GENESIS 4
4
Kain naAbel
1Ndele Adam okwa nangala nomwalikadi waye Eva, ndele ye ta ningi oufimba ndele ta dala Kain, ndele ta ti: “Ame onde limonena omulumenhu kekwafo lOmwene.” 2Komesho okwa dala yo omumwaina Abel. Ndele Abel okwa ninga omufita weedi, ndele Kain omunamapya. 3Ndele eshi pa pita efimbo, Kain okwa yambela Omwene oiimati yomepya. 4Ndele Abel yo okwa eta eshi sha dalwa tete shomoimuna yaye nokutya, omaadi ayo. Ndele Omwene okwa tala nokuhokwa Abel noiyandjiwa yaye, 5ndele Ye ina tala Kain noiyandjiwa yaye. Opo nee Kain okwa handuka unene, ndele ta fidimike oshipala shaye. 6Ndele Omwene okwa lombwela Kain: “Omolwashike wa handuka, nomolwashike wa fidimika oshipala shoye? 7Hasho ngaha: ngeenge to longo ouwa, oto shiiva okuyelula omutwe woye; ndelenee ngeenge ito longo ouwa, oulunde otau ku nangele poshivelo, ndele tau ku hokwa. Ndele ove ou na oku u pangela.”
Kain ta dipaa Abel
8Ndele Kain okwa popya nondenge yaye Abel: “Natu ye moixwa,” ndele opa ningwa eshi va li moixwa, Kain okwa nhukila Abel ndele te mu dipaa. 9Opo nee Omwene okwa tya kuKain: “Ondenge yoye Abel oi li peni?” Ndele okwa nyamukula: “Ame nghi shi shii. Aame mbela omufita wondenge yange?” 10Ndele Ye ta ti: “Owa ninga shike? Ondaka yohonde yondenge yoye otai kuwile nge onghuwo medu. 11Onghee hano ove oto ka kala wa fingwa, ove to ka kala kokule nedu eli la makula okanya kalo okupona ohonde yondenge yoye, keke loye. 12Ove ngeenge oto longo edu, lo itali ku dalele sha vali. Ove oto ka ninga epongo nomutewatewi kombada yedu.” 13Opo nee Kain ta ti kOmwene: “Etimba lange olinene unene nokuhumbata. 14Tala, ove oto taataa nge paife mepya ndele ame ndi na okuhondama oshipala shoye. Ame ohandi ningi epongo nomutewatewi kombada yedu, nakeshe tuu ou ta mono nge, ota ka dipaa nge.” 15Ndelenee Omwene okwe mu lombwela: “Onghee hano ngeenge umwe ta dipaa Kain, oku na okuhandukilwa luheyali.” Ndele Omwene okwa tula Kain edidiliko, opo keshe ou te mu mono, ehe mu dipae. 16Opo nee Kain okwa dja ko koshipala shOmwene ndele ta ka tula medu laNod koushilo waEden.
Oludalo laKain
17Ndele Kain okwa nangala nomwalikadi waye ndele ye okwa ninga oufimba ndele a dala Henok. Komesho ye okwa tunga oshilando ndele e shi lukila edina lomona waye Henok. 18Ndele Henok okwa dalelwa Irad. Ndele Irad okwa li xe yaMehujael. Ndele Mehujael okwa li xe yaMetusael. Ndele Metusael okwa li xe yaLamek.
19Ndele Lamek okwa hombola ovalikadi vavali. Edina laau wotete oAda, ndele edina lomutivali oSilla. 20Ndele Ada okwa dala Jabal. Ye okwa li xe yovanamatwali noyovanahambo. 21Edina lamumwaina ola li Jubal. Ye okwa li xe yaaveshe ava hava shiki ouxumbafeta nomapoli. 22Ndele Silla okwa dala yo Tubal-Kain, omuhambwidi ha hambula oilongifo i lili noi lili yoshikushu noyoivela. Nomumwaina omukainhu waTubal-Kain okwa li Naama.
23Ndele Lamek okwa lombwela ovalikadi vaye:
“Ada naSilla, udeni ondaka yange!
Ovalikadi vaLamek, pwilikineni ondjovo yange.
Onda dipaa omunhu, eshi a denga nge oshipute,
nomunyasha omolwombole yange.
24Osheshi Kain ota ka handukilwa luheyali,
ndelenee Lamek olwomilongo heyali naheyali.”
Set naEnos
25Ndele Adam okwa nangala vali nomwalikadi waye, ndele okwa dala omona okamati ndele e mu luka Set. Osheshi ye okwa ti: “Kalunga okwa pa nge omona umwe ponhele yaAbel, ou a dipawa kuKain.” 26Ndele Set okwa dalelwa yo omona omumati, ou a luka Enos. Mefimbo tuu olo vo ova hovela okwiifana edina laKalunga.
বর্তমানে নির্বাচিত:
GENESIS 4: OKYB
হাইলাইট
শেয়ার
কপি
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.