanás oya Judas Iscariote re, jae ko doce vae reta güi metei. 4Jayave Judas ojo sacerdote reta itenondegua reta jare tupao iyangarekoa reta itenondegua ndive imiari jae reta ndive kërai omee vaerä Jesús chupe reta. 5Jayave jae reta oyerovia, jare jei reta Judas pe omeeta ko chupe korepoti. 6Jayave Judas oñererökuavee omee vaerä Jesús chupe reta. Jare oeka kërai omee chupe reta vaerä opaete vae reta oikuaambae reve.
Jesús oyapo Santa Cena jemimboe reta ndive
(Mt 26.17-29; Mc 14.12-25; Jn 13.21-30; 1 Co 11.23-26)
7Jare ou oväe arete oyeu vaerä mbɨyape oyembovumbae; jókuae arete pe oyeyukañoi vecha kuimbae taɨrusu vae Pascua pegua. 8Jayave Jesús jei Pedro jare Juan pe:
—Pekua peyapo kavi yau vaerä vecha kuimbae taɨrusu vae isoo Pascua pegua.
9Jayave jei reta chupe:
—¿Kia pe pa reipota royapo kavi?
10—Mase, peo peväe yave tëta guasu pe, peövaitita metei kuimbae ɨ güɨraja ɨru pe vae. Pekua jaɨkue o pe oike regua. 11Jayave pere jókuae o iya pe: “Oporomboe vae jei ndeve: ‘¿Kia pe pa oime oï o, joko pe jau vaerä vecha kuimbae taɨrusu vae isoo Pascua pegua cheremimboe reta ndive?’ ” 12Jayave o iya oechaukata peve metei cuarto tuicha vae joɨvate pe, oï kavi ma vae. Joko pe peyapo kavi yandeve.
13Jayave yogüɨraja reta, jare oväe Jesús jei chupe reta rami. Jare oyapo kavi reta vecha kuimbae taɨrusu vae isoo Pascua pegua jou reta vaerä.
14Jare oväe ma ora yave, Jesús oguapɨ mesa pe jókuae jemimondo reta ndive. 15Jayave jei chupe reta:
—Chekɨ̈reɨ yae ko jau vecha kuimbae taɨrusu vae isoo Pascua pegua pe reta ndive, ndei amano mbove. 16Che jae peve, ngaraa ye jau, oyembopo regua Tumpa iporookuaía pe.
17Jayave Jesús oipɨɨ kopa, jare omee yasoropai Tumpa pe jese, jare jei:
—Peu kuae vino opaete pe reta. 18Che jae peve, ngaraa ye ma jau uva tɨgüegüe, Tumpa iporookuaía ou ye regua.
19Javoi Jesús oipɨɨ mbɨyape, jare omee yasoropai Tumpa pe jese. Jare opɨ̈saa mbɨyape omee chupe reta, jei reve:
—Kuae ko jae cherete, oñemeeta peré vae. Peyapo kuae pemaendúa cheré vaerä.
20Jaeramiño vi oipɨɨ kopa, opa ma okaru reta yave, jei reve:
—Kuae vino ko jae morogüɨrökuavee päve ipɨau vae#Jer 31.31-34. cherugüɨ rupi oyeapota vae. Oyepɨyereta peré vae.
21Ërei yandepɨte pe oguapɨ oï#Sal 41.9. cherovaicho reta pe chemeeta vae. 22Añete ko, che Kuimbaerä ayeapo vae pe oyeapo ñotai ko Tumpa jei oyeapota cheve vae. Ërei, ¡paravete jókuae kuimbae chemboeterengata vae!
23Jayave jemimboe reta omboɨpɨ oyoaka oyoupii, kia ra chugüi reta oyapota jókuae.
¿Kia pa jae tenondegua?
24Jare Jesús jemimboe reta omboɨpɨ oyoaka oyoupii kia ra chugüi reta tenondeguarä#Mt 18.1; Mc 9.34; Lc 9.46. 25Ërei Jesús jei chupe reta: “Mburuvicha guasu reta güɨnoi mbaepuere jëtaguasu reta re.#Mt 20.25-27; Mc 10.42-44. Jare opaete vae reta ombotuicha. 26Ërei pe reta ndive mbaetɨta jökorai. Pepɨte pe tuichagüe vae, toyeapo taɨkuegua rami, jare tenondegua vae, toyeapo metei tembiokuai#Mt 23.11; Mc 9.35. rami. 27Echa mesa pe oguapɨ okaru vaerä vae ko tenondegua tembíu güeru vae güi. Ërei che aï pepɨte pe ayeokuai#Mt 20.28; Mc 10.45; Jn 13.12-15. peve vaerä.
28Pe reta peiko che ndive opaete kuae aiporara ramboeve. 29Jáeramo che poñono ma peiko vaerä Tumpa iporookuaía pe, cheRu cheñono rami. 30Pekaru vaerä chemesa pe cheporookuaía pe. Jaeramiño vi penoita mbaepuere pejäa vaerä jókuae doce ñemuña#Mt 19.28. Israel pegua reta.”
Pedro oikuakuta Jesús
(Mt 26.31-35; Mc 14.27-31; Jn 13.36-38)
31YandeYa jei Simón pe:
—Simón, Simón, mase, Satanás oyerure ma peré, pemboyao vaerä trigo oyembogua rami. 32Ërei che ayerure ma nderé, agüɨye vaerä oata ndeporogüɨrovia. Jare reyerova ye yave, emborɨ nderɨvɨ reta ipɨ̈rata vaerä iporogüɨrovia pe.
33Jayave Pedro jei Jesús pe:
—CheYa, ajata ko nde ndive, mbaetɨta tembipɨɨrɨru peño, tamano vi nde ndive.
34Jayave yandeYa jei chupe:
—Che jae ndeve Pedro, ndei takareo oñee mbove, mboapɨ vese ma chekuakuta mbaetɨ ko chekuaa vae.
Mbaembae oyereraja vae regua
35Jayave Jesús jei jemimboe reta pe:
—Che pomondo yave, pekorepotimbae, peaporokambae jare pepɨapaambae,#Mt 10.9-10; Mc 6.8-9; Lc 9.3; 10.4. ¿oata pa mbae peve?
Jae reta jei:
—Mbaetɨ.
36Jayave Jesús jei ye chupe reta:
—Ërei añave: Korepotirɨru güɨnoi vae togüɨraja, jare aporoka vi. Jare mbaetɨ güɨnoi kɨsepuku vae, tomee jemimonde, ogua vaerä metei kɨsepuku. 37Echa che jae peve, oyeapotai ko cheve Tumpa Iñee pe oyekuatía oï cheré vae. Echa jei körai: “Oyepapa iyoa vae reta ndive.”#Is 53.12. Echa oyekuatía oï cheregua vae, oyembopota ko.
38Jayave jae reta jei chupe:
—Mase, oreYa, oime rogüɨnoi mókoi kɨsepuku.
Jare jae jei:
—Ikaviño ma ko.
Jesús oyerure Getsemaní pe
(Mt 26.36-46; Mc 14.32-42)
39Jayave Jesús oë ojo ɨvɨtɨ Olivo pe, ojoñoi rami. Jare jemimboe reta vi yogüɨraja jae ndive. 40Jare ojo oväe joko pe yave jei jemimboe reta pe:
—Peyerure Tumpa pe agüɨye vaerä peyoa.
41Jayave Jesús osɨrɨ katu chugüi reta, ita oyemombo vae oa ojo ramía pe, jare oyetavatɨka oyerure Tumpa pe. 42Jei reve: “CheRu, nde reipota yave, emboasa chegüi kuae aiporarata vae. Ërei toyeapo cheve nde rere vae. Agüɨye toyeapo che jae vae.”
43Jayave oyekuaa Jesús pe metei araɨgua omomɨ̈rata vaerä. 44Jesús oiporara yae oï, jare jeiete oyerure Tumpa pe. Jɨai oa ɨvɨ re tugüɨ tuicha otɨkɨ rami.
45Jare opa oyerure güire, opüa jare ou ye jemimboe reta ñogüɨnoia pe yave, oecha oke ñogüɨnoi ipɨatɨtɨ güi. 46Jayave Jesús jei chupe reta:
—¿Maera pa peke peï? Pepüa peyerure Tumpa pe, agüɨye vaerä peyoa.
Oipɨɨ reta Jesús
(Mt 26.47-56; Mc 14.43-50; Jn 18.2-11)
47Jare imiari vɨteri oï ramboeve, oyekuaa jeta vae. Jare Judas, doce vae güi metei vae ou jókuae jeta vae jenonde. Ou oväe Jesús oïa pe yave, oovapɨte. 48Jayave Jesús jei chupe:
—Judas, ¿metei yeovapɨte rupi pa che Kuimbaerä ayeapo vae chemee kuae reta pe?
49Jare jemimboe reta ñogüɨnoi jae ndive vae, oecha mbae oyeapota chupe vae ramo, jei Jesús pe:
—OreYa, ¿roiporuta pa kɨsepuku jese reta?
50Jayave metei Jesús jemimboe oiporu ikɨsepuku sacerdote tenondegua jembiokuai re, jare oyasɨa inambi iyakatu kotɨgua chugüi. 51Jayave Jesús jei:
—Joko peño mo. Pemaeño jese.
Jayave oyavɨkɨ kuimbae inambi, jare ombogüera.
52Jare Jesús jei sacerdote reta itenondegua reta, tupao iyangarekoa reta itenondegua reta jare tëta guasu pegua reta itenondegua reta yogüeru ikotɨ vae reta pe:
—¿Maera pa peyu kɨsepuku jare ɨvɨra reta ndive, imonda vae kotɨ rami? 53Ara ñavo aiko pe reta ndive tupao pe,#Lc 19.47; 21.37. ërei mbaetɨ chepɨɨ. Ërei ora oväe ma peve chepɨɨ vaerä, Satanás imbaepuere rupi.
Pedro oikuaku Jesús
(Mt 26.57-58,69-75; Mc 14.53-54,66-72; Jn 18.12-18,25-27)
54Jayave oipɨɨ reta Jesús jare güɨraja sacerdote tenondegua ete jëta pe. Jare Pedro ojo jaɨkue, ërei mombɨrɨño oiko chugüi. 55Jare jókuae sacerdote tenondegua ete joka mbɨte pe oyatapɨ reta. Jare Pedro vi oguapɨ joko pe jae reta ipɨte pe. 56Ërei metei tembiokuai kuña oecha Pedro oguapɨ oï tataɨpɨ pe yave, omae ngatu jese. Jare jei:
—Kuae kuimbae vi oiko jae ndive.
57Jayave Pedro oikuaku Jesús jei reve:
—Mbaetɨ aikuaa jókuae kuimbae.
58Ndei ɨma mbove ïru vae oecha Pedro yave jei:
—Nde jae vi ko jae reta ïru.
Jare Pedro jei:
—Mbaetɨ ko.
59Jare metei ora rupi, ïru kuimbae jei ye:
—Añetete ko, kuae kuimbae oiko vi jae ndive. Echa Galileaɨgua ko.
60Jare Pedro jei:
—Mbaetɨ aikuaa mbae rere reï vae.
Jare imiari vɨteri oï ramboeve, takareo oñee. 61Jayave yandeYa oyerova omae Pedro re. Jayave Pedro imaendúa yandeYa jei chupe vae re: “Ndei takareo oñee mbove, mboapɨ ye ma chekuakuta.” 62Jayave Pedro oë joko güi, jare ipɨatɨtɨ yae reve oyaeo.
Oyuvanga reta Jesús re
(Mt 26.67-68; Mc 14.65)
63Jare Jesús järoa reta oyóyai jare oinupa. 64Jayave jae reta oesa yokua Jesús jare okua jova re. Jayave jei reta chupe:
—Emombeu oreve kia ra okua oï nderé vae.
65Jare jeta mbae ikavimbae vae jei reta chupe.
Güɨraja reta Jesús mburuvicha reta jóvai
(Mt 26.59-66; Mc 14.55-64; Jn 18.19-24)
66Jare köe ma yave, tëta guasu pegua reta itenondegua reta jare sacerdote reta itenondegua reta jare mborookuai re oporomboe vae reta oyomboatɨ. Jare güeru reta Jesús jókuae reta jóvai jare jei reta chupe:
67—Ere oreve, ¿nde pa ko jae Cristo?
Jare Jesús jei:
—Che amombeu yave peve, ngaraa chererovia. 68Jare che aparandu yave peve mbae re, ngaraa pemombeu cheve, ani ngaraa vi cheyora. 69Ërei che Kuimbaerä ayeapo vae añave güive aguapɨ Tumpa imbaepuere vae iyakatu kotɨ.
70Jare opaete jae reta oparandu chupe:
—¿Jayave nde pa ko jae Tumpa Taɨ?
Jesús jei chupe reta:
—Pere ma ko pe reta etei.
71Jayave jae reta jei:
—¿Mbaerä ye pa yaekata ïru vae imiari vaerä jese? Echa yande etei ma yaendu jeigüe vae.
বর্তমানে নির্বাচিত:
SAN LUCAS 22: GUABD
হাইলাইট
শেয়ার
কপি
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
