Genesis 3
3
Khoen di ǁnâuǀnamoǃnâsib
1ǀAob ge ǃKhūb Elob ge kuru hoaraga ǀgurun ǃgâ-ai ge ǀhôagao i ǀguruba. ǁÎb ge tarekhoesa ge dî: “Amabes ǃnâb kha Eloba nē ǃhanab ǃnâ mâ haidi ǂû-i xare-e ro ǂû tide, ti ge mî?”#ǂHai. 12:9; 20:2
2Os ge ǁîsa ge ǃeream: “Mâ hai-i nē ǃhanab ǃnâ hâ-i di ǂû-i hoa-em ge a ǂû ǁkhā, 3ǁaegub ǃnâ mâ hais din ǀguin ose. Elob ge ǂû tamas ka iom tsâǀkhās xawesa hî tide tsîm ǁnāsam ga dī, o nî ǁō ti ge mî.”
4Ob ge ǀaoba ge mîba si: “ǁŌsa ro ge ǁō tide. 5Elob ge ǁîsa xu ro ga ǂû, o ro ǁîb khami ī#3:5 ǁÎb khami ī: Tamas ka io Elob khami ī tamas ka io elogu khami ī. tsî ǃgâin tsî tsūn ǁaegu ǀgoras di ǂansa nî ūhâ ǃkhaisab ǂan xui-ao ǁnāti ge mî.”
6Os ge ǁîsa mâtikōses nē haisa îsa ǃkhais, mâtikōsen ǁîs ǂûna ǂûs ǃaroma ga ǃgâi ǃkhais tsî mâtikōse i ǃgâi ǁîs ga gā-ai ǃkhaisas tsîna nē haisas ge kō, o ge mû. Tsîs ge ǁnā hais di ǂûn xa ū tsî ge ǂû. ǁNās khaoǃgâs ge aoba ge mā, tsîb ge ǁîb tsîna ge ǂû. 7ǂÛtoa ra ges khaoǃgâ ra ge ǁnâuǃāba hō tsî ǀōǀkhā ra hâ ǃkhaisa mûǂan, o ra ge ǀnomahais di ǂgaegu ǀkha ǃgaera ge ǂomǁaebasen.
8ǁNāǃoe ra ge ǃKhūb Elob ra ǃhanab ǃnâ ǃgûma ǃkhaisa ra ge ǁnâuo, haidi ǁaegu ge gau. 9Xaweb ge ǃKhūb Eloba khoeba ǂgai tsî “Mâpats hâ?” ti ge dî.
10Ob ge “ǃHanab ǃnâ ta go ǁnâu tsi, o ta ge ǃao tsî satsa xu go gau, ǀōǀkhā ta hâ xui-ao” ti ge ǃeream.
11Ob ge Eloba khoeba ge dî: “Tari-e ǀōǀkhāts hâ ǃkhaisa go mîba tsi? Tita ǁîsa xuts ǂû tide ti mîmā tsi hâ haisa xuts go ǂû?” 12Ob ge “Sats ge tita ǀkhas nî hâse mā te khoes ge hais di ǂû-e go mā te, tsî ta ge go ǂû” ti ge ǃeream.
13Ob ge ǃKhūb Eloba khoesa “Tare-i ǃaromas nēsa go dī?”#2Kor. 11:3; 1Tim. 2:14 ti ge dî.
Os ge ǁîsa “ǀAob xa ǂgaeǂhapuhe tsî ta ge go ǂû” ti ge ǃeream.
Elob ge ǀgoraǃgâsa ra gowaǂui
14Ob ge ǃKhūb Eloba ǀaob ǃoa ge mî: “Khoesats go ǂgaeǂhapu xui-aots ge nē ǀâxare ba nî ǃkhōǃoa: Sats ǀguits ge hoa ǃaub di xamarin tsî ǀgurun ǃnâ sa ǃnā-arib ai ǂhana tsî ûits hâs kōse tsaraba nî ǂû. 15Sats tsî khoes hâro ǁaegu ta ge khākhoegusisa nî dī, tsîb ge sa surib tsî ǁîs di surib tsîna hoaǁae nî khākhoegu. ǁÎs surib ge sa danasa nî ǂkhūǂkhū tsî sats ge ǁîs suriba#3:15 ǁÎs suriba: Tamas ka io ǁîna. ǃnôas ai nî nâ.”#ǂHai. 12:17
16Tsîb ge khoesa ge mîba: “ǀGamǀkhās tsî ǁorab âs ǃnâ ta ge sa tsûba nî ǂguiǂgui, xawes ge nēn hoan ǃnâ sa aob ǃoa nî tura tsî xawe ǁîb ǃnaka nî ǃgamǃgamsen.”
17Tsîb ge Adamma#3:17 Adamma: Nē ǀons ge Hebregowab ǃnâ khoesib ti ra ǂâibasen. ge mîba: “Sa tarasa ǃgâ tsîts ge ǁîsa xuts nî ǂû ǃkhaisa ta ge ǃkhâi tsi haisa xu go ǂû. Tsîb ge ǁnātits go dī ǃkhais ǃaroma ǃhūba ǀâxareb ǃnaka nî hâ. Kaisets ge ǃgomse sa ûitsēdi hoade, ǂâu hâ ǂû-eb nî ūǀkhība tsise ǁîb ai nî sîsen.#Heb. 6:8 18ǁÎb ge ǁkhūn tsî ǀkhininina nî ūǀkhī, tsîts ge ǃgarob haiǂûna nî ǂû. 19Kaise ǀgaisase sîsen tsîts ge ǃhūb nî xū-e ūǀkhīse nî aosen, ǁîba xuts ge kuruhe ǃhūb ǃoats nî oas kōse. ǃHūba xuts ge ge kuruhe, tsîts ge ǁkhawa nî ǃhū kai.”
20Adammi ge taras âba Eva#3:20 Eva: Nēs ge Hebregowab mîs hîa ûi ti hâs, nē mâsib ǃnâs ra sîsenūheo khoen ǁga ra ǁnaeǁgaus ǀkha ǀguiti ra ǀō. ti ge ǀonǂgai, hoaraga khoen di ǁgû kais nî xui-ao. 21Tsîb ge ǃKhūb Eloba Adammi tsî ǁîb taras hâra khōsarana kuruba tsî ge ana.
Adammi tsî Evas hâra ge ǃhanaba xu ra ǃgû kaihe
22Tsîb ge ǃKhūb Eloba ge mî: “Nēsisab ge khoeba sage di ǀguib khami ī tsî ǃgâin tsî tsūn ǁaegu ǀgorasa a ǂan.#Gen. 2:9 ǁÎb ge ǃommi âba ǀhōǂui tsî ûib di haisa xu ū tsî ǂûsa mā-amhe tide, ǁnāsab ga dī, ob nî ǀamose ûi xui-ao.”#ǂHai. 22:14 23ǁNātib ge ǃKhūb Eloba Adamma Edenǃhanaba xu ge ǃgû kai, ǁîba xub ge kuruhe ǃhūbab sī nî sîsense. 24Tsîb ge aiǂoasǀkhāb ǃhanab dib ai ûitsama kurusaben tsî ǁhabu ra gôa-i, hoa ǀkhāgu ǁga ra dabasen-e ge mâi. Nēs ge ûiba ra mā hais tawa i khoe-i xare-e nî ǀgū ǃkhaisa ǁkhaes ǃaroma ge dīhe.
বর্তমানে নির্বাচিত:
Genesis 3: KKG20
হাইলাইট
শেয়ার
কপি
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
