Mark 5
5
1Oˑnă̱h' do̱nˑda'ă̱ˑno̱nˑdaˑwă̱'ă̱nt neh sgaˑnyòˑdăˑdi'gwa hoˑdiˑyo̱sˑo̱h he'o̱ˑweh' hoˑno̱'ă̱nˑjaˑdeħ ne Gaˑdaˑrenes.
2Neħ, dih, noˑnă̱h' hoˑdeħ'no̱hˑdah'gwă̱h ne' gaˑo̱ˑwaˑgo̱o̱', waħ'oˑgo̱nˑdaˑdyeħ' de'o̱ˑwa̱nˑdăh'do̱h ne da'yaˑgă̱ħt' he'o̱ˑweh' dyo̱nˑda'dehˑsa'do̱hˑgwa'no̱h' no̱'gweh', neħ' ho'aaħ' noˑtwai'shăˑtgiħ.
3Neħˑhuh' ni'aˑno̱ˑgăˑdyeħs' he'o̱ˑweh yo̱nˑda'dehˑsa'do̱hˑgwa'no̱h; tă̱ħ'ă̱h, kuh, deħˑso̱ˑgaaħ' no̱'gweh deˑo'gweˑnyo̱o̱ na'osˑhă̱ˑo̱nˑdă̱ħ; tă̱ħˑă̱h deħˑo'gweˑnyo̱o̱h', ha'eħˑgwaħ, ne' deˑgă̱ˑo̱ˑwe'oˑdaˑho̱h';
4Neħ gaˑi'o̱ˑnih', heh, oˑnă̱h' weˑsòħ niˑyò'ăhˑdo̱h ne daħˑji'aħˑneħ' oˑnaeħ' shaˑsha'o̱nt, neħ gaˑye'ăhˑdah'go̱h ne deˑyo̱'daˑdah'siħˑda'no̱hˑso̱n'dahˑgwaħ', kuh, ne deˑgă̱'o̱ˑweˑoˑdaˑho̱h; da neħ' ne de'aˑyaħkˑho̱'o̱ħ, sho̱', ne' deˑgă̱ˑo̱ˑwe'oˑdaˑho̱h'; neħ, kuh, ne deˑyo̱n'daˑdah'siħˑda'no̱hˑso̱n'dahˑgwaħ' deˑa'itˑhaħ', sho̱; tă̱ħ'ă̱h, kuh, so̱ˑgaaħ' no̱'gweh deˑo'gweˑnyo̱s'o̱h naˑoħˑni'go̱ˑă̱ˑgwa'ihˑsiħ;
5Dyòtˑgo̱nt', gwaħˑhuh', ne' wahˑso̱n'daˑdeˑnyo̱ħ', kuh ne wă̱ˑnĭs'hăˑdeˑnyo̱ħ, neħˑhuh' haħˑde'oˑdaˑwă̱ˑnyee heˑgaˑe'no̱nˑdeˑnyo̱ħ'; kuh he'o̱ˑweh' o̱nˑda'dehˑsa'do̱hˑgwa'no̱h, daah'să̱nˑtwah'seħs, haˑdat'heˑno̱'no̱h, gwaħˑhuh, neħ haˑye'ăħˑdahˑgwaħ' ne gaħˑsgwăˑăħˑsho̱ħ'o̱h.
6Neħˑhuh, dih', noˑnă̱h' wa'oˑgă̱ħ ne Jeˑsus, weˑă̱h, haħˑde'oˑă̱h'daˑdo̱h', haħˑde'oˑyaħ'daˑno'o̱hˑgwa'no̱ħ',
7De'ohˑsă̱ntˑwaħ'o̱h, kuh, thoˑdeħ'hasˑdo̱s'o̱h; haˑwă̱ă̱h, A naħˑot' aˑga'diˑwaˑdeħ niiħ' hehˑsyaħˑdaˑdeeħ', Jeˑsus, iis ne' yaˑaˑwak' ne siˑgwa'diˑhah heħˑtgă̱h' Ha'wĕnˑniˑyòħ'? Neħ Naˑwĕnˑniˑyòħ' hohˑsă̱n'na̱ˑgo̱' dak ha'wihˑdʋk' oħˑgo̱ˑyaˑdo̱'ehˑsyo̱hˑgwă̱ħ', na'gă̱ˑa̱a̱k' daħˑdes'gaˑdo̱h'ho̱ˑga'nyahˑdo̱o̱ħ.
8(Neħ să̱ħ'ă̱h naˑwă̱'a̱hˑseeh, Daˑjaˑgă̱ħt' haˑyaħ'daˑdeħ' no̱'gweh, iis, ne satˑhwa'isˑhăˑtgiħ.)
9Oˑnă̱h' ho'o̱nˑdo̱sˑo̱h', A naħˑoh'dă̱ħˑă̱h' syaˑso̱h'? Neħ ne detˑhos'nyeħˑo̱h', haˑwă̱ă̱h, Leˑgion, neh'huh gyaˑso̱h'; neħ, să̱ħ'ă̱h, no̱ˑgwat'gaħˑdeħ'.
10Neħ ne weˑsòħ' waˑoˑdo̱'ehˑsyo̱hˑgwă̱ħ' na'gă̱ˑa̱k da'go̱ˑyaˑdoˑwiiħ' aaˑgo̱'yaħˑdiˑtgă̱h' he'yo̱ˑă̱ˑjaˑdeħ ne neħˑhuh'.
11Da neħ', dih, ne' neħˑhuh' dòsˑgă'o̱h, hoˑno̱n'daˑdeˑnyo̱ħ', gă̱nˑdyòh'goˑwaˑnă̱h' ne gwĭsˑgwis' dyoˑno̱n'dekˑho̱'niˑaˑdyeħs.
12Neħ' ne' gaˑgweˑgo̱h' naˑdi'nĭsˑhe'oˑno̱ħ' waˑo̱ˑwa̱nˑdo̱'ehˑsyo̱h'gwă̱ħ, hoˑnă̱ă̱h', neħˑhuh' da'gwaˑgo̱nˑdʋk' heˑwaˑdi'yaħˑdaˑdeħ' ne' gwĭsˑgwis; neeħ'', ha'yakˑhi''yaħˑdyo̱ħs.
13Oˑnă̱h', sho̱, kuh', naeh, ne Jeˑsus waˑgo̱ˑno̱k'dotˑhas'. Neħ ne' waˑdiˑyaˑgă̱ħt' noˑno̱ntˑwa'iˑshăˑtgiħ, neħˑhuh' he'oˑdiˑyo̱s'o̱h heˑwaˑdi'yaħˑdaˑdeħ' ne' gwĭsˑgwis; da neħ heˑniˑgă̱n'dyòhˑgwaħ' deˑyoˑnă̱ă̱h'daˑdo̱h' deħˑswă̱'no̱nˑdaˑdwĕnˑniˑyòˑdyeħ', oˑnă̱nˑno̱nˑdʋs'nă̱hˑdo̱h he'o̱ˑweh gwʋs' gaˑneˑjòòt'; gaˑnyòˑdăăħ'gĕh haħˑdeˑyòˑdiħ'sgoħˑo̱h'; (deˑwă̱ħ'nyaħˑes'hăsˑhă̱ă̱h', no̱o̱', niˑwă̱n'no̱nˑdi'no̱ħ;) neħˑhuh', naeh, daˑwĕnˑno̱nˑdo̱'isˑsweħ'dă̱ħ ga'nyòˑdăˑgo̱o̱'.
14Neħ neh, haˑdi'no̱nˑdă̱'a̱k ne gwĭsˑgwis waˑă̱ˑno̱nˑdeħ'gòħ', naeh; neħˑhuh' hwa'ă̱ˑno̱nˑtyòˑwiħ' he'tgaˑno̱nˑdaˑyă̱ħ'; kuh, he'yo̱'ă̱nˑjaˑdeħ' ne' neħˑhuh'. Oˑnă̱h' hoˑdi'yă̱ˑgă̱ħ'o̱h hoˑno̱nt'gatˑwahˑso̱o̱ ne' naħˑot', ne gă̱ħ, no̱nˑda'yaˑwă̱h'.
15Neħ neh' hoˑwa̱'yaħˑdo'wă̱ħˑo̱h' ne Jeˑsus, ho̱ˑwa̱ˑgă̱ă̱h', kuh, neh haˑnĭs'heˑoˑno̱ħ' hoˑdyă̱'niˑno̱ħ, neħ, kuh, neh hoˑaˑwaħk ne Leˑgion; hă̱ħˑdyo̱ħ'; hòsˑyo̱ˑnii, kuh; neħ, kuh, ne' detˑgaˑye'iħ naaħ'niˑgo̱ˑă̱ħ'gĕh; da neħ neh hoˑno̱h'dyo̱ħˑo̱h.
16Neħ neh hoˑno̱nt'gatˑwă̱h' waˑo̱ˑwa̱nˑdi'oˑwiħ', heˑna̱'oˑyaħˑdaˑwă̱h', neh hoˑdyă̱'niˑno̱ħ' naˑnĭs'heˑoˑno̱ħ'; neħ, kuh, heˑno̱ħ'oˑdiˑyaħ'daˑwă̱h ne gwĭsˑgwis.
17Oˑnă̱h' hoˑno̱h'saaħ hoˑwa̱nˑdo̱ˑeh'syo̱hˑgwaˑnii no̱'saˑyaˑgă̱ħt' heˑniˑo'no̱ˑă̱nˑjaˑdeħ.
18Neħ noˑnă̱h' hesˑho'deħˑno̱h'daˑho̱h ne' gaˑo̱ˑwa̱ˑgo̱', neħ haˑyaħ'daˑdeħ' neh haˑnĭs'heˑoˑno̱ħ' hoˑdyă̱'niˑno̱ħ', hoˑdo̱'eˑsyo̱h'go̱h ne da'aˑyaˑdi'aak', sho̱'.
19Neħˑhuh, gwa' niˑya'wă̱ħˑo̱h, ne thă̱ħ'ă̱h deˑoˑgaˑyă̱ħ'o̱o̱ħ' ne Jeˑsus; neħ, sho̱, naˑwă̱'a̱hˑseeh, Saˑsah'dă̱nˑdih, ho̱ˑsas'heˑyaħ'doˑwă̱ħt ne' she'no̱o̱kˑsho̱ħ'; neħ, kuh, nă̱sˑhe'oˑwiħ heˑniˑyòˑiˑwaˑnăă'gwahˑdo̱ħs', no̱ħˑo'iˑoħ'dă̱ħ Naˑyaħ'daˑgwĕnˑniˑyòħ' no̱'yaˑdyeˑăħs'; kuh heˑniˑgănˑdă̱ă̱s'yòˑwaˑnă̱h' waˑyă̱nˑdă̱ă̱ħ.
20Neħ no'yaħˑjih hes'haˑweˑno̱o̱, neħˑhuh', sho̱', kuh, oˑnă̱h' hohˑsaaħ oħˑtha'diˑoˑgwat neh Deˑcapˑoˑlis heˑniˑyòˑiˑwaˑnăă'gwahˑdo̱ħs no̱ħˑo'iˑoħ'dă̱ħˑsho̱ħ ne Jeˑsus niˑoˑdyeˑăħ'see; da neħ ne gaˑgweˑgo̱h' no̱ˑgweh' hoˑdii'waˑnăă'gwaħˑo̱h.
21Neħˑhuh, dih, niˑyoˑweħ' noˑnaeħ' ne Jeˑsus gaˑo̱ˑwa̱ˑgo̱o̱ hoˑyeˑăħˑdah'go̱h desˑhoˑyaˑyaħ'go̱h', gòtˑgaħ'deħ no̱ˑgweh' neħˑhuh, hoˑdiˑye'iħˑo̱h' haˑyaħ'daˑdeħ; neħ neˑgaˑnyòˑdăăkˑah', sho̱', niˑeħs.
22Neħ neh, nă̱ niˑya'wă̱ħˑo̱h, dyă̱ˑgwah', sho̱', da'eħ' sha'yaħ'daat he'niˑă̱ˑno̱nˑdii ne thă̱ˑnă̱n'no̱hˑdo̱'o̱ħ, hă̱ˑno̱nt'gă̱nˑnĭs'atˑhaħ', Jaiˑrus haˑya'so̱h; neħ', kuh, noˑnă̱h' wa'oˑgă̱ħ', neħˑhuh' he'oˑyʋsˑhă̱n'daħˑo̱h heˑdeˑah'siħˑda'deˑnyo̱ħ.
23Da neħ' ne weˑsòħ hoˑdo̱ˑeˑsyo̱h'gwaˑnii', haˑwă̱ă̱h', Neħ ne niˑya'gaħˑa'ah khe'aˑwak yeˑyʋs'hă̱ħ, neħˑhuh' oˑnă̱h' heˑgaaˑdeħ' ne yai'eˑyo̱s; Oħˑgo̱ˑyaˑdo̱ˑeˑsyo̱h'gwă̱ħ, dih, ne neħˑhuh' haahˑseeħ, a'sheˑyă̱n'nisˑoh'daˑă̱ħ, o̱'saˑyo̱nˑdo̱ħ', iˑgă̱ă̱, a'yaˑgo̱ˑheek', dih', naeh.
24Oˑnă̱h' ne Jeˑsus shoˑneˑno̱o̱'; da neħ' ne gă̱nˑdyòh'goˑwaˑnă̱h' ho̱ˑwa̱'no̱nˑdă'dyesˑo̱h, do̱'wa̱ˑyaħ'doˑăˑgo̱'o̱nˑdyeħ' ne gwʋs'.
25Neħ, dih, neh' yeˑyaħ'daˑdoˑgă̱ă̱' ne yaˑgo̱o̱ˑgweh', ne wʋsˑhă̱ă̱' dekˑnii' sga'eħ niˑyòs'hăˑgee' no̱ħˑo̱'nisˑheħt, chiˑyet'gwă̱hˑjiˑtgă̱ħs',
26Hoˑno̱nt'gaħˑdeħ', kuh, nă̱'no̱nˑdeˑjă̱ħs' thoˑdi'waħ, weˑsòħ' oˑi'waˑgee' deˑyaˑgoˑdo̱h'ho̱ˑga'nyaħˑo̱h; gaˑgweˑgo̱h', kuh, heˑniˑyo̱o̱' goˑyă̱nˑdʋk, goˑdă̱ħˑdaaħ; tă̱ħˑă̱h', kuh, deħˑthaħˑgwĭsˑdă̱ħ deħˑa'goˑyaħ'daˑgeh'hasˑo̱o̱ħ; saħ'gwah, gwa', sho̱, aˑyă̱ă̱ħ, oħˑgaˑgă̱ˑĭs';
27Neħ noˑnă̱h' ho̱ˑwa̱i'waˑo̱ˑgă̱h' ne Jeˑsus neħˑhuh' sho̱ dyaˑgo'yo̱sˑo̱h heˑdeˑaˑdiˑyaħ'dahˑsi'aaħ, hasˑho̱ˑne'gwa niˑdya'gaˑweˑno̱o̱h' haħˑdeˑyaˑgoˑyă̱'o̱'nyo̱sˑo̱h noˑdyaħ'daˑwiħ'shăħ.
28Neħ, să̱ħ'ă̱h, ne gaˑwă̱ă̱h, Neħ, giħˑshă̱h', sho̱, neħˑhuh' niˑyòˑgweˑnyo̱o̱h', ne neħ', sho̱, haħˑdă̱ˑgyă̱ˑo̱ˑnyo̱o̱h no'syo̱'nyʋsˑhăħ, tgaˑgo̱nt' ne' neħ' ă̱sˑgaˑdo̱ħ.
29Da neħ, naˑgwʋs' oˑnă̱h', sho̱'', kuh, waħˑă̱ˑniˑgwă̱h'jaħk; neħ, kuh, neh, daˑyă̱n'niˑno̱nˑdook' ne ye'yaħ'daˑgo̱o̱, doˑgă̱s' saˑyo̱nˑdo̱ħ' heˑniˑya'goˑyaħ'daˑwă̱s'gwaħ.
30Neħ' ne Jeˑsus, waħ'oˑgo̱nˑdaˑdyeħ' thoˑgaħ'ă̱ˑyo̱s'o̱h naˑyaħ'daˑgo̱o̱, heh, oˑya'gă̱ħˑo̱h, gwah, haˑyaħ'daˑdeħ, ne gaħˑhas'desˑhăˑgwĕnˑniˑyòħ jaˑgo'jă̱ħˑdah'gwaħ, deˑo'dihˑsaˑdeˑnyo̱o̱' heˑno̱ħˑdaˑdi'yaħˑdah'siˑaaħ, haˑwă̱ă̱h, So̱ ne gă̱ħ' hoħˑdye'yă̱ˑo̱ˑnyo̱o̱ħ' naˑgʋs'yo̱ˑnyʋs'hăăħ''?
31Oˑnă̱h naˑgo̱ˑi'o̱ˑnyaˑnih' ho̱ˑwă̱'a̱hˑseeh', Sheˑgă̱h', waeh, naeh, ne gă̱n'dyòhˑgoˑwaˑnă̱h, kuh he'no̱ħˑdeˑyeˑsa'yaħˑdo'ăˑgo̱h; da, a niˑyòħ'dă̱ă̱h heh' saˑdo̱h', So̱' naħˑot' hoħˑdyo̱'gyă̱ˑo̱ˑnyo̱o̱h''?
32Oˑnă̱h' deˑot'gahˑdo̱o̱s'o̱h neħ na'shaˑgoˑgă̱ħ ne' neħˑhuh' no̱ħ'eˑyeeħ nă̱ˑgă̱ă̱'.
33Neħ, dih, neˑyaˑgo̱o̱ˑgweh' gohˑdyo̱ħ'o̱h, goˑyaħ'do̱nˑdaaħˑthaħ', gwaħˑhuh', yeˑi'waˑyă̱nˑdeˑih' heˑniˑya'wă̱ħˑo̱h he yeˑhaħ'daˑdeħ; dyaˑgòh'dă̱nˑdyo̱s'o̱h, neħˑhuh' goˑyaħ'dyeˑnă̱ħ'o̱h he'aˑgat, oˑi'waˑgweˑgo̱h' ne gai'waˑgwĕnˑniˑyòħ' ho̱ˑwa̱'oˑwii.
34Oˑnă̱h' shaˑgaˑwă̱'a̱hˑseeh, Go̱'a̱ˑwa̱k', neħ ne sai'waˑgwĕnˑniˑyòs'do̱sˑhăħ' seˑsaˑjă̱ħt; sgă̱ˑno̱ħ' să̱ˑno̱h'do̱ˑnyo'neh, sah'dă̱nˑdih; neħ, kuh, ne jiˑsa'do̱ħˑo̱'o̱k heˑniˑsa'yaħˑdaˑwă̱s.
35Neħ, dih, he'no̱ħˑweeħ ahˑso̱h' hoˑthaaħ haˑdi'yaħˑdaˑdoˑgă̱ă̱' ne neħˑhuh' daˑă̱'no̱hˑdă̱nˑdiħ heˑthoˑno̱h'sòt ne thă̱ˑno̱h'do̱ˑo̱ħ' hă̱ˑno̱nt'gă̱ˑnĭs'atˑhaħ', hoˑnă̱ă̱', Oˑnă̱h' gaˑwe'eˑyo̱o̱h' ne' sheˑaˑwak; a, naeh, heˑgoˑwaah' ahˑso̱h deeh'seħˑno̱'wehˑhăˑniˑaˑdyeħ' Naˑdi'o̱ˑnyaˑnih'?
36Neħ, dih', heˑniˑyòs'noˑweħ, noˑnă̱h' waˑa̱'o̱k ne Jeˑsus heˑno̱'diˑwă̱'noħˑdă̱ħ'heħt ne waˑa'disˑnyeħt, haˑwă̱'a̱hˑseeh ne thă̱nˑno̱h'do̱ˑo̱ħ' hă̱ˑno̱nt'gă̱nˑnĭs'atˑhaħ, Să̱ˑno̱h' ă̱ˑsah'dyo̱ħk; neħ', sho̱, ne' jiˑwaˑgwĕnˑniˑyòs'.
37Da neħ ne thă̱ħˑă̱h deˑoˑgaˑyă̱ħ'o̱o̱ħ neh' so̱ˑgaaħ no̱'gweh aˑo̱ˑwa̱a̱'no̱nˑdă̱ħ; neħ, sho̱, ne Peˑter, kuh, ne James, kuh, ne John, ne deˑya'dă̱ˑno̱nˑdeeħ ne James.
38Oˑnă̱h' neħˑhuh' hoˑyo̱s'o̱h hoˑno̱h'sòòt ne thă̱nˑno̱h'do̱ˑo̱ħ', hă̱ˑno̱nt'gă̱nˑnĭs'atˑhaħ'; hotˑgat'waħˑo̱h' heh no̱ħˑdeˑyòˑdyòh'gwaˑe'syo̱h; neħ, kuh, nă̱ˑna̱s'dă̱ˑo̱ˑnyo̱h' hă̱ˑno̱nˑdă̱ˑno̱ħs' heˑniˑyòˑgweˑnyo̱o̱.
39Neħˑhuh', dih', niˑyòˑweħ', noˑnă̱ħ' thoˑyo̱o̱, haˑgo̱ˑyă̱ˑa̱h'seeh, A, naeh', heˑgoˑwaa', nă̱ˑgă̱' niˑswaˑdyeˑă̱h'; swʋs'dă̱ˑo̱ˑnyo̱h', kuh? thă̱ħˑă̱h ne gă̱ħ', naeh, deħˑaˑgaˑwe'eˑyo̱o̱ ne yekˑsaħ'daˑseeħˑah; neħ', sho̱, ne goˑdaħ'o̱h.
40Da neħ no̱ˑwʋs'gatˑgwă̱ħ'o̱h, ho̱ˑwa̱nˑdă̱nˑdo'nyaħˑdo̱h'. Neħˑhuh, dih, niˑyòˑweħ', noˑnă̱h' gaˑgweˑgo̱h' ho̱ˑsaˑaˑgo̱'yaħˑdiˑtgă̱h', neħ heˑa'go̱ˑa̱a̱h ne' shaˑgo'no̱nˑdeeħˑdo̱h' ne yekˑsaħ'goˑwaah, kuh ne' shaħˑgaat hă̱ˑneħ', neħˑhuh' heˑoˑdiˑyo̱s'o̱h he'o̱ˑweh niˑdye'yʋsˑhă̱ħ ne yekˑsaħ'goˑwaah.
41Neħ noħˑsha'gosˑoh'daˑyeˑna̱a̱ħ' ne yekˑsaħ'goˑwaah, neħ', kuh, ne shaˑgaˑwă̱'a̱hˑseeh, Taˑliˑtha cuˑmi; neħ gă̱nˑdo̱h ne deˑga'wă̱nˑno̱nˑdeˑnyo̱o̱', Sekˑsaħ'goˑwaah, Neħ noħˑgo̱'yă̱ˑa̱s, sat'gă̱h'.
42Neħ naˑgwʋs' oˑnă̱h', sho'', kuh, do̱nˑda'yo̱ntˑgă̱h ne yekˑsaħ'goˑwaah, waħˑo̱h'dă̱nˑdiħ', kuh; neħ, să̱ħ'ă̱h, neˑwʋsˑhă̱ă̱' dekˑnii' sga'eħ niˑyaˑga'osˑhiˑyaħ'go̱h. Da neħ' naˑgwʋs' deħˑsho''diħˑniˑgo̱nt', sho̱, heˑnaˑoˑdii'waˑnă''gòħ.
43Da neħ naˑgo̱ħ'niˑgo̱'o̱ˑnii haˑgo̱ˑya'isˑdaˑnii na'gă̱ˑa̱a̱k so̱ˑgaaħ' no̱'gweh de'oˑiˑwaˑyă̱nˑdeeħ'o̱o̱ħ; waˑa'iˑwĭsˑaaħ, kuh, naaħˑgwis'dă̱ħ o̱'daˑyo̱nˑdaˑdo̱ħ' a'yo̱nˑdek'ho̱ˑniħ.
বর্তমানে নির্বাচিত:
Mark 5: SEE
হাইলাইট
শেয়ার
কপি
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.
