Mat 13
13
Elgan ni li bada mbahmgbe
(Mak 4:1-9; Luk 8:4-8)
1Efung bꞌnehm ona, Jisos kehm mehle go etahk, song ji go nkpe eto. 2Eji ellong ane gbalee ba go ege, owo á kehm yele go egbang, song ji. Ane bao kpee yiimi go nkpe egbuk.
3Á ko ngaane, jo tong bo nsol gbalee re, “Nne jolo gona, no tahme no, song wohngo amohk nti enye go ege egbe. 4Eji á jo wohngo, nyandiki gbo noongo go mbang. Nruk ba suudu kpee mele.
5“Nyandiki gbo noongo go ndi nyi jolo atal atal. Abon ndi jolo ntiil. Amohk nti nyao gulu elmahnge. Tibre edi jio ndi gbalem. 6Njul nyaare kan a me, akohdo nti nyao wuudu, fere kpo. Tibre alohk jolem.
7“Nyandiki gbo kuumu go elkob akpiri. Akpiri nyao gbale, bulu akohdo nti nyao.
8“Amohk nti nyako gbo noongo go nnooba ndi, kab akab. Atasok nyandiki jo jolo nkab atahl alon alon, atasok nyandiki nkab atahl ara ara, atasok nyandiki eltahl a nkab ewubu eltahl a nkab ewubu.
9“Nne no kpi atung, nong, á wuk!”#13:9 Mat 13:18-23
Ji wahnge Jisos jo tꞌtuubu ngaane
(Mak 4:10-12; Luk 8:9-10)
10Owo abatꞌtoono Jisos kehm bake go ege, ba bahb-e re, “Jen ji wahnge a kpo ko ngaane, jo bung a bo?”
11Jisos kehm faange bo re, “Bo ma-n ka elkahne nio ni etul bi Esowo, bi Esowo behre no. Ane bao, bo kaam bo. 12Nne no kpi no, bo bahk-e budu na, á bel gbalee. Nne no ki kpi, bo bahk-e taare na ji á kpi no.#13:12 Mat 25:28 13Owo wahng ka n kpo bung a bo go ngaane. Tibre bo kpo seenge, jol bo kpehme nyehn. Bo kpo wuungu atung, jol bo kpehme wuk, fere kahn.
14Bo ba li ane ba nnyehnamahr Aisaya bungu no bada bo re,
“ ‘Ḿ bahke wuungu na wuungu wuungu atung,
ń nehm tiki kahn.
Ḿ bahke seenge na seenge seenge,
ń nehm tiki nyehn.
15Tibre asi ane bao ebfere tahne.
Bobsahde atung ebo.
Bobbulu amahr ebo.
Ki li ano, kehn, bo kpꞌnyehne, fere wuk,
fere kꞌkahn go bo a ntim, fere sennge,
feere go egame, eji n lꞌlim bo, bo nob.’#13:15 2 Tes 2:11-12
16Elfuulu li ka amahr enyahne, eji kpꞌnyehne. Elfuulu li ka atung enyahne, eji kpꞌwuku. 17Etingitingi, n kp-n tongo re, Abanyehnamahr gbalee, a aneb Esowo gbalee jo sebe re bo nyehn ji ń kpꞌnyehne a. Jol bo tikem nyehn. Bo jo sebe re bo wuk ji ń kpꞌwuku a. Jol bo tikem wuk.#13:17 Luk 10:23-24
Ana Jisos lennge elgan ni li bada mbahmgbe
(Mak 4:13-20; Luk 8:11-15)
18“Wuungen atung anv, wahn kahn ana elgan ni li bada mbahmgbe lohngo no.
19“Ane ba lꞌwuk alum nya etul bi Esowo, kꞌkahn ana lohngo no, Ebinne bahke bake, ba yehke nsol nyi bo ma bahm go bo a ntim tahm a nyi. Nyao nya li amohk nti nya gbo noongo go mbang.
20“Ane bandiki li ana amohk nti nya gbo noongo go ndi nyi jolo atal atal. Bo lꞌwuk alum Esowo nyao o, bo ko tvtv a eyebatahng. 21Eji bo ki kpi alohk, bo kpehme kang. Erem lꞌba, a ntong tib go alum Esowo nya bo wuku no, bo soro gbo tvtv.
22“Ane bandiki li ana amohk nti nya fooro gbo go elkob akpiri. Bo kpꞌwuku alum Esowo, wo, nsol nyi njini nyia kpo gbiingi bo go bo a ntim. Ekor akpohko kpo nehm bo.#13:22 1 Tim 6:9 Nsol nyia kpee kpo bulu alum Esowo nyao tv. Akab bo nehm kab.
23“Ane bako li ana amohk nti nya bo wohngo go nnooba ndi.#13:23 Elt 17:11 Bo lꞌwuk alum Esowo kahn, bo lohko kab akab, egom jindiki nkab atahl alon alon, egom jindiki nkab atahl ara ara, egom jindiki eltahl a nkab ewubu eltahl a nkab ewubu.”#13:23 Gal 5:22
Elgan ni li bade agasame
24Jisos kehm kpe tub bo elgan nehko re, “Etul bi Esowo li ana nne no tahme song kak nkohl go ege egbe. 25Eji ane ma lal, nnekv ewe kehm tahme song wohngo afem agasame semme go nkohl nyio, tahm eje. 26Eji nkohl ma mahng, gbal, fere lake abon, agasame kehm tob mahng. 27Owo alokeltum ba nfono egbe noo kehm ba bahb-e re, ‘Nsoo, nkohl sang a kake go ega egbea? Anv, agasame nyao lohngo gan ba?’ 28Owo á kehm tongo bo re, ‘Nnekv wo ma lim ejum jio.’ Alokeltum bao kehm-e bahbe re, ‘Anv, a kpꞌsebe re wahr song wooba?’ 29Á kehm tene re, ‘Eꞌee, ń lꞌsong woobo agasame, ḿ bahke woobo nkohl semme. 30Nong, nsol ebal ebal gbal ano tete rehng go efung elbanne. Owo m bahke tongo ababꞌbanne re, Gboon mbang, wahn tohko woobo agasame, gba agan agan, eji bo lꞌjahm fi, wahn kehm banne nkohl kanne, kpu song kpake go egame etahk.’ ”#13:30 Mat 13:37-43
Elgan ni li bada mmohk asia
(Mak 4:30-32; Luk 13:18-19)
31Jisos kehm kpe tub bo elgan nehko re, “Etul bi Esowo li ana mmohk asia nyi nne ko no, song bahm go ege etahngga. 32Se sehnge mmohk eti anyehng anyehng.#13:32 Fil 2:8 Eji gbale no, gbale sehnge eti ajehng ajehng ji bo kpo bahm etahngga.#13:32 Jon 12:24 Owo nruk kehm bake, ba si ntahk o.”#13:32 Elt 20:29-30; Mat 13:30
Elgan nyi li bade ayist
(Luk 13:20-21)
33Jisos kehm kpe tub bo elgan nehko re, “Etul bi Esowo li ana ayist,#13:33 Mak 8:15; 1 Kor 5:6-8 nya nnenkal ko song behr go ebam aflawa na ebra tete semme kpee, fere tung.”#13:33 Mat 13:30
Ana Jisos lennge elgan ni li bade agasame
(Mak 4:33-34)
34Nsol nyia kpee, Jisos jo bungu go ngaane, tong ellong ane. Á joom tiki bung na bung, kꞌbung go elgan, 35eji lꞌlohko jol ana nnyehnamahr bungu no re,
“M bahke jo bung a bo go ngaane.
M bahke tongo bo nsol nyi Esowo behre no ngare nyi njini bomo no.”
36Jisos kehm tahme ellong ane bao sa, song yel ekpꞌkpa. Abatꞌtoono ebe kehm bake go ege, ba bahb-e re, “Tong-r ana elgan ni li bade agasame lohngo no.”
37Owo Jisos kehm faange re, “Nne no kake nkohl, Mmon no nne wo. 38Edi egbe jio, njini nyi. Nkohl nyio, abon Ntul ba. Agasame nyao, abon ba Ebinne jio ba. 39Nnekv no wohngo afem agasame, nnehm nyi. Ngare elbanne nyio, esꞌkohro eying jia ji. Ababꞌbanne bao, babenjel ba.
40“Ana bo bahke kpuku agasame nyao, jamme fi, ano wo bahke jolo esꞌkohro eying jia. 41Owo Mmon no nne bahke tumu enjel enye,#13:41 Mat 25:31-46 bo bahke yannge go ege ejahbetul, kpu ane kpee ba jo wahng re ane jo lim abiafem, a aneb abꞌbi, 42ro bo, kak go agun. Owo bo bahke woomo, jo ling, fere jo kono amahn. 43Aneb Esowo bahke jo ya ana njul go ejahbetul ji Nde ebo.
“Nne no kpi atung, nong, á wuk.
Elgan ni li bade elkohl akpohko
44“Etul bi Esowo tob li ana elkohl akpohko ni bo behre edi egbe.#13:44 1 Pit 1:7; Kol 3:3 Nne awohng kehm song nyehn, tuungu behr. Á bele eyebatahng sehng, kehm song gungu nsol enye kpee nyi á bele no,#13:44 Fil 2:6-8 fere ba gunu edi egbe jio.#13:44 Ell 5:9
Elgan ni li bada mmohkesol
45“Etul bi Esowo tob li ana njenare no jo seb anoobo amohkesol. 46Eji á nyehne anyehng nyi sahb kꞌkim ekun, fere nꞌnob, owo á kehm soro tahm, song gungu nsol enye kpee, nyi á bele no, fere ba gunu mmohkesol nyio.
Elgan ni li bade erim
47“Etul bi Esowo tob li ana erim bi bo ma kak go aya, fere bob nsahre go nkohn a nkohn.#13:47 Mat 22:9-10 48Eji nsahre ma rur, bo kehm tohngo, bum egbuk.#13:48 Mat 24:14 Owo bo kehm jehke, kehm kehme nsahre jak. Nyi nno, bo jo kake go ajeere. Abi nsahre, bo ro go. 49Ano wo bahke jolo go esꞌkohro eying jia. Babenjel bahke bake, ba jak abi ane go ellong anoobo ane, 50fere ro bo kak agun. Owo bo bahke woomo, jo ling, fere jo kono amahn.”#13:50 Elt 10:35; 1 Kor 6:9-11
Akꞌkulu nsol, a nsol nfenfe
51Jisos kehm bahbe bo re, “Anv, nsol nyia lenng-n lennga?” Owo bo kehm-e faange re, “Ee nsoo.” 52Á kehm tongo bo re, “Owo wahnge ntꞌtibi no atahm awohng awohng no ma jol ntꞌtoono Esowo, no ma kpili bade etul bi Esowo, á li ana nfontahk no kpo yehke nsol afang enye go elkohl, nyindiki nsol nfenfe,#13:52 Jon 13:34 nyindiki akꞌkulu nsol.”#13:52 1 Tim 1:8; Rom 7:12,14
Ana bo tene Jisos go Nasaret
(Mak 6:1-6; Luk 4:16-30)
53Eji Jisos tuubu ngaane nyio kpee mal, owo á kehm tahme edi jio, 54song rehng go ege ejahbe, song kehme bo tib go bo etahk ero.
Ane ba wuk-e no, jo kpo bo esi sehng, bo kehm bahbe re, “Gan wo á bele elkohn elkahne ana nia, a nsahm nyi á kpo ko lim agburu akpokosi nyaa?#13:54 Jon 7:15 55Ye sang li mmon a kapentaa? Nnyehn sang bo kpo lung-e re Meria? Abonanyehn sang bo kpo lung bo re Jems, Joses, Saimon a Judasa? 56Abonanyehn ba nkal sang li a nahre a kpeea? Anv, gan wo á bele bel nsol nyio kpee?” 57Owo bo kehm-e tene.
Jisos kehm tongo bo re, “Nnyehnamahr, bo kpo kak-e edi ajehng ajehng, sehngem ane ebe, a ejahbe eje ji kil jo kak-e.”#13:57 Jon 4:44
58Á limem akpokosi gbalee ejahbe jio tib go bo ekꞌtaame.
বর্তমানে নির্বাচিত:
Mat 13: EKA-011
হাইলাইট
শেয়ার
কপি
Want to have your highlights saved across all your devices? Sign up or sign in
©️2024 Luke Initiative for Scripture Translation
