San Mateo 15

Nataꞌ Jesús me se ꞌyaj chiꞌi̱i̱ man yuvii̱ a

1Ga̱a ne̱ nichrunꞌ taꞌa̱j nij síí fariseo do̱ꞌ, nij síí naquiꞌyaj cu̱u stucua̱nj Moisés do̱ꞌ, rihaan Jesús, ne̱ síí cavii chumanꞌ Jerusalén me nij soꞌ a. Ne̱ xnáꞌanj nij soꞌ man Jesús, cataj nij soꞌ a:

2―Nij síí tucuꞌyón snana̱ so̱ꞌ roꞌ, me cheꞌé ne uno nij soꞌ nana̱ cataj xnaꞌanj nij síí uun chij ma̱n ga̱a naá ga̱. ꞌO̱ se ne naꞌyaꞌ nij soꞌ ga̱a chá nij soꞌ maꞌ ―taj nij soꞌ rihaan Jesús a.

3Ga̱a ne̱ cataj Jesús rihaan nij soꞌ a:

―Xa̱ꞌ maꞌa̱n soj, tza̱j ne̱ me cheꞌé ne uno maꞌa̱n soj stucua̱nj Yaꞌanj ꞌyaj maꞌa̱n tucuáán noco̱ꞌ soj ga̱. 4ꞌO̱ se caꞌneꞌ Yaꞌanj suun a: “Cara̱a̱ co̱chróó so̱ꞌ rihaan réé so̱ꞌ do̱ꞌ, rihaan nií so̱ꞌ do̱ꞌ á.” Ne̱ cataj uún Yaꞌanj a: “Síí aꞌmii chre̱e cheꞌé rej do̱ꞌ, cheꞌé nii do̱ꞌ, me se yu̱u̱n cheꞌe̱ cavi̱ꞌ soꞌ quiꞌya̱j nii á.” Da̱nj vaa nana̱ cataj xnaꞌanj Yaꞌanj rihaan níꞌ ado̱nj. 5Tza̱j ne̱ taj soj se vaa sese cata̱j ꞌo̱ soꞌ rihaan rej soꞌ do̱ꞌ, rihaan nii soꞌ do̱ꞌ, se vaa a̱j rqué soꞌ nu̱ꞌ siꞌyaj soꞌ rihaan Yaꞌanj ne̱ cheꞌé dan se̱ caꞌvee ra̱cuíj soꞌ man rej soꞌ do̱ꞌ, man nii soꞌ do̱ꞌ, 6ne̱ daj chiha̱a̱ míj ne nó xcúún soꞌ cara̱a̱ cochro̱j soꞌ ra̱cuíj soꞌ man rej soꞌ do̱ꞌ, man nii soꞌ do̱ꞌ, taj soj a. Dan me se da̱nj ina̱nj aꞌmii soj ga̱a tucuꞌyón soj stucua̱nj nij síí ma̱n ga̱a naá, ne̱ tiriꞌ soj suun caꞌneꞌ Yaꞌanj quiꞌya̱j yuvii̱ na̱nj ado̱nj. 7Dan me se síí tuꞌva rmaꞌa̱n me soj na̱nj á. Dan me se caꞌmii natáj síí cuꞌna̱j Isaías snana̱ Yaꞌanj ga̱a naá, ne̱ cataj xnaꞌanj soꞌ da̱j si̱j me soj a. Cataj soꞌ a:

8Yuvii̱ nihánj me se ma̱an tuꞌva u̱u̱n nij soꞌ aráj cochro̱j nij soꞌ mán ꞌu̱nj,

tza̱j ne̱ ga̱nꞌ uxrá nicunꞌ nimán nij soꞌ ga̱ ꞌu̱nj na̱nj ado̱nj.

9Aráj gue̱e̱ rmaꞌa̱n nij soꞌ rihanj na̱nj á.

ꞌO̱ se tucuáán nataꞌ nij soꞌ roꞌ,

me suun cavii raa̱ na̱nj yuvii̱ na̱nj ado̱nj.

Dan me snana̱ Yaꞌanj a ―taj Jesús rihaan taꞌa̱j nij síí fariseo do̱ꞌ, nij síí naquiꞌyaj cu̱u stucua̱nj Moisés do̱ꞌ a.

10Ga̱a ne̱ canacúún Jesús man nij yuvii̱ ri̱i̱ caꞌna̱ꞌ nij yuvii̱ rihaan soꞌ a. Ga̱a ne̱ cataj soꞌ rihaan nij yuvii̱ a:

―Cuno̱ soj nana̱ nihánj, ne̱ xca̱j soj cuentá á. 11Né se atúj tuꞌva yuvii̱ me se ꞌyaj chiꞌi̱i̱ man yuvii̱ maꞌ. Se avii tuꞌva yuvii̱ roꞌ, ꞌyaj chiꞌi̱i̱ man yuvii̱ ado̱nj ―taj Jesús rihaan nij yuvii̱ a.

12Ga̱a ne̱ cuchiꞌ nij síí tucuꞌyón snana̱ Jesús rihaan Jesús, ne̱ cataj nij soꞌ a:

―Neꞌén so̱ꞌ se vaa caꞌmaan rá nij síí fariseo cheꞌé nana̱ caꞌmii so̱ꞌ rihaan nij soꞌ naꞌ ―taj nij soꞌ, xnáꞌanj nij soꞌ man Jesús a.

13Ga̱a ne̱ cataj Jesús a:

―Xa̱ꞌ nij soꞌ, tza̱j ne̱ ase vaa coj xraꞌ maꞌa̱n vaa nij soꞌ do̱ꞌ, vaa nana̱ tucuꞌyón nij soꞌ do̱ꞌ ado̱nj. Cheꞌé dan, ase vaa tiriꞌ nii man coj xraꞌ maꞌa̱n roꞌ, da̱nj ga̱a̱ tiri̱ꞌ Yaꞌanj man nij soꞌ ga̱ nana̱ tucuꞌyón maꞌa̱n nij soꞌ na̱nj ado̱nj. 14Se̱ cuno soj aꞌmii nij soꞌ maꞌ. ꞌO̱ se ase vaa síí aráán rihaan vaa nij soꞌ ado̱nj. Dan me se neꞌen soj se vaa sese gu̱un rá síí tuchri̱i ra̱cuíj soꞌ man ꞌó síí tuchri̱i nari̱ꞌ soꞌ chrej caꞌa̱nj soꞌ, ne̱ quini̱j ro̱j síí tuchri̱i yoꞌ rá yuꞌuj na̱nj ado̱nj ―taj Jesús rihaan nij síí tucuꞌyón snana̱ soꞌ a.

15Ga̱a ne̱ cataj Pedró rihaan soꞌ a:

―Cata̱j xnaꞌanj so̱ꞌ rihaan núj me se me raj cata̱a nana̱ caꞌmii so̱ꞌ cheꞌé se vaa atúj tuꞌva yuvii̱ á ―taj Pedró a.

16Ga̱a ne̱ cataj Jesús a:

―Vaa soj vaa, ne̱ ataa xca̱j maꞌa̱n soj do̱ꞌ cuentá a̱ naꞌ. 17Ne̱ neꞌen soj se vaa nu̱ꞌ se atúj tuꞌva yuvii̱ roꞌ, achén yoꞌ rque yuvii̱, ne̱ uriha̱nj yoꞌ ga̱a reꞌé yuvii̱ na̱nj á. 18Tza̱j ne̱ se uriha̱nj tuꞌva yuvii̱ roꞌ, yoꞌ me nana̱ avii nimán yuvii̱, ne̱ nana̱ yoꞌ me ꞌyaj chiꞌi̱i̱ ndoꞌo man yuvii̱ ado̱nj. 19ꞌO̱ se nihánj me se chiꞌi̱i̱ avii nimán yuvii̱ a: yan quiꞌya̱j se nij do̱ꞌ, yan ticavi̱ꞌ man tuviꞌ do̱ꞌ, yan coto̱j ga̱ ꞌó yuvii̱ sese né ni̱ca̱ soꞌ me do̱ꞌ, yan coto̱j síí ya̱a̱n ga̱ ꞌo̱ chana̱ ya̱a̱n do̱ꞌ, yan quiꞌya̱j itu̱u̱ siꞌyaj tuviꞌ do̱ꞌ, yan caꞌmi̱i̱ ne̱ cheꞌé tuviꞌ do̱ꞌ, yan nachri̱ꞌ ni̱ꞌyaj man tuviꞌ do̱ꞌ, me nu̱ꞌ se avii nimán yuvii̱ ado̱nj. 20Ne̱ nu̱ꞌ yoꞌ me se vaa ꞌyaj chiꞌi̱i̱ man yuvii̱ na̱nj ado̱nj. Tza̱j ne̱ cheꞌé nu̱ꞌ se chá yuvii̱ me se caꞌve̱e se ne naꞌyaꞌ yuvii̱ ga̱a chá yuvii̱, tza̱j ne̱ se̱ quiꞌyaj chiꞌi̱i̱ yoꞌ man yuvii̱ maꞌ ―taj Jesús rihaan nij síí tucuꞌyón snana̱ soꞌ a.

Cuchumán rá ꞌo̱ chana̱ cananea se vaa ra̱cuíj Jesús man noꞌ a

21Ga̱a ne̱ curiha̱nj Jesús rej yoꞌ, ne̱ caꞌanj soꞌ rej na̱j chumanꞌ cuꞌna̱j Tiro do̱ꞌ, chumanꞌ cuꞌna̱j Sidón do̱ꞌ a. 22Dan me se curiha̱nj ꞌo̱ chana̱ cananea chana̱ ya̱nj rej yoꞌ a. Ne̱ caguáj ndoꞌo noꞌ rihaan Jesús, cataj noꞌ a:

―Neꞌenj se vaa Taꞌníí Taꞌnij Siꞌno̱ David síí cayáán ga̱a naá mé so̱ꞌ, Señor. Cheꞌé dan cunu̱u ꞌe̱e̱ rá so̱ꞌ manj rugua̱nj. ꞌO̱ se canó uxrá nana̱ chre̱e man taꞌníj chala̱ cunii na̱nj ado̱nj ―taj chana̱ yoꞌ, caguáj noꞌ rihaan Jesús a.

23Tza̱j ne̱ a̱ ꞌó nana̱ ne caꞌmi̱i̱ Jesús rihaan noꞌ maꞌ. Ga̱a ne̱ cuchiꞌ nij síí tucuꞌyón snana̱ Jesús rihaan soꞌ, ne̱ cachíín niꞌya̱j nij soꞌ rihaan soꞌ, cataj nij soꞌ a:

―Qui̱ꞌyáá so̱ꞌ se ndoꞌo, ne̱ cata̱j xnaꞌanj so̱ꞌ rihaan chana̱ yoꞌ se vaa caꞌa̱nj chana̱ yoꞌ na̱nj rugua̱nj. ꞌO̱ se noco̱ꞌ uxrá noꞌ man níꞌ, ne̱ aguáj ndoꞌo noꞌ na̱nj asânj ―taj nij soꞌ a.

24Ga̱a ne̱ cataj soꞌ a:

―Ina̱nj rihaan nij matzinj caꞌanj niꞌya̱ ma̱n chumanꞌ israelitá caꞌnéé Yaꞌanj mán ꞌu̱nj rá soj naꞌ ―taj Jesús rihaan nij soꞌ a.

25Ga̱a ne̱ cuchiꞌ chana̱ yoꞌ rihaan Jesús, ne̱ caꞌanj ca̱yáán ru̱j noꞌ rihaan Jesús, ne̱ cataj noꞌ a:

―Señor, ra̱cuíj so̱ꞌ manj rugua̱nj ―taj noꞌ a.

26Ga̱a ne̱ cataj soꞌ a:

―Dan me se neꞌén so̱ꞌ se vaa se̱ caꞌvee ta̱ꞌaa níꞌ coꞌoo ma̱n rihaan nij xnii ne̱ go̱ꞌ níꞌ cha̱ nij chuvee maꞌ ―taj Jesús rihaan chana̱ yoꞌ a.

27Ga̱a ne̱ cataj noꞌ a:

―Veé da̱nj vaa gue̱e̱, Señor. Tza̱j ne̱ nij chuvee roꞌ, chá nij xoꞌ tachruu̱ ayuu tuꞌva se‑xqui̱ꞌ nij xoꞌ na̱nj ado̱nj ―taj chana̱ yoꞌ rihaan Jesús a.

28Ga̱a ne̱ cataj Jesús a:

―Amán uxrá rá so̱ꞌ niꞌya̱j so̱ꞌ manj, nocoj. Cheꞌé dan qui̱ꞌyáj se vaa achíín so̱ꞌ rihanj na̱nj á ―taj Jesús rihaan noꞌ a.

Ne̱ veé ma̱an orá dan nahuun sa̱ꞌ taꞌníí chana̱ yoꞌ a.

Nahuun sa̱ꞌ uxrá yuvii̱, quiꞌyaj Jesús a

29Ga̱a ne̱ curiha̱nj Jesús rej yoꞌ, ne̱ cachén soꞌ tuꞌva na laguaná cuꞌna̱j Galilea, ga̱a ne̱ cavii soꞌ raa̱ ꞌo̱ tacaan, ne̱ caꞌanj ca̱yáán soꞌ rihaan yoꞌóó a. 30Ne̱ cuchiꞌ uxrá yuvii̱ rihaan soꞌ, ne̱ caꞌnaꞌ nij yuvii̱ nica̱j nij yuvii̱ man síí ranꞌ rihaan soꞌ a. Dan me se síí chéé rengo̱ do̱ꞌ, síí tuchri̱i do̱ꞌ, síí larihuu̱ raꞌa do̱ꞌ, síí yaꞌmi̱i do̱ꞌ, síí anó me maꞌa̱n chiꞌii̱ do̱ꞌ, cuchiꞌ rihaan Jesús, quiꞌyaj nij yuvii̱, ne̱ cuchruj nij yuvii̱ man nij síí ranꞌ yoꞌ tacóó Jesús, ne̱ nahuun sa̱ꞌ nij soꞌ, quiꞌyaj Jesús a. 31Ne̱ caráyaꞌa̱nj ndoꞌo nij yuvii̱ ri̱i̱ queneꞌen nij soꞌ se vaa caꞌmii nij síí yaꞌmi̱i yoꞌ do̱ꞌ, se vaa cunu̱u sa̱ꞌ raꞌa nij síí raꞌa̱ larihuu̱ do̱ꞌ, se vaa cachéé sa̱ꞌ nij síí rengo̱ do̱ꞌ, se vaa nachuguu̱n rihaan nij síí tuchri̱i do̱ꞌ a. Ne̱ sa̱ꞌ uxrá caꞌmii nij yuvii̱ cheꞌé Taꞌanj nij yuvii̱ israelitá a.

Rqué Jesús se chá caꞌa̱nj míj (4,000) snóꞌo a

32Ga̱a ne̱ canacúún Jesús caꞌna̱ꞌ nij síí tucuꞌyón snana̱ soꞌ rihaan soꞌ, ne̱ cataj soꞌ a:

―Nuu ꞌe̱e̱ raj man nij yuvii̱ nihánj na̱nj ado̱nj. ꞌO̱ se quisíj vaꞌnu̱j güii mán nij soꞌ ga̱j, ne̱ taj va̱j se cha̱ nij soꞌ a̱ maꞌ. Ne̱ naꞌvej raj caꞌne̱j ꞌu̱nj man nij soꞌ caꞌa̱nj nij soꞌ maꞌ. ꞌO̱ se va̱j nij soꞌ chrej, ne̱ naꞌaan rque nij soꞌ, ne̱ nina̱j nij soꞌ rá chrej, rá ꞌu̱nj na̱nj ado̱nj ―taj Jesús a.

33Ne̱ cataj nij síí tucuꞌyón snana̱ soꞌ rihaan soꞌ a:

―ꞌO̱ se rcoꞌ tacaan u̱u̱n me nihánj, ne̱ me rej quiri̱ꞌ níꞌ rachrúún cha̱ cunuda̱nj nij yuvii̱ nihánj ga̱ ―taj nij soꞌ a.

34―Me daj rachrúún vaa rihaan soj ga̱ ―taj Jesús, xnáꞌanj soꞌ man nij síí tucuꞌyón snana̱ soꞌ a.

―Chi̱j gue̱e̱ rachrúún ga̱ do̱j xcuaj leꞌe̱j vaa rihaan núj na̱nj ado̱nj ―taj nij soꞌ a.

35Ga̱a ne̱ caꞌneꞌ Jesús suun rihaan nij yuvii̱ se vaa caꞌa̱nj ca̱yáán nij yuvii̱ rihaan yoꞌóó a. 36Ga̱a ne̱ nica̱j soꞌ chi̱j rachrúún yoꞌ ga̱ do̱j xcuaj, ne̱ cataj soꞌ guun niꞌya̱j níꞌ rihaan Yaꞌanj, ga̱a ne̱ cuxraꞌ taꞌa̱j soꞌ man rachrúún yoꞌ do̱ꞌ, man nee̱ xcuaj yoꞌ do̱ꞌ, ne̱ caxríj soꞌ ston nij síí tucuꞌyón snana̱ soꞌ, ne̱ rqué nij soꞌ rihaan nij yuvii̱ a. 37Ga̱a ne̱ chá cunuda̱nj nij yuvii̱, ne̱ nda̱a caraa rque nij soꞌ a. Ga̱a ne̱ naquiꞌyaj chre̱ꞌ nii se vaa quináj, ne̱ quisíj cunu̱ꞌ chi̱j ya̱ scaa caraa quiꞌyaj se quináj tuꞌva nij yuvii̱ yoꞌ a. 38Dan me se cunuda̱nj nij soꞌ chá, ne̱ quisíj nda̱a caꞌa̱nj míj nij snóꞌo chá, ne̱ ne quiꞌya̱j contá nii man chana̱ ga̱ xnii maꞌ. 39Ga̱a ne̱ naꞌnéé Jesús chrej man nij yuvii̱, ne̱ cavii soꞌ rá rihoo chéé rihaan na, ne̱ caꞌanj soꞌ rej cuꞌna̱j Magdala a.

বর্তমানে নির্বাচিত:

San Mateo 15: trc

হাইলাইট

কপি