Mark 8
8
Jesu naa gɨ bi dubu mi wa̰y tudi
Mat 15.32-39
1Na ɗa̰y ɗay bi dɨbla tay peer cam, lɛ a ten wa̰y tudi lo. Jesu soon ər bi tɨ wa̰y edɨ la ər ja gɨ a ɓə: 2«Ən ləg bi ne jindemni kəysul a ka ɗa̰y tɨ tedi na ən la, a wa̰y tudi teni. 3Jo ən kun a na ndula ka a si tɨ gə̰y le, a dwari ɓə tong tɨ ul, kəysul bi tapeer tɨ a daan o̰ tɨ ɓag.» 4Ər bi duga gɨ ər: «Yini ɓə wa̰y tudi tina tɨ ɓay tɨ taa hul le tɨ gɨ a naa a?» 5Gɨna Jesu ɓiri a: «Yḭ na mapa tɨ waa a?» A duga gɨ ər: «Yini na mapa kili.» 6Gɨna ər ɓiri bi ka a ti tɨ lɔr. La ər so mapa kili ər ka gɨ Ndɨla barka la, ər ha̰w ər naa gɨ ər bi tɨ wa̰y edɨ nɨ ka a ɓaan gɨ bi gun. A ɓaan gɨ bi gun la. 7Cəw ɓḭ kaw a na ɓa̰ndḛni. Jesu jul mu tɨ sul la ər ja gɨ ər bi tɨ wa̰y edɨ ka a ɓaan gɨ bi la. 8Bi gun twi, a kər la. A to wa̰y tudi burmi ne lɔ gə̰y sir krang kili. 9Bi ji gun lɛm dubu so. Lɔ tɨ pla, Jesu kun a. 10Tɨ daamu ər ɗɔl tɨ kwa̰r ɗəng hul na ər bi tɨ wa̰y edɨ a si tɨ lɔr nəgri sul tɨ Dalmanuta.
Parisyḛ-a ham ho̰ni
Mat 16.1-4
11Parisyḛ-a hina la a ɗolɔ tɨ jaa gaglə na Jesu, tɨ ər sangni. A ɓiri ər ka ər ka gɨ a wa̰y ne ɓɔrji ne o̰ tɨ ndɨlasul. 12Jesu bɛ saaw pḭ la ər ja: «Kəyjaa bi kalɔ ne ɓiri ən wa̰y ne ɓɔrji? Kuri ən ja gɨ i tɨ bayri, ən ɓə gɨ i wa̰y ne ɓɔrji ɓudu in kar lo.» 13La ər nɨm a, ər ɗɔl tɨ kwa̰r ɗəng hul, ər si tɨ ta paa. 14Ər bi tɨ wa̰y edɨ tori mapa sula tɨ a daa, a si na mapa ɓudu ngoy tɨ kwa̰r hul. 15Jesu peer a kuna paa ne: «Yḭ kay jicina ɓari tɨ i ndɔ sul na Parisyḛ-a ham ho̰ni la, Erod ham ho̰ni la.» 16Bi tɨ wa̰y edɨ gag peer tɨ a daan kəysul a naa mapa lo. 17Gorne Jesu una ɓə a wo paa gaglə gɨna, ər ja gɨ a: «Kəyjaa yḭ gag peer mapa na teni jaa a? Pay yḭ una wa̰y ne ən ka lɔ lo cam a? 18Yḭ na ji le i ləg un lo a? Yḭ na tori lɛ i laa jaa lo a? Yḭ lɛm i ho̰ni jani yo̰y lo a? 19Gorne ən ɓaan mapa tɨ luni gɨ bi dubu mi, la mapa burmi gə̰y sir krang tɨ waa a?» A ja ɓə: «Yini to krang dɔkɔmɛ kar sap.» 20«La gorne ən ɓaan mapa kili gɨ bi ɓərgɨ dubu so la, i to wa̰y tudi ne gə̰y krang hul tɨ waa a?» A duga gɨ ər ɓə: «Yini to krang kili.» 21La ər ja gɨ a: «Yḭ una mum ne ji lo yɔd ɗang a?»
Jesu la wo ji nina
22Lɔ tɨ plaa, Jesu a na ər bi tɨ wa̰y edɨ a si tɨ Betsayda, gorne a an gɨna, a hina na wo ji nina gɨ Jesu la, a ka gɨ ər kɔgri ka ər do ər. 23Jesu par wo ji nina daa la ər wag na ər tɨ lɔr mu tɨ bayri. Ər ka gɨ ər hirgɨ tɨ ər ji, la ər kay ər daa tɨ ər sul ər ɓiri ər: «Əm ləg wa̰y paa a?» 24Wo ji nina təng ji la ər ja: «Ən ləg bi, lɛ a ti kuna teri no̰.» 25Jesu kay ər daa tɨ ər jikɔr sul cam, gorne ər ləg un gar-gar gɨna, ər ləg un wang. 26Gɨna Jesu ja gɨ ər: «Si tɨ gə̰y, əm ka wur tɨ lɔr hul lo.»
Bi na ilgɨ tɨ Jesu sul
Mat 16.13-20; Luk 9.18-21
27Jesu a na ər bi tɨ wa̰y edɨ a si tɨ lwərgɨ ne ndog tɨ lɔr nəgri sul tɨ Sesare Pilip. Tɨ ul, ər ɓiri ər bi tɨ wa̰y edɨ: «Kəyjaa jo bi ja tuna ən sul a?» 28A duga gɨ ər: «Bi tapeer ja ɓə əm tɨ Ja̰ Batis, peer paa ja ɓə əm tɨ nebi Eli, tapeer ja cam ɓə əm tɨ nebi paa.» 29Jesu ja: «A yḭ, i ja ɓə yin tɨ ja a?» Piyɛr duga gɨ ər: «Yim tɨ Krist, ne Ndɨla ɛr əm.» 30La ər peer a na gṵ sɨgra ɓə: «Yḭ ka gɨ wo jaa ne tuna ən in ja lo.»
Jesu jaa ja tuna ər ulu la ər wag tɨ ngalɨm sul
Mat 16.21-28; Luk 9.22-27
31La Jesu ɗolɔ tɨ gɨ ər bi tɨ wa̰y edɨ. Ər ja ɓə: «Yin Wo Ɓa̰ ɓə pɛw tina nari, bi nii ɓə ər ɓini la, bi tɨ hima ɓina na woom hari na bi tɨ gṵ hul ɓla ɓə ər ɓini la. A ɓə ər humna, lɛ ɗa̰y tedi mani tɨ plaa gɨna, ər ɓə wag tɨ ngalɨm.» 32Ər ja gɨ a jaa ne tɨ bayri. Gɨna Piyɛr wag na ər teni la ər meer ər. 33Lɛ Jesu yiga ndula ər ləg ər bi tɨ wa̰y edɨ la ər meer Piyɛr ɓə: «Si ɓag na ən, Sidan! kəysul əm ilgɨ tɨ Ndɨla na ilgɨ lo lɛ tɨ bi ɓari na ilgɨ.»
Ul sula tɨ Jesu lɔ
Mat 16.24-28; Luk 9.23-27
34Lɔ tɨ plaa, Jesu soon bi hari na ər bi tomni, tɨ ər ndɔ la ər ja gɨ a: «Jo wo taam ul sula tɨ ən lɔ gɨna, ka ər ɓini ər ndula ya̰m la, ər so ər tɨla tɨ tərgɨ la, ər so ul tɨ ən lɔ. 35Kəysul wo ne taam ər ndula ɓaw gɨna, ɓə ər ndula ya̰m haam, lɛ wo ne haam ər ndula yin jaa la Jaa Ndinimani jaa la gɨna, ər ɓə nina tina. 36Jo wo ten mum gun tɨ dunya̰ lɛ ər ndoygɨ kud gɨna, ər barka maan tɨ kəy a? 37Kəy wa̰y jo woɓari ɓə lɛm sula na ər ndo̰yngɨ yɛr a? 38Kəysul jo wo ka kaar tɨ ən sul la ən jaa sul la, tɨ bi kalɔ ne juna la ɓijim la, par a hul kakamle gɨna, yin Wo Ɓa̰ kaw ən ɓə kaar kar tɨ ər sul gorne ən ɓə duga hina tɨ ən Ba taan hul ɓudu na ər malayka ndeeri-a.»
বর্তমানে নির্বাচিত:
Mark 8: nie
হাইলাইট
শেয়ার
কপি
Want to have your highlights saved across all your devices? Sign up or sign in
© 2023, ATALTRAB
