Wahannisa 12

Yesuusa shitto tizhide maachito

(Maato. 26:6-13; Mar. 14:3-9)

1Faasiga bonchchize izipun qammappa tiino, Yesuusa hyayqoppa dentstside Alaazare yeze guta, Bitaaniya hyanggida. 2Yinna besite un ees kawo giigizida. Alaazare Yesuusara wolla leematella bettezin Martta unttis kiitinttane. 3Mayrama narddoosa gaaze gaama al77o geeshi shitto ki7i Yesuusa tohitilla gussida. Fa ommitira E tohito uccida; keetsite ubba shitto sawora tonkku gayda.#Luqa. 7:37-38

4Yezin Yesuusa tamaaruntsappa fete, Yesuusa aatsii inggodes yeze, Asqorootu Yihuda, 5«Hyanna shittita hyaydzdzii xeet dinaares bayzinttii, miishita dahuntsis ingginttosa?» yagayda. 6E kayzo maaqqide gisho yinno gaydap attin dahas yiqsinttii gaykaaya. E bira aykkiza maaqqide gisho ubba wode iippa faas ekkane.

7Yesuusa, «Iza faas yeze baz ta mooginttize qammas minjjide gisho izo ashshii ashshote. 8Dahuntsi ubba wode yinttara yessada, yezin ta ubba wode yinttara yezoos» yagayda.#Mahe 15:11

9Ye wode gaama asuntsi Yesuusa Bitaaniya yezanno si7i ize yi7ida. Un Yesuusa xalaala maaqqikaayzin E hyayqoppa dentside Alaazaren be7ades yi7ida. 10Yinnii gisho, kahinunts hyalaquntsi Alaazaren gujjii wodhodes zorinttida. 11Akkos gayko, Alaazare baggara gaama Ayhuduntsi unttana ixxii Yesuusa ammanze gisho.

Yesuusa bonchchora Yerusalaame gelida

(Maato. 21:1-11; Mar. 11:1-11; Luqa. 19:28-40)

12Wonttisti wode Faasiga bonchchize besite ye7ize gaama asuntsi Yesuusa Yerusalaame yi7izanno si7i, 13Qiile hyaye ekkii eza mokkodes kezida. Un fa qaaltto dhoqi yiizii,

«Hosaana!

Laatstse suntsite ye7ize!

Isra7eele Kaati anjjintto!»

yagayda.#Maz. 118:25-26

14-15Geeshi Maxaafite,

«Xiyoone katamite, zhashtippe!

Yikke, ne Kaatize hyare na7alla bettii yi7ida»

gaynttidanni fana Yesuusa hyare na7a denggi eza toggida.#Zakka. 9:9

16Yesuusa tamaaruntsi yinno tiino tiirikaaya. Yezin Yesuusa bonchchinttidannippa suuba un yinno ubba tiirida. Yinna ubba Geeshi Maxaafta gaydannigaara hyanida.

17Yesuusa Alaazare boozappa xeegii, hyayqoppa dentside wode eera yeze gaama asuntsi Yesuusa baz markkidhida. 18Gaama asuntsi eza mokkodes kezide, E yinna kille bazito oochchezanno si7ide gisho. 19Yinnii gisho, Farisaawuntsi fete fetego, «Nu akkon oochchodes dandda7oosanno bo7ote; worzhita ubba eza kaallida» yagayda.

20Faasiga bonchchize wode goynodes Yerusalaame hyanggezunts gidda fettii fettii Girike asuntsi yene. 21Unttin Galila sa7a Beetesayda katamappa yi7ide Filphoosago yi7i, «Laatstso, nuunii Yesuusa be7ades koyane» yaga7i woossida. 22Filphoosa hyanggi Inddiriyases ohin lam77untsi hyanggi, Yesuusas ohida.

23Yesuusa unttago, «As Na7ay, bonchchinttize wode yellida. 24Ta yinttis turo turo gaane; fettii zarga aafe sa7a wodhdhii dolanxiko faas attane. Yezin ye zarga aafize doliko gaama aafe aafane. 25Fa shemppito kadhize ooden dhabssane; fa shemppito hyanna alamite ixxize ooden medhina de7oos naagane.#Maato. 10:39; 16:25; Mar. 8:35; Luqa. 9:24; 17:33 26Ta yeze besite taara yessade gaar taas oochchodes koyeze ooden tana kaallodes beezane. Taas oochchiza oonan ta Aday bonchchoda.

Yesuusa fa hyayqitibaz tiinii ohida

27«Hyatte ta shemppita gaama un77inttida; yeezin waago? ‹Ta Adayo, tana hyanna saattippa ashsho› yagawune? Ade, ta yi7idanna hyanna madha saatis. 28Ta Adayo, ne suntsito bonchcho» yagayda.

Ye wode saloppa, «Taanii ta suntsito bonchchida; mahin bonchchoda» yagaaze qaala yi7ida.

29Yinna besite eqqide gaama asuntsi yinna qaaltto si7i, «Yinna dada dhoge» yagayda.

Melluntsi mahi, «Kiitanchcho ees ohida» yagayda.

30Yesuusa mahi unttago, «Hyay ootsize yin gisho yi7idap attin ta gisho baaya. 31Hyanna alamita firddinttize wodita hyatte; hyanna alamito ahize kaatize hyatte bale olinttoda. 32Mahi ta sa7appa dhoqi dhoqi gayde wode as ubba taago ko7oda» yagayda. 33E yinno gaydanna akko gaar hyayqo hyayqqodyezako unttis qonccissades.

34Gaama asuntsi mahi, «Nu higgita Kiristtoosa medhina yezanno ohine. Yeezin, ne waaga7i, ‹As Na7ay dhoqi dhoqi gawudes beezane› ga7e? ‹E, As Na7ay oode?› » yagayda.#Maz. 110:4; Isa. 9:7; Hiz. 37:25; Dane. 7:14

35Yesuusa, «Foo7o yinttara eerats wode gam77oda. Yinttis dhumaame gaar foo7o yezin, foo7ite hyanttote. Dhuma yedhdhize asi ana qitizako eroos. 36Foo7o na7untsana maaqqade gaar foo7o yezin foo7iza ammanote» yagayda.

Ayhuduntsi ammanikaaya

Yesuusa yinno ohidannippa maaqqii hyanggi unttappa genggida. 37E yinnii fana kille baz un tiino oochchinin ammanikaaya. 38Nabe Isayaasa,

«Laatstso, nu markkatitsito oonii ammanide?#Isa. 53:1

Laatstse fa wolqqito oos qonccizido?»

Gaydanna turo maaqqade fana un eza ammanikaaya.

39-40Mahin Isayaasa,

«un aafta be7aame gaar,

un wozintta tiiraame gaar,

un Xoozago maaqqin, E unttana fatstsaame gaar,

Xoozii un aafto qooqizida.

Un wozintta minggida»

gayde gisho un ammanodes dandda7ikaaya.#Isa. 6:10

41Isayaasa yinno gaydanna, Yesuusa bonchchito bi7ide gishone ebazin ohide gisho.

42Maaqqikon, Ayhude hyalaquntsappa gaamuntsi Yesuusa ammanida. Yezin Farisaawuntsi fana Ayhuduntsi woosa keetstsappa kessoda ga7i zhashtide gisho ammanida ga7i qoncce markkidhikaaya. 43Yinno un oochchide, Xoozze bonchchoppa aadhii as bonchcho kadhide gisho.

44Yesuusa fa qaaltto dhoqi yiizii, «Tana ammanze ooden tana kiittezan ammananep attin tana xalaala ammanoos. 45Tana be7ize ooden tana kiittezan be7ine. 46Tana ammanze ubba dhuma yezaame fana ta foo7o maaqqii alame yi7ida. 47Ta qaaltto si7i kiitinttoosa oonan ta firddoos. Akkos gayko, ta alamito ashshodes yi7idap attin firddodes yi7ikaaya. 48Tana ixxizayan ta qaaltto ekkoossa oonan firddize yene. Ta ohide qaaltta wurssutsi qamma ye atstsa firddoda. 49Akkos gayko, ta yinno taappa ohoos, yezin tana kiitteze ta Aday ta gawudannon ohodanno kiittida. 50Mahi E kiittan medhina de7o maaqqidanno ta erane. Yinnii gisho, ta ohizanna ta Aday taas ohidanno» yagayda.

বর্তমানে নির্বাচিত:

Wahannisa 12: OydaNTL

হাইলাইট

কপি