San Mateo 17

Chuguu̱n ndoꞌo man Jesús niꞌya̱j vaꞌnu̱j síí tucuꞌyón snana̱ soꞌ a

1Cachén vata̱nꞌ güii, ga̱a ne̱ nica̱j Jesús man síí cuꞌna̱j Pedró do̱ꞌ, síí cuꞌna̱j Jacobo do̱ꞌ, tinúú Jacobo síí cuꞌna̱j Juan do̱ꞌ, caꞌanj soꞌ raa̱ ꞌo̱ quij xca̱a̱n rej taj va̱j a̱ ꞌó yuvii̱ a. 2Ga̱a ne̱ ꞌo̱ cunuu ino̱ cunuda̱nj man Jesús niꞌya̱j nij síí tucuꞌyón snana̱ soꞌ, ne̱ dan me se chuguu̱n ndoꞌo rihaan soꞌ ase vaa chuguu̱n güii na̱nj á. Ne̱ nuu catzi̱i̱ ndoꞌo saga̱nꞌ soꞌ, ne̱ ase vaa yaꞌan chuguu̱n vaa saga̱nꞌ soꞌ a. 3Ga̱a ne̱ ta̱j niꞌyo̱n naquiꞌyaa síí cuꞌna̱j Moisés ga̱ síí cuꞌna̱j Elías síí cayáán ga̱a naá rihaan nij soꞌ, ne̱ caꞌmii ro̱j soꞌ ga̱ Jesús a. 4Ga̱a ne̱ cataj Pedró rihaan Jesús a:

―Cuna̱j uxrá vaa mán núj nihánj ga̱ so̱ꞌ, Señor. Sese me rá so̱ꞌ, ne̱ qui̱ꞌyáá ꞌu̱nj vaꞌnu̱j veꞌ yacataj ca̱yáán soj na̱nj á. ꞌO̱ veꞌ ca̱yáán so̱ꞌ, ne̱ ꞌó veꞌ ca̱yáán Moisés, ne̱ ꞌó veꞌ ca̱yáán Elías rugua̱nj ―taj Pedró rihaan Jesús a.

5Ataa quisi̱j caꞌmii Pedró, ne̱ caꞌnaꞌ ꞌo̱ ngaa chuguu̱n ndoꞌo, ne̱ caráán ngaa chuguu̱n yoꞌ man ta̱ranꞌ nij soꞌ a. Dan me se Yaꞌanj roꞌ, caꞌmii nana̱ cuno nij soꞌ rque ngaa yoꞌ, ne̱ cataj Yaꞌanj a:

―Síí nihánj me Taꞌníj ado̱nj. ꞌE̱e̱ raj niꞌya̱j man soꞌ, ne̱ aranꞌ rá nimanj niꞌya̱j ꞌu̱nj man soꞌ ado̱nj. Cuno̱ soj rihaan soꞌ á ―taj Yaꞌanj cuno nij soꞌ a.

6Ga̱a cuno nij síí tucuꞌyón snana̱ Jesús nana̱ yoꞌ, ne̱ quinij ru̱j nij soꞌ nda̱a canó rihaan nij soꞌ yoꞌóó, ne̱ cuchuꞌviꞌ ndoꞌo nij soꞌ a. 7Ga̱a ne̱ cuchiꞌ Jesús rihaan nij soꞌ, ne̱ cutaꞌ raꞌa soꞌ xráá nij soꞌ, ne̱ cataj soꞌ a:

―Canicu̱nꞌ caya̱ soj, ne̱ se̱ cuchuꞌviꞌ soj maꞌ ―taj soꞌ a.

8Ga̱a ne̱ naxca̱j rihaan nij soꞌ niꞌya̱j nij soꞌ, ne̱ da̱j o̱rúnꞌ Jesús nicunꞌ, niꞌya̱j nij soꞌ na̱nj ado̱nj.

Ase vaa síí cuꞌna̱j Elías roꞌ, da̱nj vaa Juan Síí Cutaꞌ Ne man yuvii̱ a

9Ga̱a ne̱ ga̱a nanij nij soꞌ tacóó quij yoꞌ me se caꞌneꞌ Jesús suun rihaan nij soꞌ, cataj soꞌ a:

―Se̱ nataꞌ soj rihaan a̱ ꞌó yuvii̱ cheꞌé se vaa queneꞌen soj cuanꞌ maꞌ. Nda̱a quisíj cavíꞌ ꞌu̱nj ne̱ cunuu iꞌna̱ꞌ uún ꞌu̱nj, ga̱a ne̱ caꞌve̱e nata̱ꞌ soj se vaa queneꞌen soj da̱j quiránꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ na̱nj ado̱nj ―taj Jesús rihaan nij soꞌ a.

10Ga̱a ne̱ xnáꞌanj nij síí tucuꞌyón snana̱ soꞌ man soꞌ, cataj nij soꞌ a:

―Me cheꞌé taj nij síí naquiꞌyaj cu̱u stucua̱nj Moisés se vaa asino caꞌna̱ꞌ síí cuꞌna̱j Elías síí nataꞌ snana̱ Yaꞌanj ga̱a naá, ga̱a ne̱ caꞌve̱e caꞌne̱ꞌ Yaꞌanj cacunꞌ cheꞌé yuvii̱ ga̱ ―taj nij síí tucuꞌyón snana̱ Jesús, xnáꞌanj nij soꞌ man Jesús a.

11Ga̱a ne̱ cataj Jesús a:

―Ya̱ aꞌmii nij síí naquiꞌyaj cu̱u stucua̱nj Moisés, taj nij soꞌ se vaa asino caꞌna̱ꞌ Elías, ga̱a ne̱ naquiꞌya̱j sa̱ꞌ soꞌ nu̱ꞌ rasu̱u̱n ado̱nj. 12Tza̱j ne̱ cuano̱ nihánj me se cata̱j xnaꞌanj ꞌu̱nj rihaan soj se vaa a̱j caꞌnaꞌ Elías, tza̱j ne̱ ne xca̱j nij yuvii̱ cuentá me si̱j me soꞌ maꞌ. Ma̱an se quiꞌyaj ya̱ nij yuvii̱ nda̱a vaa me rá maꞌa̱n nij yuvii̱ man soꞌ na̱nj ado̱nj. Ne̱ veé da̱nj qui̱ránꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ quiꞌya̱j nij yuvii̱ yoꞌ ado̱nj ―taj Jesús a.

13Ga̱a ne̱ xcaj nij síí tucuꞌyón snana̱ Jesús cuentá se vaa caꞌmii Jesús cheꞌé síí cuꞌna̱j Juan Síí Cutaꞌ Ne man yuvii̱ se vaa síí nacaj se‑su̱u̱n Elías me Juan yoꞌ a.

Nahuun sa̱ꞌ ꞌo̱ xnii nu̱u̱ nana̱ chre̱e nimán, quiꞌyaj Jesús a

14Ga̱a ne̱ caꞌanj nij soꞌ rej va̱j ndoꞌo yuvii̱, ne̱ cuchiꞌ ꞌo̱ snóꞌo rihaan Jesús, ne̱ caꞌanj ca̱yáán ru̱j soꞌ rihaan Jesús, ne̱ cataj soꞌ a:

15―Señor, cunu̱u ꞌe̱e̱ rá so̱ꞌ man taꞌníj rugua̱nj. ꞌO̱ se ranꞌ soꞌ chiꞌii̱ snúú, ne̱ cheꞌé dan ranꞌ ndoꞌo soꞌ sayuun na̱nj ado̱nj. Veé dan, ne̱ ina̱nj naxruꞌ soꞌ rihaan yaꞌan do̱ꞌ, naxruꞌ soꞌ rque na do̱ꞌ a. 16Ne̱ caꞌnaꞌ nica̱j ꞌu̱nj man soꞌ rihaan nij síí tucuꞌyón snana̱ so̱ꞌ, tza̱j ne̱ taj se quiꞌyáꞌ nahu̱un sa̱ꞌ soꞌ, quiꞌyaj nij soꞌ maꞌ ―taj snóꞌo yoꞌ a.

17Ga̱a ne̱ cataj Jesús a:

―Dan me se síí ne amán rá me soj si̱j ma̱n rihaan chumii̱ nihánj cuano̱, ne̱ chiꞌi̱i̱ vaa nimán soj, ne̱ a̱ me daj cache̱j ga̱ soj, ne̱ a̱ me daj ga̱a̱ naj nimanj ni̱ꞌyaj ꞌu̱nj man soj ga̱. Ni̱caj soj man xnii caꞌna̱ꞌ soj rihanj cuaj á ―taj Jesús a.

18Ga̱a ne̱ caꞌneꞌ Jesús suun rihaan nana̱ chre̱e nu̱u̱ nimán xnii se vaa ta̱náj yoꞌ man xnii a. Ga̱a ne̱ curiha̱nj nana̱ chre̱e nimán xnii, caꞌanj yoꞌ, ne̱ veé ma̱an orá dan nahuun sa̱ꞌ xnii yoꞌ a.

19Ga̱a ne̱ cuchiꞌ ina̱nj maꞌa̱n nij síí tucuꞌyón snana̱ Jesús rihaan Jesús, ne̱ xnáꞌanj nij soꞌ man soꞌ, cataj nij soꞌ a:

―Me cheꞌé ne gu̱un nucua̱j núj caꞌve̱e quiri̱i̱ núj man nana̱ chre̱e yoꞌ nimán xnii ga̱ ―cataj nij soꞌ, xnáꞌanj nij soꞌ man Jesús a.

20Ga̱a ne̱ cataj Jesús a:

―Cheꞌé se do̱j amán rá soj, cheꞌé dan ne caꞌve̱e gu̱un nucua̱j soj maꞌ. Tza̱j ne̱ neꞌen soj se vaa caân ma̱n raa̱ cuêj mostazá xlá, ne̱ nda̱ꞌ se tzínꞌ vaa yoꞌ, tza̱j ne̱ asa̱ꞌ achij yoꞌ, ne̱ ase vaa chruun vaa yoꞌ a. Ne̱ ase vaa caân cuêj mostazá xlá yoꞌ roꞌ, da̱nj ga̱a̱ maꞌa̱n soj ado̱nj. Ya̱ ya̱ cata̱j xnaꞌanj ꞌu̱nj rihaan soj se vaa sese ya̱ amán rá soj ne̱ sese cata̱j soj rihaan ꞌo̱ quij se vaa cu̱riha̱nj quij yoꞌ rej nicu̱nꞌ yoꞌ, ne̱ cavi̱i̱ quij yoꞌ ne̱ caꞌa̱nj yoꞌ níchrej ado̱nj. Ne̱ gu̱un nucua̱j soj quiꞌya̱j soj cunuda̱nj na̱nj ado̱nj. 21Ne̱ nana̱ chre̱e vaa da̱nj roꞌ, se̱ caꞌvee quiꞌya̱j níꞌ cu̱riha̱nj nij soꞌ nimán yuvii̱ sese ne achíín niꞌya̱j ndoꞌo níꞌ rihaan Yaꞌanj ne̱ sese ne tocoꞌ níꞌ xꞌnaa man maꞌa̱n níꞌ cheꞌé se aráj gue̱e̱ níꞌ rihaan Yaꞌanj maꞌ ―taj Jesús rihaan nij soꞌ a.

Cataj xnaꞌanj uún Jesús se vaa cavi̱ꞌ soꞌ ne̱ cunu̱u iꞌna̱ꞌ uún soꞌ a

22Dan me se cunuu chre̱ꞌ uún ta̱ranꞌ nij soꞌ estadó Galilea, ga̱a ne̱ cataj Jesús rihaan nij síí tucuꞌyón snana̱ soꞌ a:

―Dan me se ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ me se vaa güii nago̱ꞌ nii mán ꞌu̱nj rihaan yuvii̱, 23ne̱ ticavi̱ꞌ nij yuvii̱ manj, ga̱a ne̱ cache̱n vaꞌnu̱j güii, tza̱j ne̱ cunu̱u iꞌna̱ꞌ uún ꞌu̱nj na̱nj ado̱nj ―taj Jesús a.

Ga̱a ne̱ quinanó ndoꞌo rá nij síí tucuꞌyón snana̱ soꞌ a.

Xnáꞌanj Pedró man Jesús cheꞌé impuestó cheꞌé nuvií noco̱o a

24Catúj nij soꞌ chumanꞌ Capernaum, ga̱a ne̱ cuchiꞌ nij síí caꞌnéj impuestó cheꞌé nuvií rihaan síí cuꞌna̱j Pedró, ne̱ xnáꞌanj nij soꞌ man Pedró, cataj nij soꞌ a:

―Síí tucuꞌyón nana̱ rihaan soj roꞌ, oꞌ soꞌ impuestó cheꞌé nuvií noco̱o naꞌ ―taj nij soꞌ a.

25―Oꞌ soꞌ impuestó ado̱nj ―taj Pedró rihaan nij soꞌ a.

Ga̱a ne̱ catúj Pedró rá veꞌ, ne̱ me rá Pedró xna̱ꞌanj Pedró cheꞌé impuestó yoꞌ, tza̱j ne̱ asino Jesús xnáꞌanj man Pedró, cataj soꞌ a:

―Simón, da̱j uun rá so̱ꞌ ga̱. Nij síí nica̱j suun rey uun chij rihaan yuvii̱ ma̱n rihaan chumii̱ nihánj me se me síí aꞌnéj nij soꞌ impuestó rihaan ga̱. Rihaan maꞌa̱n taꞌníí nij soꞌ naꞌ. Ase rihaan ꞌó yuvii̱ xa̱ꞌ ―taj Jesús, xnáꞌanj soꞌ man Pedró a.

26―Rihaan ꞌó yuvii̱ ado̱nj ―taj Pedró rihaan Jesús a.

Ga̱a ne̱ cataj Jesús a:

―Cheꞌé dan taj cheꞌé go̱ꞌ taꞌníí síí nica̱j suun impuestó maꞌ. 27Tza̱j ne̱ se̱ guun caꞌma̱an rá nij síí aꞌnéj impuestó cheꞌé nuvií noco̱o, quiꞌya̱j níꞌ maꞌ. Cheꞌé dan caꞌa̱nj so̱ꞌ tuꞌva na laguaná, ne̱ ta̱güéj so̱ꞌ ꞌo̱ agaꞌ taꞌaa xcuaj rque na, ne̱ ta̱ꞌaa so̱ꞌ xcuaj cano̱ agaꞌ asino ya̱a̱n á. Ga̱a ne̱ nuxra̱ꞌ so̱ꞌ tuꞌva xcuaj yoꞌ, ne̱ quiri̱ꞌ so̱ꞌ saꞌanj aga̱ꞌ vaa tuꞌvee yuvii̱ ꞌyaj suun caꞌa̱nj güii tuꞌva xcuaj yoꞌ, ne̱ go̱ꞌ so̱ꞌ saꞌanj yoꞌ cheꞌé ro̱ꞌ rihaan nij síí aꞌnéj impuestó á ―taj Jesús a.

বর্তমানে নির্বাচিত:

San Mateo 17: trc

হাইলাইট

কপি