HECHOS 14

Pablo jare Bernabé Iconio pe

1Jare Iconio pe Pablo jare Bernabé oike päve judío reta itupao pe, jare imiari reta joko pe ñogüɨnoi vae reta pe. Jare jeta judío reta jare judiombae vae reta oporogüɨrovia. 2Ërei judío oporogüɨroviambae vae reta omboemboe judiombae vae reta oporogüɨrovia vae reta kotɨ. 3Jáeramo Pablo jare Bernabé opɨta joko pe ɨma pegua, jare imiari ïru vae reta pe okɨɨyembae reve, oyeko reve yandeYa re. Jare yandeYa oechauka añete ko iñee mbɨakavi regua mɨakañɨ Pablo jare Bernabé oyapo vae reta rupi. 4Ërei tëta guasu pegua reta oyemboyao oyougüi. Amogüe oñemoïru judío reta ndive, jare amogüe oñemoïru temimondo reta ndive. 5Judío reta jare judiombae vae reta juvicha reta ndive oporepeña temimondo reta re, oyapo vaerä ikavimbae chupe reta jare oyapi vaerä ita pe yave, 6Pablo jare Bernabé oikuaa yave otekuarai reta Listra jare Derbe kotɨ, jae ko tëta guasu reta ɨvɨ Licaonia pegua jare opaete tëta raɨ reta iyɨvɨrigua rupi. 7Jare jokoropi vi jae reta omoërakua ñee ikavi vae.

Listra pegua reta oyapi Pablo ita pe

8Jare Listra pe oguapɨ oï metei kuimbae oguatambae vae. Ichɨ jɨe güi oa güive ipuereä etei oguata. 9Kuae kuimbae oendu Pablo imiari oï. Jare Pablo omae ngatu jese, jare oecha güɨrovia ipuere vaerä okuera. 10Jayave Pablo iñeeäta reve jei chupe:

—Epüa eyemboɨ isɨmbi.

Jare jae opüa voi oyemboɨ jare omboɨpɨ oguata. 11Jayave yatɨ vae reta oecha yave Pablo oyapo vae, jei reta Licaonia pegua ñee pe iñeeäta reve:

—¡Tumpa reta ogüeyɨ yandepɨte pe kuimbae rami!

12Jare jae reta ombojee Bernabé Júpiter pe, jare ombojee Pablo Mercurio pe. Echa Pablo oñemoñee. 13Jare tumpa-raanga Júpiter isacerdote itupao oï tëta guasu jóvai vae güeru toro reta jare mbaepotɨ reta öke reta pe, jae jare yatɨ vae reta ndive oipota tëi omee mɨmba oyeyukagüe reta chupe reta. 14Ërei temimondo reta kuae oikuaa yave, omondoro reta jemimonde, jare oike yatɨ vae reta ipɨte pe, jare iñeeäta reve jei chupe reta:

15—Kuimbae reta, ¿maera pa peyapo kuae? Ore kuimbae reta pe reta ramiño ko. Romoërakua peve peyerova vaerä kuae ikavimbae peyapo vae güi Tumpa oikove vae kotɨ. Jae ko oyapo ara, ɨvɨ, ɨguasu jare opaete mbaembae pɨpe oime vae. 16Tumpa omaeño arakae pegua reta re oyapo vaerä jae reta oipota vae. 17Ërei jae jekuaeño oyekuaa chupe reta mbaembae ikavi vae jae oyapo vae rupi. Echa jae ombou yandeve ama oime vaerä mbaagüɨye, jökorai omee yandeve tembíu yayerovia vaerä.

18Kuae jei reta yave, añeapea omboavai tëta guasu pegua reta agüɨye vaerä oyuka mɨmba güɨrökuavee chupe reta omboete vaerä.

19Jókuae ara rupi amogüe judío reta yogüeru Antioquía jare Iconio güi. Jae reta omboemboe tëta guasu pegua reta oyapi vaerä Pablo ita pe. Jare oyapi ma yave, ombotɨrɨrɨ güɨraja tëta guasu güi ikatu kotɨ, echa omanoecha chupe reta. 20Ërei oporogüɨrovia vae reta yogüeru yatɨ Pablo re yave, Pablo opüa jare oike tëta guasu pe. Jayave pɨareve pe ojo Bernabé ndive Derbe kotɨ.

21Jare omoërakua reta güire ñee ikavi vae Derbe pe, jeta güɨrovia Jesús re vae. Javoi oyerova ye Listra, Iconio jare Antioquía pe. 22Jare kuae tëta guasu reta rupi jae reta omoäta ngatu oporogüɨrovia vae reta, jare omboarakuaa jekuaeño vaerä güɨnoi reta mborogüɨrovia Tumpa kotɨ. Jare jei vi chupe reta: “Yaiporara ñotai ko jeta yaike vaerä Tumpa iporookuaía pe.” 23Jare oporogüɨrovia vae reta ñogüɨnoia ñavo Pablo jare Bernabé oiparavo oporogüɨrovia vae reta itenondeguarä. Jare oyekuaku tembíu güi reve oyerure reta, oeya yandeYa jae reta güɨrovia jese vae ipo pe.

Oyerova ye Antioquía Siria pegua pe

24Jayave Pablo jare Bernabé oasa Pisidia rupi, jare yogüeru oväe Panfilia pe. 25Jare omoërakua güire Tumpa iñee Perge pe, yogüeru tëta guasu Atalia pe. 26Jare joko güi oasa reta barco pe Antioquía kotɨ. Echa jókuae tëta güi oporogüɨrovia vae reta omondo oyerure güire Tumpa ipɨakavi re chupe reta, kuae mbaravɨkɨ opa ma oyapo vae re. 27Jare yogüeru oväe yave, Pablo jare Bernabé omboatɨ oporogüɨrovia vae reta, jare imiari chupe reta opaete Tumpa oyapo mbae tuichagüe jae reta ndive vae, jare kërai Tumpa omee judiombae vae reta pe oporogüɨrovia vaerä. 28Jare opɨta reta joko pe ɨma pegua oporogüɨrovia vae reta ndive.

বর্তমানে নির্বাচিত:

HECHOS 14: GUABD

হাইলাইট

কপি