SAN JUAN 1

Ñee oyeapo Kuimbaerä

1Iyɨpɨ ete pe oiko Ñee. Jare jókuae Ñee oiko Tumpa ndive. Jae ko Tumpa etei. 2Jókuae Ñee oiko Tumpa ndive iyɨpɨ ete pe. 3Opaete mbaembae jae etei oyapo.#Gn 1.1-3; Sal 33.6; Pr 8.22-31; Col 1.15-17; Heb 1.2; 1 Jn 1.1; Ap 19.13. Jae oyapombae reve mbaetɨi mbae oyeapogüe. 4Jese ko oï tekove, jare jókuae tekove jae ko tembipe ɨvɨ pegua reta pe. 5Tembipe pɨtumimbi pe jembipe, jare pɨtumimbi ipuereä etei ombogüe.

6Oiko metei kuimbae Juan#Mt 3.1; Mc 1.4; Lc 3.1-2. jee vae Tumpa ombou vae. 7Jae ou omombeu vaerä jókuae tembipe regua, opaete vae reta güɨrovia vaerä jei vae rupi. 8Juan jaeä ko jókuae tembipe. Jae ko ou jókuae tembipe re omombeu vaeräño. 9Jókuae tembipe añetete pegua vae, omboesape opaete vae reta re vae ou kuae ɨvɨ pe.

10Jae oiko kuae ɨvɨ pe, jae rupi oyeapo kuae ɨvɨ. Ërei ɨvɨ pegua reta mbaetɨ oikuaa. 11Ou jëtaɨgua reta pɨri, ërei jëtaɨgua reta mbaetɨ omboresive. 12Ërei opaete omboresive vae reta, güɨrovia jese vae reta pe, omee ipuere vaerä yogüɨreko Tumpa taɨ retarä ani tayɨ retarä. 13Tumpa etei kuae oyapo, mbaetɨ ou reta ichɨ ani tu rupi, jaeño ou Tumpa jemimbota rupi.

14Jókuae Ñee oyeapo Kuimbaerä, jare ou oiko orepɨte rupi mbɨakatu ndive jare añetegüe rupi. Jare ore roecha iyemboetea, Tumpa Taɨ jae vaeño vae iyemboetea. 15Juan imiari jese ïru vae reta pe, jei reve: “Kuae ko jae chemiari jese vae, jae yave: ‘Cheraɨkue rupi outa vae, jae ko tuichagüe yae chegüi vae, echa oikoño mai ndei aiko mbove.’ ”

16Echa ipɨakavi yae güi yamboresive avei jekuaekuae iporerekua reta. 17Moisés rupi oñemee mborookuai. Ërei Jesucristo rupi ou, Tumpa ipɨakavi jare añete vae. 18Mbaetɨi kia oecha Tumpa vae. Ërei Tumpa Taɨ jaevaeño vae, oiko jae ndive etei vae oikuaauka yandeve.#Mt 11.27; Lc 10.22; 1 Jn 1.2.

Juan oporombobautisa vae omombeu vae

(Mt 3.11-12; Mc 1.7-8; Lc 3.15-20)

19Kuae ko jae Juan omombeu vae, judío reta Jerusalén pegua omondo yave sacerdote reta jare levita reta oparandu vaerä chupe, kia ra jae vae.

20Jare Juan omombeu kavi chupe reta, jei:

—Che jaeä ko Cristo.

21Jae reta oparandu ye chupe:

—Jayave, ¿nde pa ko jae Elías?#Mal 4.5.

Juan jei:

—Jaeä ko che.

Jei reta chupe:

—¿Nde pa ko jókuae ñeemombeúa?#Dt 18.15,18.

Juan jei chupe reta:

—Jaeä ko che.

22Jayave oparandu reta ye chupe:

—Jayave ¿kia pa nde? Romombeu vaerä orembou vae reta pe. ¿Mbae pa rere ndeyé?

23Jayave Juan jei:

—Che ko jae metei ñuu pe asapúkai reve jae vae: “Pembosɨmbi yandeYa japerä.” Ñeemombeúa Isaías#Is 40.3. jei rami.

24Kuae Juan oïa pe yogüɨraja vae reta fariseo reta ko. 25Oparandu reta Juan pe:

—¿Maera pa reporombobautisa? Nde jaeä ko Cristo ani Elías ani jókuae ñeemombeúa yave.

26Juan jei chupe reta:

—Che aporombobautisa ɨ pe. Ërei pepɨte pe oime oï metei mbaetɨ peikuaa vae. 27Jae ko tuichagüe yae chegüi vae, mbaetɨ jupi che ipɨapaa iïcha ayora vaerä ave vae.

28Opaete kuae oasa Betábara pe, ɨ̈aka Jordán jovaicho pe, Juan oporombobautisaa pe.

Jesús, Tumpa iVecha kuimbae taɨrusu vae rami vae

29Pɨareve pe Juan oecha Jesús ou ikotɨ jare jei: “Mase, kuae ko jae Tumpa iVecha kuimbae taɨrusu vae. Omboai opaete ɨvɨ pegua reta iyoa vae. 30Kuae ko jae chemiari jese vae, jae yave: ‘Cheraɨkue rupi outa vae, jae ko tuichagüe yae chegüi vae, echa oikoño mai ndei aiko mbove.’ 31Che mbaetɨ aikuaa kia ko jae vae. Ërei ayu aporombobautisa ɨ pe Israel pegua reta oikuaa vaerä.”

32Juan omombeu vi chupe reta, jei: “Aecha Espíritu ogüeyɨ ara güi jese pɨkasu rami. 33Che mbaetɨ aikuaa kia ko jae vae. Ërei chembou aporombobautisa vaerä ɨ pe vae jei cheve: ‘Reecha Espíritu ogüeyɨ jese vae, jae ko jókuae kuimbae oporombobautisa Espíritu Santo pe vae.’ 34Jókuae aecha jare amombeu peve, jae ko jókuae Tumpa Taɨ.”

Jesús jemimboe ɨpɨ reta

35Pɨareve pe Juan oï ye joko pe mókoi jemimboe reta ndive. 36Jare oecha Jesús oasa jokoropi yave jei:

—Mase, kuae ko jae Tumpa iVecha kuimbae taɨrusu vae.

37Jare jókuae mókoi jemimboe oendu yave, yogüɨraja Jesús jupíe. 38Jesús oyerova yave, oecha yogüeru jupíe, jare jei chupe reta:

—¿Mbae pa peeka?

Jae reta jei chupe:

—Oporomboe vae, ¿kia pe pa reiko?

39Jesús jei chupe reta:

—Peyu jare peecha.

Jayave yogüɨraja oecha Jesús oikoa, jare opɨta jókuae ara jae ndive. Echa kaaru yae ma. 40Andrés, Simón Pedro tɨvɨ jae ko metei jókuae mókoi vae güi oendu Juan jei vae jare ojo Jesús jupíe vae. 41Andrés, tenonde oeka tɨkeɨ Simón, jare jei chupe:

—Roväe ma Mesías (kuae oipota jei: Cristo.) 42Jayave Andrés güeru Simón Jesús oïa pe. Jesús omae ngatu Simón re jare jei:

—Nde ko jae Simón, Jonás taɨ. Ndereeta Cefas (kuae oipota jei: Pedro.)

Jesús oenɨi Felipe jare Natanael

43-44Pɨareve pe Jesús oipota ojo Galilea pe. Jare oväe Felipe Betsaida pegua. Andrés jare Pedro jëta guasu pegua. Jesús jei Felipe pe:

—Eyu cherupíe.

45Jayave Felipe oväe Natanael jare jei chupe:

—Roväe jókuae Moisés oikuatía jesegua mborookuai pe vae. Jare ñeemombeúa reta. Jae ko Jesús, José Nazaret pegua taɨ.

46Jayave Natanael jei:

—¿Oime ra mbae ikavi vae oë vaerä Nazaret güi?

Felipe jei:

—Eyu emae jese.

47Jesús oecha Natanael ou ikotɨ yave, jei:

—Mase, ko ou metei Israel pegua añete vae. Mbaetɨ oñeväe yembotavɨ jese vae.

48Natanael oparandu Jesús pe:

—¿Kërai pa chekuaa?

Jesús jei chupe:

—Ndei Felipe nereenɨi mbove, ɨva igüɨ pe reï yave, che roecha.

49Jayave Natanael jei chupe:

—Oporomboe vae. ¡Nde ko jae Tumpa Taɨ.#Mt 16.15. Nde ko jae Israel pegua reta Juvicha guasu!

50Jesús jei chupe:

—¿Amombeu ndeve che roecha ɨva igüɨ pe jeko pegua pa reporogüɨrovia? Reechata mbae tuichagüe kuae reecha vae güi. 51Añetete che jae ndeve, reechata ara oyepea oï, jare reechata vi Tumpa iaraɨgua reta oyeupi jare ogüeyɨ che Kuimbaerä#Gn 28.12. oyeapo vae re.

বর্তমানে নির্বাচিত:

SAN JUAN 1: GUABD

হাইলাইট

কপি