LUKA 6

1Mba ha tangwa lia Sambata wapalikile mu minda; ni tumbaji twenyi yahulula nona, yalia, nikujilakumuna mu moko jo. 2Alioze amwe a kuli A-Fwariseu ambile kuli ayo ngwo, Kuchi te nunalingi chize kuchalitele ni shimbi kulinga ha tangwa lia Sambata? 3Yesu waakumbulwile ngwenyi, Kunwatangile chipwe chize alingile David, muze evwile zala, iye ni waze apwile hamwe nenyi, nyi? 4Ngwe chize anjilile mu zuwo lia Zambi, wanjile mbolo ja kutumbieka, walile, wahanyine kuli waze apwile hamwe nenyi, jize kuchalitele ni shimbi kulia shina hali asasendote wika? 5Iye wambile kuli ayo ngwenyi, Mwe Mwana Mutu iye mwenya Sambata nawa.

6Mba ha tangwa lia Sambata likwo nawa, wanjilile mu sunangonga, walongesele. Mwapwilemo mutu ni kwoko lienyi lia chindume lia kusosewa. 7Akwa kusonyeka ni A-Fwariseu amulayilile, kachi mawuka ha tangwa lia Sambata, hanga akawane chitela muli iye. 8Alioze iye wanyingikine manyonga jo; wambile kuli mutu yoze wapwile ni kwoko lienyi lia kusosewa ngwenyi, Katuka, umane mukachi. Iye wakatukile, wamanyinemo. 9Yesu wambile kuli ayo ngwenyi, Mungunuhula ngwami, Muchilita ni shimbi ha tangwa lia Sambata shina kulinga yipema nyi, shina kulinga yipi? Shina kulamwina mwono nyi, shina kwonwona? 10Iye wakengesele hali ayo eswe, wambile kuli iye ngwenyi, Olola kwoko lie. Iye waliolwele, ni kwoko lienyi liahindukile lingunu ngwe likwo. 11Alioze o azalile tò ni ufwatulo, ahanjikile umwe kuli mukwo ha chize malinga kuli Yesu.

12Ha matangwa aze wayile ku mulundu mukulemba; iye wahwishile ufuku weswe nikulemba kuli Zambi. 13Muze hapwile mwalwa, watambikile tumbaji twenyi; iye watongwele hakachi ko kumi ni aali, eno nawa waalukile jina ngwenyi, Apostolo. 14Ngwo, Semone, mwenawo amulukile jina likwo ngwo, Petulu, ni mwanakwo Andeleu, ni Tiangu ni Yoano, ni Fwilipe ni Mbatolomeu; 15ni Mateu ni Tomase, ni Tiangu mwana Alefweu, ni Semone, amuvulukile ngwo, Ka-Zelo. 16Ni Yundase mwana Tiangu, ni Yundase Ka-Keriote, mwenawo nawa wapwile mwe mukwa kuhandukulula.

17Iye wapalumukine hamwe no, wamanyine homa ha Salama, ni mbunga yinene ya tumbaji twenyi, ni chizavu chinene cha atu a ku Yundeya mweswe ni a ku Yerusaleme, ni a ku mbaka ya Teru ni Sendone, eno ejile mukumwivwa, akaahindwise ku misongo yo; 18iye wawukile waze aapinjishile kuli maspiritu a luchisa. 19Ni mbunga yeswe afupile kumusa minwe; mumu tachi jatuhukile muli iye, jahindwishile eswe.

20Iye wahetwile meso jenyi hali tumbaji twenyi, ngwenyi,

Kunwawaha, yenu, yiswale; mumu wanangana wa Zambi niwenu.

21Kunwawaha, yenu nwakwivwa zala haliapwila, mumu kumunukakuta.

Kunwawaha, yenu nwakulilalila haliapwila, mumu kumunukaseha.

22Kunwawaha, yenu, muze atu manuvwila kole, muze malihandununa ni yenu, manuchoka, mambila haze jina lienu ngwe lipi, mumu hali mwe Mwana Mutu; 23Wahililenu ha tangwa lize, tumbwokenu ni uwahililo; mumu kwononona chenu chinene mwilu, mumu chizechene akako alingile kuli aprofeta.

24Alioze lamba lienu, yenu pichi! mumu hinunatambula kulembejeka chenu.

25Lamba lienu, yenu nwakukuta haliapwila, mumu kumunukevwa zala!

Lamba lienu, yenu nwakuseha haliapwila! mumu kumunukanenganyana nikulila!

26Lamba lienu, muze atu eswe manuchichimieka! mumu chizechene akako alingile kuli aprofeta a kwonga.

27Alioze kuli yenu nwakwivwa, ngwami, Zangenu akwa kole jenu, lingenu kanawa kuli waze akunuvwila kole, 28Wahisenu waze akunushinga, lembenu hali waze akunulinga chipi. 29Kuli yoze makulamba ha tafu, mwehe tafu likwo nawa, kuli yoze mafupa kuchiza mbinja ye, kanda ukamukanjisa kuchiza chikuto che nawa. 30Hana kuli mweswe makwita, kuli yoze machiza yikumba ye, kanda ukayita nawa. 31Chizechene ngwe nunazange atu akalinge kuli yenu, lingenu nawa kuli ayo chizechene.

32Nyi kachi nunazange waze akunuzanga, hahi manusakwilila? Mumu chipwe yivulumunyi kakuzanga waze akwazanga. 33Kachi nwakulinga yipema kuli waze akulinga yipema kuli yenu, hahi manusakwilila? Mumu chipwe yivulumunyi kakulinga chizechene. 34Mumu kachi munuhana mukuli kuli waze munutalatala kutambula, hahi manusakwilila? Mumu chipwe yivulumunyi kakuhana mikuli kuli yivulumunyi, hanga akatambule chizechene. 35Alioze zangenu akwa kole jenu, lingenu yipema kuli ayo, hanenu mukuli, kanda nutalatala chize mahilwisa; ni kwononona chenu kumuchikapwa chinene; kumunukapwa ana ja mwe Chitunda: mumu iye mukwa utu kuli akwa kaleleso ni yingulungulu. 36Pwenu akwa keke kashika chizechene ngwe Tatenu nawa iye mukwa keke.

37Kanda nukapatwila akwenu, mba kechi kanupatwila; kanda nukahisa mba kechi kanuhisa; konekenenu, mba kumakanukonekena. 38Hanenu, mba kumakanwaha; njongo yipema, ya kukona, ya kunyikumuna hamwe, ya kusupwoka, kumakayihana mu hina lienu, mumu ni cheseko chize munweseka nacho, kumakanwesekela cheka nawa.

39Iye wahanjikile nawa chishima kuli ayo ngwenyi, Kapuputa mahasa kusongwela kapuputa, nyi? Eswe aali, kechi kaholokela mu wina nyi? 40Kambaji keshi kuhiana longeshi yenyi: alioze mweswe mungunu kumakapwa chizechene ngwe longeshi yenyi. 41Alioze kuchi te unatale ku koma kaze kali mu liso lia mukwenu, alioze kushi kumona mukambo uze uli mu liso lie? 42Hanji ngwe kuchi muhasa kwamba kuli mukwenu ngwe, Mukwetu, nguchize koma kaze kali mu liso lie, muze yena mwene kushi kumona mukambo uze uli mu liso lie? Chilembese, Uliange kuchiza mukambo mu liso lie, mba mumona kanawa kuchiza koma kaze kali mu liso lia mukwenu.

43Mumu mutondo upema uze muwima mihuko yipi wakuhi niumwe; chipwe mutondo upi uze muwima mihuko yipema wakuhi niumwe. 44Mumu mitondo yeswe kanayinyingika ku mihuko yayo; mumu atu keshi kuhela makuyu ku mingonga, chipwe uva ku mikalale, ka. 45Mutu mupema ku upite upema wa mbunge yenyi masolola yipema, ni chingulungulu ku upite wa ungulungulu wa mbunge yenyi masolola ungulungulu; mumu ku kulumbama cha mbunge kanwa mulihanjika.

46Kuchi te nunanguvuluka ngwenu, Mwene, Mwene, alioze kunushi kulinga yuma yize ngunambe? 47Mweswawo meza kuli yami, mevwa maliji jami, maalinga, mungunulweza yoze malifwa nenyi: 48kanapu ngwe mutu kanatungu zuwo, washimine nikujotola; wasele fundamentu ha liwe. Muze mihwiji yejile, yalundumukine ha zuwo lize, kuyahashile kulinyikisa, mumu alitungile ha liwe. 49Yoze mevwa alioze keshi kulinga, kanapu ngwe mutu yoze watungile zuwo ha mavu, ni fundamentu yakuhi; ha lienalio mihwiji yalundumukine, haze hene liapuzukile, ni kupuzuka cha zuwo lize chapwile chinene.

বর্তমানে নির্বাচিত:

LUKA 6: Csa

হাইলাইট

কপি