KEJADIN 3
3
Manusia la erkemalangen man Dibata
1I bas kerina rubia-rubia daraten si ijadiken Dibata, nipe me si cerdikna. Nungkun nipe man diberu ndai nina, “Tuhu kin ikataken Dibata man bandu maka la banci ipanndu sada pe buah batang kayu si i bas peken enda?” #Ket 12:9; 20:2
2Erjabab diberu e nina, “Kerina buah batang kayu si lit i bas peken enda banci nge ipan kami,” 3“seakatan buah kayu si i tengah peken. Ikataken Dibata man kami maka la banci pan buahna, jemak pe ola. Adi ipan tah ijemak kami, mate kami.” 4Ngaloi ka nipe nina, “Labo tuhu e, labo kam mate. 5Bage nina Dibata, perban ietehNa kenca ipanndu, bali kam ras Dibata, meteh si bujur ras si jahat.”
6Itatap diberu e batang kayu ndai, tuhu seh kal akapna jilena, janah buahna pe entabeh nari nge man pangan. Iukurina ka, kuga senangna adi arah man buah batang kayu e ndat pemeteh ia. E maka iputikkenna buah kayu e, ipanna, jenari iberekenna man perbulangenna si rassa i je, janah ipan perbulangenna ka. 7Mintes medak matana duana, janah igejapna maka manjang-anjang ia. E maka isemitna bulung ara jadi gonjena.
8Karabenna, ibegi kalak ndai TUHAN Dibata erdalan-dalan i bas peken ndai. E maka cebuni ia duana i ligen-ligen batang kayu. 9Ilebuh TUHAN Dibata si dilaki nina, “I ja kam?”
10Ngaloi ia nina, “Kubegi ndai Kam erdalan i bas peken; mbiar aku, e maka cebuni aku, erkiteken aku manjang-anjang.”
11“Ise ngatakenca maka kam manjang-anjang?” nina Dibata nungkun. “Ipanndu kin buah batang kayu si Kularang e?”
12Erjabap dilaki e nina, “Diberu si itamakenNdu ras aku i jenda kap merekenca man bangku, e maka kupan.” 13Isungkun TUHAN Dibata ka si diberu nina, “Engkai maka bage perbahanenndu?” Erjabap diberu ndai, “Nipe si ngajar-ngajari aku maka kupan.” #2Kor 11:3; 1Tim 2:14
Dibata mereken ukumen
14Kenca bage nina TUHAN Dibata man nipe, “Erkiteken perbahanenndu e, kena ukumen kam; i bas kerina rubia-rubia nari kam ngenca kena sumpah enda: Mulai genduari nari njoler kam alu beltekndu, janah kidekah kam nggeluh abu taneh panganndu. 15Kuperimbangken kam ras diberu enda, bage pe kesusurenndu ras kesusurenna. Kesusurenna merperken takalndu, janah kam naguti tukul-tukulna.” #Ket 12:17
16Nina Dibata man diberu e, “Kutambahi kiniseranndu sanga mehuli kulandu. Mesui akapndu sanga mupus. Aminna bage pe metedeh atendu rusur man perbulangenndu, tapi perbulangenndu ngkuasai kam.”
17Nina Dibata kempak dilaki, “Perban ibegikenndu ndeharandu, janah ipanndu buah batang kayu si Kularang e, e maka kena sumpah taneh enda erkiteken kam. Terpaksa kam latih erdahin ngusahaisa kidekah geluhndu, gelah banci iberekenna cukup nakanndu. #Heb 6:8 18Dukut-dukut ras sinuan-sinuan si erduri, e me turah i bas taneh enda nari, janah terpaksa ipanndu sinuan-sinuan i juma. 19Terpaksa igegehindu erdahin alu curcur panasndu, gelah taneh enda banci mereken ulihna man bandu, seh mulih ka kam ku taneh, sabap i je nari kam ijadiken. I bas taneh nari kam ijadiken, janah jadi taneh ka kam mulihken.”
20Ibahan Adam gelar ndeharana Hawa erkiteken ia me nande kerina jelma manusia. 21Kenca bage ibahan TUHAN Dibata uis i bas kulit rubia-rubia nari man Adam ras Hawa, jenari ipakekenNa e man bana duana.
Adam ras Hawa ipelawes i Peken Eden nari
22Nina TUHAN Dibata, “Genduari manusia e enggo seri ras sekalak i bas Kita, erpemeteh kerna si bujur ras si jahat. Ola bere ibuatna buah batang kayu kegeluhen e janah ipanna, jenari nggeluh ia rasa lalap.” #Ket 22:14
23E maka ipelawes TUHAN Dibata ia i bas Peken Eden nari gelah iperjumaina taneh, i ja nari ia ndube ijadiken. 24Arah Timur peken ndai itamaken TUHAN Dibata malekat kerubim, njemak pedang merara si mawat-awat, njagai batang kayu kegeluhen ndai gelah ise pe la banci ndeher ku je.
বর্তমানে নির্বাচিত:
KEJADIN 3: BTX
হাইলাইট
শেয়ার
কপি
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
