LUKA 5

1Shimbu mbunga amushinjikile mukwivwa liji lia Zambi, wamanyine ku sesa lia Chitende cha Ngenezare; 2wamwene maulungu aali ku sesa lia Chitende; alioze akwa kutela yishi hatuhukamo kulu, te kanakoso manda jo. 3Wanjilile mu ulungu umwe uze wapwile wa Semone, wamwichile asosoloke hakepe ku ngenge; iye watwamine nikulongesa mbunga ku ulungu. 4Muze alitwaminyine kuhanjika wambile kuli Semone ngwenyi, Shinjika haze hasuku, nusunwise manda jenu nukoze. 5Semone wakumbulwile ngwenyi, Mwata, twakilikitanga ufuku weswe, kutwakwachile niumwe; alioze ha liji lie mungusunwisa wanda. 6Muze te halinga chino, ajingilikile chizavu chinene cha yishi, ni wanda wo watanukine. 7O alahwile kuli masepa jo waze apwile mu ulungu ukwo, eze aakwase; o yeza, yazalisa maulungu eswe aali, chocho aputukile kushimbama. 8Alioze Semone Petulu muze achimwene, wafulamanyine ku makungunwa ja Yesu, ngwenyi, Mwene, katukenu kuli yami, mumu nguli chivulumunyi. 9Mumu wakomokene ni waze eswe apwile hamwe nenyi, ha yishi waze ozele; 10chizechene nawa Tiangu ni Yoano, ana ja Zembendeu, eno apwile masepa ja Semone. Yesu wambile kuli Semone ngwenyi, Kanda wivwa woma; chize ku haliapwila ndo ku miaka kumukatela atu. 11Mba muze te haneha maulungu jo hashi, yehuka yeswe, yamukaula.

12Muze apwile mu limbo limwe, kumanyi, mwapwile lunga wa tò ni mbumba, muze amwene Yesu, wafulamanyine, waliumbile kuli iye, ngwenyi, Mwene, nyi unapale, muhasa kungupemesa. 13Iye wolwele kwoko lienyi, wamusele minwe, ngwenyi, Ngunapale; pwako mungunu; haze hene mbumba yenyi yamukatukile. 14Iye wamuhele koki kanda akaambulwila niumwe: alioze ngwenyi, Yako kwe, ukalilweze kuli sasendote, ukalambule ha kupemesa che, ngwe ambile Mose, chikapwe Shindakenyo kuli ayo. 15Alioze lufuma wenyi wamwanganyine mwamwa kuhiana nawa, ni mbunga yinene akungamine mukwivwa, hanga akaawuke ku kukokoloka cho. 16Alioze wapwile nikuyaya ku puya, nikulembako.

17Mba ha tangwa limwe shimbu machilongesa, A-Fwariseu ni akwa shimbi atwamineko, waze te hakatuka ku yihunda yeswe ya mu Ngalileya ni ya mu Yundeya ni a ku Yerusaleme, ni tachi ja Mwene japwileko kwahindwisa. 18Kumanyi, malunga anehene ha muhela mutu umwe wapwile mukwa kalepa; o afupile kumunjisa, akamutumbike kumeso jenyi. 19Muze kawanyine haze mamunjishila, mumu ha mbunga, anyinyine ha fulumba ya zuwo, amusunwishine ndusu mu telya hamwe ni chalo chenyi mukachi, kumeso jenyi. 20Iye, ha kumona Ufulielo wo, ngwenyi, Yena lunga, ngunakukonekena milonga ye. 21Akwa kusonyeka ni A-Fwariseu aputukile kunyonga ngwo, Iya yono unahanjika kushililika Zambi? Iya mahasa kukonekena milonga shina Zambi wika? 22Alioze Yesu, nikunyingika manyonga jo, wakumbulwile ngwenyi, Kuchi te nunanyongo mu mbunge jenu? 23Chashi chika shina kwamba ngwami, Ngunakukonekena milonga ye, nyi? Shina kwamba ngwami, Katuka, wende? 24Alioze hanga nunyingike mwe Mwana Mutu chiyulo akwete hano hashi cha kukonekena milonga, (wambile kuli mukwa kalepa) ngwenyi, Ngunambe kuli yena ngwami, Katuka, anda chalo che, uye ku zuwo lie. 25Haze hene wakatukile kumeso jo, wanjile chalo haze wapombele, iye wakatukile nikuya ku zuwo lienyi nikuchichimieka Zambi. 26Eswe alishikishilile, o achichimiekene Zambi; nikuzala tò ni woma, ngwo, Hitunamono yuma ya yipupu musono uno.

27Kulutwe lia yino yuma, watuhukile, wamwene mukwa kufwetesa lijimu, jina lienyi Levi, kanatwama mu zuwo lia lijimu, wambile kuli iye ngwenyi, Ngukaule. 28Iye Wehukile yeswe, wakatukile, wamukawile.

29Mba Levi wamulingilile chiteleka chinene mu zuwo lienyi; kwapwile mbunga yinene ya akwa kufwetesa lijimu ni akwo waze atwamine ku mesa hamwe no. 30A-Fwariseu ni akwa kusonyeka jo alinyenyetene hali tumbaji twenyi, nikwamba ngwo, Kuchi te nunali, nunanu hamwe ni akwa kufwetesa lijimu ni yivulumunyi? 31Yesu waakumbulwile ngwenyi, Angunu keshi kufupa mbuki; alioze waze ayiza. 32Chejile mukutambika akwa ululi alioze yivulumunyi alikonyeke.

33O ambile kuli iye ngwo, Kuchi te tumbaji twa Yoano akulitwamina kulia kanji, nikulemba; chizechene waze a kuli A-Fwariseu nawa, alioze nie kakulialia, kakunwanwa? 34Iye ngwenyi, Munuhasa kukanjisa akwa ulungi alitwamine kulia shimbu sandungi ali hamwe no, nyi? 35Alioze matangwa makeza muze makachiza sandungi kuli ayo, hohene makalitwamina kulia ha matangwa aze. 36Iye wahanjikile cheka nawa chishima kuli ayo ngwenyi, Niumwe mapula chando ku hina liaha akachise ha hina likulu, nyi chocho, mapula liaha, ni chando cha liaha kuchishi kulita ni likulu. 37Mutu niumwe malonga vinyu yaha mu tuku ja malambu akulu; kuchina vinyu yaha muyimengununa malambu, yene muyimwangana, ni malambu mafwa. 38Alioze vinyu yaha mayilonga mu tuku ja malambu aha, ni yeswe yiali muyiwaha. 39Mutu niumwe muze hanwa vinyu yikulu, mazanga yaha; mumu mamba ngwenyi, Yikulu Shinaho.

বর্তমানে নির্বাচিত:

LUKA 5: Csa

হাইলাইট

কপি