San Juan 10

Ase vaa síí tumé matzinj roꞌ, da̱nj vaa Jesús, tumé soꞌ man níꞌ a

1Ga̱a ne̱ cataj uún Jesús rihaan nij soꞌ a:

―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa xa̱ꞌ síí ne atúj taꞌyaa rej nu̱u̱ nij matzinj ne̱ avii raa̱ chingá rej nu̱u̱ nij xoꞌ, tza̱j ne̱ síí itu̱u̱ me soꞌ ado̱nj. 2Tza̱j ne̱ síí atúj taꞌyaa roꞌ, soꞌ me síí tumé matzinj yoꞌ ado̱nj. 3Dan me se xꞌnúj taꞌyaa rihaan soꞌ, ꞌyaj síí tumé taꞌyaa, ga̱a ne̱ uno nij matzinj snana̱ soꞌ a. Ga̱a ne̱ nacúún soꞌ man nij matzinj aꞌmii soꞌ se‑chuvi̱i ꞌo̱ ꞌo̱ nij xoꞌ, ga̱a ne̱ ꞌanj nica̱j soꞌ man nij xoꞌ xeꞌ ado̱nj. 4Ga̱a quisíj quirii soꞌ man nij xoꞌ xeꞌ, ne̱ noco̱ꞌ nij matzinj xcó soꞌ, cheꞌé se uꞌyón nij xoꞌ snana̱ soꞌ ado̱nj. 5Tza̱j ne̱ ꞌó yuvii̱ me se se̱ canocoꞌ nij xoꞌ man ꞌó soꞌ, tana̱nj cuna̱nj nij xoꞌ rihaan ꞌó soꞌ, cheꞌé se se̱ cunuu ya̱a̱n uxrá nij xoꞌ snana̱ ꞌó soꞌ a̱ maꞌ ―taj Jesús a.

6Dan me se ase vaa ꞌo̱ cuentó vaa nana̱ nihánj nana̱ caꞌmii Jesús rihaan nij soꞌ, tza̱j ne̱ ne xca̱j nij soꞌ cuentá me taj nana̱ nihánj a̱ maꞌ.

7Cheꞌé dan cataj uún Jesús a:

―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa ase vaa taꞌyaa rej atúj nij matzinj roꞌ, da̱nj vaa ꞌu̱nj a. 8Dan me se xa̱ꞌ ta̱ranꞌ nij síí caꞌnaꞌ ga̱a rque̱ doj, tza̱j ne̱ ase vaa síí itu̱u̱ vaa nij soꞌ a. Tza̱j ne̱ ne cuno̱ nij matzinj rihaan nij soꞌ a̱ maꞌ. 9Dan me se ase vaa taꞌyaa yoꞌ vaa ꞌu̱nj, ne̱ síí atúj rej nicu̱nꞌ ꞌu̱nj roꞌ, soꞌ me síí amán rá niꞌya̱j manj a. Nani̱i̱ soꞌ rihaan sayuun, ne̱ veꞌé catu̱u̱ soꞌ, ne̱ veꞌé cu̱riha̱nj soꞌ, ne̱ nari̱ꞌ soꞌ coj chri̱nꞌ cha̱ soꞌ na̱nj ado̱nj.

10’Xa̱ꞌ síí itu̱u̱, tza̱j ne̱ me ina̱nj rá soꞌ quiꞌya̱j itu̱u̱ soꞌ matzinj do̱ꞌ, ticavi̱ꞌ soꞌ matzinj do̱ꞌ, tinavi̱j soꞌ matzinj do̱ꞌ ado̱nj. Cheꞌé dan atúj soꞌ rej nu̱u̱ nij matzinj a. Tza̱j ne̱ ꞌu̱nj me se caꞌnáꞌ ꞌu̱nj cheꞌé se me rá ꞌu̱nj ꞌo̱ ga̱a̱ iꞌna̱ꞌ nij xoꞌ, ne̱ niꞌndaj ya̱ ga̱a̱ xe̱j nimán nij xoꞌ, qui̱ꞌyáj chugua̱nj.

11’Ne̱ ꞌu̱nj roꞌ, me síí veꞌé ya̱ ya̱ tumej nij matzinj, ne̱ caꞌne̱j nimanj cavi̱j cheꞌé nij xoꞌ ado̱nj. 12Xa̱ꞌ mozó, tza̱j ne̱ né si̱j da̱a̱n matzinj tumé sa̱ꞌ matzinj me soꞌ maꞌ. Si̱j ꞌyaj canaán saꞌanj u̱u̱n me soꞌ, ne̱ cheꞌé dan sese neꞌen soꞌ xcuu xcaꞌyanj caꞌnu̱ꞌ, ne̱ chuꞌviꞌ soꞌ, ne̱ tanáj soꞌ matzinj yoꞌ, ne̱ unánj soꞌ a. Ga̱a ne̱ tanáj maꞌa̱n soꞌ man nij matzinj, ga̱a ne̱ ta̱ꞌaa xcaꞌyanj yoꞌ man nij matzinj, ne̱ ti̱chaꞌnuu̱ xcaꞌyanj yoꞌ man nij xoꞌ na̱nj ado̱nj. 13Da̱nj ꞌyaj mozó yoꞌ, cheꞌé se mozó u̱u̱n me soꞌ, ne̱ ne rihuun rá soꞌ sese quira̱nꞌ nij matzinj sayuun maꞌ.

14’Ne̱ xa̱ꞌ ꞌu̱nj, tza̱j ne̱ si̱j tumé sa̱ꞌ man nij matzinj mej, ne̱ neꞌenj man nij matzinj noco̱ꞌ manj, ne̱ neꞌen nij xoꞌ manj na̱nj á. 15Dan me se neꞌen Réj Yaꞌanj manj, ne̱ neꞌenj man Réj, ne̱ ase vaa ꞌu̱nj ga̱ Réj roꞌ, da̱nj vaa daán ꞌu̱nj matzinj ga̱ ꞌu̱nj chugua̱nj. Ne̱ aꞌnéé nimanj cavi̱j cheꞌé nij xoꞌ ado̱nj. 16Ne̱ vaa doj daán ꞌu̱nj matzinj uún, tza̱j ne̱ nuviꞌ nij xoꞌ rej nu̱u̱ nij matzinj nihánj maꞌ. Ne̱ vaa cheꞌé caꞌna̱ꞌ ꞌó matzinj yoꞌ uún, qui̱ꞌyáj, ne̱ cuno̱ nij xoꞌ snana̱ ꞌu̱nj a. Ga̱a ne̱ cunu̱u chre̱ꞌ nij xoꞌ ga̱ matzinj nihánj, ga̱a ne̱ tu̱mé ꞌu̱nj man cunuda̱nj nij xoꞌ ado̱nj.

17’Dan me se caꞌnéé nimanj cavi̱j, ne̱ cunu̱u iꞌna̱ꞌ uún ꞌu̱nj, ne̱ cheꞌé dan ꞌe̱e̱ rá Réj Yaꞌanj manj ado̱nj. 18Taj va̱j síí rquee̱ manj cavi̱j maꞌ. ꞌO̱ se ma̱ꞌanj aꞌnéé nimanj cavi̱j na̱nj á. Dan me se ꞌu̱nj me síí no̱ xcúún caꞌne̱j nimanj cavi̱j, ne̱ ꞌu̱nj me síí no̱ xcúún cunu̱u iꞌna̱ꞌ uún ado̱nj. Nihánj me suun caꞌneꞌ Réj Yaꞌanj rihanj na̱nj ado̱nj ―taj Jesús rihaan nij soꞌ a.

19Ga̱a ne̱ cuxraꞌ taꞌa̱j uún nij yuvii̱ israelitá man nij soꞌ, ga̱a cuno nij soꞌ nana̱ yoꞌ a. 20Dan me se taꞌa̱j nij soꞌ cataj a:

―Nu̱u̱ nana̱ chre̱e nimán soꞌ, ne̱ snúú soꞌ na̱nj á. Taj cheꞌé cuno̱ soj snana̱ soꞌ maꞌ ―taj taꞌa̱j nij soꞌ rihaan tuviꞌ nij soꞌ, niꞌya̱j nij soꞌ man Jesús a.

21Tza̱j ne̱ ꞌó taꞌa̱j nij soꞌ cataj a:

―Né na̱na̱ chre̱e nuû nimán síí nihánj a̱ maꞌ. ꞌO̱ se se̱ guun nucua̱j síí nu̱u̱ nana̱ chre̱e nimán nacuxra̱ꞌ soꞌ rihaan síí tuchri̱i a̱ maꞌ ―taj ꞌó taꞌa̱j nij soꞌ a.

Guun rá nij síí uun chij rihaan nij yuvii̱ israelitá go̱ꞌ nij soꞌ yahij man Jesús a

22Güii dan me se canuû chaꞌanj cheꞌé nuvií noco̱o chumanꞌ Jerusalén, ne̱ tiempó acoj ndoꞌo me yoꞌ a. 23Ga̱a ne̱ chéé Jesús rá veꞌ cheꞌe̱e̱ cuꞌna̱j Corredor Salomón rej ya̱nj nuvií noco̱o yoꞌ, 24ne̱ cunuu chre̱ꞌ nij síí uun chij rihaan nij yuvii̱ israelitá, ne̱ ꞌo̱ tucuachriin nij soꞌ nu̱ꞌ anica̱j man Jesús a. Ga̱a ne̱ cataj nij soꞌ a:

―Nda̱a aman me quisi̱j güii gu̱un ya̱ ya̱ rá nimán núj ni̱ꞌyaj núj mán so̱ꞌ ga̱. ꞌO̱ se cata̱j xnaꞌanj yá yá so̱ꞌ rihaan núj sese ya̱ Si̱j Caꞌnéé Yaꞌanj Ti̱nanii man Yuvii̱ rihaan Sayuun me yá so̱ꞌ á ―taj nij soꞌ rihaan Jesús a.

25Ga̱a ne̱ cataj Jesús rihaan nij soꞌ a:

―A̱j cataj xnaꞌanj ꞌu̱nj rihaan soj, tza̱j ne̱ naꞌvej rá soj cuchuma̱n rá soj a̱ maꞌ. Ne̱ xa̱ꞌ suun sa̱ꞌ noco̱o ꞌyáá ꞌu̱nj cheꞌé Réj Yaꞌanj, tza̱j ne̱ maꞌa̱n nij suun sa̱ꞌ noco̱o yoꞌ taj xnaꞌanj da̱j si̱j mej ado̱nj. 26Tza̱j ne̱ ne cuchuma̱n rá soj ni̱ꞌyaj soj manj maan asânj. ꞌO̱ se né da̱a̱n ꞌu̱nj matzinj me soj a̱ maꞌ. 27Xa̱ꞌ daán ꞌu̱nj matzinj, tza̱j ne̱ uno nij xoꞌ snana̱j, ne̱ neꞌenj man nij xoꞌ, ne̱ nocoꞌ nij xoꞌ manj a. 28Ga̱a ne̱ cunu̱u iꞌna̱ꞌ nij xoꞌ ca̱yáán nij xoꞌ ga̱ Yaꞌanj nu̱ꞌ cavii nu̱ꞌ caꞌanj, qui̱ꞌyáá ꞌu̱nj, ne̱ daj chiha̱a̱ míj se̱ caviꞌ nij xoꞌ a̱ maꞌ. Ne̱ taj va̱j síí caꞌne̱e̱ man nij xoꞌ raꞌaj maꞌ. 29ꞌO̱ se Réj Yaꞌanj me síí rqué man nij xoꞌ rihanj, ne̱ si̱j noco̱o doj me soꞌ rihaan cunuda̱nj, ne̱ cheꞌé dan taj va̱j síí gu̱un nucua̱j caꞌne̱e̱ man nij xoꞌ raꞌa Réj Yaꞌanj a̱ maꞌ. 30ꞌO̱ se ase vaa o̱rúnꞌ yuvii̱ vaa ꞌu̱nj ga̱ Réj ado̱nj ―taj Jesús rihaan nij soꞌ a.

31Ga̱a ne̱ taꞌaa uún nij síí uun chij rihaan nij yuvii̱ israelitá yahij go̱ꞌ nij soꞌ man Jesús a.

32Ga̱a ne̱ cataj Jesús rihaan nij soꞌ a:

―Quisíj quiꞌyaj uxraj suun sa̱ꞌ noco̱o queneꞌen nij soj, ne̱ guun nu̱cuáj quiꞌyáj da̱nj, quiꞌyaj Réj Yaꞌanj a. Me suun sa̱ꞌ noco̱o cheꞌe̱ me rá soj go̱ꞌ soj yahij manj ga̱ ―taj Jesús, xnáꞌanj soꞌ man nij soꞌ a.

33Ga̱a ne̱ cataj nij síí uun chij rihaan nij yuvii̱ israelitá a:

―Se̱ goꞌ núj yahij mán so̱ꞌ cheꞌé suun sa̱ꞌ noco̱o quiꞌyáá so̱ꞌ a̱ maꞌ. ꞌO̱ se go̱ꞌ núj yahij mán so̱ꞌ cheꞌé se caꞌmii so̱ꞌ nana̱ qui̱j cheꞌé Yaꞌanj ado̱nj. Dan me se na̱nj yuvii̱ u̱u̱n mé so̱ꞌ, ne̱ me cheꞌé cataj so̱ꞌ se vaa Yaꞌanj mé so̱ꞌ ga̱ ―taj nij soꞌ rihaan Jesús a.

34Ga̱a ne̱ cataj Jesús a:

―Ma̱an se vaa nana̱ no̱ rihaan yanj no̱ tucuáán noco̱ꞌ soj, ne̱ nana̱ caꞌmii maꞌa̱n Yaꞌanj me nana̱ yoꞌ a. Dan me se cataj Yaꞌanj a: “ꞌU̱nj me síí cataj xnaꞌanj se vaa yaꞌanj me soj á”, taj Yaꞌanj rihaan nij síí caꞌmii snana̱ soꞌ ga̱a naá a. 35Dan me se sese maꞌa̱n Yaꞌanj cataj se vaa nij síí caꞌmii snana̱ soꞌ me yaꞌanj uún, ga̱a ne̱ daj chiha̱a̱ míj se̱ caꞌvee ta̱náj xco̱ níꞌ snana̱ Yaꞌanj nana̱ no̱ rihaan yanj ga̱a maꞌ. 36Ne̱ veé dan me caꞌneꞌ Yaꞌanj suun gue̱e̱ rihanj, ne̱ caꞌnéé soꞌ manj rihaan chumii̱ nihánj a. Ne̱ ma̱an cheꞌé se cataj ꞌu̱nj se vaa taꞌni̱j Yaꞌanj mej, cheꞌé dan cataj soj se vaa nana̱ qui̱j caꞌmij cheꞌé Yaꞌanj naꞌ. 37ꞌO̱ se sese ne ꞌyáá ꞌu̱nj se‑su̱u̱n Réj Yaꞌanj, ne̱ caꞌve̱e caꞌne̱ꞌ rá soj ga̱ suun amán rá niꞌya̱j manj chugua̱nj. 38Tza̱j ne̱ sese ya̱ ꞌyáá ꞌu̱nj se‑su̱u̱n Réj Yaꞌanj, ne̱ caꞌve̱e se ne amán rá soj niꞌya̱j soj man ma̱ꞌanj, tza̱j ne̱ vaa cheꞌé cuchuma̱n rá soj ni̱ꞌyaj soj man nij suun sa̱ꞌ noco̱o quiꞌyáj á. Nda̱a síj, ga̱a ne̱ xca̱j soj cuentá, ga̱a ne̱ ꞌo̱ queneꞌe̱n soj se vaa ya̱nj Réj Yaꞌanj ga̱j, ne̱ ya̱nj ꞌu̱nj ga̱ Réj Yaꞌanj uún ado̱nj ―taj Jesús a.

39Cheꞌé dan guun rá uún nij soꞌ ta̱ꞌaa nij soꞌ man Jesús, tza̱j ne̱ nanii soꞌ rihaan nij soꞌ a.

Queꞌe̱e̱ ndoꞌo yuvii̱ cuchumán rá niꞌya̱j man Jesús a

40Ga̱a ne̱ cavii uún Jesús caꞌanj soꞌ níchrej tuꞌva chráá cuꞌna̱j Jordán nda̱a rej cutaꞌ ne síí cuꞌna̱j Juan man yuvii̱ ga̱a chéé soꞌ a. Ga̱a ne̱ guun ra̱a̱n soꞌ rej yoꞌ a. 41Ga̱a ne̱ cuchiꞌ uxrá yuvii̱ rihaan soꞌ, ne̱ cataj nij yuvii̱ se vaa Juan Síí Cutaꞌ Ne man yuvii̱ me se a̱ doj suun sa̱ꞌ noco̱o ne quiꞌya̱j soꞌ, tza̱j ne̱ quisíj ya̱ nu̱ꞌ nana̱ cataj xnaꞌanj Juan cheꞌé Jesús a. 42Ga̱a ne̱ cuchumán rá queꞌe̱e̱ ndoꞌo nij soꞌ niꞌya̱j nij soꞌ man Jesús ga̱a va̱j soꞌ rej yoꞌ a.

বর্তমানে নির্বাচিত:

San Juan 10: trc

হাইলাইট

কপি