मत्ती 15

रीति-रिवाजों पर सवाल

(मर 7:1-13)

1तब यरूशलेम नगर बटि कुछ फरीसी दल का लोग अर शास्‍त्री यीशु का पास ऐनी अर बोन्‍न लगि गैनी, 2“गुरुजी, तुमरा चेला पितरों की रीति-रिवाजों का खिलाप मा जैके बगैर हाथ धुयां खाणुक किलै खनदिन?” 3वेन ऊंतैं जबाब दिनी, “अरे, तुम भि त अपणी रीति-रिवाजों को पालन करण का चक्‍कर मा, परमेस्वर की आज्ञाओं को पालन नि करद्‍यां। 4किलैकि परमेस्वर न बोलि छौ कि, #निर्ग 20:12; 21:17‘अपणा ब्वे-बबा को आदर कर्यां।’ अर #नीति 20:20; 23:22; व्यव 5:16; लैव्य 20:9 ‘जु कुई अपणा ब्वे-बबा कू गळत बात बोललु, वेतैं जान से मार दिये जालु।’ 5पर तुम लोगु तैं इन सिखौन्द्‍यां कि, ‘एक मनखि अपणा ब्वे-बाब खुणि इन बोलि सकदु च कि, तुमरो पालन-पोसण करणु खुणि मि मा कुछ छैं त च मगर मि यू तुमतै नि दे सकदु, किलैकि मिन यू पिता परमेस्वर तैं अरपण कैरियाली।’ 6अर तुम इन भि सिखौन्द्‍यां कि, ‘अगर तुम अपणा ब्वे-बाब तैं नि देखि सकद्‍यां, त कुई बात नि च,’ अर इन कैरिके तुम अपणा रीति-रिवाजों को पालन करौण का खातिर परमेस्वर की आज्ञा तैं ही टाळि देन्द्‍यां। 7हे ढोंगि लोगु, तुमरा बारा मा यशायाह रैबर्या न एकदम ठिक भविष्यबाणी कैरी छै। अर वेन बोलि छौ कि,

8 # यशा 29:13 “‘केवल गिच्‍चळ ही यू लोग मेरु आदर-समान करदिन,

मगर यों को मन मिसे भौत दूर च।

9अर यू लोग बेकार मा ही मेरी भक्‍ति करदिन,

किलैकि यू लोग अपणा ही द्‍वारा बणईं आज्ञाओं तैं परमेस्वर की शिक्षा बतै के सिखौन्दिन।’”

अशुद्ध करण वळी बात

(मर 7:14-23)

10तब यीशु न लोगु तैं अपणा पास बुलै अर ऊंकू बोलि, “सुणा, अर ईं बात तैं बिंगण की कोसिस कैरा। 11मनखि का गिच्‍चा बटि जु कुछ भि भितर जान्दु वु वेतैं अशुद्ध नि करदु, मगर जु कुछ भि वेका गिच्‍चा बटि भैर निकळदु उई वेतैं अशुद्ध करदु।”

12तब यीशु का चेला न वेका पास ऐके बोलि, “गुरुजी, क्या तुमतै पता च कि तुमरा ये वचन की वजै से फरीसी दल का लोग खिरसयां छिन?” 13वेन जबाब दिनी, “हरेक उ पौधा जु स्वर्ग मा रौण वळा मेरा पिता न नि लगै, वेतैं उखाड़ दिये जालु। 14अरे, ऊंतैं जाण द्‍या। ऊ खुद त अन्धा छिन, अर दुसरो तैं बाटु बतौन्दिन। अगर एक अन्धु दुसरा अन्धा तैं बाटु दिखालु, त दुईया का दुई खडोळुन्द पोड़ि जाला।” 15अर या बात सुणी के पतरस न वेकू बोलि, “गुरुजी, मनखि तैं अशुद्ध करण वळी बात को मतलब हमतै समझै द्‍या।” 16वेन बोलि, “क्या तुम अभि तक नासमझ छाँ? 17अर क्या तुमरि बिंगण मा नि औन्दु, कि जु कुछ भि गिच्‍चा भितर जान्दु उ पुटगुन्द ही जान्दु, अर सुबेर मल का रुप मा भैर निकळि जान्दु? 18पर सुणा, जु कुछ भि गिच्‍चा बटि निकळदु, उ मनखि का मन बटि निकळदु अर उई मनखि तैं अशुद्ध भि करदु। 19किलैकि बुरा ख्याल, हत्या करण, दुसरि जनानियों पर गळत नजर रखण, अर दुसरि जनानियों का दगड़ा मा गळत सम्बन्ध रखण, चोरी करण, झूठ्‍ठी गवै देण, दुसरो की बुरै करण, इन्दरि किसमे सब बात मनखि का मन बटि ही निकळदिन। 20अर यू सब बात ही मनखि तैं अशुद्ध करदिन, पर अगर कुई मनखि बगैर हाथ धुयां खाणुक खान्दु त वु खाणुक वेतैं अशुद्ध नि करदु।”

कनानी जाति की जनानि को बिस्वास

(मर 7:24-30)

21तब यीशु उख बटि निकळि के, सूर अर सैदा नगरों का मुलक मा चलि गै। 22अर देखा, वे ही बगत वे मुलक बटि एक जनानि ऐ, ज्वा की कनानी जाति की छै। अर वा चिल्‍लै-चिल्‍लै के बोन्‍न लगि गै, “मेरा प्रभु, राजा दाऊद का वंशज, मि पर दया कैरा, किलैकि मेरी नौनि तैं खबेस न बुरी तरौं से अपणा बस मा कर्युं च, अर उ वींतैं भौत सतौन्दु।” 23पर यीशु न वींतैं कुछ जबाब नि दिनी। तब वेका चेलों न पास ऐके बोलि, “गुरुजी, ईं तैं इख बटि विदा कैर द्‍या, किलैकि या हमरा पिछनै चिल्‍लै-चिल्‍लै के औणी च।” 24तब यीशु न जबाब देई, “मितैं सिरफ इस्राएली लोगु की मदद करणु खुणि ही भिजे गै, जु कि हरचि भेड़ों का जन छिन।” 25पर वा जनानि वेका पास ऐ, अर वेका खुटों मा हाथ जोड़ी के पोड़ि गै अर बोलि, “मेरा प्रभु, मेरी मदद कैरा।” 26अर वेन उदारण देके वींकू बोलि, “या बात ठिक नि च कि बच्‍चों की रुट्‍टी लेके कुकरों का अगनै डळै जौ।” 27वींन बोलि, “हाँ प्रभु, तुम ठिक बोन्‍ना छाँ, पर कुकर भि त मालिक का द्‍वारा छुटयां चूर-बूर तैं खनदिन।” 28तब यीशु न वींकू बोलि, “हे बेटी, त्वेतै भौत जादा बिस्वास च। इलै जन तू चान्दी त्वे खुणि उन्‍नि हो।” अर सुणा, वे बगत बटि ही वीं जनानि की नौनि खूब ह्‍वे गै।

भौत रोगियों तैं खूब करण

29तब यीशु उख बटि निकळि के गलील झील का छाला पर ऐ, अर उख एक पाड़ पर चैड़ि के बैठि गै। 30अर तब एक बड़ी भीड़ वेका पास ऐ। अर यू लोग अपणा दगड़ा मा लूला-लंगड़ो, अन्धों, अर गूंगों तैं अर इन्‍नि भौत बिमार लोगु तैं भि लेके ऐनी। अर भीड़ का लोगु न यों तैं यीशु का खुटों का समणि रखी दिनी, अर यीशु न ऊंतैं खूब कैरी। 31अर जब लोगु न देखि कि गूंगा बुलणा छिन, अर लूला-लंगड़ा खूब ह्‍वेके हिटणा छिन, अर अन्धा दिखणा छिन, त भीड़ का लोग दंग ह्‍वेके इस्राएल का परमेस्वर की बडै करण लगि गैनी।

चार हजार से भि जादा लोगु तैं खिलाण

(मर 8:1-10)

32तब यीशु न अपणा चेलों तैं अपणा पास बुलै अर ऊंकू बोलि, “ईं भीड़ पर मितैं बड़ु तरस औणु च, किलैकि तीन दिन बटि यू मेरा दगड़ा मा ही छिन। अर खाणु खुणि ऊंका पास कुछ नि च, अर मि ऊंतैं भूकि वापस नि भेजण चान्दु, कखि इन नि हो कि जान्द दौं वु बाटा मा गस खै द्‍या।” 33मगर वेका चेलों न वेकू बोलि, “गुरुजी, ईं निर्जन जगा मा हमुन इथगा माप रुट्‍टी कख बटि लौणिन, कि हम ईं भीड़ तैं खिलै सैका?” 34अर यीशु न ऊं बटि पूछी, “एक बात बता तुम मा कथगा रुट्‍टी छिन?” ऊंन बोलि, “बस सात रुट्‍टी अर कुछ छुटा माछा छिन।” 35तब यीशु न लोगु तैं भ्वीं मा बैठणे की आज्ञा दिनी। 36तब वेन सात रुट्‍टी अर माछों तैं ले, अर परमेस्वर को धन्यवाद देके ऊंतैं तोड़ि, अर अपणा चेलों तैं देणु रै अर वु भीड़ का लोगु मा बंटणा रैनी। 37अर सब लोग खै के छक ह्‍वे गैनी, त वेका चेलों न बच्यां टुकड़ों का सात ठुफरा उठैनि। 38अर खाण वळो मा करीब चार हजार त बैख ही छा, अर ऊंका अलावा बच्‍चा अर जनानियां भि छै, जौं तैं नि गिणै गै छौ। 39तब यीशु भीड़ तैं विदा कैरिके नाव मा चैड़ि, अर मगदन नगर का क्षेत्र की सीमाओं जनै चलि गै।

বর্তমানে নির্বাচিত:

मत्ती 15: GBM

হাইলাইট

কপি