Kèʼlo 8
8
Ndzə́ví kéʼ, a shùŋrìn
1A Nyùy kù kuúme Noa wùn à nyám se wùn áwune‑eè dzəə̀n é kikoŋ si, e nèn lò, e tsə̀nsí shwér, wú shaà kitú ke nsay kidzə̀m, ndzə́ví nèn kèʼ, a shùŋrìn. 2Wù kfən yiì, ntòŋ sé ndzəv se sí‑iì fəəkin fó loònsay si sə́tí, e yiì, shuu se yuv sí sə́tí sá. Wuú nèn tìn, 3ndzə́ví wáa shùŋrìn. Kí lòo meé e kishiíy ke yì‑iì siìn ji vishiíy kishóv mtàn e wiì mo ndzə́ví‑iì kèʼèn, a wìy, a yí fár ne wún. 4Kikóŋ ki nèn fàáy e kirùmèn kímóʼ kí áàgwan veé Ararat, a sì kishiíy nshòv saàmbà e ghvə̀m fo ŋwee woo saàmbà, e kiya foo fèy. 5A ndzə́ví kù shuŋrìnè, e yiì lòo meé e kishiíy ké mbìy ki fó ŋwee woo ghvə̀m, vitú ve agwan vi nèn kèʼ, a yensín.
6Vishiíy ví kfən shaà mkweè, Noa nèn mvə̀ʼ shúu wundu wo wù‑uù fèrìn é wǔn kikoŋ, 7e tùm kiŋaʼ. Kí‑iì dù bey, e kù a feŋ, a kar karín, e dù, e mèé mo ndzə́ví‑iì yumen fó nsay. 8Mo shinə́n shiy shi duùn, e làa yòʼ dzə́ə kfən e bàm, Noa nèn lò, e tsə̀nsí kibìŋ ji wun kiíy á ji ndzə́ví sá ne màysì, e yùm fó kitu ke nsay a. 9Kí nèn dù, a ndzə́ví kù dzə̀ə́ e kitu ke nsay, kí búŋ fóo laʼám, e nèn kfə̀n é bàm. Noa tsə́nsí kiwó, e ghàr shó, e siìr e kikoŋ, 10e nèn kfə̀n shìy kishiíy saàmbà, e bóo kfə̀n fəə́r, e tsənsí. 11Yiì lòo dzə e ŋkuùr, kibìŋ kí bvə́y e vav kici ké *oliv ye shoòŋe é shuù. Noa nèn kìíy ji ndzə́ví shùŋrìn a ne. 12Wù kfən shìy vishiíy vímóʼ ví saàmbà, e kfə̀n tsə̀nsí kibìŋ. Kí dù lèn, e làa yòʼ dzə́ə kfən e bàm.
13Ndzə́ví nèn mày fo kitu ke nsay a dzə̀ é kishiíy ké mbìy ki fó ŋwee mbìyi wo Noa‑aà siìn kiyá nshòv mòʼón e ghiì ntuùfú (601). Wù nèn tsə̀ʼ kifá ke wù‑uù sətin vitú ve kikoŋ sho, e màʼ sí fo ndzə, e yèn, a nsay sí yuúme. 14Kí wáa meé ji ŋwee e baà, e kishiíy kee nshòv saàmbà e mbaà fó ŋwee foo fèy, a kitú ke nsay ki máysí ne, e yùm ŋkuuŋkùŋ.
15Nyùy nèn sùúy e Noa jii, 16«Fəə́ fó kikoŋ vèn à wiiy wò, à wón vée, à vikǐy won vée. 17Ku lì kfəə́ se vifa ve ŋeʼèn ví sidzə̀m, é vèn áwune fəə́. Ku lì menə́n wùn à nyám si, à vifá ve ví ŋaŋrì ŋàŋrìn é nsay vi vidzə̀m, é ví wáa dzəə́ wón, aá wáa run e kitu ke nsay.» 18Noa ku nèn fəə̀ wùn à wón vəə́, à wiiy və, à vikǐy won vəə́. 19Kifá kidzə̀m ke kí ghan e kitu ke nsay ki nèn a fəə sa fo kikoŋ e kfəə sí kfəə si, nyám sidzə̀m, menə́n medzə̀m, à kifá kidzə̀m ke kí ŋaŋrì ŋàŋrìn kí.
Noa seérí nyám si, e cù Nyùy sho
20Noa nèn bòm *kíy cù wó a cù Nyùy Tàr shó, e shòʼtí nyám se nsər din ji see là *kifàn símóʼ sí, wùn à menə́n mee là kifàn mè, a tòn e kiy fèy, a cù Nyùy Tàr shó. 21Kirəm ke cù ki rə́ʼtín, e ghèén Nyùy Tàr, wù suúy fo wun bvə̀m jii, «Bó m yòʼ dzəə́ wìy màʼ ŋgeʼ e kitu ke nsay bìʼ wir msòŋ. Kwaʼtì wìr msòŋ e dzə̀me kù sì yé kisaŋe, e kèʼ fo meterí. Bó m yòʼ dzəə́ wìy laàr kifá ke ŋeʼèn kí fó kitu ke nsay mo mò‑oò laàrìn.»
22«Mo ndzə wíy a dzə,
ghán sé kiŋgway, à ghán se á káv vifá,
ghán sé kidzər, à ghán se virə́ʼ ví lumè,
bìŋ wùn à lùm,
shùy wùn à vitsə́ʼ,
ghán sin si yòʼ wíy buú.»
বর্তমানে নির্বাচিত:
Kèʼlo 8: LNB
হাইলাইট
শেয়ার
কপি
Want to have your highlights saved across all your devices? Sign up or sign in
© 2022 CABTAL
