پیدأیش ۶
۶
نوحٚ طوفأن
1 او وخت کی زیمینٚ رو اینسأنأنٚ نفرأن زیأدَ بوستی و اَشأنٚ رِه دؤخترأن بودونیأ اَمؤیی، 2 خودا پٚسرأن بیدِده کی اینسأنأنٚ دؤخترأن قشنگده، پٚس خوشأنٚ رِه هرتأیَ کی پسند بوکودٚد، زن بردنٚ وأسی بیگیفتٚده. 3 بأزون خوداوند بٚفرمأسته: «می روح همیشٚک اینسأنٚ میأن نمأنِه، چونکی اون ایتأ جٚه بین شؤئؤنی موجود ایسٚه و جٚه خو نفْس فرمأن بٚره. پٚس اونی روجأن صد و بیست سأل بِه.»
4 او روجأنٚ میأن و اونی پٚسی‌یٚم، او وخت کی خودا پٚسرأن و اینسأنأنٚ دؤخترأن کس‌کسٚ اَمرأ وصلت بوکودٚد، اوشأنٚ جَا ایتأ مردأکأنی بودونیأ بأمؤده بیرون بأمؤ کی غولَ مأنستیدی. اَشأن قدیمٚ دؤرأنٚ میأن سٚرشنأسٚ پهلوأنأن ایسٚد. 5 خوداوند اینسأنٚ شرورٚکأرأنَ زیمینٚ سٚر بیدِه کی چندر زیأدَ بوسته و تترج اونی دیلٚ وأستن بدی ور میل دأره. 6 پٚس خوداوند اینسأنٚ خلق کودنٚ جَا افسوس بوخورد و اونی دیلٚ میأن غم دکفته.
7 پٚس خوداوند بٚفرمأسته: «آدمٚ نتأجَ کی خلق بوکودم، زیمینٚ سٚر جٚه بین بٚرٚم. حتّا چأرپأیأن و او حیوأنأن کی خوشأنَ زیمینٚ سٚر فوسینده و پرنده‌یأنٚم جٚه بین بٚرٚم، چونکی جٚه اوشأنٚ خلق کودنٚ افسوس بوخوردم.»
8 ولی اَ وسط خوداوند نوحَ لوطف دأشتی.
نوحٚ طوفأن
9 اَن نوح و اونی نتأجٚ تأریخچه ایسٚه:
نوح خو زمأتٚ آدمأنٚ میأن ایتأ خورومٚ مردأی بو کی خودا اَمرأ رأ شؤیی. 10 نوح سه‌تأ پٚسر دأشتی کی اوشأنی نأم سام، حام و یافث بو.
11 اَ زمأتٚ دورون، گونأ و ظولم کودن دٚدأرَ بوسته بو و خودا بیدِه کی دِه خٚیلی زیأدَ بوسته.
12 خودا زیمینٚ سٚر آدمأنٚ شرورٚکأرأنَ فأندرسته، چونکی تومأمٚ دونیأ آدمأن خرأبَ بوسته بود. 13 پٚس خودا نوحَ بٚفرمأسته: «قصد بوکودم تومأمٚ اَ آدمأنَ هلأکَ کونٚم، چونکی زیمینَ شرورٚکأرأنٚ جَا پورَ کودٚده. من اوشأنَ زیمینٚ اَمرأ جٚه بین بٚرٚم.
14 «ولی تو، اَی نوح، سروٚ دأرٚ چو اَمرأ ایتأ کشتی چأکون و اونی میأن چنتأ اوتأق چأکون و اونی دورون و بیرونَ قیر وأسین. 15 اونَ ایجور چأکون کی اونی درأزأ ۳۰۰ ذرأع، اونی پأنأیی ۵۰ ذرأع و اونی قد ۳۰ ذرأع بٚبه. 16 کشتی روشنأیی وأسی ایتأ ذرأع سقفٚ جَا بیجیرتر، ایتأ درجک چأکون. اونی دورون سه‌تأ طبقه چأکون و کشتی کنأره میأن، بودورون شؤئؤنٚ رِه ایتأ در بٚنه.
17 «پور زمأت نیبه کی من زیمینٚ اَسر تأ اوسٚرَ آبٚ اَمرأ پورَ کونٚم کی اونی میأن هرتأ موجود کی زٚنده ایسٚه، جٚه بین بٚشه.
18 «ولی می عهدَ تی اَمرأ قأیم دأرم و تو شی کشتی دورون؛ تو، تی پٚسرأن، تی زنأی و تی پٚسرأنٚ زنأکأن، تی اَمرأ. 19 تومأمٚ حیوأنأنٚ جَا، ایتأ جوفت نر و مأده تی اَمرأ بٚبر کشتی میأن، کی اَ طوفأنٚ خطرٚ جَا اَمنیتٚ میأن بِئیسٚد. 20 هر تأ پرنده جَا ایتأ جوفت، جٚه هرتأ چأرپأ و جٚه هرتأ او حیوأنأن کی خوشأنَ زیمینٚ سٚر فوسینده تی ورجأ اَیٚده کی اوشأنَ زٚنده بٚدأری. 21 هطؤیم اوندر کی وٚست بٚبه تِرِه و تی خأنوأرٚ رِه و تومأمٚ کشتی میأن جأنورأنٚ رِه خوردنی جمَ کون.» 22 نوح تومأمٚ خودا دستورأنَ انجأم بٚدأ.
বর্তমানে নির্বাচিত:
پیدأیش ۶: GCB
হাইলাইট
শেয়ার
কপি
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org