མ་ཏི། 12
12
ཡི་ཤུ་ཤོ་ དུས་བཟང་ག་ གཙོ་བོ་གི༌ལ།
1ཨུ་ཉུ་གང་ཀ་ དུས་བཟང་ག་ནོང་གི་ཝ་ཆོ་ཝ༌ལ། ཉི་ཨོ་ཉ་དུས་བཟང་ག་ནོང་ཀ་ ཡི་ཤུ་ བོང་ག་ཨུང་ནང་ཀེ་ཨ་ཉི་ ཤོ་ཉི་བྱོན་མ༌ལ། རོ་ཀ་སློ་མ་བ་ གསོལཝ་ཀིད་པ་ཨ་དེན་གེ་ བོང་ག་ནམ་ནང་ཕུད་ཐཱན་ ཁུ་ཤོ་ཉི་བཞེས་ཝ༌ལ། 2ཕ་རི་སི་པ་བ་ཀི་ ཐོང་མ་ཀབ་ཉི་ ཡི་ཤུ་ག་ཞུ་ཝ་ལ་ གཟིགས་ཅོ་ལེ་ ན་ག་སློ་མ་བ་ཀི་ དུས་བཟང་ག་ནོང་ཀ་ ཨ་ལེ་མ་ན་ཁཱན་ལའི་ཨ་ན་དག༌ཉི།
3ཡི་ཤུ་གི་ རོག་ཏེ་བ་ཀ་ གསུངས་མ་ལ་ ད་ཝུད་དང་ རོག་ཀབ་ཉི་ཆོ་ཁཱན་སོ་ངོ་བ་ བི་ནང་ཁུ་ལ་ཀབ་ཉི་ ད་ཝུད་གི་ ཧང་ཨ་ཝ་གི་ལ་སྨོ་ ཨོ་ཉ་ཀོར་གེ་ ན་ཤི་མ་ལྷག་ཅི་སྨོ། 4རོ་ཀི་དཀོན་མཆོག་ག་ ཕོ་བྲང་ནང་ཀ་ནུབ་ཐཱན་ དཀོན་མཆོག་ག་ཕུལ་ཁཱན་ ཚོགས་ཁེ་པ་ཟ་ཝ། མ་པ་ ཨོ་ཉ་ཚོགས་ཤོ་ བླ་མ་ཐུར་གི་མ་ཏོག་པ་ རོག་དང་རོ་ཀ་སོ་ངོ་བ་ཀི་ ཟ་ལེ་མ་ན་ཝ་ཐུར་ཆོ་ཝ། 5ཨུ་ཉུ་ཤ་མང་གི་ཝ་ དུས་བཟང་ག་ནོང་ཀ་ ལའི་ཨ་ལེ་ག་མ་ཆོག་ནེ་བུ་ བླ་མ་བ་ཀི་ མཆོད་ཁང་ག་ལའི་ཨན༌ཅ། ཨོ་ཉེ་རང་གི་ནེ་བུ་ རོག་ཏེ་བ་ ངཱད་པ་ཙི་ལུ་མཱན་ཅ་ཨ་ཉི་ བཀའ་ཁྲིམས་གེ་ཤོ་ཁཱན་ཁེ་པ་ ན་ཤི་མ་ལྷག་ཅི་སྨོ།
6ཇི་གི་ ན་ཧ་ཡེག་ཅ་ མཆོད་ཁང་གེ་ལག་ཉི་ཆི་ལུ་ཐུར་ ཨོ་ཐ་ག༌ཅ། 7གསུང་རབ་གེ་ ན་ཤི་མཆོད་པ་ཕུལ་ཁཱན་མང་གི་ཝ་ ན་ཤི་སྙིང་རྗེ་ཨ་ཁཱན་ ཇི་གི་ཤོ་ནང་ཕེན་ཅ་དག་ཉི་ ཤོ་ཁཱན་ཁེ་པ་ ན་ཤི་ཧ་གོ་ཝ་ཆོ་ནེ་ལ་ ན་ཤི་སོ་ངོ་དྲང་པུ་བ་ ཁྲིམས་མ་ཅཱད་པ་ཨོ་ཕེ། 8ཧང་ཡ་དག་ནེ་ལ་ སོ་ངོ་ག་ཟ་ཤོ་ དུས་བཟང་ག་ གཙོ་བོ་གི་ལ་དག༌ཉི༎
ག་དང་སང་ཁཱན་སོ་ངོ་ དྲག་གནང་མ༌ལ།
9ཉི་གེ་ རོག་ཆོས་འཛོམས་ག་ཏཱན་ བྱོན་མ༌ལ། 10ཉི་ཨོ་ཉ་ཆོས་འཛོམས་ནང་ཀ་ ག་དང་ལོག་ཐུར་སང་མ་ཨ་ཝ་ སོ་ངོ་ཐུར་ཅ་གི་ཝ༌ལ། ཡི་ཤུ་གེ་ཅོན་ལམ་ཉི་ ཕ་རི་སི་པ་བ་ཀི་ རོ་ཀ་ཞུ་ཝ་ལ་ དུས་བཟང་ག་ནོང་ཀ་ དྲག་པེ་ཆོག་པེ་སྨོ་དག༌ཉི།
11ཡི་ཤུ་གི་གསུངས་མ་ལ་ ན་ཧ་པོང་ཀེ་ སོ་ངོ་ཐུར་ག་ ཤི་ཤ་ཐུར་ཅ་གི་ཝ༌ལ། ཉི་དུས་བཟང་ག་ནོང་ཀ་ ཨོ་ཉ་ཤི་ཤ་ ཧོང་ཅི་ནང་ཀ་ རོ་ཁེ་ཇོང་ནེ་ལ་ དུས་བཟང་གི་ལ་ཨ་ཉི་ ཤི་ཤ་ཧོང་ཅི་ནང་ཀེ་ མ་ཤོ་ལཱན་ཐ་ལེ་སྨོ། 12སོ་ངོ་ཏ་ ཤི་ཤ་གེ་ལག་ཉི་ ཁག་ཆི་ལུ་མང་གི་སྨོ། ཨོ་ཉི་ཨ་དེན་གེ་ དུས་བཟང་ག་ནོང་ཀ་བུ་ ལའི་ལེག་པུ་ཤོ་ ཨ་ལེ་ཆོག་པེ་དག༌ཉི།
13ཉི་རོ་ཀི་ ག་དང་སང་ཁཱན་སོ་ངོ་ག་ ན་ག་ག་དང་ཏེང་ཅོ་དག་ཉི་ གསུངས་མ༌ལ། ཉི་རོ་ཀི་ ག་དང་ཏེང་པ་ཀབ་ཉི་ རོ་ཀ་ག་དང་དྲག་ཉི་ ཨོམ་ཐུར་ག་དང་ལེག་པུ་ཆོ་ཁཱན་ ད་བུ་རང་རི་ཝ༌ལ། 14དག་པ་ཀབ་ཉི་ ཕ་རི་སི་པ་བ་ ཕིས་ཀ་ཤོན་དིན་ཐཱན་ ཡི་ཤུ་ ཧང་ཏེན་བཀྲོངས་མེ་གི་ལ་སྨོ་ ཨོ་ཉ་ཀོར་གེ་ ཏུན་ཆ་ཨ་ཝ༌ལ༎
ཡི་ཤུ་ཤོ་ དཀོན་མཆོག་གི་ སི་ཁཱན་གཡོག་པ་གི༌ལ།
15རོག་ཏེ་བ་ཀི་ཙམ་ཁཱན་ འཆར་གཞི་ག་ཀོར་གེ་ ཡི་ཤུ་གི་མཁྱེན་མ་ཨ་དེན་གེ་ རོག་ཨོ་ཉ་ས་ཆ་ཐུབ་ཐཱན་ཐཱན་ བྱོན་མ༌ལ། ཉི་ལག་ཏང་སོ་ངོ་མང་པུ་ཐུར་གི་ རོ་ཀ་ཚིང་ཚིང་དི་ཝ༌ལ། རོག་ཏེ་བ་ཀ་པོང་ཀ་མར་ཁཱན་ ཐམས་ཅན་རང་ རོ་ཀི་དྲག་ཉི་གནང་མ༌ལ། 16དག་པ་ཀབ་ཉི་ རོག་ཨི་བི་གི་ལ་སྨོ་ མ་ཡེག་ཅོ་ན་དག་ཉི་ བཀའ་ན་སྒྲིང་སྒྲིང་ཨ་ཉི་གནང་མ༌ལ། 17ཨུ་ཐུ་ཤོ་ ལུང་བསྟན་པ་ ཡ་ཤའི་ཡ་གི་གསུངས་ཁཱན་ཁེ་པ་ དེན་ཐ་འགྲུབ་ཕེ་དེན་གེ་ ཇུང་མ་གི་ཝ༌ལ།
18རོག་ཤོ་ ཇི་གི་སི་ཁཱན་ ཇ་ག་གཡོག་པ་གི༌ལ། ཇི་གི་ རོག་གནམ་མེད་ས་མེད་ ཕང༌ཅ། ཉི་ཇང་རོག་ཀབ་ཉི་ གནམ་མེད་ས་མེད་ ཤོ་ནང་ཕེ་ཝ༌ཅ། ཇི་གི་ ཇ་ག་ཐུགས་ཉིད་ རོ་ཀ་ཐུང་ཀ་ཀུན་ཏི༌ལེ། ཉི་རོ་ཀི་ མི་རིགས་བ་ཀ་ ཇ་ག་ཁྲིམས་དྲང་པུ་ག་ཀོར་གེ་ ཀཱད༌པེ། 19རོ་ཀི་ཁོ་ལོང་ཕི་ཉི་ ཤ་དར་མ་ཕི༌ལ། ཉི་རོ་ཀ་ཀཱན་ གཞུང་ལམ་ཁོན་ཆོ་ཁཱན་བ་ཀི་ ན་མ་ཐ༌ལ། 20ཁྲིམས་དྲང་པུ་ག་ རྒྱལ་ཁ་མ་ཉོང་པ་སག་པུ་ རོ་ཀི་ཟོབ་ཉི་ཆུ་མ་ཨ་ཝ་ཆོ་ཁཱན་ ངོན་ཁེ་པ་མ་ཕུད་པ། ཉི་རོ་ཀི་ མུ་གུ་ཤོ་ཁཱན་ལ་ཝང་མ་ཤེ༌ལ། 21ཉི་མི་རིགས་བ་ཀི་ རོ་ཀ་མཚན་ག་རེ་ཆ་ཨ་ལེ་#12:21 ཡ་ཤའི་ཡ་ག་དཔེ་ཆ་ 42:1–4 དག༌ཉི༎
ཡི་ཤུ་དང་བལ་ཇི་བུལ།
22དོན་གི་ནོད་པ་ཨ་དེན་གེ་ མིང་ཀ་ན་དང་ནོ་ཝང་ཆོག་པེ་ མ་སེ་ཝ་རི་ཁཱན་སོ་ངོ་ཐུར་ རོ་ཀ་སྐུན་མདུན་ག་ཕ་ཝ༌ལ། ཉི་རོ་ཀི་དྲག་གནང་ཉི་ ནོ་ཝང་ཆོག་པེ་སེ་ཝ་དང་ མིང་ཐོང་མེ་རེ་བ་རི་ཝ༌ལ། 23སོ་ངོ་བ་ ཐམས་ཅན་རང་ ཡིད་ཆི་ཉི་ཡེག་པ་ལ་ ཨོ་ཐ་སོ་ངོ་ ད་ཝུད་ག་ རྒྱུད་པ་གི་ཝ་ལ་དག༌ཉི།
24དག་པ་ཀབ་ཉི་ ཕ་རི་སི་པ་བ་ཀི་ ཨོ་ཐ་ཀོར་གེ་ ན་ཐ་ཉི་ཡེག་པ་ལ་ དོན་བ་ཀ་རྒྱལ་སྲས་ བལ་ཇི་བུལ་#12:24 བལ་ཇི་བུལ་བུ་ སེ་ཏཱན་ག་ མིང་རང་གི༌ལ། ག་ དབང་ཚད་གི་ཨ་ཉི་ ཨོ་ཐ་སོ་ངོ་གི་ དོན་བ་ཁོན་ལ་དག༌ཉི།
25རོག་ཏེ་བ་ཀི་ མི་ཁཱན་ཁེ་པ་མཁྱེན་ཉི་ ཡི་ཤུ་གི་གསུངས་མ་ལ་ རྒྱལ་སྲིད་གི་རྒྱལ་སྲིད་ རོག་ཏེན་ག་དགྲ་ཨ་ནེ་ལ་ ཨོ་ཉ་རྒྱལ་སྲིད་ཇཝ་ཆུ༌མེ། ཉི་ཁྲོམ་ཆེན་གི་ཁྲོམ་ཆེན་ རོག་ཏེན་ག་དགྲ་ཨ་ཉི་ ཕའི་ནང་ཐུར་ག་སོ་ངོ་བ་ རོག་ཏེ་བ་ནང་དོ་དགྲ་ཨ་ནེ་ལ་ རོག་ཏེ་བ་ ཇཝ་ཆུ༌མེ། 26ཉི་སེ་ཏཱན་གི་ སེ་ཏཱན་རང་ཁོ་ཉི་ རོག་ཏེ་བ་ནང་དོ་དགྲ་ཨ་ནེ་ལ་ ཧང་ཏེན་ཨ་ཉི་སེ་ཏཱན་ག་ རྒྱལ་སྲིད་དོས་པེ་ཡ། 27ཇི་གི་བལ་ཇི་བུལ་ག་ དབང་ཚད་གི་ཨ་ཉི་ དོན་ག་བ་ཁོན་མ་གི་ནེ་ལ་ ན་ཧ་སློ་མ་བ་ཀི་ཤོ་ ཧང་ག་དབང་ཚད་གི་ཨ་ཉི་ ཁོན་ཅ་ཡ། ཨོ་ཉི་ཨ་དེན་གེ་ རོག་ཏེ་བ་ཤོ་ ན་ཧ་དྲང་དཔོན་གི༌ལ། 28དག་པ་ཀབ་ཉི་ ཇི་གི་དཀོན་མཆོག་ག་ ཐུགས་ཉིད་ག་དབང་ཚད་གི་ཨ་ཉི་ དོན་ག་བ་ཤོན་གེ་མ་ཆོ་ནེ་ལ་ དཀོན་མཆོག་ག་རྒྱལ་སྲིད་ ན་ཧ་པོང་ཀ་ཤེག་པ་ཅ་དག་ཉི་ གེན༌ཅ། 29ཨུ་ཉུ་མ་ནེ་ལ་ སོ་ངོ་ཤུག་ཅཱན་ཆོ་ཁཱན་ཁེ་པ་ གོ་མ་རང་ ཐིག་ཉི་མ་ཐ་ཝ་སག་པུ་ ཧང་ཏེན་ཨ་ཉི་ རོ་ཀ་ཕའི་ག་ནུབ་ཐཱན་ རོ་ཀ་ནོ་ཙང་བ་ ཅོམ་པེ་རེ་བེ་ཡ། རོག་གོ་མ་རང་ ཐིག་ཉི་ཐ་ནེ་ཤ་ རོ་ཀ་ཕའི་ཅོམ་པེ་རེ༌བེ།
30ཇང་ཀབ་ཉི་མ་ཁཱན་བ་ ཇ་ག་དགྲ་ཨན་ཅ་གི༌ལ། ཉི་ཇང་ཀབ་ཉི་མ་ཛོམ་ཁཱན་བ་ ཆུ་གེ་ཤེར་ཉི་གེམ་ཅ་གི༌ལ།
31ཨོ་ཉི་ཨ་དེན་གེ་ ཇི་གི་ ན་ཧ་ཡེག་ཅ་ སྡིག་པ་དང་སྐུར་པ་ ཧང་ད་བུ་རང་བཀའ་དྲིན་བསྐྱང༌མེ། དག་པ་ཀབ་ཉི་ དམ་པའི་ཐུགས་ཉིད་ག་ སྐུར་པ་ཞུ་ཁཱན་གི་ནེ་ལ་ བཀའ་དྲིན་མ་བསྐྱང་མ། 32ཉི་ཨི་བི་གི་ སོ་ངོ་ག་ཟ་ག་ མ་ལེག་པ་ཡེག་ནེ་བུ་ བཀའ་དྲིན་བསྐྱང༌མེ། དག་པ་ཀབ་ཉི་ དམ་པའི་ཐུགས་ཉིད་ག་ མ་ལེག་པ་ཡེག་ཁཱན་གི་ནེ་ལ་ ཚེ་ད་ལྟ་ག་ཨ་ནེ་བུ་ ཚེ་ཕྱི་མ་ག་ཨ་ནེ་བུ་ ཏི་ངེ་རང་བཀའ་དྲིན་མ་བསྐྱང་མ༎
ཤིང་དང་སེ།
33ཤིང་ལེག་པུ་ཅོད་ཅོ། ཉི་ཨོ་ཉ་ཤིང་ག་སེ་ ལེག་པུ་ཨོ་ཕེ། ཤིང་མ་ལེག་པ་ཅོད་ཅོ། ཉི་ཨོ་ཉ་ཤིང་ག་སེ་ མ་ལེག་པ་ཨོ་ཕེ། ཧང་ཡ་དག་ནེ་ལ་ ཤིང་ཤོ་ སེ་གེ་ཨ་ཉི་ གུམ་ཡེན་ཅ་གི༌ལ། 34ནའི་དུག་ཆོ་ཁཱན་ རུ་གེ་ནང་བ་ ན་ཧ་བ་ མ་ལེག་པ་ཆོན་ཐཱན་ ཧང་ཏེན་ཨ་ཉི་ ལེག་པུ་ཡེག་པེ་རེ་བེ་ཡ། ཧང་ཡ་དག་ནེ་ལ་ སེམས་ཀ་ཧང་ཆོ་ཝ་ཐུར་ སོ་ངོ་གི་ཡེག་ཅ་གི༌ལ། 35སོ་ངོ་ལེག་པུ་གི་ རོ་ཀ་སེམས་ལེག་པུ་ ཆོ་ཝ་ཨ་དེན་གེ་ ལེག་པུ་ཨན༌ཅ། དག་པ་ཀབ་ཉི་ སོ་ངོ་མ་ལེག་པ་གི་ རོ་ཀ་སེམས་མ་ལེག་པ་ ཆོ་ཝ་ཨ་དེན་གེ་ མ་ལེག་པ་ཨན༌ཅ། 36ཇི་གི་ ན་ཧ་ཡེག་ཅ་ ཁྲིམས་ཅཱད་པེ་ནོང་ཀ་ ན་ཤི་རིག་པ་སྒྲིམ་ཉི་ མ་ཨ་ཁཱན་ཆཱས་ ཐམས་ཅན་ག་རྩིས་ ན་ཤི་བི་ལེ་ཁེ༌ལེ། 37དགོངས་ཡངས་ཉོང་ནེ་བུ་ ན་ཧ་ཆཱས་དང་ཏུ་ཉི་ཉོང༌པེ། ཉི་ཁྲིམས་ཉོང་ནེ་བུ་ ན་ཧ་ཆཱས་དང་ཏུ་ཉི་ཉོང་པེ་དག༌ཉི༎
ཡོ་ན་ག་རྟགས།
38ནོང་ཐུར་ བཀའ་ཁྲིམས་ག་ སློབ་དཔོན་བ་དང་ ཕ་རི་སི་པ་བ་ ཡི་ཤུ་ག་ སྐུན་མདུན་ག་བཅག་ཐཱན་ ཞུ་ཝ་ལ་ སློབ་དཔོན་ ནཱན་གི་ ཨ་ཧ་རྟགས་ཐུར་ གེན་ཉི་གནང་ཤོ་དག༌ཉི།
39དག་པ་ཀབ་ཉི་ རོ་ཀི་ལན་གནང་ཉི་ གསུངས་མ་ལ་ ངན་པ་དང་དམ་ཚིག་མ་ཁཱན་ མི་རབས་བ་ཀི་ཤ་ རྟགས་ལམ༌ཅ། ཇི་གི་ རོག་ཏེ་བ་ཀ་ ལུང་བསྟན་པ་ ཡོ་ན་ག་རྟགས་ཐུར་མ་ཏོག་པ་ བཱརའ་རྟགས་ཐུར་རང་མ་གེན་མ། 40ཡོ་ན་ངམ་བི་ནང་སམ་སག་པུ་ ང་ཆི་ལུ་ག་བོ་ལང་ནང་ཀ་ ཆོ་ཝ་པུརུས་ཀིན་ཨ་ཉི་ སོ་ངོ་ག་ཟ་བུ་ འཛམ་གླིང་ག་ས་ནང་ཀ་ ངམ་བི་ནང་སམ་ཆོ༌ལེ།
41ཁྲིམས་ཅཱད་པེ་ནོང་ཀ་ ཁྲོམ་ཆེན་ནི་ན་ཝེ་ག་སོ་ངོ་བ་ ཨོ་ཐ་མི་རབས་བ་ཀབ་ཉི་ཐིང་ཐཱན་ ན་ཧ་དགྲ་ཨ་ཉི་ འཛོམས་དཔང་དཔང་བཞག་ཨ༌ལེ། ཧང་ཡ་དག་ནེ་ལ་ ཡོ་ན་གི་གསུང་བཤད་པ་ཀབ་ཉི་ རོག་ཏེ་བ་ཀི་ སྡིག་པ་གེ་ལོག་པ། དག་པ་ཀབ་ཉི་ གོད་ཅོ་ ཡོ་ན་གེ་ལག་པ་ཆི་ལུ་ཐུར་ ཐ་ག༌ཅ། 42ཁྲིམས་ཅཱད་པེ་ནོང་ཀ་ ལྷོ་ག་ཨ་ཞེ་ཤེ་བ་གི་ ཨོ་ཐ་མི་རབས་བ་ཀབ་ཉི་ཐིང་ཐཱན་ ན་ཧ་དགྲ་ཨ་ཉི་ འཛོམས་དཔང་ཨ༌ལེ། ཧང་ཡ་དག་ནེ་ལ་ དཔོན་སོ་ལོ་མོན་ག་ རིག་པ་ཉཱན་པེ་དེན་གེ་ རོག་འཛམ་གླིང་ལོག་ཐུར་གེ་ ཨོ་ཕ་ཆོ་ཝ། ཉི་ཨོ་མ་ སོ་ལོ་མོན་གེ་ཆི་ལུ་ཐུར་ ཐ་ག༌ཅ།
43རྣམ་ཤེས་མ་ལེག་པ་ སོ་ངོ་གེ་ ཕིས་ཀ་ཤོན་ཇོང་དེན་གེ་ ས་ཆ་སང་མུ་གེ་ལེང་ ཤོང་ལ་ལེ་ག་ བཱརང་ལམ་ཉི་དིན༌ཅ། དག་པ་ཀབ་ཉི་ ཤོང་ལ་ལེ་ག་བཱརང་ ལམ་མ་ཐོང་ནེ་ལ་ 44རོ་ཀི་ རོག་ཏེན་ག་ཡེག་པེ་ ལོག་ཉི་རང་ ཇང་ཆོ་ཁཱན་ཕའི་ནང་ཀ་ དི་ལེ་ཁེ་ལེ་ལ་དག༌ཉི། ཉི་རོག་ ལོག་ཉི་གོད་པ་ཀབ་ཉི་ ཨོ་ཉ་ཕའི་ཁེ་པ་ཏོང་པུ་ བཱརང་ཕག་ཉི་ ཁམས་སངས་ཀིན་ཨ་ཝ་ ཅོད་ཐ་ཝ་ཐོང༌མེ། 45ཉི་རོག་དིན་ཐཱན་ རོ་ཀེ་ལག་པ་ཏེ་ངན་ཆོ་ཁཱན་ རྣམ་ཤེས་མ་ལེག་པ་ཟུམ་ཐེན་ རིག་ཉི་ཕཱན་ཐཱན་ ཨོ་ཉ་ཕའི་ནང་ཀ་ནུ་ཕེ། ཉི་ཨོ་ཉ་སོ་ངོ་ གོ་མ་གེ་ལག་ཉི་ ཀ་ལུ་རི༌ལེ། ཉི་ཨོ་ཐ་ ཏེ་ངན་མི་རབས་ག་ཐུང་ཀ་བུ་ ཨུ་ཐུ་ད་བུ་རང་ཇུང༌མེ༎
ཡི་ཤུ་ག་ཡུམ་དང་ཡུང་ཟི་བ།
46ཡི་ཤུ་གི་ སོ་ངོ་མང་པུ་ཛོམ་ཁཱན་བ་ཀ་ གསུངས་མེ་གང་ཀ་ རོ་ཀ་ཡུམ་དང་ཡུང་ཟི་བ་ རོག་ཀབ་ཉི་ གསུང་གྲོས་གནང་མེ་དེན་གེ་ ཕིས་ཀ་ནོང་ཉི་ བཞུགས་པ་ཅ་གི་ཝ༌ལ། 47ན་ག་ཡུམ་དང་ཡུང་ཟི་བ་ ཕིས་ཀ་ཐིང་ཉི་བཞུགས་པ༌ལ། རོག་ཏེ་བ་ ནཱན་ཀབ་ཉི་ གསུང་གྲོས་གནང་མེ་ཅ་དང་ཨ་ཉི་ སོ་ངོ་ཐུར་གི་ ཡི་ཤུ་ག་ཞུ་ཝ༌ལ།
48ཡི་ཤུ་གི་ རོ་ཀ་གསུངས་མ་ལ་ ཇ་ག་ཨ་མ་དང་ཡུང་ཟི་བ་ ཨི་བི་གི་ལ་ཡ་དག༌ཉི། 49ཉི་རོ་ཀི་ རོ་ཀ་སློ་མ་བ་གེན་ཐཱན་ གསུངས་མ་ལ་ ཇ་ག་ཨ་མ་དང་ཡུང་ཟི་བ་ཤོ་ རོག་ཏེ་བ་གི༌ལ། 50ཧང་ཡ་དག་ནེ་ལ་ ཨི་བི་གི་ ཞིང་ཁམས་ག་བཞུགས་ཁཱན་ ཇ་ག་ཡབ་ག་ཐུགས་དང་ཏུ་ཉི་ ལའི་ཨན་ཅ་གི་ལ་སྨོ་ ཨོ་ཉ་སོ་ངོ་བ་ཤོ་ ཇ་ག་ཨ་མ་དང་བོ་ཉིང་བ་ ཉི་ཨུ་ས་བ་གི་ལ་ན་དག་ཉི་ གསུངས་མ༌ལ༎
বর্তমানে নির্বাচিত:
མ་ཏི། 12: TNTB
হাইলাইট
শেয়ার
কপি
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
