Tegagia 35
35
I Yako mekule i Beteli
35:1-15
1 #
Teg. 28:11-17
Ondae Ue Ala mepau ndi Yako, ”Pepatindamo, lakomo i Beteli, po'iamo i ra'ai. Weweuomo i ra'ai meda pontunua pesomba ndi Ondae Ue Ala, anu mepopokita Iramo ndi omue, tempono upolai inso ndi Esau, pepaekompomu.” 2Ka i'amba motae i Yako a luwuno pe'asa rahano ka luwuno mia anu perongano, ”Imentadio luwuno pinesombai susua anu kongko i olomiu, impokomemporiomo koroimiu ka ime'euomo sangkamiu. 3Aiwamo tompepatinda ka melako i Beteli. Aku moweweu meda pontunua pesomba ndi Ondae Ue Ala i ra'ai anu sumangki akumo i tempono pompema'isoku ka anu kumongkomi akumo a nsala anu tinondaku.” 4Dompeweengakono ndi Yako luwuno pinesombai susua anu pine'uedo ka tole-tole anu kongko a birido. Ka i'amba tumanoo i Yako a toto ngkeu tarabanti umpeda i Sikemi. 5Umarino atuu mpelungka iramo. Mongkokongiria inso ndi Ondae Ue Ala umaluo luwuno kota petengi-tengido onaemo ka nahi domelinampui anano i Yako.
6Ka i'amba haweomo i Yako i wita Lusi onaemo Beteli, anu i wita Kana'a, onae ka luwuno mia anu perongano. 7Iwanguo meda pontunua pesomba i tu'ai ka numeeakono po'ianga atuu Eli-Beteli, hangano Ondae Ue Ala mepokomengkaa Iramo ndi onae i tu'ai, tempono ipolai inso a mpepaekompono. 8I Debora, puu mpete'iano i Ribeka, mate. Onae kinaburu te'alaako i totono Beteli, a toto ngkeu tarabanti, anu domeneeakono mia: Keu Tarabanti Pengesea.
9Ondae Ue Ala mepopokita mbo'u ndi Yako mansano hawe inso i Padana-Arami, ka rumonsoo. 10#Teg. 32:28Pau-Do Ue Ala ndi onae, ”Neemu i Yako. Neemu nahi ta pinau mbo'u i Yako, tendeano i Isaraeli ta gagi neemu.” Kanandiomo Ondae Ue Ala numeeakono i Isaraeli. 11#Teg. 17:4-8Ondae Ue Ala mepau mbo'u ndi onae, ”Ongkuemo Ue Ala Anu Tedoa Pabawa. Impo'ulemo ka intetiangimo; asa tongku, tendeano asa tepumpuano luwuno tongku, ira mehina inso ndi omue ka luwuno mokole ira ntepu'u inso ndi omue. 12Wita andio anu Kuweeakonomo i Burahima ka i Saki, Aku weeakomu ka a inulemu.” 13Umarino atuu Ondae Ue Ala mewuatako bintao i Yako inso a mpo'ianga-Do mepau ndi onae. 14#Teg. 28:18-19Ka i'amba i Yako mompontade tugu a mpo'ianga-Do Ue Ala mepau ndi onae, asa tugu watu. Ipesombaakono pesomba tinawa ka tumawao lana i wawono. 15I Yako numeeakono po'ianga pepau-Do Ue Ala ndi onae ”Beteli.”
Hinaano i Benami ka mateno i Raheli
35:16-22a
16Umarino atuu ondae mpelungka inso i Beteli. Tempono nahi dome'olai mbo'u inso i Eparata, i Raheli me'ana, sine pe'anano tedoa motungko. 17I tempono pe'anano anu motungko atuu, motaeomo sando mpe'ana ndi onae, ”Si doito, pohona mbo'u andio ana ntama anu hinawemu.” 18Se'eluno napi tampula penaano hangano onae mate, ipoponeeo anano atuu i Beni-Oni, sine amano numeeakono i Benami. 19Kanandiomo mateno i Raheli, ka i'amba kinaburu a nsala lumako i Eparata, onaemo Beteleme. 20I Yako mompontade tugu i wawono kaburuno; onaemo atuu tugu kaburuno i Raheli hawe kanandio-andio.
21Umarino atuu melungkaomo i Isaraeli, ka i'amba pasao kemano i asatowano Migidali-Ederi. 22aTempono i Isaraeli mo'ia i wita andio, gagiomo nine i Rube lumako moturi saru i Biliha, kombia mongurano amano, ka i Isaraeli rumongeo anu gagi atuu.
Luwuno anano i Yako ka mateno i Saki
35:22b-29
22bLuwuno ana ntamano i Yako porokono hopulu ka orua. 23#1Taw. 2:1-2Luwuno anano inso ndi Lea onaemo i Rube, ana akano i Yako, ka i'amba i Simeo, i Lewi, i Yehuda, i Isakari ka i Sebulo. 24Luwuno anano inso ndi Raheli onaemo i Yusupu ka i Benami. 25Luwuno anano inso ndi Biliha, ata beineno i Raheli onaemo i Dani saru i Napatali. 26Luwuno anano inso ndi Silipa, ata beineno i Lea onaemo i Gadi ka i Asere. Onaemo atuu luwuno ana ntamano i Yako anu pine'anaako i Padana-Arami.
27 #
Teg. 13:18
I Yako aiwa ndi Saki, amano, i Mamere umpeda i Kiriati-Araba, onaemo atuu Heberoni. I tu'aimo dopo'ia i Burahima ka i Saki gagi mia mehawe. 28Tinuwuno i Saki asa etu ka halopulu nta'u. 29Ka i'amba i Saki tampula penaano, mate ka pinumpu a uempu'uno; onae mota'u ka tende ntinuwu. I Esau ka i Yako, anano kumaburuo.
বর্তমানে নির্বাচিত:
Tegagia 35: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
