Матвей 6
6
Арасьчисэнень лездамодо
1«Ванодо, илядо максне арасьчисэнень лезкске ломанень сельме икеле, ансяк кода невтемань кисэ. Истя теиндерятадо, сестэ а ули тенк казне менелень Тетянк пельде.
2Секскак, зярдо тон лездат арасьчисэнень, иля гайге теде прок баяга, кода тейнить чачонь полавтницятне#6:2 чачонь полавтниця – лицемер синагогасо ды ошкужосо, ломанень пельде пряст шнавтомга. Видестэ кортан тенк: истямо ладсо сыненст уш педе пес питнесь пандозь. 3Зярдо тон максат лезкске арасьчисэнень, сестэ кадык керш кедетькак а соды, мезе теи витесь, 4кадык тонь лезкскесь тееви салава. Сестэ тонь Тетясь, кона несы сеньгак, мезе тееви салава, пандсы тонь питнеть неемга».
Озномадо
5«Зярдо ознат, иля уле чачонь полавтницятнень кондямокс, конат вечкить синагогасо ды ульця улосо озномо, ломантненень пряст невтемга. Видестэ кортан тенк: сыненст уш педе пес питнесь пандозь. 6Тон, зярдо ознат, совак эсеть икельце кудос, пекстык кенкшенть ды ознок эсь а неявиця Тетянтень. Сестэ тонь Тетясь, кона несы сеньгак, мезе тееви салава, пандсы теть неемга.
7Озномсто чаво валт илядо лавга виде Пазонь а содыцятнень ладсо. Сынь арсить, бути ламо валсо ознат, седе курок марятанзат Пазось. 8Илядо уле сынст кондямокс. Эдь Тетянк уш кедьстэнзэ вешемадонк икеле соды, мезе тенк эряви. 9Тынь ознодо вана истя:
Менелень минек Тетянок!
Иневаньксэкс улезэ Тонь леметь.
10Сазо Тонь Инязорксчить.
Топавтовост Тонь мелеть-арсемат
масторлангсояк, кода менельсэ.
11Максыкая миненек течи эрявикс кшинек-салонок.
12Нолдыть минек теевть пежетенек,
кода миньгак нолдтнетяно минек икеле чумосотненень.
13Илямизь нолда снартнемас-варчавтнемас,
мекевланк – менстямизь Апародонть,
эдь Тонь ули Инязорксчись, виеськак, шнамоськак
пингеде пингес. Аминь.
14Бути карматадо лия ломантненень нолдтнеме-простямо сынст чумост-тапавксост, сестэ менелень Тетянк тынккак чумонк нолдасынзе-простясынзе. 15Бути а карматадо нолдтнеме лиятненень сынст чумост-тапавксост, сестэ Тетянк тынксетненьгак а нолдасынзе».
Постовамодо
16«Истя жо, зярдо кирдтядо пост, илядо невте прянк нусманякс, кода чачонь полавтницятне. Сынь постонь кирдемаст весенень невтемань кисэ чамаст сумборьгавтнесызь. Видестэ кортан тенк: сыненст уш педе пес пандозь питнесь. 17А вана тон постонь кирдемстэ прят судрик, чаматкак шлик. 18Сестэ тонь постонь кирдемадо карми содамо ансяк а неявиця Тетят, аволь ломанть. Ды тонь Тетясь, кона несы сеньгак, мезе тееви салава, пандсы питнеть неемга».
Пазось ды сюпавчись
19«Илядо пурна эстенк сюпавчи масторлангсо, косо ки суксоськак сэви, чеменеськак кери, косо салыцятнеяк кудос совсить саламо. 20Мекевланк – пурнадо эстенк сюпавчи менель лангов, косо ки суксоськак а сэви, чеменеськак а кери, косо салыцятнеяк а совавить саламо. 21Эдь косо сюпавчинк, тосо карми улеме седеенккак.
22Сельметне рунгонть туртов валдонь максыцят. Секскак улиндеряйть сельметь шумбрат, сестэ весе рунготкак ули пештязь валдосо. 23Улиндеряйть сельметне сэредицят, сестэ весе рунготкак ули пештязь чоподасо. Истя, бути валдось, конась тонь эйсэ, ули чоподакс, сестэ кодамо покш тандавкс те чоподась!
24Кияк кавто азорнэнь а важодеви. Бути снартсы тень теемс, сестэ сон вейкенть карми вечкеме, омбоценть сельмесэ а нееме. Бути вейкенень карми савтомо, омбоцестэнть карми прянзо велявтомо. Тыньгак ве шкасто а важодевтядо Пазонтень ды ярмактненень».
Пазонь кедь лангсо
25«Секскак кортан тыненк: илядо мелявто эрямонк кисэ, мезде тенк ярсамс эли мезде симемс, ды рунгонк кисэяк, мезе тенк оршамс. Эдь эрямось – ярсамопельде питней ды рунгоськак – оршамопельде питней. 26Варштадо менелень нармунтнень лангс: сынь а видить, а нуить, утомскак а пурныть. Ялатеке Менелень Тетянк сынст три-ваны. Арази тынь аволь седе питнейть нармунтнень коряс? 27Кинень тынк ютксто, пек мелявтозьгак, кувалгавтови эсь эрямозо куш ве кенерешкас? 28Ды оршамонь кисэ мекс мелявтомс? Варштадо паксянь цецятнень лангс, кода сынь касыть: а штердить, а кодыть. 29Ялатеке кортан тенк: Соломон инязороськак, эсь сюпавчинь сияждомасонзо, истя эзь оршне, кода эрьвась сынст эйстэ. 30Бути Пазось истя мазыйстэ оршавты паксянь тикшенть, кона течи касы, ванды жо ули ёртозь каштомонь толс, сестэ, нама, Сон тынк седеяк парсте оршатадызь! Вай, кода аламо тынк кемеманк! 31Секскак, илядо мелявто: “Мезде миненек ярсамс?”, эли “Мезде симемс?”, эли “Мейсэ оршамс?” 32Тень эйстэ мелявтыть Паздо а содыцятне. Эдь менелень Тетянк соды: те весе тыненк эряви. 33Мекевланк – весемеде пек вешнеде Пазонь Инязорксчинть ды Сонзэ мелензэ топавтоманть, ды сестэ те весемеськак тыненк максови. 34Истя эно, тынь илядо мелявто вандынь чинть кисэ. Вандынь чинть сонсензэ мелявксонзо. Эрьва чинть сатыть эсь мелявксонзо».
বর্তমানে নির্বাচিত:
Матвей 6: ОВ
হাইলাইট
শেয়ার
কপি
Want to have your highlights saved across all your devices? Sign up or sign in
© Библиянь ютавтомань институтось,
Хельсинки 2006
