Mata 21

Yɛsu Lǝkwa Ursalima apa Kuhyi

(Mar 11:1-11; Luk 19:28-40; Yaw 12:12-19)

1Sakatǝ dar si kudzǝghɛ aka Ursalima ba dar ka si akwa Baithfadzi ata Payar Zaitun, Yɛsu ka hyanuba ndzǝr nuwɛ yarɛ sǝɗɛ, 2dzǝ nkǝrɛ ala dar, “Mwaramɛ akwa mǝlmǝ nam akǝma gǝri, ba gǝri ata ɓui kwara ada mbwai akwanda, aka zǝrǝrni ada hyati adzǝni. Mpǝli tǝ dar ka gǝri si aka dar alai. 3Ma kǝlara ndǝ nkǝr sǝ laka ala gǝri, nkǝrɛ mɛ alari apǝri, Thlaku ani ada bara tǝ dar, ba dzǝ ata ɓakta si aka dar kura aka santa saka.”

4Sǝ ǝni kǝ 'ya akuya ghǝiyaba sǝ nam tǝ ndǝ tara nkǝrɛ atar nabi ni:

5 # Zak 9:9 “Ka gǝri nkǝrɛ ala nkwar Zayaun,

‘Wuti, kuhyir ngɛ ata si adzǝ ngɛ,

Aka kanadi ba ada mwari ata kwara,

ata kusta, zǝr kwara ni.’ ”

6Ndzǝr nu ni ka mwari ka 'ya tsu apa tǝ Yɛsu tara nkǝrɛ ala dar. 7Dar ka si aka kwara ni aka kusta ni, dar ka puti lǝkutǝr dar yarɛ ata hǝiya dar, ba Yɛsu fǝlti ka ndzai ata dar. 8Ndzǝ hang ka sǝsǝnta lǝkutǝr dar ata kǝra whalɛ, laka ndzǝ tsuwɛ ada ɓǝgǝli tsiya fwɛ yarɛ ka puputi tǝ dar ata kǝra whalɛ. 9#Zab 118:25,26Hangkur ndzǝ ni nam ada mwari akǝma Yɛsu ba ndzǝ nam aghǝlari ni ada haɓǝti kuɗahu,

“Hausana#21:9 Hausana akwa nyar Ibrahim ani “Mbati!” nam tara siya ndzai whalǝr hǝmɛ; tsuwɛ akwa vǝrsu 15 ala Zǝr Dauda!”

“Barka aka ndǝ nam ada si akwa thlǝma Thlaku!”

“Hausana ala Hyal nam ati ta sang!”

10Sakatǝ Yɛsu tara lǝkwa Ursalima, sanga ndzǝr kuta mǝlmɛ kǝ ndatǝdzi, ba dar ada yuwɛ, “Wa ǝni?”

11Hangkur ndzǝ ni sǝnau, “Əni ani Yɛsu, nabi ni nam tara hyati akwa Nazarat akwa diyir Galili.”

Yɛsu akwa Fǝr Hyal ni

(Mar 11:15-19; Luk 19:45-48; Yaw 2:13-22)

12Yɛsu lǝkwa babalǝr fǝr Hyal ka kǝdlǝba sanga ndzǝ nam ada ɗǝlba ba ɗǝlnta akwanda. Dzǝ ka mbuti tɛbǝr yarɛ nǝr ndzǝr pali kwapa yarɛ ba vui ndzaiyir ndzǝ nam ada ɗǝlnta kǝtǝpǝr yarɛ. 13#Isa 56:7; Iri 7:11Dzǝ ka nkǝrɛ ala dar, “Rǝbwa-rǝbwa, ‘Ndɛ ata kǝga kǝiyirna aka kǝiyir aduwa,’ ama gǝri ada mǝrti tǝni ‘dlǝma nǝr ndzǝr fa whalɛ.’”

14Ndzǝ nam ghyang ba ndzǝ nam ngurngudi ka si adzǝni akwa fǝr Hyal ni, ba dzǝ ka mbǝti tǝ dar. 15Ama sakatǝ nggar fǝrist yarni ba malǝmǝr mabari yarni tara wula sǝr ndati yarɛ tǝ dzǝ 'yati ba madausai ni ada haɓǝti kuɗahu akwa babal fǝr Hyal ni, “Hausana ala Zǝr Dauda.” Ɗǝfa dar ka mbutǝdzi.

16 # Zab 8:2 Dar ka yu tǝni. “Gɛ ada ngati sǝ nam tǝ madausai yarni ada gha?”

Yɛsu ka sǝnau, “A, gǝri ta saga kǝratsǝni wɛ,

“ ‘Akwa nya madausai, ba mbǝghyiwa yarɛ

tǝ gǝ hau ka dar hǝmɛ tǝngɛ’?”

17Ba dzǝ ka ngyar tǝ dar ka tǝra lǝba ka ngyar mǝlmɛ ni ka mwari akwa Baitanya, vui nam tǝ dzǝ pi.

Fur Kanda ni Ɓulantadzi

(Mar 11:12-14)

18Sǝbar arpɛ kula-kula mbǝk, apa tǝ dzǝ ata whalɛ aghǝla si akwa kuta mǝlmɛ ni, mi ka kal tǝni. 19Sakatǝ dzǝ tara wula fur kanda ata nya whalɛ, dzǝ ka mwara lǝkur fwu ni ama dzǝ ta ɓui mima ati wɛ ɗiɗi thlali yarɛ. Antǝ dzǝ ka nkǝrɛ ala fwu ni, “Gɛ adi ata ya munya kadamwa kǝra wɛ!” Tǝkǝma fu ni ka ɓulantadzi.

20Sakatǝ ndzǝr nuwurni tara wula ǝni dar ka ndatǝdzi. Dar ka yuwɛ, “Mǝmi tǝ fu ni ɓuli bǝtǝbǝtu ahani?”

21 # Mat 17:20; 1Kwa 13:2 Yɛsu ka sǝnau, “Yi ada gha ala gǝri dzǝri, ma gǝri aka hamnta dzǝri ba kura gǝri aka dzamɛ akwa ɗǝfa gǝri, adi ɗiɗi sǝ nam tara 'ya ala fur kanda ni ani tǝ gǝri ata mǝrti wɛ, ama tsuwɛ gǝri ata nkǝrɛ ala paya ǝni, ‘Mwari ka gǝ ɗalu kǝrngɛ akwa manda ni,’ ba ndǝ ata 'yati apani. 22Ma gǝri mbǝrsa, gǝri ata dlutsi kǝlara sǝ nam tǝ gǝri yuwɛ akwa aduwa.”

Yuwɛ ata Kǝra Dǝnar Yɛsu

(Mar 11:27-33; Luk 20:1-8)

23Yɛsu lǝkwa babalǝr fǝr Hyal, ba, sakatǝ dzǝ ada hyipɛ, nggar fǝrist yarni ba ndzǝ nam ngga-ngga yarɛ ka si adzǝni. Dar ka yuwɛ, “Aka wada madi tǝ gǝ ada 'ya sǝ yarɛ ǝni? Ba wa la gǝ dǝna ǝni?”

24Yɛsu ka sǝnau, “Yi ata yu tǝ gǝri sǝr yuwɛ pathlu tsuwɛ. Ma gǝri sǝnau alai, Yi ata gha ala gǝri aka wada madi tǝ Yi ada 'ya sǝ yarɛ ǝni. 25Bamtizǝma Yawhana—ada si amarɛ? Hyati atahyal kǝna adzǝ ndzɛ?”

Dar ka 'ya kampiku kaka kǝma dar ba dar ka nkǝrɛ, “Ma muri nkǝrɛ, ‘Hyati atahyal,’ dzǝ ata yuwɛ, ‘Antǝ kami kura gǝri awa mbǝrsa aka dza?’ 26Ama ma muri gha, ‘Adzǝ ndzi’—muri ada hyivǝr ndzǝ ni, akuya dar sang kǝtǝ apǝri Yawhana dzǝ nabi.”

27Ani dar ka sǝnau ala Yɛsu, “Yar ta zǝndi wɛ.”

Antǝ dzǝ ka nkǝrɛ, “Yi adi ata gha ala gǝri aka wada madi tǝ Yi ada 'ya sǝ yarɛ ǝni wɛ.

Karabu ata Kǝra Madar Sǝɗǝ ni

28“Mǝ tǝ gǝri ada ɗǝnga? Ndɛ laka adai nam aka madar sǝli sǝɗɛ. Dzǝ ka mwari adzǝ nam kǝmani ka nkǝrɛ, ‘Zǝrna mwari ka gǝ lǝka 'ya kǝthlǝr akwa fwaku asǝna.’

29“Dzǝ ka sǝnau, ‘Yi adi ata mwari wɛ,’ ama saka laka dzǝ ka pali ɗǝngar ni dzǝ ka mwari.

30“Antǝ tada ni ka mwari adzǝ zǝr damwa ni ka nkǝrɛ su tsu apani. Dzǝ ka sǝnau, ‘Yi ata mwari, Thlaku,’ ama dzǝ ta mwari wɛ.

31“Madi akwa ntsa dar sǝɗǝ ni tara 'ya sǝ nam tǝ tada dar ni tara bara?”

Dar ka sǝnau, “Nam kǝmani.”

Yɛsu ka nkǝrɛ ala dar, “Yi ada gha ala gǝri dzǝri, ndzǝr dlu tsǝmɛ kaka zawar yarni ata lǝkwa kuhyikur Hyal kǝma ta gǝri. 32#Luk 3:12; 7:29,30Akuya Yawhana Ndǝr 'Ya Bamtizǝma kǝ si adzǝ gǝri ka tsanti ala gǝri whalɛ nǝr kalkalkur, ba gǝri ta mbǝrsa aka dza wɛ, ama ndzǝr dlu tsǝmɛ ba zawar yarni dar mbǝrsa. Ba wala aghǝla tǝ gǝri tara wula ǝni, gǝri ta tubi ba mbǝrsa aka dza wɛ.

Karabu ata Kǝra Ndzǝr Tsǝwhɛ ni

(Mar 12:1-12; Luk 20:9-19)

33 # Isa 5:1,2 “Siyamɛ thlǝmɛ ala karabu damwa: Thlakǝr dai laka adai nam tara thlǝkati fwaku. Dzǝ ka tsakǝr garu, ka laba kawur ɓǝtsǝ yimǝr inabi akwa ba dzǝ tsati fǝr sǝkɛ. Antǝ dzǝ ka la fwaku ni ala ndzǝr tsǝwhɛ laka yarɛ akuya ka agǝri ba dzǝ ka tǝrarni akwa buraburá. 34Sakatǝ sakar ɗǝm munyar fwɛ ni tara 'ya, dzǝ ka hyanti madar kǝiyirni yarɛ ala ndzǝ nam tara kǝl fwaku ka agǝri ni ka dar dlutsi alari bwarni akwa munyar fwɛ ni.

35“Ndzǝ tara kǝl fwaku yarni ka ngǝti madar kǝiyirni yarni; dar dlaɓu ndǝ pathlu, dar tsai dukwa dar, ba dar ɗigal ndɛ nǝr makǝrkur aka paya. 36Antǝ dzǝ hyanti madar kǝiyirni yarɛ damwa ala dar, hang ta nǝr kǝmani, ba ndzǝr kǝl fwaku yarni 'yati ala dar tsu apa ǝnda. 37Ata dǝnta, dzǝ hyanti zǝrǝrni ala dar. Dzǝ ka nkǝrɛ, ‘Dar ata nga sǝlaiyir zǝrna.’

38“Ama sakatǝ ndzǝr kǝl fwaku ka agǝri yarni tara wula zǝr ni, dar nkǝrɛ ala kǝma dar, ‘Əni ani ndǝr sǝm wartari. Azǝramɛ, ka mur tsi tǝni ka mur sǝnya wartarni.’ 39Ani dar ka kǝtǝ tǝni ka ɗalba asǝba ngyar fwaku ni ba dar ka tsi tǝni.

40“Kadǝbar ǝni, sakatǝ thlakǝr fwaku ni si, mǝ tǝ dzǝ ata 'ya ala ndzǝ tara kǝl fwaku ka agǝri yarɛ ni?”

41Dar ka sǝnau, “Dzǝ ata tsai ndzǝ kulɗa yarni akwa whal nam kulɗa, ba dzǝ ata hamnta fwaku ni ala ndzǝ damwa yarɛ nam ata si akǝri alari bwarni nǝr munyar fwaku ni ata sakari.”

42 # Zab 118:22,23 Yɛsu nkǝrɛ ala dar, “Gǝri ta saga kǝra akwa Labar Hyal wɛ:

“ ‘Paya nam tǝ ndzǝr tsa fǝr yarɛ tara ngǝla

kǝ siya ndzai payar kuɗǝma#21:42 Wala payar kuɗǝma. ni;

Thlaku ni dza 'yati ǝni,

ba kǝ ndzai sǝr ndati ata ntsa muri’?

43“Kadǝbar ǝni Yi ada gha ala gǝri apǝri kuhyikur Hyal ni ndǝ ata kǝlnta adzǝ gǝri ka la ndzǝ nam ata ya munya. 44Ndǝ nam tara dla ata paya ǝni dzǝ ata ɓǝgǝludzi ɗǝɗǝhyu, ama ndǝ nam tǝ paya ǝni ɗǝkǝr alari dzǝ ata ghyaɓuntadzi.”#21:44 Laka rǝbwa tsai yarɛ adi aka vǝrsu 44 wɛ.

45Sakatǝ nggar fǝrist yarni ba ndzǝr Farisi yarni tara ngati karabur Yɛsu ni, dar kǝ zǝndi apǝri dzǝ ada ndǝrɛ ata kǝra dar. 46Dar ka bara whal nam tǝ dar ata ngǝti tǝni, ama dar ada hyivǝr hangkur ndzǝ ni kadǝbar ndzǝ ni kǝtǝ apǝri dzǝ nabi.

বর্তমানে নির্বাচিত:

Mata 21: CKL

হাইলাইট

কপি