Матвей 7
7
Илядо чумондо
1«Киньгак илядо судя, сестэ тынсенккак Пазось а судятадызь. 2Эдь кодамо судсо лиятнень судятадо, тынсенккак Пазось истямосо судятадызь. Кодамо онкссо онкстатадо, истямосо тыненккак онкстазь ули. 3Кода тон сардыненть несак малавиксэть сельместэ, бути эсеть сельместэ чочконть а редясак? 4Кода мереват малавиксэть туртов: “Эрьга, таргаса сельместэть сардыненть”, а вана теке шкастонть тонсеть сельмесэ чочко? 5Чачонь полавтниця! Таргик васняяк эсеть сельместэ чочконть ды сестэ несак, кода таргамс малавиксэть сельместэ сардыненть.
6Пазнэнь алтазенть илядо максне пиненень, – пинетне каявить лангозонк ды сезнетядызь. Питней ведьэрьгеть илядо кайсе туво икелев, – тувотне шешксызь сынст пильгест алов».
Вешеде, вешнеде, вачкоеде
7«Вешеде ды максозь ули тенк; вешнеде ды мутадо; вачкоеде ды панжить тенк. 8Эдь эрьва вешицянтень – максови; вешницясь – муи; вачкоицянтень – панжозь ули. 9Арази муеви тынк ютксто истямо ломань, конась, зярдо цёразо веши кедьстэнзэ кши – максы тензэ кев? 10Эли зярдо цёразо веши кал – максы тензэ гуй? 11Бути натой тыньгак, берянь ломанть, машттадо эсь эйкакшонк туртов вадря казнень макснеме, нама, менелень Тетянк седеяк максы вадря казнеть сетненень, кить вешить кедьстэнзэ! 12Тееде ломантнень туртов весемесэ истя, кода, тынк меленк коряс, эряви теемс тенст эсенк туртов. Теньсэ Моисеень Коенть ды пазмарицянь тонавтоматнень зэмест-смустест#7:12 зэме – суть».
Теине орта
13«Совадо теине ортава. Ламот ютыть келей ортава ды шожда киява, конат ветить пингеде пингень куломас-ёмамос. 14Кодамо теине ортась ды стака се кись, конат ветить эрямос, ды ансяк аламотне мукшносызь сынст!»
Чувтось содави умарьга
15«Ванстодо прянк кенгелиця пазмарицятнеде. Сынь тыненк сакшныть сэтьме ревекс, ансяк сынст потмост – азарсь верьгизэнь. 16Тынь сынст содасынк тевест кувалт. А кочксить кодоркс куракшсто винаумарть#7:16 винаумарь – виноград (плод) эли кирмалавсто инжирт. 17Истя, эрьва паро чувтось чачты паро умарть, ды берянь чувтось чачты амаштовикс умарть. 18Паро чувтонтень берянь умарть а чачтовить, берянь чувтонтеньгак паро умарть а чачтовить. 19Эрьва чувтонть, кона паро умарть а чачты, керясызь ды толс каясызь. 20Истя тевест кувалт тынь содасынк сынсткак.
21Аволь эрьвась, кона Монень мери: “Азоро, Азоро!” – сови Менельсэнть Инязорксчинтень. Сови ансяк се, кона топавты менелень Тетянть мелензэ. 22Судонь чистэнть ламотне Монень мерить: “Азоро, Азоро! Эдь Тонь лемсэ минь ёвтнинек Пазонь кулянть. Истя жо Тонь лемсэ ломантнестэ пансинек идемевстнень ды тейнинек ламо лия покш тевть”. 23Сестэ Мон видьстэ мерян сыненст: “Мон тынк зярдояк а содылидизь. Оргодеде Монь эйстэ, зыянонь тейницят!”»
Кавто кудоюрт
24«Кие кунсолы неть Монь валтнэнь ды топавты эйсэст, се вейкетстяви превей ломань марто, кона путызе кудонзо кевень юр лангс. 25Тусь пиземе, лейтнеяк тусть ланга чудеме, варматнеяк пувасть ды вачкодевсть се кудонть эйс, ансяк сон эзь каладо, секс мекс путозель кевень юр лангс. 26А вана кие кунсолы неть Монь валтнэнь ды ялатеке а топавты эйсэст, се вейкетстяви превтеме ломань марто, кона путызе кудонзо чувар лангс. 27Тусь пиземе, лейтнеяк тусть ланга чудеме, варматнеяк пувасть ды вачкодевсть се кудонть эйс. Ды кудось допрок каладсь».
28Зярдо Иисус прядынзе неть валтнэнь, ломантне дивсесть Сонзэ тонавтомантень. 29Сон тонавтсь эйсэст кода се, конань ули азорксчизэ, аволь кода Койс тонавтыцятне ды фарисейтне.
বর্তমানে নির্বাচিত:
Матвей 7: ОВ
হাইলাইট
শেয়ার
কপি
Want to have your highlights saved across all your devices? Sign up or sign in
© Библиянь ютавтомань институтось,
Хельсинки 2006
