मत्ती 8

कोढ़ओ नतपाबि ठीक लहज़ी

(मरकु 1:40-45; लूको 5:12-16)

1अपेहल यीशु दुह गोह दोरच़ी योंखा तकसीरि ता, महस मीहतु भीड़ दोऊ थले शुहचे इलि। 2“दंङ खांई, इच्च़ा कोढ़ी ज़ि दोऊ कछंङ अंज़े दोबि फ्यग लहतो दंङ कुहते, हे गुरु! कनु हिटी तोह ता केई गिह्बी ठीक लेह तरपोन दंङ गेह धर्मिक रिवाज़ो हिसाबे शुद्ध शुहचे योग।”

3यीशुज़ि एनोह गुहड़ तुंखा लेह दोह्बी कुहते, “गेह ज़ुन्ज़ताग केई रुठे शुहचे इला। दंङ दुह दोथरे कोढङ ज़ि शुद्ध शुहचे इलि।” 4यीशुज़ि दोबि कुहतो, “रेड्रु! दि गप्पा अतंङ साते ला थाकुड़ु, कि गेह कनिंङ ठीक लेह चरच़ातग, दंङ इलजे दीह गप्पा केनोह यहुदी पुरोहिता बि कंड्रु, दंङ छी चढ़ावा मूसा ज़ि कुहषी ततो चढ़ाएतु, ताकि मीहतु थल्जी गवाही शुहबी जूंस।”

इच्च़ा सुबेदारो विशवास

(लूको 7:1-10)

5अपेहल दुह कफरनूम शहर अति, दंङ इच्च़ा सुबेदारे अंऊ राह सेनिकातु रोमी अधिकारी तोहई, यीशु कछंङ अंज़े दोहरंङ बिनती लहरी, 6“हे प्रभु, गिऊ परगर चुंङ नम्क्योंन टेहची दोबि महस टेहषी शुहबी लेहकी तोह।” 7“यीशुज़ि दोबि कुहतो, गेह अंज़े दोबि ठीक लोहग।” 8“सुबेदारे जुबाब रन्दो, हे प्रभु, गेह दिऊ जोगे ता माशुहगा कि, काह गिऊ घरबारंङ अपोन, पर अगर केई केनोह आहच़ि इच्च़ा फेरा कुचे केरिन ता गिऊ परगर ठीक शुहचे योतो। 9छना कुचे गेह ला अधिकारीऊ अधीन तोतग, दंङ अपेहल गेह इदि बि कुट्रातग कि इला ता दुह अच़ा य्वा; दंङ अईदीबी कुट्रातग अता ता दुह अच़ा अपा, दंङ अपेहल घेंङौ परगराबि कोहग कि झांह लोहू, ता दोई दुह लेहई।”

10दिह रेड्रीरंङ यीशु ठट् केह्षा इलि, “दंङ अरी दोऊ थले अपि लेहकी तोईरे दोतंङ कुहते, गेह केतंङ साते हेले कुट्रातग कि, गेह इस्राएल देशो मीहतु बिचंङ झांह ठ्रोह बिशवास माह तंङरीग अतु विशवास दिह गैर यहुदी मीहू ठ्रोह शोतो। 11गेह केतंङ साते कुट्रातग कि महस ऊई जातिऊ मीहरे पूर्व ए पशिचमंङज़ि अंज़े अब्राहम, इसहाक ए याकूबा रंङ साते स्वर्गीय राजंङ बगत जोओर। 12पर राज्यो कटुरे (यहुदी) धह्कते हंयारंङ केह च़रपोर: दोहर क्रपिए छ्वा रुहक्च़ी शोतो।” 13दंङ यीशुज़ि सुबेदारबि कुहतो, “चुंखा ईला, छना कांह विशवास तोह, करंङ साते ध्वांए शोतो।” दंङ दोऊ परगर दोहथल ए ठीक शुहचे इलि।

महस टेहची तिंङ ठीक लहज़ी

(मरकु 1:29-34; लूको 4:38-41)

14अपेहल यीशु पतरसो चुंङ इलदे, दंङ दोई दोऊ युग बुखारे टेची तंङाते। 15यीशुज़ि दोऊ कछंङ इलजे दोऊ गुहड़ चुम्ज़ा दोबि खड़े लहतो, दंङ दोऊ बुखार ठीक शुहचे इलि, दुह खड़े शुहचे दोऊ सेवा टहल लहज़ी लेहती। 16ञोंकोल कि दोच़ी दोऊ कछंङ मीहरे हतिरे अतु अंद्रेग मांजी आत्मारेह तोहई दंङ दोई दोरे मांजी आत्मारे एनोह बचनरंङ साते हुंज़े केहरी; दंङ भत्ते टेची मीहर ठीक लहते। 17ताकि छि वचन यशायाह भविष्यवक्ताओ दोरच़ी कुहषी तोहई दुह पूरा शुहबी जूंस। “मसीह ऐनेह हेंदु कमज़ोरी लेहपशे केहते दंङ हेंदु टेहषी उठाके केहते।”

यीशु चेला शुहबिमी मुल

(लूको 9:51-62)

18यीशुज़ि अपेहल एनोह फेरे महस मीहतु भीड़ तंङाते एनोह चेला तु हखा कुंहई, अतंई हेनर गलील झीलो नुरेच़ि योंई। 19छना ए दोरे इबिमी थल्जी तेयार शुबी लेहकी तोईरे दंङ इच्च़ा यहुदी शास्त्रीज़ि दोऊ कछंङ अंज़े दोऊ हखा कुंहई, “हे गुरु, गेह कांह चेला बणेक्पिमी कांह थले अपोग।” 20यीशु ज़ि दोरंङ साते कुतोह, “गव्वा तु गुफा ए प्यारेतु बंङज़िमी थल्जी बंङ शुहबी पर गेह मीहू योह बि बंङज़िमी थल्जी घरबार ला माह।” 21इच्च़ा अई चेलाज़ि दोबि कुहतो, “हे प्रभु, हेगा गिह्बी चुंखा वापिस इबी रंऊ। गिऊ बाहओ सिमी थल दोबि पथेके कनु चेला बणेक्पिमी थल्जी कांह थले अपोग।” 22यीशुज़ि दोबि कुहतो, “गिऊ चेला बणेक्पिमी थल्जी गिऊ थले शुहचे इला, अंऊ मीहरे आत्मिक रीतिरंङ सीए इलजे तोतोर, दोतिंङ एनोह मुर्दारे पथेक्च़ी रंऊ।”

तूफान शांत लहज़ी

23अपेहल यीशु किशतीऊ टोहकठे बंङज़िरी, दोऊ चेलारे दोऊ थल शुहचे इलिरे। 24दंङ, झीलंङ इच्च़ा मोह्ड़े तूफान अति कि किशती छ्वली रेह डुमज़ी लेहती, दंङ यीशु ईम लहज़ी लेहकी तोहई। 25दंङ दोऊ हखा दिह कुट्री लेहतिर, “हे प्रभु। ञेंहतिंङ बचाएतु, हेनर सिए योंई।” 26यीशुज़ि दोतिंङ जुबाब रेंई “हे विशवास मेह मीहरे, छिले बेवातंई?” दंङ दोहपल ए यीशु खड़े शुहचे भमबुट ए छ्वालि बि हुकुम रेह दंङ भत्ते शांत शुहचे इलि। 27दंङ दोरे हेरानीरंङ साते कुट्री लेहतिर, “दि छना ठ्रोह मीह शुह कि भमबुट ए छ्वली ला दोऊ कहना मनेक्च़ातोर।”

माज़ी आत्मा चुम्ज़ी मीह ठीक लहज़ी

(मरकु 5:1-20; लूको 8:26-39)

28अपेहल यीशु दोह्सी गरदीनियो देशो इलाकंङ पिचा ता दंङ झुह्ट मीहरे अतु अंद्रेग मांजी आत्मा तोहई कब्रङज़ि हुंज़ा दोबि दोह्यातेर। दोरे धोंण रोहषंङ तोईरे कि अरीला दुह अमज़ि इलजे मरच़ातेर। 29दोच़ी हऊष रेह कुह्तोर, “हे परमेश्वरो योह यीशु! केई गेरंङ साते छि जुन्ज़ातन? कांह छि टईमाबे तुहई ञेंतिंङ बरदो रंड्रीमी थल्जी देहर अंज़े शुनाह?”

30दोतु दोरच़ी फोअरे ऊईतार महस सुअरों इच्च़ा थाहच रवाक्सी लेहकी तोहई। 31मांजी आत्मारे ज़ि यीशुरंङ साते बिनती लहरी कि, “अगर केई ञेंहतिंङ हुन्बातनता, सुअरातु थाचंङ च़रतु।”

32यीशुज़ि दोतंङ साते कुहतो, “ईलांई” दंङ दोरे हुन्ज़ा दुह सुअरातु थाहचो अंद्रेग अच़ा इलि दंङ खांई भत्ते थाहच गोह मुखंङ ज़ि छ्वा रे तीरिंङ अच्च़ा इलिरे दंङ सिए इलि। 33दोतु पोहालरे पोखशे इलिरे दंङ नगरंङ इलजे दि भत्ते गप्पारे ए अतिंङ मांजी आत्मारे तोहई दोतु भत्ते गप्पारे कंड्री लेहतिर। 34भत्ते नगरो मीहरे यीशुरंङ दोई थल्जी अच़ा अतिरे, दंङ दोबि खांई दोरंङ साते बिनती लेह कुट्री लेहती कि ञेंहतु इलाको दोरच़ी अच़ा ला।

বর্তমানে নির্বাচিত:

मत्ती 8: LBFNT

হাইলাইট

কপি