KEJADIN 9
9
Dibata erbahan perpadanen ras Nuah
1Ipasu-pasu Dibata si Nuah ras anak-anakna nina, “Ertuah lah dingen ertambah-tambahlah, gelah sinursurndu ndemi doni enda kerina. #Kej 1:28 2Kerina rubia-rubia, perik-perik, ras nurung, mbiar man bandu. Kerina ia itamaken i teruh kuasandu. 3Genduari kerina rubia-rubia, perik-perik, ras nurung e banci ipanndu, bage pe sinuan-sinuan si meratah. Kubereken e kerina man bandu jadi panganndu. 4Tapi daging si lit denga darehna la banci ipanndu. #Im 7:26-27; 17:10-14; 19:26; Ul 12:16,23; 15:23 5Si enda Kularang kam sabap kegeluhen lit i bas dareh. Ise munuh jelma iukum. Rubia-rubia si munuh jelma Kuukum alu kematen. 6Manusia ijadiken seri ras Dibata, e maka ise munuh jelma ia jine pe ibunuh temanna manusia ka. #Kej 1:26; Kel 20:13
7La banci lang nterem anak ipupusndu, gelah sinursurndu ndemi doni enda kerina.” #Kej 1:28
8Nina Dibata man Nuah ras man anak-anakna, 9“Genduari Kubahan perpadanen ras kam bage pe ras sinursurndu, 10janah ras kasa kai si nggeluh, e me kerina perik-perik, kerina rubia-rubia, kerina si ndarat ras kam i bas kapal e nari. 11Enda me perpadanenKu ras kam: Maka ndigan pe lanai Kucedaken kasa kai si nggeluh alu banjir si mbelin; ndigan pe doni enda lanai icedaken alu banjir. 12Tandana maka tuhu-tuhu tetap perpadanenKu ras kam ras man kasa kai si nggeluh enda e me kap: 13Kutamaken bentehangKu i bas embun. E me tanda perpadanenKu ras doni enda. 14Sanga Kututupi langit alu embun, jenari teridah benteha, 15Kuinget me perpadanenKu man bandu ras man kerina asuh-asuhen maka banjir si mbelin lanai ndigan pe ncedaken kasa kai si nggeluh. 16Sanga benteha teridah i bas embun, Kuidah e, e maka Kuinget perpadanenKu si rasa lalap nandangi kerina si nggeluh i babo doni enda.
17Benteha e me tanda perpadanen si Kubahan man kasa kai si nggeluh.”
Nuah ras anak-anakna
18Anak Nuah si ndarat i bas kapal e nari e me kap Sem, Ham, Japet. (Ham e me kap bapa Kanaan.) 19Anak Nuah si telu kalak enda me jadi nini kerina jelma i babo doni enda.
20Nuah sekalak perjuma; ia me tangtangna kal si nuan anggur. 21Kenca iinemna lau anggur e, mabuk ia, itangtangina gonjena, janah alu manjang-anjang medem ia i bas sapona. 22Sanga Ham, bapa Kanaan e, ngidah bapana manjang-anjang, ndarat ia, iturikenna man seninana Sem ras Japet. 23Kenca bage ibuat Sem ras Japet sada jubah itamakenna ku barana. E maka erdalan surut ia ku sapo e, jenari icabinina bapana, sedang ayona nulih ku ingan si deban gelah ola i idahna bapana manjang-anjang. 24Kenca lanai mabuk Nuah, ietehna kai si enggo ibahan anakna si nguda man bana. 25E maka nina Nuah, “Kena sumpah lah Kanaan! Ia jadi budak senina-seninana. 26Terpujilah TUHAN, Dibata Sem! Kanaan jadi budak Sem denggo. 27Erbelangna lah taneh Japet ibahan Dibata, janah Dibata lah erbahanca maka sinursur Japet banci ringan i bas kemah sinursur Sem. Kanaan jadi suruh-suruhen Japet denggo.”
28Kenca banjir si mbelin e, 350 tahun nari Nuah nggeluh. 29Jenari mate ia asum umurna 950 tahun.
বর্তমানে নির্বাচিত:
KEJADIN 9: BTX
হাইলাইট
শেয়ার
কপি
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
