Mark 12
12
Jaa laar tuna bi damnar way sul
Mat 21.33-46; Luk 20.9-19
1La Jesu ja gɨ a jaa na lar, ər ja ɓə: «Ɓər paa waay damnar, ər yeri sul na jal. Ər kaw un tɨ damnar kurbu la ər kaw ko̰ygɨ baw tɨ waal ɓaw la. Lɔ tɨ plaa, ər nɨm gɨ bi tɨ damnar wal ɓaw, ər ja gɨ a ər ɓə gɨ a damnar ji taal naa, la ər ɗo ər sul ər si tɨ ɓoy. 2Na pya̰ sul tɨ damnar ɓina, ər toon ər wo tɨ cida ɓudu tɨ bi tɨ damnar waay ndɔ tɨ ər damnar kula. 3Lɛ a par wo tɨ tomni a ɗɨb ər la a kun ər daa bla. 4Duga damnar Baali ton wo tɨ ndidi mani, a ɗɨb ər kuna paa ne toni la, a ɓurum ər la. 5Baali ton gɨ a wo tɨ tedi mani, a hun ər la, a hun tapeer dɨbla la, a ɗɨb tapeer la, a hun tapeer la. 6Wo ɓudu ne gə̰y tɨ ər ndɔ tɨ ər ɓa̰ ne ər ka ər kum nari. Ər toon ər lɔ tɨ plaa la, ər ilgɨ ɓə: “Tɔteni a ɓə gɨ ər ɓa̰ oy.” 7Le bi tɨ damnar way ja gɨ peer: “tɨ ɓa̰ tɨ ndoogɨ tudi jo le! Ka i hina i hun ər, nɨ ndoogɨ gə̰y gɨ i!” 8A par ɓa̰ a hun ər la a ɗoli ər ulu tɨ damnar jal ɓəgri. 9Jesu ɓiri a, kəyjo damnar Baali ɓə kar a? Ər wo hina, ər wo bi tɨ damnar way humna la ər ɓə ər damnar waal gɨ bi jak naa. 10Pay yḭ edɨ jaa ne tɨ Ndɨla maktub hul lo a? “Kura ne bi tɨ li kay ɗoli duga tɨ kura ndinimani tɨ li jaal sul#12.10 Psa 118.22-23.” 11Nejo tɨ Baali tɨ Ndɨla na cida tɨ kar, tɨ wa̰y ne ɓɔrji!» 12Juyb-a na woom taam ul tɨ Jesu par kəysul a una ɓari ɓə Jesu ja jaa lar ne tuna a sul lɛ a oy gɨ bi. A nɨm ər lɛ, a ɗo a sul a si.
Jaa ne tuna lambo sul
Mat 22.15-22; Luk 20.20-26
13Juyb woom toon Parisyḛ-a la, Erod na bi la, tɨ Jesu ndɔ tɨ ər sangni tɨ ər ja sul. 14A hina a ja gɨ ər ɓə: «Wo tɨ wa̰y ɓla, yini una əm jaa tɨ ja tɨ kuri, əm oy bi ilgɨ lo la, əm nɨm wo nɨ ɗol tɨ əm sul lo la. Wo in ji ka əm kaar lo la, lɛ əm ɓla gɨ bi ul kuri tɨ Ndɨla maan. Əm ja gɨ i, yini na ul mu tɨ gɨ Sesar lambo naa ɓee gɨ ər naa lo a?» 15Lɛ Jesu una a ɓura la ər ja gɨ a: «Kəyjaa i sang ən a? Yḭ hina gɨ ən na sile ka ən ləg.» 16A hina gɨ ər na sile ɓudu la ər ɓiri a: «wo sul ne la, ndil ne la tɨ ja maan a?» A duga gɨ ər: «Tɨ Sesar maan.» 17Lɛ Jesu duga gɨ a: «Yḭ naa gɨ Sejar wa̰y ne tɨ Sesar maan la i na gɨ Ndɨla wa̰y ne tɨ Ndɨla maan la.» Ər jaa tɨ ja ɓɔr a ji.
Bi tɨ ulu na wag tɨ ngalɨm
Mat 22.23-33; Luk 20.27-40
18Sadusḛ-a tapeer hina tɨ Jesu ndɔ. Bi ne ja ɓə bi ɓə wag tɨ ngalɨm lo. A ɓiri Jesu ja kuna paa ne: 19«Baali, Moys kya̰ gɨ i gṵ hul ne: “Jo wo ɓər uy nɨm ər ii bla ɓa̰, ər ɓun ɓə ər ii kula na ɓa̰ tuyla tɨ ər kalɔ.” 20Peer ɓungɨ kili wo nin, ne toni mani ko ii lɛ ər uy bla ɓa̰ 21Ne tɨ ndidi mani so ər ii tɨ ər gor. Yḭr kaw ər uy bla ɓa̰. Ne tɨ tedi mani uy kuna ər peer la. 22A ji kili gun a uy bla ɓa̰. Lɔ tɨ plaa, ii kaaw uy la. 23Ɗa̰y ne bi tɨ ulu ɓə wag tɨ ngalɨm, ii ne ɓə tɨm ja na ii a? Kəysul peer ɓungɨ kili gun ko ər!» 24Jesu duga gɨ a: «Yḭ una wa̰y lo kəysul yḭ una Ndɨla jaa lo la Ndɨla dwari lo la. 25Gorne bi tɨ ulu ɓə wag tɨ ngalɨm gɨna, a ɓə peer kula cam lo. Lɛ a ɓə tɨm kuna malayka-a tɨ ndɨlasul. 26Tɨ jaa ne tuna bi na wag tɨ ngalɨm sul, i edɨ tɨ Moys na maktub hul ne ja jaa tuna laa ne ko tɨ ɔri daan lo a? Ndɨla ja gɨ ər jaa ɓə: “Yin tɨ Abraham na Ndɨla la, tɨ Isak na Ndɨla la, tɨ Jakob na Ndɨla la.”» 27Jesu ja gɨ a cam: «Ndɨla tɨ Ndɨla tɨ bi tɨ ulu maan lo, lɛ tɨ Ndɨla tɨ bi jili maan. Kuna ne, yḭ wa̰y tɨ una teni marway.»
Ndɨla gṵ na ne toni maani
Mat 22.34-40; Luk 10.25-28
28Wo tɨ gṵ hul ɓla paa laa a paa gaglə la Jesu na Jaa Ndinimani ne duga gɨ a gɨna, ər kori tɨ a ndɔ ər ɓiri a ɓə: «Kəy gṵ hul jo ura peer gun a?» 29Jesu duga gɨ ər: «Gṵ hul ne toni maani jo le: “Israhel na ɓimi, yḭ laa ɓari, Ndɨla i Baali tɨ Baali ɓudu, 30əm ɓə əm Baali Ndɨla kumkar na əm hul ɓudu, na əm ndo̰yngɨ gun la, na əm ilgɨ gun la, na əm dwari gun la.” 31Ne tɨ ndidi mani jo le: “Əm ɓə əm paa kum kar kuna əm ndɔ la.” Gṵ hul ne hura ya̰ ton tɨ ndidi ne in teni.» 32Wo tɨ gṵ hul ɓla ja gɨ ər: «Ndini nari, wo tɨ wa̰y ɓla, əm jaa tɨ ja kuri: Ər tɨ ɓudu kam lag-lag, Ndɨla paa jak in teni. Ndɨla paa jak kuna yḭr in teni. 33Ja kaw ɓə Ndɨla kumkar na ər hul ɓudu la, na ər ilgɨ gun la, na ər dwari la, ər ɓə ər paa kum kar kuna yḭr mar la. Nejo hura mum gun ne i naa gɨ Ndɨla la hima tɨ ɓina la.» 34Jesu ləg gorne ər duga gɨ ər jaa ne na jicina gɨna, Jesu duga gɨ ər: «Əm ti ɓag na Ndɨla waan lo.» Tɨ un ne wo lɛm ər jaa ɓiri cam lo.
Jaa tuna mesi la Dabid la sul
Mat 22.42-46; Luk 20.41-44
35Gorne Jesu wo wa̰y ɓla tɨ Ndɨla li hul, ər ɓiri jaa ne: «Ka waa bi tɨ gṵ hul ɓla ɓə ja ɓə Krist wo ne Ndɨla ɛr tɨ Dabid na ɓa̰ a? 36Dabid may ja jaa na Ndɨla lal dwari ɓə:
“Baali ja gɨ ən Baali:
Hina əm ti tɨ ən lɨma sul marway
ən ɓə əm peer pɛni kay tɨ əm ɗa̰y lɔ.”
37Jo Dabid may soon ər “Baali”, ka waa ta ər ɓə tɨm ər ɓa̰ a?» Bi dɨbla laa Jesu jaa ne na ndula lar.
Jesu tung jaa tɨ bi tɨ gṵ hul ɓla sul
Mat 23.1-36; Luk 20.45-47
38Dabra Jesu ɓla gɨ a wa̰y kuna ne: «Yḭ kay i jicina tɨ i ndɔ sul tuna bi tɨ gṵ hul ɓla. A kakum tɨ sərgɨ nii wurum la a taam ɓə ka bi ka gɨ a lapya tɨ un tɨ paa tina na hormo̰ la, ta a taam tɨm tɨ bi kwi tɨ Juyb-a li tɨ paa tina hul ta tɨm tɨ wa̰y tudi mu la. 39A taam tɨm tɨ goblə ndinimani sul tɨ bi kwi tɨ Juyb-a na li tɨ paa tina hul, la tɨm tɨ wa̰y tudi mu la. 40A ko mum dɨbla tɨ aa tɨ ndirimu daa, la a soon Ndɨla na jaa ɓududu tɨ a mu. Ndɨla ɓə jaa tungni tɨ a sul na sɨgra.»
Ii tɨ ndrimu na wa̰y naa
Luk 21.1-4
41Gorne Jesu ti ndog na sanduk tɨ gursu bɛ tɨ Ndɨla li hul gɨna, ər ləg bi gun ne bɛ gursu. Bi tɨ mum tina dɨbla bɛ a gursu dɨbla tɨ sanduk ne hul. 42Gorne ii tɨ ndrimu paa hina, ər bɛ sile ɓḭ tɨ ndidi gɨna, 43Jesu soon ər bi tɨ wa̰y edɨ la ər ja gɨ a: «Ən ja gɨ i tɨ bayri, ii ndrimu ne bɛ gursu ura bi gun tɨ sanduk hul. 44Kəysul bi gun jul a wa̰y tɨ tina taal jo a bɛ tɨ bra̰ hul lɛ ii tɨ ndemni ne gɨna, ər naa gursu gun ne tɨ ər mu tɨ tudi.»
বর্তমানে নির্বাচিত:
Mark 12: nie
হাইলাইট
শেয়ার
কপি
Want to have your highlights saved across all your devices? Sign up or sign in
© 2023, ATALTRAB
