SAN JUAN 9

Tej tul tnaabl jun xjal mos̈ titzꞌjlenx tuꞌn Jesús

1Tejtzen tetz Jesús tuj nintzaj tja Dios, tcub junxin xjal mos̈. Mos̈xin titzꞌjlenxin. 2Bix e xiꞌ cykanen t-xnakꞌatz Jesús te:

—Taat Xnakꞌtzal, ¿alcye e binchan il, tiꞌj itzꞌj ja xjal lu mos̈? ¿Japa mos̈, bix ka ejeeꞌ tmanxin?―tz̈ikexin.

3Aj ttzakꞌbeꞌn Jesús:

—Min ul itzꞌjxin mos̈ tuꞌn tlaj jun tilxin. Jax juꞌx ke tmanxin, min ul itzꞌj cycwal mos̈ tuꞌn tlaj jun cyil. Ul itzꞌj ja xjal lu mos̈ tuꞌntzen tyeecꞌaj tipemal Dios oj tbint. 4Bix ma pon tumel. Iltzen tiꞌj tuꞌn tbint kuꞌn j-akꞌuntl o kꞌoj ke tuꞌn Nmana e tzaj tsmaꞌn inayena. Bix il tiꞌj tuꞌn kakꞌanan tiꞌ taakꞌen Nmana tuj tyem te jaꞌlewe, cuma oj tul tyem te koniyan, otktzen pon baj twiꞌ tyem tuꞌn kakꞌanan. 5Tiꞌj lux kena ntiina twitz txꞌotxꞌ, il tiꞌj chin kꞌola spiꞌyen cye xjal―tz̈ixin.

6Tej tkbante Jesús jlu, e cub ttzubanxin twitz txꞌotxꞌ, bix e cub tbinchaꞌnxin chꞌin xookꞌl tuya taꞌl ttzixin, bix oc tsuꞌnxin xookꞌl cyiꞌ tbakꞌ twitz mos̈. 7Bix e xiꞌ tkbaꞌnxin te mos̈:

—Cutxey txjol twitza tuj jtxꞌajbil Siloé tbi, jatzen japeninaj O Tzaj Kꞌoꞌn―tz̈ixin.

Bix e tcuya mos̈, bix el ttxjoꞌnxin twitzxin tuj txꞌajbil. Bix e bint twitzxin tuꞌn tcyeꞌyenxin, bix e ponxin tjaxin. 8Bix e xiꞌ cykbaꞌn ke tvesint-xin bix kej xjal otk cyil jaxin tej tkanenxin pwak:

—¿Yaaꞌmpa ja xjal jlu mos̈ ncub ke twitz tja Dios te kanl pwak?―tz̈ikexin.

9At juuntl e xiꞌ cykbaꞌn:

—Ja tzunxin.

Pero at juuntl e xiꞌ cykbaꞌn:

—Min, yaaꞌn jaxin, sino nuk jun xjal juꞌ tcyeꞌnc tisenj mos̈―tz̈ikexin.

Pero e xiꞌ tkbaꞌn jmos̈ otk kꞌanj:

—Inayen weja.

10Juꞌ tzunj, e xiꞌ cykbaꞌnxin texin:

—¿Ti xbina twitza, tiꞌj lutle ncyeꞌyena?―tz̈ikexin.

11Aj ttzakꞌbeꞌnxin:

—At junxin xjal Jesús tbi. Ja tzunxin xcub binchante chꞌin xookꞌl, bix s-oc tsuꞌnxin xookꞌl tiꞌ nwitza, bix s-aj tkbaꞌnxin weya tuꞌn tel ntxjoꞌna nwitza tuj txꞌajbil te Siloé. Ẍin pona tuj txꞌajbil, bix s-el ntxjoꞌna nwitza, bix xcyaj nwitza baꞌn―tz̈ixin cye tvesint-xin.

12Bix e xiꞌ cykbaꞌnxin texin:

—¿Jaaꞌtzen taꞌ jxjal xkꞌanente tey?―tz̈ikexin.

—Mintiiꞌ tumel wuyena jaaꞌ taꞌ―tz̈ixin.

Nchi xkelen fariseo te jxjal otk jket twitz tuꞌn Jesús

13Entonces, e xiꞌ cyiiꞌnxin ja xjal otk ten mos̈ cywitz fariseo. 14Tuj kꞌij te ajlabl tej tbinchante Jesús xookꞌl bix e kꞌanj xjal mos̈. 15Juꞌ tzunj e xiꞌ cykanen fariseo te mos̈:

—¿Ti tten xkꞌanja, tuꞌn tcyeꞌyena? ¿Ti xbaj tey?―tz̈ikexin.

Bix e xiꞌ tkbaꞌnxin cye fariseo:

—S-oc tsuꞌn Jesús xookꞌl tiꞌ nwitza, bix s-el ntxjoꞌna nwitza, bix ncyajtltzen baꞌn―tz̈ixin.

16Juꞌ tzunj, e xiꞌ cykbaꞌn juun fariseo cyxolx:

—Yaaꞌn smaꞌn tuꞌn Dios ja xjal lu, cuma ma binchanxin xookꞌl tuj kꞌij yaaꞌn baꞌn te akꞌuntl. Min tniman jley tej kꞌij te ajlabl―tz̈ikexin.

Pero at juuntl cyxolxin e xiꞌ cykbaꞌnxin:

—Yaaꞌn tumel cyyola. ¿Ti tten baꞌn tkꞌane jun aj il mos̈?―tz̈ikexin. Bix juꞌ tzunj e tzaj jun kꞌoj cyxolxin. 17Mancꞌbiltzen, e xiꞌ cykanenxin te mos̈:

—Tzin tkbaꞌna ma kꞌanen jxin lu cyiꞌj twitza. Juꞌ tzunj, ctzaal tkbaꞌna alcyexin tuj twitza―tz̈ikexin.

—Jaxin jun tyolel Dios―tz̈ixin.

18Pero cycyꞌi nejenel cye judío tyolxin ka otk tenxin mos̈ bix ka otk kꞌanjxin. Juꞌ tzunj, e cytxocxin tmanxin tuya ttxuxin. 19Bix e xiꞌ cykanenxin cye tmanxin:

—¿Japa tzunj xjal lu cycwala? ¿Jaxpa mos̈pa tej titzꞌj? Katzen mos̈xin, ¿titzen tten sul tnaabl twitzxin?―tz̈ikexin.

20Bix aj cytzakꞌbeꞌn tmanxin cye fariseo:

—Jaxte kcwala, bix jaxte mos̈xin tej titzꞌjxin. 21Pero min tzꞌel kniꞌya tiꞌj ti tten sul tnaabl twitzxin jaꞌlewe, bix mintiiꞌ tumel kuyena alcye xjal s-oc tkꞌanen ke tbakꞌ twitzxin. Cykanenx texin, cuma ma xjaltlxin. Jaxxin kbalte―tz̈i ke tmanxin. 22E yolen ke tmanxin juꞌwa cuma at cytz̈i nejenel cye judío cyiꞌjxin, cuma otk cykba judío ka at jun xjal ma kbante Jscyꞌoꞌn tuꞌn Dios ja Jesús, n-etztzen lejetl tuj camon jaaꞌ te xnakꞌtzbil tyol Dios, tuꞌn miꞌntl tzꞌocx tentl. 23Tuꞌn cytz̈i cyiꞌjxin, juꞌ tzunj e xiꞌ cykbaꞌnxin: “Ma xjaltlxin. Cykanenx texin.”

24Tejtzen tel cyniyꞌ fariseo tiꞌj cycyꞌi tman mos̈ e yolenke, juntl maj e tzaj cytxcoꞌnxin jxin otk ten mos̈, bix e xiꞌ cykbaꞌnxin texin:

—Kbantz ka ma kꞌanja tuꞌn Dios, pero yaaꞌn tuꞌn Jesús, cuma ktzkiꞌna jun aj il teja―tz̈ikexin.

25Bix aj ttzakꞌbeꞌnxin cyexin:

—Mintiiꞌ woclena tuꞌn t-xiꞌ nkbaꞌna ka aj ilxin bix ka min. Pero ntzkiꞌna ja lu. Mos̈ kena nejl. Pero jaꞌlewe, baꞌntl chin cyeꞌyena―tz̈ixin.

26Pero min el baꞌn tyolxin tuj cywitzxin. Juꞌ tzunj e xiꞌ cykanenxin texin:

—¿Ti xtbincha Jesús tiꞌja? ¿Ti xbint tuꞌnxin, tuꞌntzen tcyeꞌyena?―tz̈ikexin.

27Aj ttzakꞌbeꞌnxin cyexin:

—Ya ma txiꞌ nkbaꞌna cyey, pero cycyꞌiy tuꞌn cyocslantey nyola tiꞌj Jesús. Ka cycyꞌiy nyola, ¿tikentzen ntzaaꞌ cykanena weya juntl maj? ¿Cyajpey tuꞌn cyxiꞌ lpey tiꞌjxin?―tz̈ixin.

28Tej cybintexin ja yol lu, e tzaj cykꞌojxin, bix e xiꞌ cykbaꞌnxin texin:

—Tey, nxiꞌ lpey tiꞌjxin, pero keya, nkoꞌx lpeya tiꞌ Moisés. 29Baꞌn kuꞌna o cyaj tkꞌoꞌn Dios tyol te Moisés. Yal tej xjal lu, mintiiꞌ tumel jaaꞌ e tzaaꞌ―tz̈ikexin.

30Aj ttzakꞌbeꞌnxin cyexin:

—Jeyꞌ, ¿titzen tten mintiiꞌ cynaabla? Ma tzaj tkꞌoꞌn Jesús weya tuꞌn ncyeꞌyena, pero tzinx cykbaꞌna min tzꞌel cyniyꞌ tiꞌj jaaꞌ e tzaaꞌxin. 31Cykilca koꞌ ktzkiꞌn min takꞌ te Dios tipemal cyej xjal aj il, sino nkꞌonxin tipemalxin tej xjal nniman jaxin bix nbinchan tajbilxin. 32Jatxe tej tbint twitz txꞌotxꞌ, bajx kbiꞌya o kꞌanj jun xjal mos̈ titzꞌjlen tuꞌn juntl xjal. 33Nuket min e tzaj ja xjal lu tiꞌ Dios, mlayettzele kꞌanen wiꞌja―tz̈ixin.

34Bix e xiꞌ cykbaꞌnxin texin:

—¿Ti tten ntxꞌolbana keya? Nuk jun aj iltey, cuma ul itzꞌja mos̈a. Te jaꞌlewe, mintiiꞌtl toclena tuꞌn tocxa tuj tja Dios bix tzalu tuj camon jaaꞌ―tz̈ikexin.

Kej xjal miꞌn n-el cyniyꞌ tiꞌ Cristo, mos̈ke tuj twitz Dios

35Tejtzen tbinte Jesús otk tzꞌetz cylojoꞌn fariseo ja mos̈ tuj tja Dios bix tuj camon jaaꞌ, e jyonxin tiꞌj mos̈, bix e xiꞌ tkbaꞌnxin te:

—¿Mapa tzꞌocslaney tiꞌj ma tzul jxjal Smaꞌn tuꞌn Dios kxol?―tz̈ixin.

36—Taat, kbantz weya alcyexin, tuꞌntzen wocslana tiꞌjxin―tz̈i mos̈.

37E xiꞌ tkbaꞌn Jesús te:

—Ma tila jaxin. Jaxj xjal nyolen tuyey jaꞌlecuwe. Inayena―tz̈i Jesús.

38Tej tbintexin jlu, e cub majexin tuꞌn t-xiꞌ tyeecꞌanxin tnimbilxin, bix e xiꞌ tkbaꞌnxin:

—Taat, chin ocslala tiꞌja―tz̈ixin.

39Mas yaj chꞌintl, e xiꞌ tkbaꞌn Jesús cye xjal:

—In tzaja twitz txꞌotxꞌ tuꞌn tcyaj tuj tzinen alcye kej xjal chi cyjel mos̈. Kej xjal ma tzꞌel cyniyꞌ tiꞌj ka mos̈ cynaabl, cjketeltzen cynaabl. Pero kej xjal n-el cyniyꞌ tiꞌj tuj cywitz, cyjeltzen cynaabl mos̈―tz̈ixin.

40Cyxoltzen xjal at cab fariseo. Tej cybinte fariseo tyol Jesús cyiꞌj mos̈, e xiꞌ cykanenxin texin:

—¿Jaxpa juꞌx koꞌya, mos̈pa koꞌya tuj twitza?―tẍikexin.

41—Nuket mos̈key, mintiiꞌtle cyila. Pero tzin cykbaꞌna: “Mintiiꞌ il tiꞌj tuꞌn tkꞌoj xnakꞌtzbil keya, cuma ma tzꞌel kniꞌya tiꞌj cykilca,” tz̈ikey. Juꞌ tzunj, chi cyjela tuj cyila―tz̈i Jesús.

বর্তমানে নির্বাচিত:

SAN JUAN 9: mamTS

হাইলাইট

কপি