Johaneb 7

Jesub tsî ǁîb ǃgâsagu

1Nēn khaoǃgâb ge Jesuba Galileab ǃnâ gere ǃgûma. ǁÎb ge Judeaba xu gere hâbē ǂgao, ǁnāpa gu gere Jodeǁî ǂgaeǂgui-aoga ǁîba ǃgamsa ǀapeǀape xui-ao. 2#Lev. 23:34; Deu. 16:13Xaweb ge ǁaeb Jodeǁîn kaitsēs, ǁHaodi ǁÂudīb tis tsîna ra ǂgaiheb diba ge ǀgū, 3o gu ge Jesub ǃgâsaga ǁîba ge ǂgaoǀkhā, îb Judeab ǁga ǁnā ǁâudīb ǃaroma ǃgû. Tsî gu ge ge mî: “Nēpa xu ǃgû, în sa saoǃgonaona* sats ra dī xūna mû!” 4“Sats ge hūgas tsîna ǂhaisasib ǃnâ ǂanhe tide nētits ga a sâuseno! Nēnats ra dī xuige ǃhūbaiba ǁnâi aitsama ǁgau re!” 5ǁÎb di ǃgâsagu ǂûgu tsîn ge ǁîb ǃnâ ǂgom tama hâ i xui-ao.

6Ob ge Jesuba ǁîga ge ǃeream: “Nēb ge noxopa ǂhanu ǁae tama hâ tita nî ǃgûba. Xawe sago ge ǂgao go ra ǁae-i hoa-i ai a ǃgû ǁkhā. 7ǃHūbaib ge sago ǁkhan ǁoa, xaweb ge tita ǁkhan hâ, ǁîna ta ge ǁoreb tsî ǂkhabadīb tsîn ai ǃkhō-am xui-ao. 8Sago ǃgû re. Tita ge ganupe ǂhomisen tama hâ nē ǁâudīb ǁga ǃgûsa, ti ǁaeb ǀoa tama xui-ao.” 9Nētib mî tsîb ge Jesuba Galileab ǃnâ ge hâ.

Jesub ge ǂhaisase Tempeli tawa ra ǁkhāǁkhā

10Xawe ǃgâsagu ge ǁâudīb ǁga a ǃgûs khaoǃgâb ge Jesub tsîna khoen xa mûhe tamase ge ǃgû. 11On ge Jodeǁîna ǁîba ǁâudīb tawa ôa tsî khoen tawa ǀû tamase gere dî, ǀnîsin mû bi tama ǃkhaisa. 12Khoen ǁaegub ge kai ǀarasasiba ǁîb ǂama ge hâ i. ǀNîn ge “ǁÎb ge a ǃgâi khoe” ti gere mî. Xawen ge nauna “ǁÎb ge gāxaǃnâ tsî ǁaesa ra ǂgaeǂhapu” ti gere mî. 13Xawe-i ge ǀgui-i ân tsîna ǂhaisase ǁîb xa ge ǃhoa ǂgao tama hâ i, Jodeǁî ǂgaeǂgui-aogan gere ǃao xui-ao.

14ǀNaib ge ǁâudība ǁaegub ǃnâ hâ i, amagab ge Jesuba Tempeli ǃoa ǃgû tsî ge ǁkhāǁkhātsoatsoa. 15On ge Jodeǁîna ǁîban ge ǁnâu, o buru tsî ge dî: “Mâtib ǁîba ǁnātikō xūna ǁkhāǁkhāsen-e ūhâ tamaǃâ a ǂan?”

16Ob ge Jesuba ǁîna ge mîba: “Tita ge ti ǁkhāǁkhāsa ǁkhāǁkhā tama hâ, xawe Elob tita ge sîb di ǁkhāǁkhāsa. 17Khoe-i ga Elob di ǂâisa dī ǂgao, o-i ge nî hōǃâ ises nē ǁkhāǁkhāsa Eloba xu hâs, tamas ka io ta aitsama ti ǁkhāsiba xu ra ǃhoasa. 18ǁNā-i ǁî-i di ǁkhāsiba xu ra ǃhoa-i ge ǁî-aitsama ra ǂhanu-ai kaisen, xawe ǁnā-i ǁîba ge sîb di ǃgôasiba ra ôa-i, ge a ǃgâi tsî ǂhanuoǃnâ tama hâ. 19Moseba sado ǂHanuba mā tamab hâ? ǀGui-i âdu tsîn ge Moseb ǂhanuba* ǃgôa tama! Tare-i ǃaroma du tita ǃgam nîse ra ǃgôaǃgon?”

20Os ge ǂnubisa ge dî: “Sats ge ǁgâuab* xa hâǃnâhe! Tari-e satsa ra ǃgam ǂgao?”

21Ob ge Jesuba ge ǃeream: “Sâtsēs ai ta ge khoeba a ǂuruǂuru, o du ge ge ǀūa-ai. 22#Lev. 12:3; Gen. 17:10Xawe du ge sadu tsîna Sabbattsēs* ai ra sîsen, Moseb ǂhanub di ǃgaosa* du ga ǁnâuǀnamo. (ǃHaoǃnāsi ǃgaos ge Moseb ǂhanub aiǃâba xu hâ, Abrahammi ǁaeǃgâsa xu.) 23#Jhn. 5:9Sa ôab di ǃgaos ga Sabbattsēs ai ǁnā, ots kom aiǃgû tsî ǁnāsa ra dīo, Moseb ǂhanubats khôa tidese. O tare-i ǃaroma ta tita ra ǀgoraǃgâhe, khoeba ta ge Sabbattsēs ai a ǂuruǂuru ǃkhais ǃaroma? 24Tā mûs ai ǀgoraǃgâ, xawe ǂhanu-aise ǀgoraǃgâ.”

ǁÎba a Xristu?*

25On ge ǀnîn hîa Jerusalems ǃnâ ge ǁan hâ ina ǁîǃnābe ge dîgu: “Nē khoe tamaba kha ǁîn ra ǃgam ǂgaoba? 26Mû! ǀHûhâsib ǃnâb ge ra ǃhoa, xawen ge xū-e ǁîb ǃoagu mî tama hâ. Sada danaǂgaeǂgui-aoga xare mûǂan gu go nēb amase a Xristu ǃkhaisa? 27Mâti gu nî ǀū? Sada kom a ǂano, mâpa xub nē khoeba ra hāsa. Xristub ga hāo, o i ge khoe-i xare-e ǂan tide mâpa xub ra hāsa.”

28Ob ge Jesuba Tempeli ǃnâb ra ǁkhāǁkhā hîa ǃgarise ge ǂgaiǂui: “Sado ǂan du a tita a tarisa tsî mâpa xu ta ra hāsa? Xawe ta ge tita ǀguib sadu xa a ǀūheba mâǁkhaeba hâ tsî ǁîb ge a ama. 29Tita ge a ǂan bi, ǁîba xu ta ge hā amaga tsî ta ge ǁîb xa sadu ǃoa ge sîhe.” 30O gu ge ǂamkhoega ge dītsâ ǁîba ǃkhōsa; xawe-i ge khoe-i xare-e ǁî-i ǃomma ǁîb ai ǁgui tama ge i, ǁaeb âb ge ganupe hā tama hâ i xui-ao.

31Tsî ǂgui khoen nē ǂnubis ǁaegu ge Tempeli tawa hâ in ge ǁîb ǃnâ ǂgom tsî ge mî: “Xristuba hāb kao, xareb nî nē khoeb ra dī saodi xa ǃnāsa saode dī?”

ǀApaǃnamgu ge Jesuba nî ǃkhōse ra sîhe

32Tsî Farisegu* ge a ǁnâu ǂnubis ra ī ge xūna ǁîb xa ǀhoeǃhoa ǃkhaisa, o gu ge danapristergu tsî Farisegu tsîga ǀapaǃnamga Jesuba nî ǃkhōse Tempeli ǁga ge sî. 33Ob ge Jesuba ǁîgu ǃoa ge mî: “ǂKhari ǁaero-i ǀgui-e ta ge sadu ǀkha nēpa ra hâ ǂgao. Tsî ta ge tita ge sîb ǁga ǁkhawa nî oa. 34Ôa te du ge nî, xawe du ge hō te tide, ǁnāpa du a sī ǁoa xui-ao.”

35O gu ge Jodeǁî ǂgaeǂgui-aoga ǁîǃnābe gere dîsen: “Mâǀî ǃgûsab ra ǀape? Sada khoen hîa Grike ǀkharigu ǃnâ ǀgaruǀgaruhe hân ǃoa ǃgû tsî Grikeǁîna ǁkhāǁkhāb nî? 36Mâtib ra ǂâibasen ‘Ôa te du nî, xawe du hō te tide’ tsî ‘Tita hâpa du a sī ǁoa’ tib ra mîo?”

Ûiba ra mā ǁgam-i

37Kaitsēs, ǁâudīb dis aib ge Jesuba khâimâ tsî nēti ge ǂgaiǂui: “Khoe-i ga ǁgâo, a-i tita ǃoa hā tsî ā! #Lev. 23:26 38#Ese. 47:1; Sax. 14:8Tita ǃnâ ra ǂgom-e, a-i hā tsî ā! Xoas ra mî amaga, ǁî-i ǃnāba xu gu ge ûitsama ǁgamǃāga nî dâu.” 39“Ûitsama ǁgam-i” xab gere ǃhoa, ob ge Gagab mâ-i hoa-i ǁîb ǃnâ ra ǂgom-i nî ǃkhōǃoab xa gere ǃhoa. Xaweb ge nē Gagaba noxopa māhe tama hâ, Jesub ganupe ǁîb ǂkhaisib ǃnâ ǂgâ tama amaga.

Khoen ǁaegu hâ ǀgoras

40ǂGuin ǂnubis din ge nē mîsan ge ǁnâu, o ge mî: “Nē khoeb ge amase a ǁnā Kēbo-ao.” 41On ge nauna ge mî: “ǁÎb ge a Xristu.” Xawen ge nauna ge mî: “ǁÎ ǁoa a! Xristuba kha Galileaba xub nî ǀkhī? 42#2Sam. 7:12; Mix. 5:2Xoas ge ǃgāsase ra mî, Xristub nî Davidi suriba xu, Betlehems, ǃāros hîab ge gao-aob Davida ǁanǃnâ hâ is ǃnâ ǃnae ǃkhaisa?” 43O-i ge ǁhaiǃāgu-e ǂnubis ǃnâ, ǁîb ǃaroma ge hā. 44Tsî ǀnîn hîa ge ǃkhō bi ǂgao hâ in ge ǀgui-i tsîna ǁî-i ǃomma ǁîb ai ǁgui tama ge i.

Jodeǁî ǂgaeǂgui-aogu di ǂgomoǃnâsib

45Tsî Tempelǃûi-aogu hîa ǁîba nî sī ǃkhōse ge sîhe hâ i gu ge danapristergu tsî Farisegu ǁga ge oahā. “Tare-i ǃaroma go hā-ū bi tama hâ?” ti gu ge ge ǂgaoǀkhā gu.

46“Sige ge tātsēs tsîna ǁnāti ra ǃhoa khoe-e ǁnâu tama hâ!” ti gu ge ǃûi-aoga ge ǃeream.

47“Sago tsîna go ǂgaeǂhapuhe?” ti gu ge Farisega ge dî gu. 48“Sage danaǂgaeǂgui-aogu tsî Farisegu tsîn ǃnâ ǁnāti ī ǀgui-e hâ-i a, ǁîb ǃnâ ra ǂgom-e? 49Nē ǂnubis Moseb ǂhanuba ǂan tamas ge ǀâxarexūhe hâ!”

50 # Jhn. 3:1-2 Ob ge Nikodemub, ǂgaeǂgui-aob hîa Jesub ǀkha ǀnai ge ǀhao hâ iba ǁîgu ǃoa ge mî. 51“ǂHanu-i kha a khoeba aibe ǀgoraǃgâsa, ǁnâuǃgâheb nîs aiǃâ?” 52O gu ge ge ǃeream: “Sats tsîna Galileab di? Xoade ôaǃnâ î mû, Galileaba xu i kēbo-ao-e hā tamasa.”#7:52 Kēbo-ao-e hā tamasa: ǀGui xoaǁguib ge Kēbo-aob ge hā tide ti ūhâ.

বর্তমানে নির্বাচিত:

Johaneb 7: KKG20

হাইলাইট

কপি