Genesis 13
13
Abrammi tsî Loti tsîkha ge ra ǀgora
1Abrammi ge ǃkhawagasǀkhāb Kanaanǃhūb dib ǁga Egipteba xu, ǁîb taras tsî hoaraga xūn âb ǀkha ge doe. Loti tsîn ge Abrammi ǀkha ge doe. 2Abrammi ge kaise ge ǃkhū hâ i tsîb ge ǀuiǀnūǀgoan, goman, ǃhuniǀurib tsî ǁkhāti ǀhaiǀuriba ge ūhâ i. 3ǁÎb ge aiǃâb ǃoa Betels ǀkhāb ǁga ge doe. Tsî Betels tsî Ais hâra ǁaegu, ǀnaib ge hâ i ǃkhaib, 4altar-eb ge ǂnubi hâ ib tawa ge sī. ǁNāpab ge ǁîba ǃKhūba ge ǀgoreǀî.
5Loti tsîn ge ǁîb di ǀuiǀnūǀgoan, goman tsî ǁîb di ǂhunuma ǀaokhoen tsî ǃgān tsîna ge ūhâ i. 6Tsîb ge ǃhūba ǁîkha hoakha di ûitsama xūn ǃaroma, ǀguipa hâs ǃnâ ǂâu hâ ǃûǃkhai-e ge ūhâ tama hâ i, ǁîkha ge kaise ǂgui ûitsama xūna ūhâ i xui-ao. 7Tsîb ge Abrammi ǀgoana ra ǃûigu tsî Loti ǀgoana ra ǃûigu ǁaegu ǂkhababa ge mâ. ǁNā ǁaeb ǃnân ge Kanaanǁîn tsî Perisǁîn tsîna noxopa nē ǃhūb ǃnâ ge ǁan hâ i.
8Ob ge Abramma Lota ge mîba: “Sakhom ge khoexakhoegu a khoekhoma, tsî-i ge ǂkhaba-e sa ǃûi-aogu tsî ti ǃûi-aogu ǁaegu a hâ ǁoa. 9ǁNā-amaga a khom ǀgora. Mâ-i ǀgui-i ka xawets ǁî-i ǃnâ ra ǁan ǂgao ǀkhā-e ǁhûi re. Sats ga ǀgui ǀkhāba ǁhûi, o ta ge tita nau ǀkhāba nî ū.”
10Ob ge Lota kōǂnami tsî hoaraga Jordanni ǃgoaǃnāb, Soars ǁga garub ǃKhūb di ǃHanab khami kai ǁgam-e ūhâ tamas ka io Egipteb khami ī ǃkhaisa ge mû. Nēs ge ǃKhūb nî Sodoms tsî Gomoras tsîra hîkākās aiǃâsa.#Gen. 2:10 11Tsîb ge Lota hoaraga Jordanni ǃgoaǃnāba ǁhûibasen tsî aiǂoasǀkhāb ǁga ge doebē. ǁNās ge nē ǀgam khoekha ge ǀgora ǀgausa. 12Abrammi ge Kanaanǃhūb ǃnâ ge hâ tsîb ge Lota ǃādi ǁaegu, Jordanni di ǃgoaǃnāb ǁga, Sodoms, 13ǂkhabaxa tsî ge kaise ǃKhūb aiǃâ ǁore khoen di ǃās ǀgūseb ǁga ge doe.
Abrammi ge Hebrons ǁga ra doe
14Loti ge Abramma xu ǀgoras khaoǃgâb ge ǃKhūba Abramma ge mîba: “ǁNāts mâ ǃkhaiba xu ǀapas, ǃkhawagas, huriǂoas tsî aiǂoasǀî kō re. 15ǁNāts ra mû hoaraga ǃhūba ta ge sats tsî sa hoaraga suriba ǀamose nî mā.#ǃNǃkh. 7:5 16Tita ge sa suriba ǃhūbaib di tsarab khami nî ǂguiǂgui, tsî khoe-i kom ga ǃhūbaib tsaraba ǃgôa ǁkhāo, ob ge sa surib tsîna nî ǃgôahe ǁkhā. 17Khâi, îts hoaraga ǃhūbaib ǃnâ ǃgû, gaxusib tsî ǂhabasib âb ǃnâ, ǁîba ta nî mā tsi xuige.”
18Ob ge Abramma tentomdi âb ǀkha doe tsî Mamres di aikehaidi, Hebrons ǀgūse hâdi tawa sī ǁan tsî ǃKhūba ǁnāpa altar-e ge ǂnubiba.
বর্তমানে নির্বাচিত:
Genesis 13: KKG20
হাইলাইট
শেয়ার
কপি
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
