SAN JUAN 10
10
Jun techel tiꞌj jun tpenwen carnel
1Bix e xiꞌ tkbaꞌntl Jesús cye fariseo:
—Jaxxix cxeꞌl nkbaꞌna cyey, ejeeꞌy yaaꞌn cylel jaxxix cye xjal. Cꞌoquel cycꞌuꞌja tiꞌj jun techel. Alcye cylel tcyꞌi tzꞌocx ttziiꞌ cypenwen carnel, sino juꞌ n-ocx twiꞌ penwen, jatzen xjalja yaaꞌn jaxxix cylel, sino jun alakꞌ. 2Pero jcylel n-ocx ttziiꞌ penwen tuj tumel, nyeecꞌantzen ka jaxxix jun cylel cye carnel. 3Oj npon jcylel jaxxix ttziiꞌ penwen te klax, jxjal ncꞌojlan ke carnel te koniyan ttzkiꞌn twitzxin, bix njkon ttziiꞌ penwen, tuꞌntzen tocx jxin cylel. Bix cytzkiꞌn carnel twiꞌ cycylel. Bix nchi tzaj ttxcoꞌn cylel teeylex juun carnel alcye cybijil, bix ncheꞌx tiiꞌnxin tuj penwen. 4N-etz tiiꞌnxin kej carnel at te texin, bix nbet-xin nejl cywitzjil. Bix nchi oc lpejil tiꞌjxin, cuma cytzkiꞌnjil twiꞌxin. 5Pero jun wikxitl xjal, mlay chi oc lpejil tiꞌj, sino chi elel okjil tiꞌj, cuma min cytzkiꞌnjil twiꞌ junxitl xjal―tz̈i Jesús cye fariseo.
6Pero tej t-xiꞌ tkbaꞌn Jesús ja techel lu cye fariseo, min el cyniyꞌxin tiꞌj ti elpenina.
Ja Jesús jbaꞌn cylel
7Juꞌ tzunj, e xiꞌ tkbaꞌnxin juntl yol cyexin:
—Jaxxix cxeꞌl nkbaꞌna cyey, inayena jjaxxix cylel. 8Cykilca kej xjal ul nejl nwitza te kꞌumlte jaxxix cylel ejeeꞌ, alakꞌke. Pero min oc cybiꞌn ncarnela cyyol. 9Junx ttziiꞌ penwen at, bix inayen tzunja junx ttziiꞌ penwen. Alcye ma tzꞌoctz wuꞌna, ccꞌojleteltzen, bix ckꞌojel te tuꞌn tex, tuꞌn tcnet twa. 10Yaltzen te alakꞌ, tzul nuk tuꞌn talkꞌan, bix te byol, bix tuꞌn t-xiꞌ cykilca tuj il. Pero weya, in ula tuꞌn tten cychunkꞌlal, bix tuꞌn tnoj cychunkꞌlal tuyaj baꞌn. 11Inayena jcylel baꞌn. Jun cylel baꞌn ctkꞌaꞌ tiib tuꞌn tcyim tuꞌn cyclet carnel. 12Pero jxjal yaaꞌn cylel, bix yaaꞌn cyaaw carnel, sino nuk jun tmaan cylel, oj tlonte jun xoꞌj, miꞌn tcꞌojla ke carnel, sino cyjel tcyeꞌyen ke carnel tuꞌn tel ok. Bix cꞌulel tzul xoꞌj te tzyul ke carnel, bix chi elel tz̈itjjil. 13Cuma mintiiꞌ tcꞌuꞌj cyiꞌ carnel, n-el ok, cuma nuk jun maan. 14Pero inayena, jcylel baꞌn kena. Ntzkiꞌna ke ncarnela, bix cytzkiꞌn ncarnela inayena. 15Ntzkiꞌna ke ncarnela tisen Nmana ttzkiꞌn inayena, bix cytzkiꞌn ncarnela inayena tisen ntzkiꞌna Nmana. Bix cnkꞌaꞌ wiiba tuꞌn ncyima tuꞌn cyclet ncarnela. 16Bix juuntl carnel eteꞌ cyuj juuntl tnom at tuꞌn cyoc te ncarnela. Il tiꞌj tuꞌn ttzaj wiiꞌna tuj penwen. Oj cytzaj ntxcoꞌna, cꞌoqueltzen cybiꞌn nwiꞌya, bix chi oquel te junx cyuya ncarnela tzalu, bix junx cycylel chin oquela. 17Bix cuma cnkꞌaꞌ wiiba tuꞌn ncyima tuꞌn cyclet carnel, juꞌ tzunj n-oc wakꞌa te Nmana. Bix chin cymeela tuꞌn njaw itzꞌja juntl maj. 18Min-al baꞌn tel kꞌinte nchunkꞌlala. Oj tpon tumel tuꞌn ncyima, tuꞌnj weya wajbil chin cymeela. At wipemala tuꞌn ncyima, bix at wipemala tuꞌn njaw itzꞌja juntl maj. Bix cbinel wuꞌna cuma juꞌ taj Nmana―tz̈i Jesús cye fariseo.
19Tejtzen cybinte judío kej yol lu, juntl maj e jaw jun kꞌoj cyxolxin. 20At nim xjal e xiꞌ cykbaꞌn:
—Ma tzꞌoc jun biman tiꞌj, bix njaw tuj twiꞌxin. ¿Tiken nxiꞌ cybiꞌna tyolxin?―tz̈ikexin.
21Pero juuntl xjal e xiꞌ cykbaꞌn:
—Min. Mlay yolen jun xjal tuj tumel juꞌwa ka ma jaw tuj twiꞌ. Bix at juntl. Mlay bint tuꞌn jun xjal tuꞌn tjket twitz jun mos̈ ka ma tzꞌoc jun biman tiꞌj―tz̈ikexin.
El cyiiqꞌuen judío ja Jesús
22Yajcꞌatltzen bix e pon juntl ninkꞌij, ja tninkꞌij nin tja Dios tuj Jerusalén. 23Otk pon tyem te ncub cheꞌw. Bix nbet Jesús tuj jtwitz peꞌn Salomón tbi. 24Tej t-xiꞌ cycyeꞌyen judío e ten Jesús tuj tja Dios, e jaw cychmon cyiibxin tiꞌjxin, bix e xiꞌ cykbaꞌnxin texin:
—¿Jtojtzen tkbay tuj tzinen ka jay jxjal Scyꞌoꞌn tuꞌn Dios?―tz̈ikexin.
25Aj ttzakꞌbeꞌn Jesús cyexin:
—Nim maj e xiꞌ nkbaꞌna cyey, pero cycyꞌiy tuꞌn cyocslana tiꞌ nyola tiꞌj alcye kena. Jax juꞌx kej o bint wuꞌna tuya tipemal Nmana, tzin cykbaꞌn alcye kena. 26Pero cycyꞌiy cyocslay wiꞌja, cuma yaaꞌnkey ncarnela. 27N-oc cybiꞌn ncarnela nwiꞌya, bix ntzkiꞌna ejeeꞌ, bix nchi oc lpe wiꞌja. 28Bix nxiꞌ nkꞌoꞌna cychunkꞌlal te junx maj. Miꞌn chi cyaj tuj cyamecy. Bix min-al baꞌn cyel kꞌinte tuj nkꞌaba. 29O tzaj tkꞌoꞌn Nmana ejeeꞌ weya, bix at mas tipemal Nmana cywitz cykilca. Juꞌ tzunj, min-al baꞌn cyel kꞌinte tuj tkꞌab Nmana. 30Inayena tuya Nmana, junx koꞌya―tz̈i Jesús.
31Tej cybinte judío tyol Jesús ka junx tuya Dios, juntl maj e jaw cyiiꞌnxin xak tuꞌn toc cyxooꞌnxin tiꞌjxin. 32Tej tel tniyꞌxin tiꞌj e cyajbexin tuꞌn tcubxin, e xiꞌ tkbaꞌnxin cyexin:
—Nim nbinchbena baꞌn o bint wuꞌna cywitza tuꞌn tipemal Nmana, te yecꞌbil junx koꞌya tuya Nmana. ¿Alcyetzen nbinchbena tzin tyeecꞌan min e bint tuꞌn tipemal Nmana, tuꞌntzen toc cyxooꞌna xak wiꞌja?―tz̈ixin.
33Aj cytzakꞌbeꞌn judío texin:
—Mlay tzꞌoc kxooꞌna xak tiꞌja tuꞌn tlaj jbaꞌn o bint tuꞌna. Pero il tiꞌj tuꞌn tcyima tuꞌn tlaj ncub t-xmucchaꞌna Dios, cuma tzin tkbaꞌna Diostey, amale nuket jun xjaltey―tz̈ikexin.
34Aj ttzakꞌbeꞌn Jesús cyexin:
—¿Mimpa tzul tuj cycꞌuꞌja at maj dios cybi xjal tuj tyol Dios? Tzin tkbaꞌn Dios tuj cyleya: “Dioskey.” 35E tkba Dios juꞌwa cye cycawel aj Israel cuma ajbenke tisen t-xel Dios cyxol xjal tuꞌn cykꞌumen tyolxin. Oc tkꞌoꞌn Dios cybi te dios, bix ktzkiꞌn mlay tzpet tyol Dios. 36Juꞌ tzunj, ka dios kej xjal nuk xjal te twitz txꞌotxꞌke, ¿tikentzen tzin cykbaꞌna nchin xmucchana Dios oj nxiꞌ nkbaꞌna Tcwal Dios kena? ¿Tikentzen nchi jaw yolena tiꞌj xjal e tscyꞌo Dios bix e tzaj tsmaꞌn Dios tzalu twitz txꞌotxꞌ tuꞌn tbint taakꞌen Dios tuꞌnxin? 37Ka ja akꞌuntl nbint wuꞌna miꞌn tzin tyeecꞌan ka smaꞌn kena tuꞌn Nmana, baꞌntzen tuꞌn wel cyxooꞌna. 38Pero ka jnbint wuꞌna nyeecꞌan Tcwal Dios kena, amale cycyꞌiyet nyola, pero tuꞌnj taakꞌen Dios nbint wuꞌna, il tiꞌj tuꞌn cyocslana tiꞌj junx kena tuya Nmana―tz̈i Jesús.
39Juꞌ tzunj, te juntl maj oc cyipenxin tiꞌj tuꞌn tcub cytzyuꞌn jaxin, pero el lkꞌexin cyiꞌjxin. 40Bix e xiꞌxin juntl maj jlajxe nimaꞌ te Jordán, tuꞌn tcyajxin tuj lugar jaaꞌ otk tzakꞌa Juan Bautista tuꞌn cycuꞌx xjal tuj aꞌ tuꞌnxin. 41Bix nim xjal e pon tuyaxin, bix e xiꞌ cykbaꞌnxin:
—Amale mint e bint jun akꞌuntl te nim tipemal tuꞌn Juan, te yecꞌbil tyolel Dios jaxin, pero o tzꞌel jaxxix cykilcaj e tkbaxin tiꞌj xjal lu―tz̈ikexin.
42Bix nim xjal ocslan tiꞌj Jesús jatzewe ka jaxin jCristo.
বর্তমানে নির্বাচিত:
SAN JUAN 10: mamTS
হাইলাইট
শেয়ার
কপি
Want to have your highlights saved across all your devices? Sign up or sign in
© 2000, Wycliffe Bible Translators, Inc. All rights reserved.
