San Mateo 12

Caꞌmii Jesús cheꞌé güii naránj rá a

1Dan me se naca̱ caꞌmii Jesús nana̱ yoꞌ, ne̱ ꞌo̱ güii naránj rá nij yuvii̱ israelitá me yoꞌ, ne̱ va̱j Jesús rque ꞌo̱ naa̱ ꞌnúú trigó a. Va̱j nij síí tucuꞌyón snana̱ soꞌ ga̱ soꞌ, ne̱ naꞌaan rque nij soꞌ a. Cheꞌé dan me guun cheꞌe̱ nij soꞌ cuta nij soꞌ do̱j ꞌnúú trigó chá nij soꞌ a. 2Tza̱j ne̱ queneꞌen nij síí fariseo se vaa cuta nij soꞌ do̱j ꞌnúú trigó, ne̱ cataj nij soꞌ rihaan Jesús a:

―Ni̱ꞌyaj so̱ꞌ á. Güii naránj rá yuvii̱ me güii cuanꞌ á. Ne nó xcúún nij síí tucuꞌyón snana̱ so̱ꞌ cuta̱ nij soꞌ ꞌnúú trigó cuanꞌ a̱ maꞌ ―taj nij soꞌ rihaan Jesús a.

3Ga̱a ne̱ cataj Jesús rihaan nij soꞌ a:

―Me cheꞌé, ne̱ ne naya̱a̱ soj rihaan Danj Yaꞌanj da̱j quiꞌyaj síí cuꞌna̱j David ga̱a naá ga̱. Ga̱a naꞌaan rque nij tuvi̱ꞌ nij soꞌ, 4ga̱a ne̱ catúj nij tuvi̱ꞌ nij soꞌ rá tucuá Yaꞌanj, ne̱ chá nij soꞌ rachrúún ta̱j rihaan se‑mesa̱ Yaꞌanj a. Ne̱ ne nó xcúún nij soꞌ cha̱ nij soꞌ rachrúún yoꞌ; ma̱an se o̱rúnꞌ nij xrej nó xcúún cha̱ rachrúún yoꞌ a.

5’Ne̱ ne naya̱a̱ soj me taj stucua̱nj Moisés cheꞌé nij xrej ꞌyaj suun nuvií noco̱o naꞌ. ꞌO̱ se cheꞌé se‑su̱u̱n nij soꞌ, ꞌyaj nij soꞌ se vaa ne nó xcúún yuvii̱ quiꞌya̱j yuvii̱ güii naránj rá níꞌ si̱j israelitá maꞌ. Tza̱j ne̱ ne tumé nij soꞌ cacunꞌ cheꞌé se vaa ꞌyaj nij soꞌ maꞌ. 6Ne̱ cuano̱ nihánj me cata̱j xnaꞌanj ꞌu̱nj rihaan soj se vaa vaa síí nicu̱nꞌ rihaan soj cuano̱, ne̱ sa̱ꞌ doj vaa soꞌ rihaan nuvií noco̱o yoꞌ ado̱nj. 7Ne̱ vaa ꞌó nana̱ no̱ rihaan Danj Yaꞌanj taj a: “Ne uun niha̱ꞌ rá ꞌu̱nj niꞌya̱j ꞌu̱nj síí rqué xcuu rihaan ꞌu̱nj maꞌ. Tana̱nj uun niha̱ꞌ rá ꞌu̱nj niꞌya̱j ꞌu̱nj yuvii̱ ꞌe̱e̱ rá man tuviꞌ ado̱nj.” Yoꞌ me snana̱ Yaꞌanj nana̱ no̱ rihaan yanj yoꞌ a. Sese cuno soj me taj nana̱ yoꞌ, ne̱ ne cuta̱ꞌ soj cacunꞌ xráá nij síí nihánj tza̱j maꞌ. Ne̱ ne tumé nij síí nihánj cacunꞌ maꞌ. 8ꞌO̱ se ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ roꞌ, no̱ xcúnj quiri̱i̱ taꞌngaj da̱j quiꞌya̱j yuvii̱ güii naránj rá na̱nj ado̱nj ―taj Jesús rihaan nij síí fariseo yoꞌ a.

Nahuun sa̱ꞌ ꞌo̱ síí nacoo̱ raꞌa, quiꞌyaj Jesús a

9Ga̱a ne̱ curiha̱nj Jesús rej na̱j naa̱ yoꞌ, ne̱ catúj soꞌ rá veꞌ tucuꞌyón nij síí ma̱n chumanꞌ yoꞌ stucua̱nj Moisés a. 10Dan me se yáán ꞌo̱ síí nacoo̱ raꞌa rá veꞌ yoꞌ a. Ne̱ xnáꞌanj nij síí fariseo man Jesús sese no̱ xcúún yuvii̱ quiꞌya̱j conoꞌó yuvii̱ man tuviꞌ yuvii̱ güii naránj rá yuvii̱ a. Da̱nj tuꞌva nij soꞌ rihaan Jesús, cheꞌé yan me rá nij soꞌ cuta̱ꞌ nij soꞌ cacunꞌ xráá Jesús cheꞌé nana̱ caꞌmi̱i̱ Jesús ado̱nj. 11Ga̱a ne̱ cataj Jesús rihaan nij soꞌ a:

―Sese vaa daán ꞌo̱ soj matzinj, ne̱ sese quini̱j xoꞌ rá yuꞌuj güii naránj rá yuvii̱, ne̱ cuxu̱u̱n síí da̱a̱n man xoꞌ quiri̱i̱ soꞌ man xoꞌ rque yuꞌuj yoꞌ, raj a. 12Ne̱ vaa se uun uxrá doj yuvii̱ rihaan matzinj yoꞌ ado̱nj. Cheꞌé dan caꞌve̱e ra̱cuíj yuvii̱ man tuviꞌ yuvii̱ güii naránj rá yuvii̱ á ―taj Jesús rihaan nij síí fariseo yoꞌ a.

13Canica̱j Jesús cataj Jesús rihaan síí nacoo̱ raꞌa yoꞌ a:

―Tu̱cuá so̱ꞌ raꞌá so̱ꞌ á ―taj Jesús rihaan soꞌ a.

Ga̱a ne̱ tucuá soꞌ raꞌa soꞌ, ne̱ cunuu sa̱ꞌ raꞌa soꞌ, ne̱ ase vaa gue̱e̱ ni̱chrej raꞌa soꞌ rej vaa sa̱ꞌ roꞌ, da̱nj vaa gue̱e̱ níchrej raꞌa soꞌ uún a.

14Dan me se curiha̱nj nij síí fariseo rá veꞌ yoꞌ, ne̱ caꞌanj nij soꞌ rej yaníj, ne̱ nuchruj ra̱a̱ ta̱ranꞌ nij soꞌ da̱j ga̱a̱ quiꞌya̱j nij soꞌ ne̱ cavi̱ꞌ Jesús a.

Caꞌneꞌ Jesús suun rihaan yuvii̱ se vaa se̱ nataꞌ yuvii̱ rihaan tuviꞌ yuvii̱ cheꞌé soꞌ a

15Tza̱j ne̱ queneꞌen Jesús da̱j me rá nij síí fariseo quiꞌya̱j nij soꞌ man Jesús a. Cheꞌé dan cavii soꞌ rej yoꞌ, ne̱ caꞌanj ndoꞌo yuvii̱ ga̱ soꞌ, ne̱ nahuun cunuda̱nj nij síí ranꞌ va̱j ga̱ nij yuvii̱, quiꞌyaj Jesús a. 16Ne̱ caꞌneꞌ ndoꞌo soꞌ suun rihaan nij yuvii̱ se vaa se̱ nataꞌ nij yuvii̱ rihaan tuviꞌ yuvii̱ me síí me ya̱ soꞌ a.

17Da̱nj caꞌmii Jesús, ga̱a ne̱ quisíj ya̱ nu̱ꞌ nana̱ nihánj nana̱ cataj xnaꞌanj Yaꞌanj rihaan síí cuꞌna̱j Isaías síí nataꞌ snana̱ Yaꞌanj ga̱a naá a:

18Ni̱ꞌyaj soj man síí nihánj á.

Síí nu̱u̱ rihaan ꞌu̱nj do̱ꞌ, síí narii ꞌu̱nj do̱ꞌ, me soꞌ ado̱nj.

ꞌE̱e̱ rá ꞌu̱nj do̱ꞌ, aranꞌ rá nimán ꞌu̱nj do̱ꞌ, niꞌya̱j ꞌu̱nj man soꞌ a.

Caꞌne̱j ꞌu̱nj Nimán ꞌu̱nj nimán soꞌ,

ne̱ nata̱ꞌ soꞌ rihaan nij síí yaníj se vaa veꞌé caꞌne̱ꞌ ꞌu̱nj cacunꞌ cheꞌé nij soꞌ a.

19Se̱ cunuꞌ soꞌ, se̱ caguáj soꞌ,

ne̱ a̱ ꞌó yuvii̱ se̱ cuno snana̱ soꞌ rá callé maꞌ.

20Rcoo̱ xtunꞌ roꞌ, se̱ tacuachranꞌ soꞌ maꞌ.

Ne̱ tuꞌvej agaꞌ yaꞌan avii yachruu̱ roꞌ, se̱ tinaꞌáj soꞌ maꞌ,

nda̱a se quiꞌya̱j canaán nana̱ nica̱

ga̱a veꞌé caꞌne̱ꞌ soꞌ cacunꞌ cheꞌé yuvii̱ na̱nj ado̱nj.

21Ne̱ ga̱a̱ nucua̱j rá nij síí yaníj man se‑chuvi̱i soꞌ a.

Da̱nj taj Yaꞌanj ga̱a naá a.

Cutaꞌ nij síí fariseo cacunꞌ rmi̱ꞌ xráá Jesús se vaa caꞌmii Jesús ga̱ Síí Chre̱e a

22Guun naá do̱j, ga̱a ne̱ caꞌnaꞌ yuvii̱ rihaan Jesús, ne̱ nica̱j nij yuvii̱ man ꞌo̱ síí yaꞌmi̱i aráán rihaan nu̱u̱ nana̱ chre̱e nimán a. Ne̱ nahuun nu̱ꞌ soꞌ, quiꞌyaj Jesús, ne̱ naxraꞌ rihaan soꞌ, ne̱ caꞌmii soꞌ ado̱nj. 23Dan me se caráyaꞌa̱nj nij yuvii̱ se vaa nahuun sa̱ꞌ soꞌ quiꞌyaj Jesús, ne̱ cataj nij yuvii̱ a:

―Síí nihánj me Taꞌníí Taꞌnij Siꞌno̱ David síí cayáán ga̱a naá, síí caꞌna̱ꞌ ti̱nanii man níꞌ rihaan sayuun, rá soj naꞌ ―taj nij yuvii̱, xnáꞌanj nij yuvii̱ man tuviꞌ yuvii̱ a.

24Tza̱j ne̱ cuno nij síí fariseo da̱j caꞌmii nij yuvii̱ cheꞌé Jesús, ne̱ cataj nij soꞌ a:

―Né maꞌa̱n síí nihánj rii nana̱ chre̱e maꞌ. Ma̱an se aꞌmii soꞌ ga̱ nana̱ chre̱e uun chij doj, síí cuꞌna̱j Beelzebú, ne̱ cheꞌé dan rii soꞌ nij nana̱ chre̱e nimán yuvii̱ ado̱nj ―taj nij síí fariseo cheꞌé Jesús, caꞌmii ne̱ nij soꞌ a.

25Dan me se queneꞌen Jesús da̱j vaa nimán nij síí fariseo yoꞌ, ga̱a ne̱ caꞌmii soꞌ rihaan nij síí fariseo a:

―Neꞌen soj se vaa sese vaa ꞌo̱ yoꞌóó noco̱o, ne̱ sese xraꞌ taꞌa̱j nij síí uun chij rihaan yoꞌóó noco̱o yoꞌ ne̱ cunu̱ꞌ nij maꞌa̱n nij soꞌ ga̱ tuviꞌ nij soꞌ, ne̱ vaa güii, ne̱ nu̱ꞌ yoꞌóó noco̱o yoꞌ quiri̱ꞌ nu̱ꞌ na̱nj ado̱nj. Ne̱ sese cunu̱ꞌ taꞌa̱j nij yuvii̱ ma̱n maꞌa̱n chumanꞌ ga̱ tuviꞌ yuvii̱, ne̱ vaa güii quiri̱ꞌ nu̱ꞌ chiháán nij soꞌ, quiꞌya̱j nij soꞌ na̱nj ado̱nj. Ne̱ sese cunu̱ꞌ taꞌa̱j nij tucua̱ ꞌo̱ soꞌ ga̱ maꞌa̱n tuviꞌ nij soꞌ, ne̱ vaa güii quiri̱ꞌ nu̱ꞌ nij tucua̱ soꞌ, quiꞌya̱j nij soꞌ na̱nj ado̱nj. 26Cheꞌé dan me sese racuíj Síí Chre̱e manj rii ꞌu̱nj tuviꞌ soꞌ nana̱ chre̱e nimán nij yuvii̱, ga̱a ne̱ asa̱ꞌ caꞌve̱e ꞌo̱ gu̱un chij ndoꞌo soꞌ rihaan nij nana̱ chre̱e, rá soj ga̱. 27Dan me se uun rá soj se vaa rii ꞌu̱nj nana̱ chre̱e nimán nij yuvii̱, ꞌyaj Síí Chre̱e, síí cuꞌna̱j Beelzebú, cheꞌé se aꞌmii ꞌu̱nj ga̱ soꞌ, rá soj a. Tza̱j ne̱ nij síí tucuꞌyón snana̱ soj me se veé da̱nj rii nij soꞌ nij nana̱ chre̱e nimán yuvii̱ uún a. Ne̱ asa̱ꞌ aꞌvee ꞌyaj nij soꞌ da̱nj, rá soj ga̱. Ne̱ vaa nij soꞌ vaa, veé da̱nj aꞌmii nij soꞌ ga̱ Síí Chre̱e, rá soj ga̱a a̱ naꞌ. Cheꞌé nana̱ caꞌmii soj me se maꞌa̱n nij síí tucuꞌyón snana̱ soj cuta̱ꞌ cacunꞌ xráá soj se vaa caꞌmii ne̱ soj ado̱nj. 28Tza̱j ne̱ ꞌu̱nj me se ya̱ Nimán Yaꞌanj me síí racuíj manj rii ꞌu̱nj nana̱ chre̱e nimán yuvii̱ ado̱nj. Cheꞌé dan xca̱j soj cuentá se vaa a̱j guun cheꞌe̱ Yaꞌanj uun chij Yaꞌanj scaꞌnúj soj ado̱nj.

29’Ne̱ sese me rá ꞌo̱ soꞌ catu̱u̱ soꞌ rá veꞌ tucuá síí nucua̱j quiꞌya̱j itu̱u̱ soꞌ siꞌyaj síí nucua̱j yoꞌ, ne̱ asino nu̱míj soꞌ man síí nucua̱j yoꞌ, ga̱a ne̱ ca̱nica̱j soꞌ catzi̱j soꞌ tucuá síí nucua̱j yoꞌ ado̱nj.

30’Síí naꞌvej rá gu̱un tuvi̱ꞌ ga̱ ꞌu̱nj roꞌ, síí ta̱j riꞌyunj manj me soꞌ a. Ne̱ síí ne racuíj manj naquiꞌya̱j chre̱ꞌ ꞌu̱nj man yuvii̱ canoco̱ꞌ man Yaꞌanj roꞌ, soꞌ me síí tichaꞌnuu̱ man nij yuvii̱, ne̱ aráán soꞌ rihaan nij yuvii̱ se̱ canocoꞌ nij yuvii̱ man Yaꞌanj ado̱nj.

31’Cheꞌé dan cata̱j xnaꞌanj ꞌu̱nj rihaan soj se vaa nu̱ꞌ cacunꞌ tu̱mé yuvii̱ do̱ꞌ, nu̱ꞌ nana̱ qui̱j caꞌmi̱i̱ yuvii̱ do̱ꞌ, caꞌve̱e tinavi̱j Yaꞌanj cacunꞌ yoꞌ cheꞌé nij yuvii̱ a. Tza̱j ne̱ sese caꞌmi̱i̱ ꞌo̱ soꞌ nana̱ qui̱j cheꞌé Nimán Yaꞌanj, ne̱ daj chiha̱a̱ míj se̱ navij cacunꞌ yoꞌ xráá soꞌ a̱ maꞌ. 32Dan me se ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ roꞌ, caꞌve̱e se caꞌmi̱i̱ ꞌo̱ soꞌ nana̱ nij cheꞌej, tza̱j ne̱ caꞌve̱e navi̱j cacunꞌ yoꞌ xráá soꞌ quiꞌya̱j Yaꞌanj na̱nj ado̱nj. Tza̱j ne̱ sese caꞌmi̱i̱ ꞌo̱ soꞌ nana̱ nij cheꞌé Nimán Yaꞌanj, ne̱ daj chiha̱a̱ míj se̱ tinavij Yaꞌanj cacunꞌ yoꞌ xráá soꞌ a̱ maꞌ. Dan me se caꞌve̱e se rihaan chumii̱ nihánj do̱ꞌ, caꞌve̱e se nda̱a cavi̱ꞌ soꞌ do̱ꞌ, tza̱j ne̱ se̱ navij cacunꞌ yoꞌ nu̱ꞌ cavii nu̱ꞌ caꞌanj xráá soꞌ a̱ maꞌ.

Cataj Jesús se vaa ase vaa nimán yuvii̱ roꞌ, da̱nj vaa nana̱ aꞌmii yuvii̱ a

33’Sese sa̱ꞌ vaa ꞌo̱ chruun, ne̱ sa̱ꞌ vaa chruj ma̱n raa̱ chruun yoꞌ a. Sese chiꞌi̱i̱ vaa ꞌo̱ chruun ne̱ chiꞌi̱i̱ vaa chruj ma̱n raa̱ chruun yoꞌ a. Dan me se sese neꞌen yuvii̱ se vaa vaa sa̱ꞌ chruj ma̱n raa̱ chruun, ne̱ neꞌen yuvii̱ se vaa chruun sa̱ꞌ me yoꞌ a. Ne̱ sese neꞌen yuvii̱ se vaa vaa chiꞌi̱i̱ chruj ma̱n raa̱ chruun, ne̱ neꞌen uún yuvii̱ se vaa chruun chiꞌi̱i̱ me yoꞌ ado̱nj. 34ꞌO̱ se ase vaa xcuáá yuva̱a̱ vaa soj na̱nj á. Chiꞌi̱i̱ vaa nimán soj, ne̱ chiꞌi̱i̱ vaa nana̱ aꞌmii soj ado̱nj. ꞌO̱ se ase vaa se ma̱n nimán yuvii̱ roꞌ, da̱nj vaa nana̱ avii tuꞌva yuvii̱ ado̱nj. 35Dan me se síí sa̱ꞌ roꞌ, ma̱n ndoꞌo se sa̱ꞌ nimán soꞌ, ne̱ ina̱nj nana̱ sa̱ꞌ aꞌmii soꞌ ado̱nj. Síí chiꞌi̱i̱ roꞌ, ma̱n ndoꞌo se chiꞌi̱i̱ nimán soꞌ, ne̱ ina̱nj nana̱ chiꞌi̱i̱ aꞌmii soꞌ ado̱nj. 36Ne̱ cuano̱ nihánj me cata̱j xnaꞌanj ꞌu̱nj rihaan soj se vaa nu̱ꞌ nana̱ aꞌmii rmaꞌa̱n nij yuvii̱ roꞌ, nago̱ꞌ nij yuvii̱ cuentá rihaan Yaꞌanj cheꞌé nu̱ꞌ nana̱ vaa da̱nj nana̱ caꞌmii nij yuvii̱ asa̱ꞌ quisíj güii caꞌne̱ꞌ Yaꞌanj cacunꞌ cheꞌé cunuda̱nj nij yuvii̱ ado̱nj. 37ꞌO̱ se sese sa̱ꞌ vaa nana̱ caꞌmii so̱ꞌ, ne̱ cata̱j Yaꞌanj se vaa ne tumé so̱ꞌ cacunꞌ maꞌ. Ne̱ sese chiꞌi̱i̱ vaa nana̱ caꞌmii so̱ꞌ, ne̱ cata̱j Yaꞌanj se vaa ya̱ tumé so̱ꞌ cacunꞌ ado̱nj ―taj Jesús rihaan nij síí fariseo yoꞌ a.

Me rá nij síí naquiꞌyaj cu̱u stucua̱nj Moisés ga̱ nij síí fariseo quiꞌya̱j Jesús ꞌo̱ suun sa̱ꞌ noco̱o a

38Dan me se caꞌmii do̱j síí naquiꞌyaj cu̱u stucua̱nj Moisés ga̱ do̱j síí fariseo rihaan Jesús, ne̱ cataj nij soꞌ a:

―Maestro, qui̱ꞌyáá so̱ꞌ ꞌo̱ suun sa̱ꞌ noco̱o queneꞌe̱n núj, ga̱a ne̱ gu̱un ya̱ rá núj se vaa ya̱ aꞌmii so̱ꞌ á ―taj nij soꞌ rihaan Jesús a.

39Ga̱a ne̱ cataj Jesús rihaan nij soꞌ a:

―Xa̱ꞌ soj si̱j ꞌyaj ina̱nj se chiꞌi̱i̱ ne̱ naꞌvej rá canoco̱ꞌ xraan man Yaꞌanj me se me rá ga̱a̱ soj qui̱ꞌyáj suun sa̱ꞌ noco̱o ni̱ꞌyaj soj, tza̱j ne̱ daj chiha̱a̱ míj se̱ quiꞌyáj nda̱a vaa me rá soj maꞌ. Ma̱an se queneꞌe̱n soj suun sa̱ꞌ noco̱o ase vaa quiranꞌ síí cuꞌna̱j Jonás síí nataꞌ snana̱ Yaꞌanj ga̱a naá roꞌ, da̱nj qui̱ránꞌ ꞌu̱nj, vaa güii, ni̱ꞌyaj soj ado̱nj. 40ꞌO̱ se ase vaa cunuû síí cuꞌna̱j Jonás vaꞌnu̱j ya̱ güii rque xcuu xi̱j va̱j rque na yaꞌa̱nj roꞌ, taꞌngaꞌ da̱nj ga̱a̱ vaꞌnu̱j ya̱ güii nuvi̱i niga̱nꞌ qui̱náá ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rque yoꞌóó queneꞌe̱n soj ado̱nj. 41Nij síí cumán chumanꞌ noco̱o cuꞌna̱j Nínive roꞌ, canicu̱nꞌ nij soꞌ ga̱ maꞌa̱n soj si̱j vaa iꞌna̱ꞌ rihaan chumii̱ nihánj cuano̱ asa̱ꞌ quisíj güii caꞌne̱ꞌ Yaꞌanj cacunꞌ cheꞌé yuvii̱, ne̱ cuta̱ꞌ nij síí cumán chumanꞌ Nínive yoꞌ cacunꞌ xráá soj ado̱nj. Cuno nij soꞌ nana̱ caꞌmii natáj Jonás, ne̱ nuchranꞌ nimán nij soꞌ, ne̱ canocoꞌ nij soꞌ man Yaꞌanj ado̱nj. Ne̱ xa̱ꞌ ꞌu̱nj si̱j nicu̱nꞌ rihaan soj cuano̱, tza̱j ne̱ síí vaa se uun doj mé ꞌu̱nj rihaan Jonás ado̱nj. 42Ne̱ güii caꞌne̱ꞌ Yaꞌanj cacunꞌ cheꞌé yuvii̱ roꞌ, cuchi̱ꞌ chana̱ nica̱j suun reiná guun chij rihaan chumanꞌ na̱j ga̱nꞌ ndoꞌo rihaan yoꞌóó rej sur, ne̱ canicu̱nꞌ noꞌ rihaan soj, quiꞌya̱j Yaꞌanj, ne̱ cuta̱ꞌ noꞌ cacunꞌ xráá soj ado̱nj. ꞌO̱ se ga̱nꞌ ndoꞌo cachéé noꞌ cuchi̱ꞌ noꞌ rihaan rey cuꞌna̱j Salomón, ne̱ cuno noꞌ nana̱ cu̱u tucuꞌyón Salomón man noꞌ ado̱nj. Ne̱ xa̱ꞌ ꞌu̱nj si̱j nicu̱nꞌ rihaan soj cuano̱, tza̱j ne̱ síí cu̱u doj raa̱ mé ꞌu̱nj rihaan Salomón na̱nj ado̱nj.

Cataj Jesús da̱j ꞌyaj nana̱ chre̱e ga̱a anica̱j uún nana̱ chre̱e nimán yuvii̱ a

43’Ne̱ ga̱a tiha̱j yu̱u̱n avii ꞌo̱ nana̱ chre̱e nimán snóꞌo, ne̱ chéé rmaꞌa̱n nana̱ chre̱e yoꞌ nanoꞌ soꞌ rej ca̱yáán soꞌ, tza̱j ne̱ taj se qui̱ꞌyáꞌ quiri̱ꞌ nana̱ chre̱e yoꞌ rej ca̱yáán soꞌ, ga̱a ne̱ me rá uún nana̱ chre̱e yoꞌ ca̱nica̱j soꞌ rej cavii soꞌ ga̱a naá a. 44Dan me se taj nana̱ chre̱e yoꞌ a: “Ca̱nica̱j uún ꞌu̱nj na̱nꞌ ꞌu̱nj rej cavii ꞌu̱nj a.” Ne̱ ga̱a nucuiꞌ nana̱ chre̱e yoꞌ, ne̱ vaa yaꞌnúj tucuá yoꞌ, ne̱ naruvii rá veꞌ, ne̱ uun yaj ya̱nj rá veꞌ a. 45Ga̱a ne̱ ꞌanj uún nana̱ chre̱e yoꞌ, ne̱ nica̱j soꞌ ꞌó chi̱j tuviꞌ nana̱ chre̱e yoꞌ síí chiꞌi̱i̱ doj, ne̱ ꞌnaꞌ nique uún soꞌ nimán snóꞌo yoꞌ, ga̱a ne̱ ca̱yáán ta̱ranꞌ nij nana̱ chre̱e yoꞌ a. Dan me se ga̱a naá ga̱a cayáán o̱rúnꞌ nana̱ chre̱e yoꞌ, ne̱ ma̱an taꞌngaꞌ qui̱j vaa nimán snóꞌo yoꞌ, tza̱j ne̱ ga̱a namán ꞌó chi̱j nana̱ chre̱e yoꞌ, ga̱a ne̱ doj a̱ tico nana̱ chre̱e man soꞌ, ne̱ doj a̱ qui̱j vaa nimán snóꞌo yoꞌ, ꞌyaj nij nana̱ chre̱e yoꞌ na̱nj ado̱nj.

’Ne̱ ase vaa ranꞌ snóꞌo yoꞌ roꞌ, taꞌngaꞌ da̱nj quira̱nꞌ soj si̱j vaa iꞌna̱ꞌ cuano̱ si̱j naꞌvej rá cuno̱ snana̱ ꞌu̱nj ado̱nj ―taj Jesús rihaan nij síí naquiꞌyaj cu̱u stucua̱nj Moisés do̱ꞌ, rihaan nij síí fariseo do̱ꞌ a.

Ase vaa nii Jesús do̱ꞌ, tinúú Jesús do̱ꞌ, raꞌvij Jesús do̱ꞌ, vaa nij síí uno rihaan Yaꞌanj a

46Ataa quisi̱j caꞌmii Jesús rihaan nij yuvii̱, ne̱ dan me se cuchiꞌ nii Jesús do̱ꞌ, tinúú Jesús do̱ꞌ, rihaan veꞌ a. Nanoꞌ nij soꞌ da̱j quiꞌya̱j nij soꞌ caꞌmi̱i̱ nij soꞌ ga̱ Jesús a. 47Ne̱ cataj ꞌo̱ soꞌ rihaan Jesús a:

―Ni̱ꞌyaj so̱ꞌ á. Nicu̱nꞌ nií so̱ꞌ ga̱ nij tinúú so̱ꞌ xeꞌ, ne̱ me ndoꞌo rá nij soꞌ caꞌmi̱i̱ nij soꞌ ga̱ so̱ꞌ ado̱nj ―taj soꞌ rihaan Jesús a.

48Ne̱ cataj uún Jesús rihaan síí cataj xnaꞌanj rihaan Jesús a:

―Me chana̱ me nií ꞌu̱nj rihaan ꞌu̱nj, rá so̱ꞌ ga̱. Me síí me tinúú ꞌu̱nj rihaan ꞌu̱nj, rá so̱ꞌ ga̱ ―taj Jesús rihaan soꞌ a.

49Ne̱ ticunꞌ soꞌ raꞌa soꞌ rihaan nij síí tucuꞌyón snana̱ soꞌ, ne̱ cataj soꞌ a:

―Ni̱ꞌyaj soj á. Ase vaa nií ꞌu̱nj do̱ꞌ, ase vaa tinúú ꞌu̱nj do̱ꞌ, vaa nij síí nihánj ado̱nj. 50ꞌO̱ se yuvii̱ uno rihaan Réé ꞌu̱nj síí nicu̱nꞌ xta̱ꞌ roꞌ, ase vaa tinúú ꞌu̱nj do̱ꞌ, ase vaa raꞌvij ꞌu̱nj do̱ꞌ, ase vaa nií ꞌu̱nj do̱ꞌ, vaa nij soꞌ rihanj ado̱nj ―taj Jesús a.

বর্তমানে নির্বাচিত:

San Mateo 12: trc

হাইলাইট

কপি