मत्ती 5

येशु मसीहीई पहाड़ी उपदेश

(लूका 6.20-23)

1एए गोर्दी पालीत तो डोगुपो सोडीत गोयु अने जांहा तो निसे बोहयु तेहलाम तियाआ शिष्य त्याजागे आव्ये. 2तेहलाम तो आपाआ सोब उगाडीत ओ हिकाडहु लाग्यू का.

धन्य वचन

3“धन्य होय जे आपाआ मनोओ नम्र होय, काहाके स्वर्गाचे राज्य तिया होय.” 4“धन्य होय जे विलाप कोअत्ले, काहाके तियाहा शांति जोडे.” 5“धन्य होय जे नम्र होय, काहाके ते पृथ्वीई अधिकारी ओवे.” 6“धन्य होय जे धार्मिकाआ फुकल्यु अने तोरह्यु होय, काहाके तियाहा तृप्त कोअलाआ आवे.” 7“धन्य होय जे दयालू होय, काहाके तियापो दया कोअलाआ आवे.” 8“धन्य होय जे ज्याआ मोन शुद्ध होय, काहाके ते देवोहो पाले.” 9“धन्य होय जे शांतीई काम कोअता, काहाके तेए परमेश्वरोओ पोऱ्ये ओवे.” 10“धन्य होय जे धार्मिकताआ वोजेसी छळ ओवत्लु, काहाके स्वर्गाचे राज्य तिया होय.” 11“धन्य होय तुमु जांहा माआ वोजोसे मांहे तुमाआ निंदा कोए, तुमाआ छळ कोए अने खोटो बोलुन-बोलुन तुमाआ विरूध वाईट गोठी कोए.” 12आनंद अने उल्हास को, काहाके होर्गाम तुम्हा कोअता वोडो फोल होय काहाके तुमा पेल्लेए जे भविष्यवक्ता ओत गोये तियाआ पण ह्याचप्रकारे छळ कोअलाआ आवयू ओतु.

खारो अने ज्योतिई तुलना

(मरकुस 9.50; 4.21; लूका 14.34-35; 8.16)

13“तुमु पृथ्वीई खारो होय पण जर खारो आपाआ चव गोमावीत टाके ताहा फासी खारसो केहकोईत लेतावे” तो कोडलाज कामा नाहा रोतलो शिवाय उडाडीलाआ अने गुडानिसे तुडविलाआ रोतो 14तुमु जगाआ प्रकाश होय, टेम्बाब बोहलो गाव निकाहू शकत नाहा 15अने मांहे दीवू लागडीत मापोनिसे नि मिकत्ले पोन दिवठणीपो मेकतलु म्हणजे कोअमेहे आखाहा उजालो पुगत्लो होय 16तुमाआ उजालो मांहा आगाडी ऐहकोईत सोमके का, तुमाआ हाजा कामाकोता पालीत तुमाआ बाह्हू जो होर्गाम होय तियाआ स्तुती कोअला जोवे.

व्यवस्थाआ पुरो ओवलोओ

17“एहलो होम्जीलो नाहा का, आय संदेष्ट्यांआ पुस्तकांआ नाश कोईलाकाजे आवयू होय, नाश कोअला नाहा पण पुरो कोईलाकाजे आवयू होय.” 18काहाके आय तुमाहा खोरोज कोत्लू का, जोपोरोत जुग अने धोरती जाती ने रोय ताहू जाआ नियमशास्त्रा मेहे एकभी काना अने मात्रा बिंदू पुरो उव्या शिवाय ने टोले 19त्यापोत जो कोडु हानाम रोत हानु आज्ञाहा तोडहि अने ऐहलेच शिक्षण दिहीराहा आपी, तो होर्गा राज्याम लाहानापो हानू कोअहो जाइअलो अने जो तियाआ पालीत कोअनारू अने दिहीराहा पण हिकाडी तो परमेश्वरोओ राज्याम वोडू कोवाय 20काहाके आय तुमामे कोत्लू का, जो पर्यंत तुमाआ धार्मिकता शास्त्री अने परुसी याआ धार्मिकते हुन जाखो रोही नाहा तोपोरोत होर्गा राज्याम प्रवेश कोअता आविलो नाहा.

हत्या अने क्रोधो दंड

21“तुमु होमल्यु होय का, पुर्वजांहि कोयु ओते, खून कोअहा मा अने जो कोडु खून कोअनारू तियाहा कोर्टात दंड आपलो आवे.” 22पण आय तुमामे कोत्लू के, जो कोडु आपाआ पाहीपो रागवाल्यू तो कोर्टात शिक्षेस योग्य ठराविलो; अने जो आपाआ पायहोहो बेन कामोओ कोअही तो शिक्षेस पात्र ठरेल, अने जो कोडु कोय अरे मूर्ख तो नरकाआ आगीई शिक्षेस पात्र ठरेल 23त्यापोत जर तू आपाआ भेट वेदी जवळ लाविले अने ताहु ओर आव्ये का, ताआ पायहोहो बद्दल काही विरोध होय एहलो ताहु स्मरण उवे, 24ताहा आपाआ भेट वेदी आगाडी तेहलूज मेका अने पालील्यो जात आपाआ पाहीआरी समाधान कोईत ले अने नंतर आविलो आपाआ भेट अर्पण को 25जर तू आपाआ दुश्मन आरी वाटे होय ताहा तियापरोत वेगु मैत्री कोईत ले, या पेल का दुश्मन ताहु न्यायधीशाला होपे अने न्यायाधीश ताहु शिपायाआ आथे होपे अने तू जेलूम टाक्यू जानारू 26आय ताहु खोरोज कोत्लू का, जोपोरोत तू दमडी-दमडी पोशाआ सुटे नाहा तोपोरोत तिहीरोत सुटीत उवे नाहा.

व्याभिचारो विषय मेहे सिक्षा

27तुमू होमल्याहा के, कोयु होय का, व्यभिचार कोअहां मा; 28पोन आय तुमाहा कोत्लू का, जो कोडु कोडनीबि बुईही वाईट नजरोवाही पालत्लु, तो आपाआ मोनुमे व्यभिचार कोईत सुक्यू होय 29जर ताआ हुदू डोउ पापाहाम ठोकर खावाडे ताहा तियाहा काढीत टाक, काहाके ताआ आखे डील नरकाआ टाक्ये जालो ह्यापेक्षा ताआ होमला अवयवाचा नाश उवे ओ ताआ हिताहा होय 30जर ताआ हुदू आथ ताहु पाप कोअला लागाडीत ताहा तियाहा वाडीत टाकी आप, काहाके ताआ आखे डील नरकाआ टाक्ये जालो ह्यापेक्षा ताआ अवयवाचा नाश नि उवे.

तलाको विषय मेहे सिक्षा

31जो कोडु तिया लाडी तिये तीही सूटपत्र आपलो ओ कोयु ओते 32पोन आय तुमामे कोत्लू का, जो कोडु व्यभिचाराला सोडीत दिहरा कोडनीबि कारनोवाही आपाआ लाडीही सोडीत आपोहो, ताहा तो तियापोरोत व्यभिचार कोअला लागाडीत अने जो कोडु एहलो सोडीत दिहरा लाडीआरी वेहवाल कोअत्लू ताहा तो व्यभिचार कोअत्लू.

शपथ नि खाअलोओ

(मत्ती 19.9; मरकुस 10.11-12; लूका 16.18)

33फासी तुमु होमल्यु होय का, पूर्वजांहि कोयु ओते, तुमु झुटी शपथ आपिली नाहा, अने प्रभु कोअता आपाआ शपथ पुरो कोइलाआ 34पण आय तुमामे कोत्लू का, कधीपण शपथ लेऊ नाहा, स्वर्गाची नाहा काहाके ते परमेश्वरोओ सिहांसन होय. 35अने पृथ्वीई पण नाहा काहाके ती तियाआ गुडू मिकलो जागू होय अने यरुशलेमची पण नाहा काहाके ए वोडू राजाआ नगरी होय. 36आपाआ मुंडकाआ पण शपथ लेऊ नाहा काहाके तू ताआ केहे पण कालु किंवा धवले कोहू शकत नाहा. 37पण तुमाआ गोगीला होय किंवा नाहा एवडोज रोंहु जोवे काहाके जे किबी ह्यापेक्षा जाखो ते वाईट ओते.

बदलू नि लेअलोओ

(लूका 6.29-30)

38तुमु होमल्यु होय का, कोयु ओते, डोआ बोदलाम डोउ, अने दातोअ बोदलाम दात, 39पण आय तुमामे कोत्लू का, वाईटा आरी लढू नाहा, पण जो कोडु ताआ हाजला गालोपो थापोड देही तियाआ आगाडी दिहरू गाल पण आप. 40अने जर कोडु तापो जोबरीव कोईत डोगलो लेई मांगत्लू ताहा तियाहा बनियन पण आप. 41जर कोडु ताहु एक किलोमीटर चालते घेऊन जात्लू ताहा तियापरोत बेन किलोमीटर चालते जा. 42जो कोडु ताआपो रोत मांगत्लू तियाहा आप, अने जो कोडु ताआपो रोत उसने मांगुई पालत्लू, त्यापोरोत आपाआ सोब फेरवूहू नाहा.

(लूका 6.27-28,32-36)

43तुमु होमल्यु होय का कोयु ओते, तू आपाआ आरी कोरयापो प्रेम को, अने आपाआ दुश्मनाआ द्वेष को 44पण आय तुमाहा कोत्लू का आपाआ दुष्मनापो प्रेम को, जे तुमामे सोतावतेहे, त्याकोअता प्रार्थना को. 45ज्यायाकोलो तुमु आपाआ होर्गा मेऱ्या ओबा पोऱ्ये बोनहू सेकेहे. काहाके तो आपाआ दिह हाजा अने वाईट बेनुपोरोत उगवितल्यू अने विश्वासी अने अन्यजाति बेनुपोरोत पाई पाडत्लू. 46काहाके जर तुमु ज्यापो प्रेम कोअता ते तुमापो प्रेम कोअता ताहा की फायदु उवे? के वसूल कोअनारे एहलो कोईत नाहा? 47जर तुमु आपाआ पाहीही नमस्कार कोअता ताहा की वोडो काम कोअता, अन्यजाति पण एहलो कोईत नाहाके? 48कोईत तुमु पुरो बोना, जेहलो तुमाआ बाह्हू होर्गाम पुरो होय.

বর্তমানে নির্বাচিত:

मत्ती 5: NOINT

হাইলাইট

কপি