San Mateo 14

Caviꞌ Juan Síí Cutaꞌ Ne man yuvii̱, quiꞌyaj síí nica̱j suun cuꞌna̱j Herodes a

1Dan me se cachén do̱j güii, ga̱a ne̱ cuchiꞌ nana̱ rihaan síí nica̱j suun cuꞌna̱j Herodes cheꞌé nu̱ꞌ se vaa quiꞌyaj Jesús a. 2Ga̱a ne̱ cataj soꞌ rihaan nij se‑mo̱zó soꞌ a:

―Síí cuꞌna̱j Jesús roꞌ, ya̱ síí cuꞌna̱j Juan Síí Cutaꞌ Ne man yuvii̱ me soꞌ chugua̱nj. Dan me se cunuu iꞌna̱ꞌ ya̱ uún Juan, rá ꞌu̱nj a. Ese Juan me síí guun nucua̱j quiꞌyaj nij suun sa̱ꞌ noco̱o yoꞌ na̱nj ado̱nj ―taj Herodes rihaan nij se‑mo̱zó soꞌ a.

3Da̱nj caꞌmii Herodes, cheꞌé se ga̱a rque̱ doj, ne̱ soꞌ me síí quiꞌyaj taꞌaa nij tanuu man Juan, ne̱ numíj nij tanuu man Juan, ne̱ caxríj Herodes tagaꞌ man Juan a. Da̱nj quiꞌyaj soꞌ cheꞌé chana̱ cuꞌna̱j Herodías nica̱ tinúú Herodes síí cuꞌna̱j Felipé a. 4Dan me se xcaj Herodes man noꞌ, ne̱ cataj xnaꞌanj Juan rihaan soꞌ se vaa ne nó xcúún soꞌ xca̱j soꞌ man choco̱ꞌ soꞌ maꞌ. 5Cheꞌé se vaa cataj Juan rihaan soꞌ roꞌ, cheꞌé dan guun ndoꞌo rá Herodes cavi̱ꞌ Juan a. Tza̱j ne̱ cuchuꞌviꞌ soꞌ se vaa caꞌma̱an rá nij yuvii̱ a. ꞌO̱ se síí nataꞌ snana̱ Yaꞌanj me Juan, rá nij yuvii̱ a.

6Dan me se quisíj güii canuû se‑chaꞌa̱nj maꞌa̱n Herodes, ga̱a ne̱ quiraꞌánj ndoꞌo taꞌníí chana̱ cuꞌna̱j Herodías niꞌya̱j cunuda̱nj nij síí caꞌnaꞌ a. Ne̱ guun niha̱ꞌ rá Herodes queneꞌen soꞌ man chana̱ ya̱a̱n raꞌánj, 7ga̱a ne̱ cheꞌé dan cataꞌ tuꞌva soꞌ se vaa ya̱ uxrá rque̱ soꞌ rihaan noꞌ me maꞌa̱n rasu̱u̱n cachi̱nj noꞌ rihaan soꞌ a. 8Dan me se cataj xnaꞌanj chana̱ cuꞌna̱j Herodías rihaan taꞌníí noꞌ da̱j cata̱j noꞌ rihaan Herodes, ga̱a ne̱ canicunꞌ chana̱ ya̱a̱n yoꞌ rihaan Herodes, quiꞌyaj nii noꞌ a. Ne̱ cataj chana̱ ya̱a̱n yoꞌ a:

―Caꞌne̱j so̱ꞌ cúú yave̱ síí cuꞌna̱j Juan rque agaꞌ rcoꞌo̱o, ne̱ rque̱ so̱ꞌ manj nihánj á ―taj chana̱ ya̱a̱n yoꞌ rihaan Herodes, quiꞌyaj nii noꞌ a.

9Ga̱a ne̱ quinanó ndoꞌo rá Herodes yoꞌ ga̱a cuno soꞌ nana̱ yoꞌ a. Quinanó rá soꞌ se vaa cuno cunuda̱nj nij síí caꞌnaꞌ nana̱ caꞌmii soꞌ se vaa rque̱ soꞌ me maꞌa̱n rasu̱u̱n rihaan chana̱ ya̱a̱n yoꞌ a. Tza̱j ne̱ cataj ya̱ soꞌ se vaa ni̱caj ya̱ chana̱ ya̱a̱n se vaa cachíín noꞌ rihaan soꞌ na̱nj ado̱nj. 10Ne̱ caꞌneꞌ soꞌ suun rihaan tanuu caꞌa̱nj tanuu tagaꞌ caꞌne̱ꞌ tanuu cúú yave̱ Juan a. Ne̱ da̱nj quiꞌyaj nij tanuu a. 11Ne̱ caꞌnéé nij tanuu cúú yave̱ Juan rque agaꞌ rcoꞌo̱o, ne̱ caꞌanj nica̱j nij tanuu cúú yave̱ Juan rihaan chana̱ ya̱a̱n yoꞌ, ne̱ caxríj nij soꞌ man yoꞌ ston noꞌ a. Ne̱ caꞌanj nica̱j noꞌ man cúú yave̱ Juan rihaan nii noꞌ a.

12Ga̱a ne̱ cuchiꞌ nij síí tucuꞌyón snana̱ Juan tagaꞌ, ne̱ caꞌanj naca̱j nij soꞌ cúú man Juan, ne̱ cachinꞌ nij soꞌ man soꞌ rque yoꞌóó a. Ga̱a ne̱ caꞌanj nij soꞌ, cataj xnaꞌanj nij soꞌ rihaan Jesús se vaa caviꞌ Juan yoꞌ a.

Rqué Jesús se chá ꞌu̱nꞌ míj (5,000) snóꞌo a

13Dan me se cuno Jesús se vaa guun, ga̱a ne̱ curiha̱nj soꞌ rej yoꞌ, ne̱ dan me se cavii soꞌ rque rihoo chéé rihaan na, ne̱ caꞌanj soꞌ rej tacaan rej taj va̱j yuvii̱ mán a. Ne̱ cuno nij yuvii̱ nana̱ se vaa caꞌanj soꞌ rej tacaan yoꞌ a. Cheꞌé dan curiha̱nj nij yuvii̱ chiháán nij yuvii̱, ne̱ cachéé taco̱j nij yuvii̱ tuꞌva na laguaná, ne̱ caꞌanj nij yuvii̱ rej caꞌanj Jesús a. 14Ne̱ nanij Jesús rá rihoo, ne̱ queneꞌen soꞌ se vaa a̱j ma̱n ri̱i̱ uxrá yuvii̱, ne̱ cunuu ꞌe̱e̱ rá soꞌ man nij yuvii̱, ne̱ nahuun sa̱ꞌ ta̱ranꞌ nij síí ranꞌ caꞌnaꞌ rihaan Jesús, quiꞌyaj soꞌ na̱nj ado̱nj. 15Dan me se cachén ndoꞌo orá, ne̱ nanij güii, ne̱ cuchiꞌ nij síí tucuꞌyón snana̱ Jesús rihaan soꞌ, ne̱ cataj nij soꞌ a:

―Rcoꞌ tacaan u̱u̱n me nihánj, ne̱ cachén ndoꞌo orá na̱nj ado̱nj. Qui̱ꞌyáá so̱ꞌ se ndoꞌo, ne̱ naꞌne̱j so̱ꞌ chrej man nij yuvii̱ ri̱i̱, caꞌa̱nj nij soꞌ chumanꞌ quira̱a̱n nij soꞌ se cha̱ nij soꞌ á ―taj nij soꞌ rihaan Jesús a.

16―Taj cheꞌé caꞌa̱nj nij yuvii̱ maꞌ. Ma̱an se rque̱ maꞌa̱n soj se chá cha̱ nij yuvii̱ á ―taj Jesús rihaan nij soꞌ a.

17―Tza̱j ne̱ taj se chá rihaan núj maꞌ. Ma̱an o̱rúnꞌ ꞌu̱nꞌ rachrúún do̱ꞌ, vi̱j gue̱e̱ xcuaj do̱ꞌ, vaa rihaan núj na̱nj á ―taj nij soꞌ rihaan Jesús a.

18―Ni̱caj soj man yoꞌ caꞌna̱ꞌ soj rihanj nihánj á ―taj Jesús rihaan nij soꞌ a.

19Ga̱a ne̱ caꞌneꞌ Jesús suun rihaan nij yuvii̱ ri̱i̱ caꞌa̱nj ca̱yáán nij yuvii̱ rihaan coj chri̱nꞌ, ga̱a ne̱ coro̱ꞌ soꞌ ꞌu̱nꞌ nij rachrúún ga̱ vi̱j ro̱j xcuaj, ne̱ niꞌya̱j soꞌ rej xta̱ꞌ, ne̱ cataj soꞌ guun niꞌya̱j níꞌ rihaan Yaꞌanj, ga̱a ne̱ cuxraꞌ taꞌa̱j soꞌ man rachrúún yoꞌ, ne̱ caxríj soꞌ ston nij síí tucuꞌyón snana̱ soꞌ, ne̱ caxríj nij soꞌ ston nij yuvii̱ a. 20Ga̱a ne̱ chá ta̱ranꞌ nij yuvii̱, ne̱ caraa rque cunuda̱nj nij soꞌ, ne̱ nda̱a quináj ndoꞌo se chá a. Ga̱a ne̱ naquiꞌyaj chre̱ꞌ nii man se quináj tuꞌva nij yuvii̱, ne̱ caraa ꞌó chuvi̱j ya̱ scaa a. 21Ne̱ nij snóꞌo rqué Jesús rachrúún me se ꞌu̱nꞌ míj snóꞌo me nij soꞌ, ne̱ ne quiꞌya̱j contá nii man chana̱ ga̱ xnii maꞌ.

Cachéé Jesús rihaan na a

22Ga̱a ne̱ raꞌya̱nj caꞌneꞌ Jesús suun rihaan nij síí tucuꞌyón snana̱ soꞌ se vaa cavi̱i̱ nij soꞌ rihoo chéé rihaan na caꞌa̱nj nij soꞌ rej xco̱ na laguaná yoꞌ, quita̱j ya̱a̱n nij soꞌ rihaan Jesús, ne̱ dan me se maꞌa̱n Jesús naꞌne̱j chrej man nij yuvii̱ ri̱i̱, taj Jesús rihaan nij síí tucuꞌyón snana̱ soꞌ a. 23Dan me se cataj Jesús rihaan nij yuvii̱ se vaa caꞌve̱e caꞌa̱nj nij yuvii̱ a. Ga̱a ne̱ cavii o̱rúnꞌ soꞌ raa̱ tacaan, ne̱ cachíín niꞌya̱j soꞌ rihaan Yaꞌanj a. Ne̱ da̱j doj cata̱ꞌ güii, ne̱ soꞌ me se quináj o̱rúnꞌ soꞌ raa̱ tacaan yoꞌ a.

24Dan me se ga̱nꞌ uxrá va̱j rihoo nu̱u̱ nij síí tucuꞌyón snana̱ Jesús rihaan na, ne̱ güéj ndoꞌo rihoo yoꞌ rihaan na, quiꞌyaj nana̱, cheꞌé se goꞌ nana̱ rej riha̱a̱n rihoo yoꞌ a. 25Dan me se rej rá ranga̱ꞌ caꞌanj Jesús rej va̱j nij soꞌ, chéé taco̱j u̱u̱n soꞌ rihaan na yoꞌ, va̱j soꞌ na̱nj ado̱nj. 26Ne̱ queneꞌen nij síí tucuꞌyón snana̱ soꞌ man soꞌ se vaa chéé u̱u̱n soꞌ rihaan na, ne̱ cuchuꞌviꞌ ndoꞌo nimán nij soꞌ a.

―Taꞌnaj me yoꞌ asânj ―taj nij soꞌ rihaan tuviꞌ nij soꞌ, ne̱ caguáj nij soꞌ, cheꞌé se cuchuꞌviꞌ nij soꞌ a.

27Veé dan, ne̱ nu̱ꞌ cataj Jesús rihaan nij soꞌ a:

―Naquiꞌya̱j nucua̱j soj nimán soj á. ꞌU̱nj ꞌnaꞌ ado̱nj. Se̱ cuchuꞌviꞌ soj maꞌ ―taj soꞌ rihaan nij soꞌ a.

28Ga̱a ne̱ cataj Pedró rihaan soꞌ a:

―Sese ya̱ ya̱ veé so̱ꞌ ꞌnaꞌ, ne̱ qui̱ꞌyáá so̱ꞌ se ndoꞌo, ne̱ caꞌve̱e cache̱e̱ ꞌu̱nj rihaan na qui̱ꞌyáá so̱ꞌ, Señor ―taj Pedró rihaan Jesús a.

29―Caꞌve̱e caꞌna̱ꞌ so̱ꞌ á ―taj Jesús rihaan Pedró a.

Ne̱ nanij Pedró rá rihoo, ne̱ cachéé soꞌ rihaan na, ne̱ caꞌanj soꞌ rihaan Jesús a. 30Tza̱j ne̱ niꞌya̱j soꞌ na se vaa cavii ndoꞌo nana̱ rihaan na, ne̱ cuchuꞌviꞌ soꞌ, ne̱ guun cheꞌe̱ soꞌ caꞌanj ni̱j soꞌ rque na yoꞌ a. Cheꞌé dan caguáj soꞌ man Jesús, cataj soꞌ a:

―Señor, ti̱nanii so̱ꞌ manj rihaan na rugua̱nj ―taj soꞌ a.

31Veé dan, ne̱ nu̱ꞌ taꞌaa Jesús raꞌa Pedró, ne̱ quirii Jesús man soꞌ rque na, ne̱ cataj Jesús a:

―Do̱j amán rá so̱ꞌ niꞌya̱j so̱ꞌ manj ado̱nj. Me cheꞌé guun vi̱j nimán so̱ꞌ ga̱ ―taj Jesús rihaan soꞌ a.

32Ga̱a ne̱ catúj ro̱j soꞌ rque rihoo chéé rihaan na, ga̱a ne̱ canicunꞌ nana̱ yoꞌ a. 33Ga̱a ne̱ caráj gue̱e̱ nij síí ma̱n rque rihoo rihaan Jesús, ne̱ cataj nij soꞌ a:

―Ya̱ ya̱ Taꞌni̱j Yaꞌanj mé so̱ꞌ ado̱nj ―taj nij soꞌ a.

Nahuun sa̱ꞌ nij síí ranꞌ ma̱n nu̱ꞌ anica̱j rej cuꞌna̱j Genesaret, quiꞌyaj Jesús a

34Ga̱a ne̱ cachén nij soꞌ nda̱a tuꞌva na laguaná, ne̱ cuchiꞌ nij soꞌ rej cuꞌna̱j Genesaret a. 35Ne̱ nuu ya̱a̱n nij síí ma̱n rej yoꞌ man Jesús, ne̱ caꞌnéé nij soꞌ nana̱ rihaan cunuda̱nj nij síí ya̱nj nu̱ꞌ anica̱j rej yoꞌ se vaa caꞌnaꞌ Jesús a. Ne̱ nica̱j nii man cunuda̱nj nij síí ranꞌ ya̱nj rej yoꞌ caꞌnaꞌ nii rihaan Jesús a. 36Ne̱ rquee̱ nij yuvii̱ rihaan Jesús se vaa caꞌve̱j Jesús cano̱ raꞌa nij soꞌ do̱j tuꞌva saga̱nꞌ soꞌ a. Ne̱ nu̱ꞌ nij síí canó raꞌa do̱j tuꞌva saga̱nꞌ soꞌ roꞌ, nahuun sa̱ꞌ cunuda̱nj nij soꞌ cuaj na̱nj ado̱nj.

বর্তমানে নির্বাচিত:

San Mateo 14: trc

হাইলাইট

কপি