ZYAŊ 17

Yeesus à ɓɔ̀ŋzii Bɛ̀ll ɓisuu ɓɛyilàg ɓii

1Yɛ̀ɛ Yeesus à kpaaghà ɓìɓan ɓiǹ, nni à ɓegsìghà mis aɗyoo, à kpaa lɛ: Tààta, cààmɛ̀n ki mɛ kpaŋ, kemzi Man wɔɔ̀, di Man wɔɔ̀ a kemzi girig wɔ̀. 2Fɛlɛ yɛ̀ɛ ù faghà nyi ìtèɗ wu lɛ a lami ɓum ɓɛ̀cèm, à fa ɓɛ̀sɛ̀ɛ̀ ɓɛ̀cèm ɓɛ ù faghà nyi cɛɓ ki fiɗyàɓ fikɔ̀ɔ̀. 3Cɛɓ ki fiɗyàɓ fikɔ̀ɔ̀ ki ri lɛ, ɓɛɛ yi wɔ̀, lɛ wɔ̀ yɛɛ ri m̀bobog à kɔɔ̀kɔɔ̀ à Bɛ̀ll, ɓɛ ki yi Yeesus Kiris, roànɛ ù romgày. 4Mɛ̀ɛ ǹkemzii wɔ̀ ɓi ziinɛ, ǹlègsì kìsay ki ù faghà mɛ̀ lɛ nki. 5Nni ɓigomìnɛ, Tààta wɔ̀ɔ̀ kemzi mɛ̀ jàŋbog rì wɛ̀ɛmiɗ, rì rìkem ɗi m̀ɓaghà rì ɗyɔ jàŋbog rì wɔ̀, di ziinɛ ì ka yin.

6Ǹɗèsìghà ɗii ɗyɔɔ a ɓumɓɛ ù faghà mɛ̀ ɓi ziinɛ; ɓɛ ɓaghà ɓum ɓɔɔ, nni ù faghà mɛ̀ ɓɔ, ɓɛ ki ɓèŋ jɛ̀ɛ̀ yɔ̀ɔ̀. 7Ɓigomìnɛ, ɓɛ mɛ yi lɛ, ɓìɓan ɓìcèm ɓi ù faghà mɛ̀, ɓi riì a lɔ̀ŋkɔɔ. 8Ɓisuulɛ ǹfaghà ɓɔ ɓìɓan ɓi ù faghà mɛ̀, ɓɛ ghaɓ ɓyɔ, ɓɛ ki konag ki yiì lɛ, m̀pɛ̀sɛ̀ngày a lɔ̀ŋkɔɔ, ɓɛ ki gherɛn lɛ wɔ̀ yɛɛ romgày mɛ̀. 9Ɓisu waa nnɛ m̀ɓɔ̀ŋzàg. Ǹ-yin ɓiì ɓɔ̀ɔɓɔ̀ŋzì ɓisuu ziinɛ, m̀ɓɔ̀ŋzii ɓisuu ɓɛroɓɛ ù faghà mɛ̀, ɓisuulɛ ɓɛ ri ɓɛnkɔ̀ɔ̀. 10Com kɛm̀ kìcèm ki ri kiŋkɔɔ, fɔɔnnɛ kiŋkɔɔ kicèm ki ri girig kiŋkɛ̀m. Ɓi ɓɔ nnɛ rìkem ɗyɛ̀m ɗyɛɛ̀ rèeresɛ̀n. 11Mɛ̀ ǹ-yiìdi ti ɓi ziinɛ, ɓɔ yɛɛ rɔɓi ɓi ziinɛ, yɛ̀ɛ mɛ̀ ǹ-yùu a lɔ̀ŋkɔɔ. Tààta ànɛ à rì ǹtɛnɛn, ɓèŋa ɓumɓɛ ù faghà mɛ̀ rì ɗii ɗyɔɔ, lɛ di ɓɛɛ ɓa ɓɛ̀ràrɛn yɛ̀ɛ ɓìsii ri ɓɛ̀ràrɛn lɛ rì mɛ̀ rì wɔ̀. 12Cààmɛ̀n ki mɛ̀ɛ nɗì rì ɓɔ, mɛ̀ɛ mɓèŋɓeŋi ɓɔ, ɓì ɗii ɗyɔɔ, mɛ̀ɛ nkàakàmɛ̀n ɗì ɓɔ, nsoò kìbog ki ɓi ɓɔ kɛ̀ kɛɛ̀ ɗyaŋ; i ki cee ɓi lɛ roànɛ à ghɛ̀ɛ̀sɛ̀ngà kìɗyaŋì lɛ mɛ̀kànì mɛɛ roǹ. 13Nni ɓigomìnɛ, ǹ-yùu a lɔ̀ŋkɔɔ; ǹki kpaa ɓìɓan ɓi, cààmɛ̀n ki ǹkaka ɓi ziinɛ, lɛ di ɓɛɛ ɓa rì kìnyàà. 14Ǹfaghà ɓɔ ɓìɓan ɓyɔɔ, fɔɔnnɛ ziinɛ ì ɓèèzɛ̀ngà ɓɔ lɛ ɓɛ yin ɓumɓɛ ɓi ziinɛ, yɛ̀ɛ mɛ̀ ǹ-yin ŋwaànɛ fɛ ɓi ziinɛ. 15M̀ɓɔ̀ŋzii ɓi wɔ lɛ u pisi ɓɔ ɓi ziinɛ, mɓɔ̀ŋzàg lɔŋ wɔ lɛ, u lɛgsi ɓɔ kìɓe. 16Ɓɛ yin ɓumɓɛ fɛ ɓi ziinɛ fɛlɛ yɛ̀ɛ mɛ̀ ǹ-yin ŋwaànɛ fɛ ɓi ziinɛ. 17Kìya lɛ rì saaɗ wɔ̀ɔ̀, ɓɛɛ ɓa ɓum ɓɔɔ; ɓìɓan ɓyɔɔ ɓi ri saaɗ. 18Fɛlɛ yɛ̀ɛ ù romgày mɛ̀ ɓi ziinɛ, mɛ̀ girig mɛ̀ɛ nɗomi ɓɔ ɓi ziinɛ. 19Mɛ̀ɛmiɗ mɓèeɓeŋɗɛ̀n ntɛnɛn lɛ ɓɔ, lɛ di ɓɔ girig ɓɛɛ ɓa ɓɛ̀tɛnɛn ɓi saaɗ ɓi ɗùm.

20M̀ɓɔ̀ŋzii ɓi wɔ ɓisu waa lɔŋ cɛ̀ncaa, m̀ɓɔ̀ŋzii wɔ̀ girig ɓisuu ɓum ɓɛ̀cèm ɓɛ ɓɛ ɓiì gherɛɛ mɛ lɛ rìghagsì ɗyaa ɗi ɓɔlɛ̀ ànɛ ɓɛ ri ɓɔ ɓiì ghagsii. 21M̀ɓɔ̀ŋzii wɔ̀ lɛ ɓɛɛ ɓa ɓɛ̀ràrɛn kìbyɔg kìfog Tààta, yɛ̀ɛ ù rì ɓi mɛ̀, mɛ̀ ɓi wɔ̀, kìya lɛ ɓɔ girig ɓɛɛ ɓa ɓɛ̀ràren ɓi ɓìsi di fɔɔnnɛ ziinɛ yɛ̀ɛ gherɛn lɛ, wɔ̀ yɛɛ romgày mɛ̀. 22Mɛ̀ ǹfaghà ɓɔ rìkem ɗi ù faghà mɛ̀, lɛ ɓɛɛ ɓa ɓɛ̀ràrɛn kibyɔg kìfog yɛ̀ɛ ɓìsi. 23Mɛ̀ ɓi ɓɔ, wɔ̀ ɓi mɛ̀, lɛ di ɓɛɛ ɓa ɓɛ̀ràrɛn lɛ kɔɔ̀kɔɔ̀ kìbyɔg kìfog, ziinɛ ì ki yi lɛ wɔ̀ yɛɛ romgày mɛ̀, nni ǹkeesìghà ɓɔ yɛ̀ɛ wɔ̀ɔ̀ keesìghà mɛ̀. 24Tààta kɛɛ̀ kɔ̀nkɔn mɛ lɛ, jàŋ inɛ ǹɗì, ɓumɓɛ ù faghà mɛ̀, ɓɛɛ ɓa girig wɔɔ nɗaŋ ri mɛ̀, di ɓɛɛ ghɛǹ rìkem ɗyɛ̀m ɗi ù faghà ɓisuulɛ ù keesìghà mɛ̀ di ziinɛ ì ka kilɛn ɓi. 25Tààta ànɛ à rì lɛ saaɗ, ziinɛ ì yighà ɓi wɔ, lɔŋ mɛ̀ yɛɛ yighà wɔ̀, ɓɛ̀roɓɛ ɓɛ ki yi lɛ wɔ̀ yɛɛ romgày mɛ̀. 26Ǹɗèsìghà ɓɔ ɗii ɗyɔɔ, m̀ɓiì ki rèsii ti ɓɔ ɗyɔ lɛ di ǹkɔ̀nɛ̀n ànɛ ù rì rì nyi ɓisu wɛ̀m a ɓa a lɔ̀ŋkaa, mɛ̀ɛmiɗ m̀ɓa a lɔ̀ŋkaa.

বর্তমানে নির্বাচিত:

ZYAŊ 17: BAFNT

হাইলাইট

কপি