HECHOS 6

Chiu kuimbae reta oyeparavo tupao pe oporomborɨ vaerä

1Jókuae ara reta rupi jeiete jeta oñemoïru oporogüɨrovia vae reta yave, griego reta#6.1 Griego reta, kuae reta ko judío reta ketɨ güi yogüeru vae, ñee griego pe imiari vae. iñeenguru hebreo reta kotɨ. Echa mbaetɨ oyangareko kavi reta jëtaɨgua imemano vae reta re, ara ñavo oñemee tembíu yave. 2Jayave jókuae doce temimondo reta omboatɨ opaete jókuae jeta oporogüɨrovia vae reta, jare jei chupe reta:

—Mbaetɨ jaekavi roeya vaerä Tumpa iñee romoërakua vae, royangareko vaerä roiko tembíu oyemboyao vae re. 3Jáeramo peiparavo pepɨte güi, chiu kuimbae reta jërakua kavi vae reta, tɨnɨe Espíritu Santo pe jare iyarakuaa katu vae reta. Jae reta toyapo kuae mbaravɨkɨ. 4Ërei ore jeiete royerureta jare romombeuta Tumpa iñee.

5Kuae jaekavi jeta vae reta pe, jare oiparavo reta Esteban jae ko kuimbae iporogüɨrovia kavi jare tɨnɨe Espíritu Santo pe vae, Felipe, Prócoro, Nicanor, Timón, Parmenas jare Nicolás tëta guasu Antioquía pegua judiorä oyeapo vae.#6.5 Judiorä, jae ko judiombae omboresive judío reta iporogüɨrovia vae (Mt 23.15). 6Jare güeru reta kuae oiparavogüe reta temimondo reta jóvai. Jayave jae reta oyerure Tumpa pe oñono reve ipo jese reta.

7Jare Tumpa iñee jeiete oñemoai. Jare jeiete jeta yae oporogüɨrovia Jerusalén pe vae, jare jeta sacerdote reta ave vi oporogüɨrovia.

Oipɨɨ reta Esteban

8Jare Esteban tɨnɨe Tumpa iporerekua jare imbaepuere pe, oyapo tuichagüe mɨakañɨ reta opaete vae reta ipɨte pe. 9Jare amogüe kuimbae judío reta itupao “Tembipɨɨgüe” jee vae pegua reta, jare Cirene pegua reta, Alejandría, Cilicia jare Asia pegua reta, oyomboatɨ oyoaka reta Esteban ndive. 10Ërei jae reta mbaetɨ ipuere omoamɨri Esteban. Echa Esteban imiari iyarakuaa katu reve Espíritu Santo rupi. 11Jayave jae reta omboepɨ vɨari ïru kuimbae reta iyapu vaerä Esteban re. Jei reta vaerä: “Roendu jei ñee ikavimbae vae Moisés jare Tumpa kotɨ.” 12Jökorai jae reta omboarasɨuka opaete vae reta, Israel iñemuña reta itenondegua reta jare mborookuai re oporomboe vae reta. Jayave kuae reta yogüeru oipɨɨ Esteban, jare güɨraja mburuvicha judío reta jóvai. 13Joko pe jae reta güeru iyapu reve imiari vaerä jese vae reta. Jei reta vaerä:

—Kuae kuimbae jei avei ikavimbae tupao ikɨambae kotɨ jare mborookuai kotɨ. 14Echa roendu jei jókuae Jesús Nazaret pegua omboaita kuae tupao, jare oipoepɨta yandegüi mboromboe Moisés omee yandeve vae.

15Jayave opaete joko pe mburuvicha judío reta oguapɨ ñogüɨnoi vae omae ngatu Esteban re, jare oecha jova araɨgua jovaecha chupe reta.

বর্তমানে নির্বাচিত:

HECHOS 6: GUABD

হাইলাইট

কপি