མ་ཏི། 7
7
བཱརའ་བ་ཀ་ཁྲིམས་མ་ཅཱད་ཅོ།
1བཱརའ་སོ་ངོ་བ་ཀ་ ཁྲིམས་མ་ཅཱད་ཅོ། ཉི་ན་ཧ་བ་བུ་ ཁྲིམས་མ་ཅཱད་པ། 2ཧང་ཡ་དག་ནེ་ལ་ ན་ཤི་བཱརའ་ག་ ཁྲིམས་ཅཱད་པ་པུརུས་ཀིན་ཨ་ཉི་ ན་ཧ་བུ་ ཁྲིམས་ཅཱད༌པེ། ཉི་ན་ཤི་ བཱརའ་ག་ཟེར་བ་པུརུས་ཀིན་ཨ་ཉི་ ན་ཧ་ཏཱན་བུ་ཟེར༌བེ།
3རང་ཏེན་ག་མིང་ནང་ཀ་ནུབ་ཁཱན་ ཤིང་ཕར་བ་མ་ཐོང་མཱན་ ན་ཧ་ཀོ་ཏ་ག་མིང་ག་ནུབ་ཁཱན་ཤུམ་ ཧང་ཏེན་ཨ་ཉི་ ཐོང་ཅ་ཡ། 4ཨུ་ཉུ་མ་ནེ་ལ་ རང་ཏེན་ག་ཤིང་ཕར་བ་ཐཱན་ཐཱན་ ན་ག་མིང་ག་ནུབ་ཁཱན་ཤུམ་ཁེ་པ་ ཇི་གི་ཤོན་བི་ལེ་ཨ་ཉི་ ན་ཤི་ ན་ཧ་ཀོ་ཏ་ག་ ཧང་ཏེན་ཡེག་པེ་རེ་བེ་ཡ། 5ནའི་འུ་དྲ་པ་བ་ གོ་རང་ རང་ཏེན་ག་ མིང་ནང་ཀ་ཆོ་ཁཱན་ ཤིང་ཕར་བ་ཤོན་གེམ༌ཤོ། ཉི་ཤ་ ན་ཧ་ཀོ་ཏ་ག་མིང་ག་ཆོ་ཁཱན་ ཤུམ་ཁེ་པ་ཤོན་གེ་མེ་དེན་གེ་ དང་སང་ཀིན་ཨ་ཉི་ ཐོང་མེ་རེ༌བེ།
6དམ་པ་ཆོ་ཁཱན་ཁེ་པ་ ཁུ་ག་མ་བི། ལག་ཏང་ རོག་ཏེ་བ་ཀི་ ཐེང་ཏ་གིར་ཐཱན་ ང་མེ་ཡང༌མེ། ཉི་མོ་ཏི་ཤོ་ ཕག་པ་ག་གུབ་ཀ་ཏཱན་ ཐུབ་མ་གེམ༌ཤོ། ཧང་ཡ་དག་ནེ་ལ་ ཕག་པ་གི་ མོ་ཏི་ཐུང་ཐུང་ བི་ཏབ་ཉི་རང་བུ༌ལེ། ཉི་རོག་ཏེ་བ་ཀི་ ལོག་ཉི་གིར་ཐཱན་ ན་ཧ་བ་ དུམ་པང་དུམ་པང་ཅོད༌པེ༎
ཕུན་ཤོ་ ལམ་ཤོ་ ཉི་ཀོ་ག་ཚབ་ཅོ།
7ཕུན་ཤོ་ ཉི་ན་ཤི་ཕུན་ཁཱན་ཁེ་པ་ ན་ཤི་ཉོང༌པེ། ལམ་ཤོ་ ན་ཤི་ཐོང༌མེ། ཉི་ཀོ་ག་ཚབ་ཅོ་ ན་ཧ་དེན་གེ་ཀོ་ཕེག༌པེ། 8ཕུན་ཁཱན་ཐམས་ཅན་གི་ ཉོང༌པེ། ལམ་ཁཱན་ཐམས་ཅན་གི་ ཐོང༌མེ། ཉི་ཀོ་ཚབ་ཁཱན་ ཐམས་ཅན་ག་དེན་གེ་ ཀོ་ཕེག༌པེ། 9ན་ཧ་པོང་ཀེ་ སོ་ངོ་ཐུར་ག་ཟ་གི་ ཀེབ་ཏང་ཕུན་མ་ཀབ་ཉི་ ཨོ་ཉ་ཨ་པ་གི་ རོ་ཀ་ཟ་ག་ལུང་བི་ལེ་སྨོ། 10ཨུ་ཉུ་མ་ནེ་ལ་ རོ་ཀི་ང་ཕུན་མ་ཀབ་ཉི་ རུ་གེ་ནང་བི་ལེ་སྨོ། 11ཉི་ནའི་ངན་པ་གི་ནེ་ཆང་ ན་ཧ་ཝག་ཙ་ག་ རྒྱུ་ལེག་པུ་བི་ལེ་སེ་ནེ་ལ་ ཞིང་ཁམས་ག་བཞུགས་ཁཱན་ ན་ཧ་ཡབ་གི་ རོ་ཀེ་ཞུ་ཁཱན་བ་ཀ་ ཨོ་ཉ་གེ་བུ་ལག་ཉི་ རྒྱུ་ལེག་པུ་བ་གནང༌མེ།
12ན་ཤི་བཱརའ་གེ་ ཧང་ཏེན་རེ་ཆ་ཨན་ཅ་གི་ལ་སྨོ་ ཨུ་ཉུ་པུརུས་ཀིན་ཨ་ཉི་རང་ ན་ཤི་བཱརའ་ག་དེན་གེ་ཨའི། ཨུ་ཐུ་ཤོ་ མོ་ས་ག་བཀའ་ཁྲིམས་དང་ ལུང་བསྟན་པ་བ་ཀི་ ཡེན་གནང་ཁཱན་བ་ཀ་ དེན་ཐ་གི༌ལ༎
སྒོ་རེ་ཁ་ཟེ་མུ་དང་ཆི་ལུ།
13སྒོ་རེ་ཁ་ཟེ་མུ་གེ་ནུབ་ཅོ། ཧང་ཡ་དག་ནེ་ལ་ སྒོ་རེ་ཁ་ཆི་ལུ་དང་ལམ་ཉམ་པུ་གི་ དམྱལ་བ་ག་ཏཱན་རིག༌ཅ། ཉི་ཨོ་ཉ་སྒོ་རེ་ཁ་དང་ ལམ་གེ་དང་ཁཱན་ སོ་ངོ་མང་པུ་ཐུར༌ཅ། 14ཉི་ཚེ་ག་རིག་ཁཱན་ སྒོ་རེ་ཁ་ཟེ་མུ་ཅ་ ཉི་ལམ་བུ་ཀ་ལུ་ཨུན༌ཅ། དག་པ་ཀབ་ཉི་ ཨུ་ཉུ་ཉོང་ཁཱན་ཤོ་ ཉུང་པུ་ཤ༌ཅ༎
ཤིང་དང་སེ།
15ལུང་བསྟན་པ་རྫུས་མ་བ་ཀེ་ རིག་པ་སྒྲིམ་ཉི་ཆོའི། རོག་ཏེ་བ་ཀི་ ཕིས་ཀེ་ཤི་ཤ་མོང་ནང་ཡེ་ཉི་ ན་ཧ་བཱརང་ཀ་ཨུན༌ཅ། དག་པ་ཀབ་ཉི་ ནང་ཀེ་ཨ་ཉི་ རོག་ཏེ་བ་ བི་ནང་ཁུ་ཉི་ ཡོང་ཁེ་སི་སི་ཨ་ཝ་ཆོ་ཁཱན་ བོ་རང་ཁུ་གི༌ལ། 16ན་ཤི་ རོག་ཏེ་བ་ རོག་ཏེ་བ་ཀ་སེ་ག་གོད་ཉི་ གུམ་ཡེ་ལེ་རེ༌བེ། ཧང་ཨང་གུར་སེ་ ཟུ་ཙོང་ནང་ཀེ་དུས་ཅ་སྨོ། ཨུ་ཉུ་མ་ནེ་ལ་ ཧང་ལྕོག་མ་སེ་ ཟུ་ཤིང་གེ་དུས་ཅ་སྨོ། 17ཨུ་ཉུ་པུརུས་ཀིན་ཨ་ཉི་ ཤིང་ལེག་པུ་གི་ སེ་ལེག་པུ་སེ༌ལེ། དག་པ་ཀབ་ཉི་ ཤིང་མ་ལེག་པ་གི་ སེ་མ་ལེག་པ་སེ༌ལེ། 18ཤིང་ལེག་པུ་གི་ སེ་མ་ལེག་པ་ སེ་ལེ་མར་བ། ཉི་ཤིང་མ་ལེག་པ་གི་ སེ་ལེག་པུ་ སེ་ལེ་མར་བ། 19སེ་མ་ལེག་པ་སེ་ཁཱན་ཤིང་ ཐམས་ཅན་རང་ ཅཱད་ཉི་གེམ་ཐཱན་ མི་ག་གོག་ཉི་གེམ༌ཅ། 20ཨུ་ཉུ་པུརུས་ཀིན་ཨ་ཉི་ ན་ཤི་ རོག་ཏེ་བ་ རོག་ཏེ་བ་ཀ་ སེ་ག་གོད་ཉི་ གུམ་ཡེ་ལེ་རེ༌བེ།
21ཇ་ག་ཏཱན་ གཙོ་བོ་ གཙོ་བོ་ཨ་ཉི་ར་ཁཱན་ ཐམས་ཅན་རང་ ཞིང་ཁམས་ག་རྒྱལ་སྲིད་ག་ ནུ་ཕེ་མར་བ། དག་པ་ཀབ་ཉི་ ཞིང་ཁམས་ག་བཞུགས་ཁཱན་ ཇ་ག་ཡབ་ག་ཐུགས་དང་ཏུ་ཉི་ ཨ་ཁཱན་བ་ཤ་ ཞིང་ཁམས་ག་རྒྱལ་སྲིད་ག་ ནུ་ཕེ་རེ༌བེ། 22ཨོ་ཉ་ནོང་ཀ་ མང་པུ་ཐུར་གི་ ཇ་ག་ཡེག་པེ་ གཙོ་བོ་ གཙོ་བོ་ ཨ་ཤི་ན་ག་མཚན་ག་ ལུང་མ་བསྟན་ཤི་སྨོ། ན་ག་མཚན་ག་ དོན་བ་མ་ཁོན་ཤི་སྨོ། ཉི་ན་ག་མཚན་ག་ རྫུ་འཕྲུལ་མང་པུ་ཐུར་ མ་ཨན་ཤི་སྨོ་དག༌ཉི། 23དག་པ་ཀབ་ཉི་ ཇི་གི་ རོག་ཏེ་བ་ཀ་ ཡེག་པེ་ ཇི་གི་ ན་ཧ་བ་ གུམ་ཡེ་ལུ་རང་མ་ཡེ༌ལ། ནའི་ལའི་ངན་པ་ཨ་ཁཱན་བ་ ཇང་གེ་ ལམ་རིང་མུ་ག་དི་དག༌ཉི༎
སོ་ངོ་མཁས་ཏྲ་དང་ཡོང་བ།
24ཨི་བི་གི་ ཇ་ག་ཨོ་ཐ་ཆཱས་ཉཱན་ཐཱན་ ཨུ་ཉུ་དང་ཏུ་ཉི་ཨ་ཝ་ཐུར་ ཨོ་ཉ་སོ་ངོ་ཤོ་ རོ་ཀ་ཕའི་ ལུང་ཆི་ལུ་ཐུང་ཀ་ཅོད་ཁཱན་ སོ་ངོ་མཁས་ཏྲ་ད་བུ་ཐུར་གི༌ལ། 25ངམ་སུ་ཁེ་ཉི་རོད་པ་ཨུ་ཉི་ ཉི་རི་དི་གི་ ཨོ་ཉ་ཕའི་ག་ཁེ་ལ་ཀབ་ཉི་ ཕའི་རོ་ཁེ་མ་དིན་ཤི། ཧང་ཡ་དག་ནེ་ལ་ ཨོ་ཉ་ཕའི་ག་རྨང་ ལུང་ཆི་ལུ་ཐུང་ཀ་ཆེ་ཝ་ཆོ་ཝ། 26དག་པ་ཀབ་ཉི་ ཇ་ག་ཨོ་ཐ་ཆཱས་ཉཱན་ཐཱན་ ཨུ་ཉུ་དང་ཏུ་ཉི་ མ་ཨ་ཁཱན་སོ་ངོ་ཤོ་ རོ་ཀ་ཕའི་བེ་ཙ་ཐུང་ཀ་ཅོད་ཁཱན་ སོ་ངོ་ཡོང་བ་ད་བུ་ཐུར་གི༌ལ། 27ངམ་སུ་ཁེ་ཉི་ རོད་པ་ཨུ་ཉི་ ཉི་རི་དི་གི་ ཨོ་ཉ་ཕའི་ག་ཁེ་ལ་ཀབ་ཉི་ ཕའི་རོ་ཁེ་ཇོང་ཉི་ ཤུག་ཐེ་བ་ཨ་ཉི་རང་ ཆེད་ཇོང༌མེ།
28ཡི་ཤུ་གི་ ཨོ་ཐ་བ་གསུངས་ཉི་ ཆུ་མ་ཀབ་ཉི་ སོ་ངོ་མང་ཨ་ཉི་ཆོ་ཁཱན་བ་ རོ་ཀི་ཡེ་ཁཱན་ག་གོད་ཉི་ གནམ་མེད་ས་མེད་ ཡིད་ཆི་ཝ༌ལ། 29ཧང་ཡ་དག་ནེ་ལ་ བཀའ་ཁྲིམས་ག་ སློབ་དཔོན་བ་ད་བུ་མང་གི་ཝ་ ཡི་ཤུ་གི་ རོ་ཀ་དབང་ཚད་དང་ཏུ་ཉི་ རོག་ཏེ་བ་ཀ་ ཡེན་གནང་མ་གི་ཝ༌ལ༎
বর্তমানে নির্বাচিত:
མ་ཏི། 7: TNTB
হাইলাইট
শেয়ার
কপি
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
