Génesis 4
4
Caín soc Abel
1Jich te Adán la sjoin ta wayel te Eva, ja' te yiname. Jich la yic' yal, jich ayin te Caín. “Ayix jtul cal, querem yac'ojbon te Diose”, xi'. 2Patil tal yuts', Abel sbiil c'ot yu'un. Te Abel la yat'elin xch'ijtesel chij, yan te Caín la yat'elin sts'unel awalts'unub ta lumq'uinal stuquel.
3La sta yorail te la yac'bey smajt'an Dios te Caine. Ja' la yac' te sit yawal-sts'unube. 4Yan te Abel ja' la yac' te sba yalatac xchij te buen jujp'ene. Te Dios lec yo'tan yu'un te Abel soc te majt'anil la yaq'ue.#Heb 11.4. 5Yan te Caín ma lecuc yo'tan Dios yu'un soc te smajt'an te la yac'beye. Jich te Caín bayal a ilin yu'un, yanaj sit yu'un te yilimbae. 6Te Dios jich la yalbey te Caín:
—¿Bistuc ilinat, soc bistuc yanaj asit? 7Te yu'unuc lec te awat'ele, ¿ma bal lecuc ac'oplal ya xc'oat yu'un te jichuque? Yan teme ma lecuc te awat'ele, ja' me ya yabatinat te mulile. Ja'uc me to, ya xju' awu'un scomel te mulil te jichuque —la yut.
8Te Caín la yalbey te Abel, ja' te yijts'ine:
—Conic ta paxeal —la yut.
Jich yu'un te bit'il la sjoin sbaic bael ta paxeal, te Caín la stsac te yijts'ine, ja' te Abel, la smil.#Mt 23.35; Lc 11.51; 1 Jn 3.12. 9Dios la sjojc'obey te Caín:
—¿Banti ay te awijts'in Abel? —la yut.
La sjac' te Caine:
—Ma xquil, ¿yu'un bal jo'on jcanantayej te quijts'ine? —xi'.
10Te Diose jich la yalbey:
—¿Bi yu'un jich la apas? Ja' la yalat te xch'ich'el awijts'in te la amalbey ta lumq'uinale.#Heb 12.24. 11Jich yu'un bolobix ac'oplal li' ta lumq'uinal to te la amalbey xch'ich'el te awijts'ine. 12Te c'alal ya awaiy awal ta lumq'uinal, ma me xyac' sit. Melmonel ya xc'axat ta q'uinal, soc ma xwejt' bay ya x'ainat —xi' sc'oplal yu'un te Diose.
13Te Caín la yalbey te Diose:
—Bayal ayon ta castigo, ma xcujch' cu'un, 14melel ya atenon loq'uel ta q'uinal, soc ma xawac'bonix quilbat asit. Melmonel ya xc'oon, soc ma xwejt' bay ya x'ainon. Spisil mach'a ya staon, ya me smilon —xi'.
15Te Dios la yalbey:
—Teme ay mach'a ya smilate, juqueb buelta ya x'esmaj castigo ta stojol —xi'.
Jich yu'un te Cajwaltic la yac'bey señail ta sbaq'uetal te Caín, swenta yu'un ma me ayuc mach'a ya xmilot yu'un. 16Jich a loc' ta stojol Dios te Caín, ba nainuc ta Nod ay ta stojol sloq'uib c'aal yu'un Edén.
Sts'umbal Caín
17Te Caín la sjoin ta wayel te yiname, jich la yic' yal, Enoc sbiil c'ot. Soc la spas muc'ul lum te Caín, Enoc sbiil c'ot yu'un te lume, ja' la yac'bey sbiilin te sbiil snich'ane. 18Ja' snich'an Enoc te Irad. Ja' snich'an Irad te Mehujael. Ja' snich'an Mehujael te Metusael. Ja' snich'an Metusael te Lamec. 19Te Lamec la yic' cheb yinam, Ada sbiil te jtule, Zila sbiil te yane. 20Alaj te Ada, Jabal sbiil c'ot te yale. Ja' sts'umbal ta spisil te mach'atic snainejic nailpac' soc te yat'elinejic xch'ijtesel te chambalametique. 21Ay yijts'in, Jubal sbiil, ja' sts'umbal ta spisil te mach'atic ya stijic arpa soc te amaye. 22Te Zila alaj uuc, Tubal-Caín sbiil c'ot te yale. La yat'elin stenel taq'uin, la sna' spasel spisil te bila ya xpastaj ta bronce soc hierro. Ay yijts'in-ach'ix te Tubal-Caín, Naama sbiil.
23Te Lamec ay jun buelta la yalbey ta xchebal te yiname:
—Ja'ex Ada soc Zila, aiybon awaiy stojol jc'op ta lec:
Ay jtul winic la jmil, yu'un la yejch'enteson,
la jmil jtul querem, yu'un la smajon.
24Teme juqueb buelta ya x'esmaj castigo
ya yich' te mach'a ya smil te Caine,
yan te mach'a ya smilone, te juqueb buelta
ya me x'esmaj lajuneb xchanwinic (70) buelta
castigo ya yich' —xi' te Lamec.
Yoxebal yal-snich'an Adán soc Eva
25Te Adán la sjoin xan ta wayel te yiname. Ayin yal te Eva, Set sbiil c'ot yu'un, melel la yal: “Dios la yac'bon yan cal swenta sjelol te Abel te la smilbon te Caín”, xi' yu'un.
26Ayin snich'an te Set, Enós sbiil c'ot. Ja' yorail te caj yalbeyic wocol ta stojol Cajwaltic te ants-winiquetique.
বর্তমানে নির্বাচিত:
Génesis 4: TZOXCH
হাইলাইট
শেয়ার
কপি
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
