SAN JUAN 2

Tej tbint jun mejoblenel tuj tnom Caná

1Tetzen toxen kꞌij tbajlen yolen Jesús tuya Natanael, attzen jun mejoblenel tuj tnom te Caná, tuj departamento te Galilea. Bix jaan ttxu Jesús ajben tuj mejoblenel. 2Jax juꞌx e pon Jesús cyuya ke t-xnakꞌatzxin tuj jmejoblenel, cuma otk chi tzaj txquet-xin.

3Tuj tzunj mejoblenel, e cub baj vino. Bix e xiꞌ tkbaꞌn ttxu Jesús texin:

—At jun il tiꞌj. Mintiiꞌtl vino―tz̈ixuj.

4Bix e xiꞌ tkbaꞌn Jesús texuj:

—¿Tikentzen nbaj tcꞌuꞌja tiꞌj lu, naa? Minaꞌx tpon hora te tuꞌn tchicꞌajax wipemala. Oj tpon tumel, Dios kbalte―tz̈i Jesús.

5Bix e xiꞌ tkbaꞌnxuj cyej niyꞌtl xjal nchi ajben:

—Oj tpon hora, alcyej ctkbaꞌ Jesús cyey, cybinchama―tz̈ixuj.

6Tuj tzunj jaaꞌ at wukak chcan xak cytxꞌotxꞌel. Tuj jaca juun e xiꞌ winkꞌan ẍokꞌ aꞌ tuj. Otk cub kꞌoꞌn tuj jaaꞌ tuꞌn cyajben tuj mejoblenel te txꞌajbil cykꞌab xjal tisex tten cyxol judío. 7Bix e xiꞌ tkbaꞌn Jesús cyej xjal ajben tuj mejoblenel:

—Cynojsanx kej chcanne tuya aꞌ―tz̈i Jesús.

Bix e cycuyaxin, bix e baj noj ke chcan tuya aꞌ cyuꞌnxin. 8Bix e xiꞌ tkbaꞌn Jesús cyexin:

—Cyiiꞌnctz chꞌin aꞌ jaꞌlewe, bix cyiiꞌnxa te tneel calpul―tz̈ixin.

E cycuyaxin, bix e xiꞌ cyiiꞌnxin te tneel calpul. 9Amale otket cyil jcabtlxin jaaꞌ otk tzaaꞌ aꞌ, pero min ttzkiꞌn jxin tneel calpul. Bix oc tniyꞌbeꞌnxin j-aꞌ kꞌiꞌn cyuꞌn tuyaxin ya otk tzꞌoctl te vino. Bix baꞌnxsen eꞌla jvino tuj twitzxin. Juꞌ tzunj, e tzaj ttxcoꞌnxin j-acꞌaj chmilbaj, 10bix e xiꞌ tkbaꞌnxin te:

—Cykilca xjal nejl nxiꞌ cykꞌoꞌn vino baꞌn cye xjal. Mas yaj, ojtzen t-xiꞌ cycꞌaꞌn xjal nim, min tzꞌel cyniyꞌ xjal tiꞌj ka baꞌn vino tzin cycꞌaꞌn bix ka yaaꞌn baꞌn, bix nxiꞌ cykꞌoꞌnx jvino yaaꞌn baꞌnxix. Pero tey, yaaꞌn nejl ma tzaj tkꞌoꞌna jvino tbanelxix keya, sino texa yaj―tz̈i tneel calpul te chmilbaj tuj mejoblenel.

11Ja tzunja e bint tuꞌn Jesús, tneel maj e tyeecꞌaxin tipemalxin. E tbinchaxin tneel tyecꞌbilxin tuj tnom te Caná, tuj departamento te Galilea, bix e cyocsla ke t-xnakꞌatzxin ka jaxin Scyꞌoꞌn tuꞌn Dios.

12Tbajlenxitltzen jlu, e xiꞌ Jesús tuj tnom te Capernaum, tuyax ttxuxin, cyuyax titzꞌenxin, bix cyuyax t-xnakꞌatzxin, bix e tenkexin tuj ja tnoma cab kꞌij.

Tej tetz tlojoꞌn Jesús ke qꞌueyel tuj tja Dios

(Mt. 21:12-13; Mr. 11:15-18; Lc. 19:45-46)

13Bix at tuꞌn tpon tumel tuꞌn tiyꞌ iyꞌset jninkꞌij te Pascua, jkꞌij tej tul tuj cycꞌuꞌj judío etz tcoꞌpan Dios ke xjal te Israel tuj tkꞌab Egipto. Juꞌ tzunj, e xiꞌ Jesús tuj Jerusalén. 14Tej tponxin, e xiꞌxin tuj jnin tja Dios. Tuj tapya tiꞌ tja Dios ocx ten kej xjal nchi qꞌueyen wacẍ bix carnel bix cucuꞌ, kej jil nchi ajben te cyoybil judío te Dios. Bix xsunkej kꞌuklecke tiꞌ cymes kej xjal ncub cychꞌixpuꞌn pwak te Roma tuya pwak te tja Dios, cuma nuk pwak te tja Dios ajben tuj tja Dios. 15Kaꞌxsen el jlu tuj twitz Jesús, bix e xiꞌ tbinchaꞌnxin jun charyon te cyjaj, bix etz tlojoꞌnxin cykilca ke qꞌueyel alimaj cyuyax ke cycarnel bix cywacẍ tuj tja Dios. Bix e cub ttz̈itexin cypwak chꞌixpul twitz pwak, bix e jaw tpacꞌtzꞌenxin cymes. 16Bix e xiꞌ tkbaꞌnxin cyej xjal nchi qꞌueyen cucuꞌ:

—¡Cyiiꞌnx kej cucuꞌ lu! Miꞌn tzꞌoc cykꞌoꞌna tja Nmana tisen jun qꞌueybil―tz̈ixin.

17Tej cylonte t-xnakꞌatz Jesús ti e bint tuꞌnxin tuj tja Dios, ultzen tuj cycꞌuꞌjxin ti e tkba tyol Dios. Tz̈i cyjulu: “E xiꞌ tkbaꞌn Tcwal Dios te Tman: ‘Cuma waja tuꞌn tajben tjay nuk tuꞌn tjaw cynimsaꞌn xjal tbiy, chin cweltzen cybyoꞌn xjal tiꞌj,’ tz̈i Tcwal Dios.”

18Yaltzen kej nejenel cye judío, tej cylonte ti otk baj te Jesús, e xiꞌ cykanenxin texin:

—¿Jaaꞌ ma tzaaꞌ kꞌoꞌn tuꞌn tcawena tibaj tja Dios juꞌwa? Kꞌontz jun yecꞌbil keya, tuꞌntzen tel kniꞌya tiꞌj at toclena―tz̈i ke judío.

19Bix aj ttzakꞌbeꞌn Jesús cyexin:

—Ka ma cub cyxitena ja tja Dios lu, cjaweltzen nbinchaꞌna juntl maj tuj oxe kꞌij―tz̈i Jesús.

20Juꞌ tzunj, e xiꞌ cykbaꞌn judío texin:

—Akꞌanan ke binchal jaaꞌ cyaꞌwnak jnabkꞌi tuya wukak e binne ja tja Dios lu. ¿Ti tten tuꞌn tjaw tbinchaꞌntey nuk oxe kꞌij?―tz̈ikexin. 21Min el cyniyꞌxin tiꞌj e yolen Jesús tiꞌj t-xumlal tisen tja Dios. Min e yolenxin tiꞌj nin tja Dios. 22Pero yal kej t-xnakꞌatz Jesús, tej tjatz itzꞌj Jesús juntl maj tuj cyamecy mas yaj, e tzaj cynaꞌnxin ti otk tkbaxin tiꞌj tuꞌn tbinchaj tja Dios, bix el jax tyol Dios bix tyolxin tuj cywitzxin.

Ttzkiꞌn Jesús tuj cyanem cykil xjal

23Entonces, e ten Jesús tuj Jerusalén te iyꞌsal ninkꞌij te Pascua. Bix tuj cywitz nim xjal, jaxin Jscyꞌoꞌn tuꞌn Dios, cuma e cyil jnim tipemalxin e xiꞌ tyeecꞌanxin. 24Pero ttzkiꞌn Jesús min oc ke cycꞌuꞌj xjal tiꞌjxin, cuma el tniyꞌxin tiꞌj ti iyꞌ tuj cycꞌuꞌj cykil xjal. 25Mintiiꞌ il tiꞌj tuꞌn tkbaj texin ti tten tnaabl jun xjal, cuma ttzkiꞌnxin alcyej at tuj tanem jaca juun xjal.

বর্তমানে নির্বাচিত:

SAN JUAN 2: mamTS

হাইলাইট

কপি